Mehn Kahlemeng Mwahu Kan Ke Kin Ale Kamwahu Sang Mehpwukat?

“KUMWAIL wialahr mehn kahlemeng mwahu ong tohnmwomwohdiso koaros nan wehin Masedonia oh Akaia.” Wahnpoaron Pohl ntingihwohng Kristian lelepek kan me koukousoan nan Deselonika mahsan pwukat. Mehn kahlemeng me re wiahda ong iengerail me pwoson kan kin uhdahn warohng kapingpe. Mendahkihte met, mehn Deselonika kan pein irail kin mwekidiki mehn kahlemeng me Pohl oh ienge ko wiahda. Pohl mahsanih: “Pwe se kalohkiwohngkumwailehr Rongamwahwo, kaidehn ni lokaiahte, ahpw ni manaman oh ni ngehn sarawi, oh pil ni ar kamehlele unsek en me mehleleo. Kumwail ese duwen at mour ni at mihmi rehmwail, pwe e wia kamwahupamwail. Kumwail kahlimengih kiht.”​—1 Deselonika 1:5-7, New World Translation.

Ehi, Pohl kin wia laud sang ihte kapahrek. Ah pein elen mour kin wia mwomwen mehn kapahrek ehu​—mehn kahlemeng en pwoson, dadaur, oh tounmetei. Pwehki met, Pohl oh ienge kan kin kamwekidada laud mour en mehn Deselonika kan, kamwekid irail en pwosonla padahk mehlel “pahn kalokolok laud.” Ahpw, kaidehn Pohl te oh ienge kan me kin kamwekidada irail me pwoson ko. Mehn kahlimeng en mehteikan me dadaurete pahn kalokolok kin pil wia mehn kangoang. Pohl ntingihwohng mehn Deselonika kan: “Riei ko, soahng kan me wiawihong kumwail pil wiawihongehr sapwellimen Koht mwomwohdiso kan nan Sudia, oh pil ong sapwellimen Krais Sises aramas akan wasao; soangen lokolokohte me kumwail aleier sang rehn tohn amwail wehi ihme re pil ale sang rehn mehn Suhs akan.”​—1 Deselonika 2:14.

Krais Sises​—Tepin Mehn Kahlemeng Mwahu

Mendahki pein Pohl wiadahr mehn kahlemeng mwahu me warohng kitail en alasang, e kin idialahng Sises Krais me iei mehn kahlemeng me keieu mwahu kitail en alasang. (1 Deselonika 1:⁠6) Krais pahn kin ahnsou koaros wia tepin atail Mehn Kahlemeng. Wahnpoaron Piter ntingihdi: “Pwe ong ni met me Koht ketin malipehkinkumwaildo; pwe duwen pein Krais eh lokolongkin kumwail oh ketikihong kumwail karasepe mwahu, ih pil duwe amwail pahn idawehn oh kahlimengih.”​—1 Piter 2:21.

Ahpw, Sises kanekehlahr ah mour nin duwen aramas men kereniong sounpar 2,000 samwalahro. Ahnsou wet e “kin ketiket nan marain me nohn lingan me sohte emen kak karanih” nin duwen ngehn men me sohte kak mehla. Nin duwen ngehn ehu, “sohte emen me kilangehr, oh sohte emen me kak kilang” ih. (1 Timoty 6:16) Eri, iaduwen kitail en alasang ih? Ehu ahl iei en sukuhliki Pwuhken Rongamwahu ko duwen mouren Sises. Pwuhken Rongamwahu ko kin kihda marain en wehwehkihla ah irair kan, ah elen mour, oh “lamalam.” (Pilipai 2:5-8) Kitail pil kak wehwehkihla laud duwen ih sang ni atail pahn onopki ni keneinei pwuhken The Greatest Man Who Ever Lived, me kin koasoia wiewia kan nan mour en Sises ni oaretik oh kaikairekdo.a

En Sises mehn kahlemeng mwahu en tounmetei kin kamwekidada laud wahnpoaron Pohl. E padahkihong Kristian en Korint kan: “Ngehi I pahn netikihla mehkoaros me I ahneki, pil pein ngehi, pwe I en sewesehkin kumwail.” (2 Korint 12:15) Ia uwen met kin wia lamalam en Krais! Ni atail kin doudouloalle mehn kahlemeng unsek en Krais, kitail pil pahn mwekidiki en alasang ih nan pein elen atail mour.

