Peipeian Sapwellimen Siohwa Pwihn
“Koht en popohl . . . en audehkinkumwailla soangen kamwahu koaros me konehng kumwail, pwe kumwail en kin kapwaiada kupwure.”—IPRU 13:20, 21.
1. Ia uwen tohtohn tohnsampah kan rahnwet, oh meh depe me kin wadawadi nin duwen tohn ekei pelien lamalam akan?
NAN pahr 1999, uwen tohto en tohnsampah wet lelehr aramas wenelik! The World Almanac kawehwehda me sang rehn aramas pwukat: ekei aramas iang pelien Muslim kan—meh 1,165,000,000; aramas 1,030,000,000 me iang pelien lamalam en Roman Kadolik; aramas 762,000,000 kin iang pelien Hindu; aramas 354,000,000 me iang pelien Buddhist; aramas 316,000,000 iang Pros; oh aramas 214,000,000 me iang Orthodox.
2. Dahme kitail kak ndahki duwen irairen pelien lamalam akan nan rahnpwukat?
2 Ni atail kin kilang duwen pwalpeseng en palien sarawi oh soh pwungpene en padahk kan en pelien lamalam me mie nan rahnwet, e kak mehlel me pelien lamalam million kei—irail koaros kin pwungiong kupwuren Koht? Soh, “pwe Koht sohte ketin malipeikitaildohng nan mour liseliping, a ong mour meleilei.” (1 Korint 14:33) Ni pali teio, iaduwen pirien nin sampah pwon en sapwellien Siohwa ladu kan—Siohwa Koht kin kupwure irail? (1 Piter 2:17) Petehkpe mwahu kin kasansalehda me ‘Koht en popohl kin audehkinirailla soangen kamwahu koaros me konehng irail, pwe irail en kin kapwaiada kupwure.’—Ipru 13:20, 21.
3. Dahme wiawi nan Serusalem nan Pendekos 33 C.E., oh dahme kahrehda?
3 Ni mehlel, ia uwen tohto en irail akan me kin iang Sounkadehdehn Siohwa kan—met kaidehn mehkot me kin kasalehda me Koht kin kupwure irail . . . oh pil nempe—kaidehn ih me Koht kin ketin kupwurki. E sohte ketin pilada mehn Israel akan pwehki irail “tohtohsang aramas teikan.” Ahpw, ni mehlel, irail me “tikitik sang wehi en sampah kan koaros.” (Deuderonomi 7:7) Ahpw, pwehki Israel me salelepek, nan Pendekos 33 C.E., Siohwa kupwurki mwomwohdiso kapw ehu me audaudkihda sapwellimen Sises Krais tohnpadahk kan. Re keikihdi sapwellimen Siohwa ngehn sarawi oh re ngoangki pakairkiseli padahk mehlel duwen Koht oh Krais ong aramas teikan.—Wiewia 2:41, 42.
Wonowei Ahnsou Koaros
4. Dahme kahrehda ke kak ndahki me mwomwohdiso en Kristian kin wonowei ahnsou koaros?
4 Nan keieun senturi, mwomwohdiso en Kristian kin wonoweite ahnsou koaros ni arail kin kalohk nan sahpw kapw akan, katohnpadahkih aramas akan, oh kalaudehla arail wehwehkihla sapwellimen Koht kupwur kan. Tepin Kristian akan kin peipeiante marain en pali ngehn me kin kohda nan kisinlikou kan (me irail me kin ntingihdi kisinlikou pwukat kin mih pahn kaweid en ngehn sarawi). Wahnpoaron akan oh meteikan kin mwemweitla rehrail oh kangoange irail, oh met kin sewese irail en kapwaiada arail doadoahk. Nan palien Pwuhk Sarawi en lokaiahn Krihk kin kadehde mwahu duwen met.—Wiewia 10:21, 22; 13:46, 47; 2 Timoty 1:13; 4:5; Ipru 6:1-3; 2 Piter 3:17, 18.
5. Dahme kahrehda sapwellimen Koht pwihn kin kekeirada rahnwet, oh dahme kahrehda kitail anahne peipeian sapwellimen Koht pwihn?
