‘Maing Koht, Komw Ketin Kadarodo Sapwellimomwi Marain’
“Komw ketin kadarodo sapwellimomwi marain oh mehlel pwe en kahluwa ie.”—MELKAHKA 43:3.
1. Iaduwen Siohwa kin kasalehda sapwellime kupwur kan?
SIOHWA kin kadek ni ahl me e ketin kasalehong sapwellime ladu kan kupwure kan. E sohte kin wiahkinteieu kasalehda padahk mehlel kan, ahpw e kin ekis ekis kamarainih kitail. Atail sapahl nan elen mour pahn kak rasehng emen me kin sapahlahng wasa doh. E kin tepida ni sohrahn oh e sohte pahn kak kilang mwahu pwe e ekis rotorot. Ni ahnsou me ketipin dakada, e kak ekis tepida kilang mehkan me kapilpene ih. Ahpw, wasa doh kan saikinte nohn sansal. Ahpw, ni ahnsou ketipin kin kohda, e kak tepida kilang wasa doh kan. E pil duwehte marain ni pali ngehn me Koht kin ketikihda. E mweidong kitail en wehwehki ekei padahk kan ni ahnsowohte. Sapwellimen Koht Ohl, Sises Krais, ketikihda marain en pali ngehn ni ahlohte. Kitail en kilang iaduwen Siohwa kin kamarainih sapwellime aramas akan en mahs, oh iaduwen e kin wia met nan rahnpwukat.
2. Iaduwen Siohwa kin ketikihda marain mwohn ahnsoun Kristian akan?
2 Likamwete nein Kora me wia koul kan en Melkahka 43. Nin duwen mehn Lipai kan, re ale pwais kaselel en padahkiong aramas akan sapwellimen Koht Kosonned. (Malakai 2:7) Ni mehlel, Siohwa kin wia arail Sounpadahk Lapalap, oh re kin sohpeiong Ih nin duwen Utupen erpit koaros. (Aiseia 30:20) Sounmelkahka kapakapki met “Maing Koht, . . . komw ketin kadarodo sapwellimomwi marain oh mehlel.” (Melkahka 43:1, 3) Ma mehn Israel akan kin lelepek ong Ih, Siohwa kin padahkiong irail duwen sapwellime ahl akan. Mwurin sounpar epwiki kei, Siohwa kin kupwurki irail ni e ketikihong irail marain oh mehlel ni ahl me keieu kaselel. Koht wia met ni ahnsou e kadarodo sapwellime Ohl nin sampah.
3. Ni ahl dahieu padahk kan en Sises kin song mehn Suhs akan?
3 Sises Krais, sapwellimen Koht Ohl, ni ahnsou me e wiahla aramas kin wia “marain en sampah.” (Sohn 8:12) E padahkiong aramas akan “soahng tohto ni karasaras”—padahk kapw kan. (Mark 4:2) E padahkiong Pontius Pailet: “Ei wehi, kaidehn kisehn sampah wet.” (Sohn 18:36) Padahk wet wia mehkot kapw ong mehn Rom akan oh pil ong irail mehn Suhs akan me kin uhki wehin aramas, pwe irail lemeleme me Mesaia pahn kasorehla Wehin Rom oh kapwurpwurodo Wehin Israel en pwurehng kaunda. Sises me kin kihda marain me kin kohsang rehn Siohwa, ahpw sapwellime mahsen kan sohte kin kaperenda kaun akan en mehn Suhs, pwe irail kin “kesempwalki ale kaping sang rehn aramas laudsang ale kaping sang rehn Koht.” (Sohn 12:42, 43) Aramas tohto kin pilada en tengla nan arail tiahk en aramas akan sang ale marain oh mehlel ni pali ngehn sang rehn Koht.—Melkahka 43:3; Madiu 13:15.
4. Iaduwen kitail ese me sapwellimen Sises tohnpadahk kan pahn kekeirada ni ahr kin wehwehkihla padahk mehlel?
4 Ahpw ekei ohl oh lih mehlel akan ni peren kamehlele padahk mehlel me Sises padahngki. Re kekeirada ni ahr kin sukuhliki oh wehwehkihla kupwuren Koht akan. Ni ahnsou me mour en ahr Sounpadahk kereniong imwisekala, irail anahne sukuhliki soahng tohto. Sises mahsanih ong irail: “Pil mie me tohto me I men ndaiong kumwail, ahpw met me inenen apwal ong kumwail en wehwehki.” (Sohn 16:12) Ei, tohnpadahk kan pahn kekeirada ni ahr wehwehkihla sapwellimen Koht padahk mehlel.