Karasepe ehu, Sises padahkihong kitail me kitail anahne en likih sapwellimen Koht inou me e pahn ketin apwalihala atail anahn en wahr. Ahpw Sises kin ketin wia laud sang met. E kin kasalehda soahngen pwoson wet oh koapworopworki Siohwa ehuehu rahn. E mahsanih: “Kidien wel kan mie deurail, oh menpihr en pahnlahng kan mie pasarail, a Nein-Aramas sohte wasa e kak kaulewei ie tapwi.” (Madiu 6:25; 8:20) Mehkan en war de dipwisou kin kaunda omw madamadau oh wiewia kan? De omw mour kin kihda mehn kadehde me ke kin raparapahki mahs Wehio? Oh iaduwen omw lamalam ong doadoahk en Siohwa? E kin duwehte lamalam en atail Sounkahlemengo, Sises? Paipel kasalehda me Sises sohte kin ihte padahk ni ngoang ahpw kin kasalehda ngoang ahnsou tohto. (Sohn 2:14-17) Pil ehu, ia uwen Sises kin wiahda mehn kahlimeng en limpoak! E meirongkihla pein ah mour pwehki sapwellime tohnpadahk kan! (Sohn 15:13) Ke kin alasang Sises ni omw kin kasalehda limpoak ong riomw Kristian kan? De komw kin mweidohng soh unsek en ekei en ireuhkidisang kasalehong irail limpoak?

Ni atail nannanti en idawehnla mehn kahlemeng en Krais, kitail pahn kalap pwupwudi. Ahpw, ni mehlel Siohwa kin ketin kupwurperenkihda atail nannanti en “ale tehtehn pei en atail Kaun Sises Krais.”​—Rom 13:14.

“Mehn Kahlemeng Mwahu ong Pelin Sihpw”

Mie aramas kan nan mwomwohdiso nan rahnwet me kak wia mehn kahlemeng mwahu ong kitail? Ehi, uhdahn! Brother kan me idihddahng pwukoa kan anahne keieu wiahda mehn kahlemeng mwahu kan. Pohl padahkihong Taitus, me kin papah mwomwohdiso kan nan Krihd oh me kin idiada sounapwali kan, me emenemen elder idihdda anahne en wia “ohl emen me sohte karaunpe.” (Taitus 1:5, 6) Ni ahlohte wahnpoaron Piter pil kaweidki “ohl mah kan” en wiahla “mehn kahlemeng ong pelin sihpwo.” (1 Piter 5:1-3) Oh iaduwen irail kan me kin papah nin duwen ministerial servant kan? Ren pil duwehte ni ahr pahn “papah ni ahl me mwahu.”​—1 Timoty 3:13.

Ni mehlel, kitail sohte kak kasik me elder koaros de ministerial servant koaros pahn uhdahn koahiek nan irair koaros en doadoahk en kalohk en Kristian. Pohl padahkihong Kristian kan nan Rom: “Eri, kitail en kapwaiada pwaisatail me wekpeseng ni soangen doadoahk kan me konehng kalahngano me Koht ketikihong kitail.” (Rom 12:6) Brother kan wekpeseng eri arail koahiek kan pil wekpeseng. E sohte pahn pwung en kasik me elder kan pahn wia soahng koaros de nda soahng koaros ni ahl ehu me unsek. “Kitail koaros kin kalap sapwungala,” Paipel mahsanih nan Seims 3:2. “Me sohte kin sapwungala ni eh lokaia, iei ih me unsek, oh ih me kin kak kaunda paliwere unsek.” Ahpw mendahki re sohte unsek, elder kan kak, duwehte Timoty, “wia mehn kahlemeng mwahu ong irail kan me pwoson, ni omw koasoi, ni omw tiahk, ni omw limpoak, ni omw pwoson oh mwakelekel.” (1 Timoty 4:12) Ni ahnsou me elder kan wia met, irail ko nan pelin sihpwo pahn men kapwaiada kaweid en Ipru 13:7: “Kumwail tamanda amwail sounpadahk en mahs ako, me kawehwehiong kumwail mahsen en Koht. Medemedewe duwen ar mour, duwen ar mehla, oh kahlemengih ar pwoson.”