5 Duwehte tepin Kristian akan, Sapwellimen Siohwa Sounkadehde kan en nan rahn pwukat tepikihda tohnmwomwohdiso malaulau. (Sekaraia 4:8-10) Sangete ni imwin kaeisek duwau en senturi, mie mehn kadehde me sansal me sapwellimen Koht ngehn sarawi kin ketin ieiang sapwellime pwihn. Kitail sohte kin likih kehl en aramas, ahpw kitail kin likih sawas me kin kohsang rehn ngehn sarawi, oh ihme kahrehda atail kin wehwehkihla Pwuhk Sarawi oh kapwaiada kupwuren Koht kin kekeirada. (Sekaraia 4:6) Pwehki kitail kin mih nan “imwin rahn akan,” e kesempwal kitail en peipeian sapwellimen Siohwa pwihn me kin wie kekeirada ahnsou koaros. (2 Timoty 3:1-5) Ni atail kin wia met, e pahn sewese kitail en kolokolete atail koapworopwor oh iang kadehde ong aramas teikan duwen sapwellimen Koht Wehi mwohn koasoandi suwed wet pahn imwisekla.—Madiu 24:3-14.
6, 7. Ni ahl siluh dah kei me kitail pahn koasoiapene me sapwellimen Siohwa pwihn me kekeirada?
6 Nanpwungatail, mie ekei me tepin iangala sapwellimen Siohwa pwihn sansal nanpwungen pahr 1920 lel 1949. Nan pahr pwukat, ihs me lemeleme me sapwellimen Siohwa pwihn pahn mwadang tohtohla oh kekeirada duwehte me wiawi sang ahnsowo lel ni ahnsouwet? Medemedewe duwen wiewia kesempwal kan me kin wiawier nan atail ahnsou! Inenen kansenamwahu mehlel ong atail pali ngehn en medemedewe duwen dahme Siohwa ketin wiahda ni e kin doadoahngki sapwellime aramas pwihn me kin soandi mwahu oh kin likih Ih.
7 Depit kin inenen pwuriamwei ni ahnsou e doudouloale duwen sapwellimen Siohwa doadoahk kaselel kan. E mahsanih, “Ma I pahn song en kasalehda koaros, re uhdahn pahn tohtohsang me I kak kasalehda!” (Melkahka 40:5) Rahnwet, kitail pil sohte kak kasalehda uwen tohtohn soahng kapwuriamwei kan me Siohwa ketin wiahda nan atail ahnsou. Ahpw, kitail pahn koasoiapene wasa silu me kin kasalehda me sapwellimen Siohwa pwihn kin wonoweite mwowe ahnsou koaros: (1) marain en pali ngehn kin ekis ekis kamarainihada kitail, (2) doadoahk en kalohk me kin kekeirada, oh (3) kawekilahn koasoandi kan (me pid sapwellimen Siohwa pwihn) ni ahnsou me konehng.
Kalahnganki Kamarain en Pali Ngehn
8. Me kin pid Lepin Padahk 4:18, marain ni pali ngehn kin sewese kitail en dehdehkihla dah duwen Wehio?
8 Me pid duwen lalaudlahn marain en pali ngehn, audepen Lepin Padahk 4:18 kin mehlel. E mahsanih: “Ahl me aramas pwung kan kin weid loale rasehng dakadahn ketipin me kin maramarainla lao rahn pwarada.” Ia uwen laud atail kalahnganki lalaudlahn marain en pali ngehn me kitail kin kilang! Nan kapokon me wiawi nan Cedar Point, Ohio, nan pahr 1919, padahk kan kin kasansalehda duwen Wehin Koht. Siohwa kin doadoahngki koasoandi en Wehio pwehn kasarawihala mware oh kalinganahda sapwellime kaunda. Ni mehlel, marain en pali ngehn kin sewese kitail en dehdehkihla me Pwuhk Sarawi (sang pwuhken Senesis lel Kaudiahl) kin kadehde duwen sapwellimen Siohwa kupwur en kalinganahda mware ki sapwellime Ohl me kin kaunda Wehin Koht. Met iei koapworopwor kaselel ehu ong aramas koaros me kin poakohng dahme pwung.—Madiu 12:18, 21.
9, 10. Nan pahr 1920 samwa, dahme irail sukuhliki duwen Wehio oh pwihn riau me kin uhpene, oh sawas dah kei kin kohda?