Maraino me kin Dakedaker
5. Mehnia peidek kohda nan keieun senturi, oh ihs me iang pwukoahki en kapwungala irair wet?
5 Mwurin Sises pwoula oh iasada, marain sang rehn Koht dakedaker laudsang mahs. Nan kasansal ehu me Piter kilangada, Siohwa kasansalehda me irail mehn liki kan me sohte sirkumsaisla pahn kak wiahla tohnpadahk kan en Krais. (Wiewia 10:9-17) Met kasansal kapwuriamwei! Ahpw, peidek ehu kin pwarada: Siohwa kin kupwurki mehn liki kan en sirkumsais mwurin re wiahla Kristian akan? Pasepeng ong peidek wet sohte wiawi nan kasansal wet, oh Kristian akan kin akamaikipene ire wet. Re anahne kapwungala met mwohn irail sohlahr pahn kak miniminpene. Ihme kahrehda nan Serusalem, “wahnpoaron ako oh me mah ko ahpw pokonpene pwe re en wie kupwurki ire wet.”—Wiewia 15:1, 2, 6.
6. Mehnia kahk kan me wahnpoaron kan oh me mah kan idawehn ni ahnsou re koasoiapene duwen peidek en sirkumsais?
6 Iaduwen irail akan me iang mihdingo kak esehla duwen kupwuren Koht ong irail mehn liki pwoson akan? Siohwa sohte kadarodo tohnleng men en kaunda arail mihding kan, de e sohte kihong irail kasansal ehu. Ahpw, mie mehn kaweid me kin kohwong wahnpoaron ako oh me mah ko. Re kin koasoiapene duwen mehn kadehde kan me kohsang rehn ekei mehn Suhs Kristian akan me kilangada iaduwen Koht tepida sapwellime wiewia ong aramas akan en wehi kan, oh wudekihdi sapwellime ngehn sarawi pohn irail mehn liki kan me sohte sirkumsaisla. Re pil kin tehk mwahu iren Paipel kan pwehn ale kaweid. Sang ahr kin wia met, tohnpadahk Seims kihda sawas me poahsoanda pohn iren Paipel ehu. Ni en irail koaros doudouloale duwen mehn kadehde wet, kupwuren Koht sansalda. Irail kan nan wehi pwukat sohte anahne sirkumsais ma re men kenikenla rehn Siohwa. Wahnpoaron akan oh me mah kan mwadangete ntingihdi arail pilipil duwen ire wet pwe iengarail Kristian akan pahn kak ale kaweid wet.—Wiewia 15:12-29; 16:4.
7. Ni ahl daieu irail Kristian akan nan keieun senturi kin kekeirada?
7 Weksang kaun en pelien lamalam en mehn Suhs akan, me tengla nan ahr tiahk en samwarail kan, pali laud en mehn Suhs Kristian akan kin perenki rong duwen kawehwe kapw en kupwuren Koht me pid duwen aramas en wehi kan, mendahki ahr kin pwungki kawehwe kapw wet kin wehwehki me re anahne kawikihla ahr madamadau ong mehn liki kan. Siohwa kapaiahda irail pwehki ahr lamalam en aktikitik, oh “mwomwohdiso kan pil kehlaillahr nan pwoson oh towe kan wie tohtohla rahn koaros.”—Wiewia 15:31; 16:5.
8. (a) Ia duwen kitail ese me marain pahn kehlailla mwurin kaimwiseklahn senturi keieu? (b) Peidek kesempwal dah kei kitail pahn koasoaiapene ni ahnsouwet?
8 Marain en ngehn wia dakadak erein keieun senturi. Ahpw, Siohwa sohte kasansalehda sapwellime kupwur kan koaros ong tepin Kristian akan. Wahnpoaron Pohl padahkiong ienge pwoson akan nan keieun senturi: “Pwe me kitail kin kilikilang met, rasehng me kitail kin ireirong nan kilahs edied ehu.” (1 Korint 13:12) Soangen kilahs wet kin edied. Nin tepio, en wehwehkihla marain ni pali ngehn kin tikitik. Mwurinte mehlahn wahnpoaron ko, marain sohte nohn kehlail, ahpw nan rahnpwukat, wehwehkihla iren Paipel kin lalaudla. (Daniel 12:4) Iaduwen Siohwa kin kamarainih sapwellime aramas akan nan rahnpwukat? Oh iaduwen kitail pahn mwekidki ni ahnsou me e kin kamarainihkin kitail wehwehn iren Paipel kan?