Ekei Mehn Kahlemeng Mwahu kan nan Rahnpwukat

Pohnangin sounpar eisek samwa samwalahro, mie me tohto teikan me kin kasalehda arail wia mehn kahlemeng mwahu. Iaduwen misineri kid kan me kin pein tounmeteikihla pein irail me kin “pwilikihdi ihmw kan de riarail ohl akan de riarail lih kan de pahpa de nohno de seri kan de sahpw akan” pwehn kapwaiada arail pwukoahn Kristian nan sahpw doh kan? (Madiu 19:29) En pil tehk duwen soundoulik kan oh arail pwoud kan, ohl oh lih akan me kin toukihda pein irail en doadoahk nan ohpis kan en Watch Tower Society, oh pioneer kan me kin papah mwomwohdiso kan. Soangen mehn kahlemeng mwahu pwukat kin kamwekid meteikan? Emen Kristian sounkalohk nan Asia tamanda emen misineri me iang towehda kasukuhl kawaluh en Watchtower Bible School en Kilead. E koasoia me brother lelepek menet pil “kak mendahkihla mwutumwut en amwuse oh karakar. . . . Me keieu kapwuriamwei iei ah koahiek en wia padahk ni lokaiahn Saina oh Malay mendahki e kohsang England.” Ia lipwen mehn kahlemeng mwahu wet? Brothero koasoia: “Ah meleilei oh koapworopwor kin kamwekid ie en men wiahla emen misineri ni ahnsou me I laudla.” E sohte kapwuriamwei pwe, brother menet wiahla emen misineri.

Watch Tower Publications Index kin audaudki koasoipen aramas tohto me pwarada nan makasihn en Watchtower oh Awake! Koasoi pwukat kin kasalehda duwen mouren aramas kan me kin kesehla doadoahk kan oh mehn akadei kan en sampah, oh powehdi luwet kan, oh wiahda wekidekla kapwuriamwei kan nan arail mour, oh kin ahneki lamalam me ke kakete powehdi uhwong kan me kin lelohng irail, oh kin kasalehda pwerisek, kanengamah, loalopwoat, karakarahk, oh ngehnin tohnmetei. Emen me wadek duwen arail mour ntingihdi: “Re kahrehong ie en wiahla Kristian karakarahk oh kalahngan ni ahi wadek dahme meteikan kin lelohng, oh re sewese ie en dehr kin medemedewe pein ngehi laud sang dahme konehng de I ender roporop.”

Patehngete met, dehr manokehla mehn kahlemeng mwahu kan nan pein omw mwomowhdiso: tapwin peneinei kan me sohte kin pwangahkihda apwalihong arail peneinei arail anahn en paliwar oh pali ngehn; sister kan​—iangahki nohno kiripw kan—​me kin apwalihala kapwunod kan en kekeirada seri kan ni ahnsouwohte ni kalap iang kalohk; me mahla kan de me soumwahu kan me kin kaukaule lelepek mendahki arail wie luluwetkihla ahr mah de soumwahu. Ke soh kin mwekidiki soangen mehn kahlemeng mwahu pwukat?

Mehlel, sampah kin dirkihla mehn kahlemeng suwed kan. (2 Timoty 3:13) Mendahki met, tehk kaweid en Pohl ong Kristian kan me koukousoan nan Sudia. Mwurin ah kosoiahda mehn kahlemeng mwahu en ohl oh lih lelepek tohto en mahso, wahnpoaron Pohl kangoangehki irail: “Sounkadehde pwukat me tohto kapilkitailpenehr duwehte depwek kalaimwun ehu. . . kitail en nantihong nan atail mour me kitail tapihadahr, rasehng atail kin tang kehlail ni atail weirentang. Kitail kainenehiongete kapehditail kan ong Sises, me tepin atail pwoson oh me kaunsekala atail pwoson.” (Ipru 12:1, 2) Kristian kan rahnwet pil kin kapilkihpene ‘depwek kalaimwun’ en mehn kahlemeng mwahu kan​—mehn mahs oh rahnwet. Ke kin uhdahn paiekihda mehn kahlemeng mwahu pwukat? Ke kak ma ke nantiohng en “dehr alasang me suwed, ahpw ke en alasang me mwahu.”​—3 Sohn 11.

[Nting tikitik me mi pah]

[Blurb nan Pali 30]

E sohte pwung en kasik me elder koaros oh ministerial servant koaros pahn uhdahn koahiek nan doadoahk kan koaros en Kristian

[Kilel nan Pali 31]

Elder kan en wia “mehn kahlemeng mwahu ong pwihn en sihpw”