9 Nan kapokon me wiawi nan Cedar Point nan pahr 1922, J. F. Rutherford wia kapahrek oh kangoange sapwellimen Koht aramas akan en “pakairki, pakairki, pakairki Nanmwarkio oh sapwellime Wehi.” Nan artikel me oaralap koasoia “Ipwidien Wehio,” me ntingihdiehr nan The Watch Tower en March 1, 1925, artikel wet me sewese aramas akan en dehdehki ni pali ngehn duwen kokohp akan me koasoia duwen sapwellimen Koht Wehi me tepidahr kakaun nan pahr 1914. Nan pahr 1920 samwa, e pil sansal me mie pwihn riau me kin uhpene—sapwellimen Siohwa pwihn oh ahn Sehdan pwihn. Uhpene nanpwungara tepidaher, oh kitail pahn iang pali me kin kana, ihte ma kitail pahn peipeian sapwellimen Siohwa pwihn.
10 Iaduwen marain ni pali ngehn kin sewese kitail? Pwehki Wehin Koht oh Nanmwarki Sises Krais sohte kin kisehn sampah wet, kitail pil sohte kin kisehn sampah. Sang ni atail kin katohrohr kitail sang sampah wet, kitail kin kasalehda me kitail kin uhki padahk mehlel. (Sohn 17:16; 18:37) Ni ahnsou me kitail kin kilang kahpwal laud kan me kin wiawi nan koasoandi suwed wet, ia uwen laud atail kalahnganki me kitail sohte iang kisehn pwihn en Sehdan! Oh pil, kitail kin paiekihda nsenamwahu ni pali ngehn nan sapwellimen Siohwa pwihn!
11. Mehnia ahd me poahsoankihda Pwuhk Sarawi me sapwellimen Koht aramas akan aleiehr nan pahr 1931?
11 Nan kapokon me wiawi nan Columbus, Ohio, nan 1931, kawehwe mwahu duwen pwuhken Aiseia 43:10-12 wiawiehr. Tohnsukuhl en Pwuhk Sarawi kan aleier ahd tohrohr ehu: Sounkadehdehn Siohwa kan. Ia uwen laud pwais en kalohki mwaren Koht pwehn sewese meteikan en likweriong mwaren Koht pwehn ale kamourparail!—Melkahka 83:18; Rom 10:13.
12. Marain en pali ngehn dahieu me kohda nan pahr 1935 me kin pid pokon kalaimwun?
12 Mwohn pahr 1930, tohtohn sapwellimen Koht aramas akan sohte nohn wehwehki duwen ahr koapworopwor ong ni ahnsou kohkohdo. Ekei kin medemedewe duwen mour nanleng ahpw re kin pil perenki rong duwen padahk kan nan Pwuhk Sarawi me kin kasalehda duwen paradais nin sampah. Nan kapokon me wiawi nan Washington, D.C. nan pahr 1935, irail perenki sukuhliki duwen pwihn en “pokon kalaimwun” me Kaudiahl irelaud 7 kasalehda me pwihn wet me kak ahneki koapworopwor en mour nan sampah. Sang ahnsowo, kihpenehn irail towe kan en pokon kalaimwun wie kekeirada. Kitail soh kalahnganki me e sansal met duwen pwihn en pokon kalaimwun, e sohte wia mehkot me ekiek ong kitail? Mehlelpen irewet me aramas akan kin kohpene oh wiahla pokon kalaimwun ehu me kin kohsang wehi koaros, keinek kan, oh lokaia kan kin kamwekidada kitail en kalaudehla atail kin wia uwen me kitail kak pwehn peipeian sapwellimen Siohwa pwihn.
13. Irair kesempwal dahieu me kawehwehda nan kapokon nan St. Louis nan pahr 1941?
13 Irair kesempwal ehu me aramas koaros anahne nsenohki kawehwehdahr nan kapokon nan St. Louis, Missouri, nan pahr 1941. E pid duwen ihs me pwung oh konehng en kaunda lahng oh sampah pwon. Met kin wia irair kesempwal ehu me anahne kapwungpwungla ni ahnsou keren, oh rahn lapalap oh kamasepwehk me pahn kapwungpwunglahn irair wet pahn wiawi inenen kerendohr! Pil ehu irair me kawehwehda nan pahr 1941 kin pid duwen lelepek, me kin kasalehda ma emen kin utungada sapwellimen Koht kaunda de soh.