Maraino kin Ekis Ekis Kehlailla
9. Ia wiepen onop en Paipel me kin pweida mwahu me irail Tohnsukuhl en Paipel kan kin doadoahngki?
9 Nan atail ahnsou, marain kin tepida dakedakehr ni kaimwiseklahn senturi 19 ni ahnsou me pwihn en Kristian ohl oh lih akan tepida onop iren Paipel kan. Re wiahda koasoandi ehu ong onop Paipel. Emen pahn kihda peidek ehu; mwuhr, pwihno pahn tehk mwahu iren Paipel kan koaros me kin pid duwen peideko. Ni ahnsou me iren Paipel kan kin likamwete uhpene, Kristian mehlel pwukat kin nantihong wehwehkihla iren Paipel riau pwukat pwehn kilang me ira koaros kin ehupene. Weksang kaun en pelien lamalam akan, irail Tohnsukuhl en Paipel akan (eden Sounkadehdehn Siohwa kan ni ahnsowo) kin nantihong mweidong Pwuhk Sarawi, kaidehn tiahk kan de padahk kan en aramas, en kahre irail. Mwurin irail kin tehk mwahu ire kesempwal kan nan Paipel, re ntingihdi arail pasepeng kan. Ni ahl wet, irail kin wehwehkihla padahk en Paipel kesempwal kan.
10. Charles Taze Russell ntingihdi mehnia sawaspen Paipel kan?
10 Aramas emen me dehde mwahu nanpwungen Tohnsukuhl en Paipel akan iei Charles Taze Russell. E ntingihdi sawaspen Paipel weneu me oaralap koasoia Studies in the Scriptures. Brother Russell pilahni en ntingihdi kaisuh en pwuhk, me pahn kawehwehda Paipel pwuhken Esekiel oh Kaudiahl. E nda met: “Ni ahnsou me I pahn diarada kih, iei ih ahnsou I pahn ntingihdi Pwuhk Kaisuh.” Ahpw, e kapataiong met: “Ma Kauno pahn ketikihong emen tohrohr kiho, e kak ntingihdi pwuhko.”
11. Ni ahl dahieu me ahnsou oh atail kin wehwehkihla kupwuren Koht kin dokpene?
11 Dahme C. T. Russell koasoia wasaht, kin kasansalehda me kitail pahn kak wehwehkihla ekei iren Paipel kan ni ahnsou me konehng. Brother Russell ese me e sohte kak kamwadangala marain en pwuhken Kaudiahl duwehte emen me pahn sapahl reirei sohte kak kamwadangala ketipino en dakada mwohn ahnsou me e kin kilelehdi en dakada.
Sansalda—Ahpw ni Pein Sapwellimen Koht Ahnsou
12. (a) Iahd me ahnsou keieu mwahu en wehwehkihla duwen kokohp kan en Paipel? (b) Mehn kahlemeng dahieu kin kasalehda me atail pahn kak wehwehki kokohp kan en Paipel kin poahsoankihda sapwellimen Koht ahnsou? (Kilang footnote.)
12 Ihte mwurin pwoulahn oh iasadahn Sises me irail wahnpoaron kan wehwehkihla kokohp tohto duwen Mesaia, oh met duwehte Kristian akan nan rahnpwukat, irail kin wehwehki kokohp kan en Paipel ni oaritik ihte mwurin kokohp kan pweidaher. (Luk 24:15, 27; Wiewia 1:15-21; 4:26, 27) Pwuhken Kaudiahl kin wia pwuhken kokohp ehu, eri kitail pahn kak wehwehki ni sansal ni ahnsou e pweidaher. Karasepe ehu, C. T. Russell sohte kak wehwehki ni pwung duwen mahn lawalo weitahta me ntingihdi nan pwuhken Kaudiahl 17:9-11, pwe pwihn kan me mahn lawalo kin karasaiong (pwihn kan en League of Nations oh United Nations) sohte mie lao lel mwurin ah mehla.a
13. Ekei ahnsou, dahme kin wiawi ni ahnsou irail kin marainkihla ekei oaralap kan en Paipel?
13 Ni ahnsou me tepin Kristian akan sukuhlikier me irail mehn liki kan me sohte sirkumsaisla pahn kak wiahla iengerail pwoson akan, wekideklahn padahk wet kahrehong peidek kapw ehu en kohda me pid duwen ma aramas en wehi kan pahn pil anahne sirkumsais. Met kahrehong wahnpoaron kan oh me mah kan en pwurehng kasawihada irairen sirkumsais. Met pil kin wiawi nan atail ahnsou. Marainkihla oaralap ehu en Paipel kin ekei pak kahrehong sapwellimen Koht ladu me keidi kan, “ladu lelepek oh loalokong” en pwurehng kasawihada mwahu oaralap teikan, nin duwen ekei karasepe kan me ahpwtehn wiawi kin kasalehda.—Madiu 24:45.