14. Nan kapokon ehu me wiawi nan pahr 1950, dahme aramas sukuhliki duwen irail soupeidi kan me ntingihdi nan pwuhken Aiseia 32:1, 2?
14 Nan pahr 1950, mie kapokon laud ehu me wiawi nan kahnimw en New York, oh mie padahk nan kapokono me kawehwehda ihs irail soupeidi kan me kileledi nan pwuhken Aiseia 32:1, 2. Ni ahnsou me Brother Frederick Franz kawehwe duwen oaralap wet oh pil kawehwe me irail soupeidi kan en sampah kapw kin mih nanpwungatail, koaros pwuriamweikihla. Nan kapokon wet oh kapokon kan me wiawi mwuri, marain en pali ngehn kin piripir mwuledek. (Melkahka 97:11) Ia uwen laud atail kalahnganki me ahl me kitail kin keid loale kin “rasehng dakadahn ketipin me kin maramarainla lao rahn pwarada”!
Wonoweite nan Atail Doadoahk en Kalohk
15, 16. (a) Iaduwen kitail wonoweite wia doadoahk en kalohk nan sounpar kan sang 1920 lel 1940? (b) Mehnia booklet me wia kihda sawas laud ong doadoahk en Kristian nan pahr keren kan?
15 Ahl keriau me sapwellimen Siohwa pwihn kin wonoweite kin pid atail doadoahk kesempwal iei en kalohki Wehin Koht oh katohnpadahk. (Madiu 28:19, 20; Mark 13:10) Pwehn kapwaiada doadoahk wet, sapwellimen Siohwa pwihn kin ahnsou koaros kangoange kitail koaros kesempwalpen kalaudehla atail doadoahk en kalohk. Nan pahr 1922, Kristian kan koaros ale kangoang en iang doadoahk en kalohk. Pein emen emen irail koaros kin pein pwukoahki arail marain en sansal mwohn aramas akan oh iang doadoahk en kadehde ong aramas teikan duwen padahk mehlel. (Madiu 5:14-16) Nan pahr 1927, koasoandi kan kin wiawi en koasoanehdi Rahn Sarawi kan ong kalohk. Sang February 1940 kohla, Sounkadehde kan kin kalap kalohk nanial en wasahn pisnes kan pwehn kihseli The Watchtower oh Consolation (makisihn me ahnsouwet adaneki Awake!).
16 Nan pahr 1937, mie booklet kapw me oaralap koasoia Model Study oh pwehki met, kangoange kin kohwong sounkalohk kan en pwurehng pwurala rehn aramas akan pwehn kak padahkiong meteikan duwen padahk mehlel en Pwuhk Sarawi. Nan sounpar kan mwuri, kangoang laud kin kohda en onop Pwuhk Sarawi rehn aramas teikan. Kangoang laud en wia doadoahk wet kin kohsang wiawihdahn pwuhk wet me oaralap koasoia “Let God Be True” nan pahr 1946 oh nan pahr 1968 pwuhk me oaralap koasoia Padahk Mehlel kin Kaluwalahng Mour Soutuk. Ni ahnsou wet kitail kin doadoahngki pwuhk me oaralap koasoia Knowledge That Leads to Everlasting Life. Onop oh kanokehla audepen pwuhk pwukat kin wiahda poahsoan kehlail ni pali ngehn ong irail me men wiahla tohnpadahk mehlel kan.
Wonoweite Peipeian Kamwahulahn Koasoandi kan en Sapwellimen Siohwa Pwihn
17. Pwehn kapwaiada pwuhken Aiseia 60:17, iaduwen sapwellimen Siohwa pwihn kin wonowei?
17 Ahl kesiluh me sapwellimen Siohwa pwihn kin wonoweite kin pid duwen kamwahulahn koasoandi kan en sapwellimen Siohwa pwihn. Siohwa ketin inoukihda met nan Aiseia 60:17: “I pahn ketikihong uhk kohl a kaidehn prons, silper oh prons a kaidehn mete oh tuhke, oh mete, kaidehn takai. Omw kaun akan solahr pahn kahpwalihiuk; pwe I pahn koasoanehdi pwe re en kakaun ni pwuhng oh popohl.” Pwehn kapwaiada kokohp wet, koasoandi kan kin wiawi pwehn kamwahuwihala epwelpen doadoahk en kalohki Wehin Koht oh pil doadoahk en apwalihala sapwellimen Siohwa pwihn.
18, 19. Kamwahulahn koasoandi dah kei en pwihn me wiawi erein sounpar akan?
18 Nan pahr 1919, mwomwohdiso kan me peki sawas en koasoanehdi arail koasoandi kan ong kalohk idihada emen Sounapwalih en Kalohk. Met wia sawas laud ong irail sounkalohk kan oh mwurin mwo, doadoahk en kalohk wie kekeirada. Nan 1932, tohnmwomwohdiso sohlahr kin usada sounapwalih kan oh deacon kan oh met wehwehki me kitail sohla kin daur koasoandi en democracy. Pil ehu wiewia kesempwal me wiawi nan pahr 1938 iei me idihddahn irail sounapwalih kan oh ministerial servant kan koaros nan mwomwohdiso kin wiawi duwehte koasoandi kan en idihada ohl akan me wiawi nan tepin mwomwohdiso en Kristian. (Wiewia 14:23; 1 Timoty 4:14) Nan pahr 1972, koasoandi en idihada sounapwalih kan oh ministerial servant kan tepida wiawi oh met kin pahrekiong dahme tepin Kristian akan kin wia mahs. Oh pil, kaidehn emente ohl pahn papah nin duwen sounapwalih en mwomwohdiso pwe Pilipai 1:1 oh iren Paipel teikan kin kawehwehda me irail akan me pahn kapwaiada koasoandi kan en sounapwalih pahn kisehn pwihn en sounapwalih kan.—Wiewia 20:28; Episos 4:11, 12.
19 Nan pahr 1975, koasoandi kapw ehu wiawihda ong irail pwihn kan (committee kan) me mih pahnangin Governing Body en Sounkadehdehn Siohwa kan pwehn apwalih sapwellimen Koht pwihn wasa koaros nan sampah. Branch Committee kan me idihdda en apwalih doadoahk en kalohk me wiawi nan arail wasa kan. Ni ahnsouwet, re kin song en kamengeila doadoahk kan me kin wiawi nan poasen kaun oh nan rahn ohpis kan en Watch Tower Society pwe irail pahn kak “pilada dahme keieu mwahu.” (Pilipai 1:9, 10) Pwukoa kan me sapwellimen Krais sounapwalih kan kin wia kin pid duwen tiengala mwowe nan doadoahk en kalohk, padapadahk nan mwomwohdiso, oh apwapwalih ni pwung sapwellimen Koht pwihn.—1 Timoty 4:16; Ipru 13:7, 17; 1 Piter 5:2, 3.
Sapwellimen Sises Pwukoa Nin Duwen Kaun
20. Ma kitail pahn peipeian sapwellimen Siohwa pwihn, dahme kitail anahne pohnese duwen pwukoa me Sises sapwellimaniki?
20 Ma kitail pahn peipeian sapwellimen Siohwa pwihn me kin kekeirada, kitail anahne pohnese pwukoa me Koht ketikihong Sises Krais nin duwen “tapwin mwomwohdiso.” (Episos 5:22, 23) Pwuhken Aiseia 55:4 padahkiong kitail: “I wiahkihla ih sounkaweid oh kaunen wehi kan, I kasalehda ei manaman ong wehi kan pwehki ih.” Sises uhdahn ese kahre aramas akan. E pil ese sapwellime sihpw kan oh arail wiewia kan. Pwe ni ahnsou e wia keseu en mwomwohdiso isuh nan Eisia Mainor, pak limau e mahsanih met: “I ese omw wiewia kan.” (Kaudiahl 2:2, 19; 3:1, 8, 15) Sises pil ketin mwahngih duwen atail anahn akan, pil duwehte Seme, Siohwa. Mwohn e padahkiong sapwellime kan duwen Kapakap en Samat, Sises mahsanih: “Koht iei Samamwail, oh e ketin mwahngih dahme konehng kumwail mwohn amwail saikinte kin peki mehkot.”—Madiu 6:8-13.