14-16. Iaduwen kawikihlahn padahk ehu me pid duwen Tehnpas Sarawi en pali ngehn kin kamwekidada atail kin wehwehki irelaud 40 lel 48 en pwuhken Esekiel?
14 Nan pahr 1971, pwuhk me oaralap koasoia “The Nations Shall Know That I Am Jehovah”—How? kin kasalehda duwen ia wehwehn kokohp en Esekiel. Ehu irelaud nan pwuhk wet me kawehwe ni mwotomwot kasansal en Esekiel duwen Tehnpas Sarawi ehu. (Esekiel irelaud 40 lel 48) Ni ahnsowo, pwuhk wet kin kasalehda iaduwen kasansal en Esekiel duwen Tehnpas Sarawio pahn pweida nan sampah kapw.—2 Peter 3:13.
15 Ahpw, artikel riau me mihmi nan The Watchtower en December 1, 1972, kin kamwekid atail madamadau en wehwehkihla kasansal en Esekiel. Artikel riau pwukat kin koasoia duwen Tehnpas Sarawi Lapalap en pali ngehn me wahnpoaron Pohl kawehwehda nan Ipru irelaud 10. The Watchtower kawehwehda me Wasa Sarawio oh Kehl en Masloaleo nan Tehnpas Sarawi en pali ngehn kin rasehng irairen irail me keidi kan ni ahnsou me re kin mih nin sampah. Sounpar kan mwuri, re kousapahlih Esekiel irelaud 40 lel 48, oh re wehwehkihla me Tehnpas Sarawi en pali ngehn kin doadoahk rahnwet, eri, Tehnpas Sarawi me Esekiel kilangada nan kasansalo pil kin doadoahk rahnwet. Iaduwen met kin wiawi?
16 Nan kasansal en Esekiel, samworo kan kin aluseli nan Kehlen Likin Tehnpas Sarawio nin duwen re kin papah keinek kan me kaidehn pwihn en samworo kan. Samworo pwukat ni sansal kin karasaiong “pwihn samworo en Nanmwarkio,” me kin wehwehki sapwellimen Siohwa ladu me keidi kan. (1 Piter 2:9) Ahpw, re sohte pahn papah nan Kehlen Likin Tehnpas Sarawio nin sampah erein Kaunda Pahr Kid en Krais. (Kaudiahl 20:4) Erein pali laud en ahnsowo, ma kaidehn ahnsowo pwon, irail me keidi kan pahn papah Koht nan Tehnpas Sarawi en pali ngehn, Wasa Sarawiheo, “nanleng.” (Ipru 9:24) Pwehki irail samworo kan kin alialuseli nan kehlen likin Tehnpas Sarawio me Esekiel kilangada, e sansal me kasansal wet pweida nan atail ahnsou, pwe ekei irail me keidi kan kin momourte nin sampah. Nin duwen met nan makisihn en Kahn Iroir, March 1, 1999, kawikihla padahk wet. Ihme kahrehda, marain ni pali ngehn kin dakdakedahr pohn kokohp en Esekiel lel ni imwin senturi karieisek.
En Perenki Kawikihla Omw Madamadau kan
17. Kawikilahn madamadau dah kei ke wiahda ni ahnsou ke sukuhliki duwen padahk mehlel, oh iaduwen ke paiekihda?
17 Mehmen me men sukuhliki padahk mehlel pahn anahne “salihedi soangen lamalam koaros pwe en peikiong Krais.” (2 Korint 10:5) E sohte mengei en wia met, keieu ni ahnsou me en emen madamadau kan kin tengala nan padahk ehu me e kamehleleier. Karasepe ehu, mwohn ke esehla padahk mehlel en Koht, mwein ke kin kalapw iang omw peneinei kasarawi rahn sarawi kesempwal kei. Mwurin ke tepida onop Paipel, ke tepida pohnese me kasarawi en wiewia pwukat kin tepsang rehn irail me kin kaudokiong koht likamw akan. Nin tepio, mwein ke ekis pweiek en kapwaiada dahme ke sukuhliki. Ahpw, ahmw limpoak ong Koht powehdi omw limpoak ong pelien lamalam, oh mwuhr ke sohlahr iang kasarawi holiday kan me kin kansensuwedih Koht. Siohwa soh kapaiukada pwehki omw wia pilipil mwahu?—Pil kilang Ipru 11:25.