21. Iaduwen Sises kin kasalehda me e kin kaunda mwomwohdisohn Kristian?
21 Iaduwen Sises kin kasalehda me e kin kakaun? Ehu ahl e kin wia met, e kin doadoahngki Kristian sounapwalih kan nin duwen “kisakis rehn ohl akan.” (Episos 4:8) Kaudiahl 1:16 kin kawehwehda duwen irail sounapwalih keidi kan me kin mih nin limen Krais palimaun, pahnganin sapwellime manaman. Rahnwet, Sises kin kahre koasoandi kan ong irail elder kan, sohte lipilipil ma ohl pwukat kin ahneki koapworopwor en kohla nanleng de mihmihte sampah. Nin duwen artikel en mwowe kawehwehda me ngehn sarawi kin idihada irail me kin pid kosonned kan en Pwuhk Sarawi. (1 Timoty 3:1-7; Taitus 1:5-9) Nan keieun senturi, pwihn en ohl mah kan nan Serusalem me iang pwihn en Governing Body oh irail kin apwalihala mwomwohdiso kan oh doadoahk en kalohki Wehin Koht. Sapwellimen Siohwa pwihn sansal nan rahnwet kin idawehn koasoandi wet.
Peipeian!
22. Soangen sawas dah kan Governing Body kin kihda?
22 Pwukoa en apwalih doadoahk en Wehin Koht wasa koaros nan sampah kin kohwong “ladu lelepek oh loalokong” me keieu wehwehki irail Governing Body en Sounkadehdehn Siohwa kan. (Madiu 24:45-47) Governing Body kin keieu nsenohki en kihda kaweid ni pali ngehn ong mwomwohdiso en Kristian. (Wiewia 6:1-6) Ni ahnsou iengatail tohnkaudok akan kin lelohng kahpwal akan duwehte melimel, rerrer en sahpw, de soangen kahpwal teikan, Governing Body kin idek rehn pwihn akan me kosonned en aramas kin kauwada en kihda sawas oh onehda sapahl ihmw akan oh Kingdom Hall kan me ohla. Ma ekei Kristian akan kin lelohng kahpwal laud de kalokolok, irail kin sewese oh kangoange Kristian pwukat pwe irail en kehlailda ni pali ngehn. Oh pil, mendahki “ahnsou apwal” kin wiawi, kitail kin wonoweite nan doadoahk en kalohk.—2 Timoty 4:1, 2.
23, 24. Mendahki dahme kin wiawi ong sapwellime aramas akan, dahme Siohwa pahn ahnsou koaros ketikihda, oh dahme kitail pahn nantihong wia?
23 Sohte lipilipil dahme kin wiawi ong sapwellime aramas akan, Siohwa kin ketikihong irail mwengehn ngehn oh kaweid me anahn. Koht pil kin ketikihong brother kan me ahneki pwukoa dehde oh erpit pwehn ren kak sewese mwomwohdiso en kekeirada oh marainla ni pali ngehn oh kamwahuwihala koasoandi kan nan sapwellime pwihn sansal. (Deuderonomi 34:9; Episos 1:16, 17) Siohwa kin ahnsou koaros ketikihda dahme kitail kin anahne pwehn kak wia doadoahk en katohnpadahk wasa koaros nan sampah.—2 Timoty 4:5.
24 Kitail kak likih me Siohwa sohte pahn kesehla sapwellime ladu kan me lelepek; e pahn kapitirailla sang “kahn kamakam kowahlap” me pahn kereniong kohdo. (Kaudiahl 7:9-14; Melkahka 94:14; 2 Piter 2:9) Mie kahrepe tohto me kitail kak kolokolete atail lelepek oh likih Siohwa me kitail ahneki sang ahnsou me kitail sukuhliki padahk mehlel lao lel ni imwio. (Ipru 3:14) Eri, kitail en nantihong peipeian sapwellimen Siohwa pwihn.
Iaduwen Ke Pahn Sapeng?
• Dahme kahrehda kitail kak ndahki me sapwellimen Siohwa pwihn kin wonoweite?
• Mehn kadehde dah kan kin kasalehda me sapwellimen Koht aramas akan kin paiekihda lalaudlahn marain ni pali ngehn?
• Soangen kamwahupe dah kan mie ong koasoandi en kalohk?
• Soangen kamwahulahn koasoandi dah kan me konehng atail ahnsou me wiawi nan sapwellimen Siohwa pwihn sansal?
[Kilel nan pali 13]
Duwehte Depit, kitail sohte kak kasalehda duwen sapwellimen Siohwa wiewia kapwuriamwei koaros
[Kilel nan pali 14]
Sapwellimen Koht pwihn kin paiekihda kamwahulahn koasoandi kan me kin wiawi