18. Iaduwen kitail pahn mwekidki ni ahnsou atail kin wehwehkihla padahk mehlel en Paipel kan pahn sansalda?
18 Ahnsou koaros kitail kin paiekihda atail wiewia kupwuren Koht. (Aiseia 48:17, 18) Ni ahnsou me kitail kin wehwehkihla duwen padahk mehlel me sansalda, kitail en perenkihda padahk mehlel me kin kekeirada! Ni mehlel, pwehki kitail kin kaukaule ekis ekis ale marain, met kin kasalehda me kitail kin kekeid nan ahl pwung. E kin rasehng “ahl me aramas pwung kan kin weid loale rasehng dakadahn ketipin me kin maramarainla lao rahn pwarada.” (Lepin Padahk 4:18) Ni mehlel, ni ahnsou wet kitail kin kilang ekei irair kan en kupwuren Koht “ahpw sohte nohn sansal.” Ahpw ni ahnsou me sapwellimen Koht ahnsou pahn leledo, kitail pahn kilang padahk mehlel ni unsek, ma kitail pahn tengla “kekeid nan ahl pwung.” Ahpw ni ahnsou wet, kitail kak perenkihda padahk mehlel me Siohwa ketikihong kitail ni wehwe mwahu, oh awiawih kawehwehpen padahk kan me saikinte nohn wehwe mwahu.
19. Ia ehu ahl kitail kak wia pwen kasalehda me kitail kin poakohng padahk mehlel?
19 Ni ahl me pahn katep laud ong kitail, iaduwen kitail kak kasalehda atail limpoak ong maraino? Ehu ahl iei en kaukaule wadwadek Mahsen en Koht—rahn koaros ma kak. Ke kin idawehn koasoandi en kaukaule wadek Paipel? Makisihn kan, Watchtower oh Awake! pil kin kihong kitail reken mwengehn ngehn. Wadek pwuhk kan, brochure kan, oh sawaspen Paipel teikan me wiawihda pwe kitail en kak paiekihda. Iaduwen ripoht kan en doadoahk en kalohki Wehio me kin ntingihdi nan Yearbook of Jehovah’s Witnesses (pwuhken pahr)?
20. Iaduwen atail kak kadokepene marain oh padahk mehlel me kohsang rehn Siohwa ong atail kaukaule iang towehda mihding en Kristian akan?
20 Ei, Siohwa ni ahl kaselel sapeng kapakap me ntingihdi nan Melkahka 43:3. Ni imwin iretikitiko, kitail wadek: “Komw ketin kadarodo sapwellimomwi marain oh mehlel pwe en kahluwa ie oh pwurehng kahrehiewohng ni sapwellimomwi dohl sarawi, oh nan Tehnpasomwi, wasa komw kin ketiket ie.” Ke kin iang mehteikan en kasikasik en kaudokiong Siohwa? Nan rahn pwukat, kaweid en pali ngehn akan me kohda nan atail mihding kan kin wia ahl kesempwal me Siohwa kin kamarainih kitail. Dahme kitail kak wia pwehn kaloalehla atail kalahnganki mihding en Kristian akan? Se luhke iuk en kapakap oh tehk mwahu artikel en mwuri.
[Nting tikitik me mi pah]
a Mwurin C. T. Russell mehla, ehu pwuhk, kaisuh en pwuhk en Studies in the Scriptures me wiawihda pwehn kawehwehda pwuhken Esekiel oh Kaudiahl. Ekei wasa nan pwuhk wet me poahsoanda pohn dahme Russell koasoiada sang pwuhk riau en Paipel. Ahpw, ahnsou en kasansalehda duwen wehwehn kokohp pwukat saikinte konehng en wiawi, oh kawehwe kan me kohda nan pwuhk wet en Studies in the Scriptures sohte nohn sansal. Ahpw ni sounpar kan mwuri, sapwellimen Siohwa kadek sapan oh wiewia kan nin sampah wet kin mweidong Kristian akan en dehdehkihla ni pwung duwen wehwehn pwuhk en kokohp pwukat.
Ke Kak Sapeng?
• Dahme kahrehda Siohwa kin ekis ekis kasansalehda sapwellime kupwur kan?
• Iaduwen irail wahnpoaron kan oh me mah kan nan Serusalem kapwungala kahpwal ehu me pwarada me pid sirkumsais?
• Koasoandi en onop Paipel dahieu me irail Tohnsukuhl en Paipel kan kin wia, oh dahme kahrehda e tohrohr?
• Kihda karasepe ehu ong iaduwen marain ni pali ngehn pahn ekis ekis kehlailla ni sapwellimen Koht ahnsou.
[Kilel nan Pali 10]
Charles Taze Russell ese me marain pahn dakerada mahsen en pwuhk en Kaudiahl ahnsou me Koht ketin kileleiong