Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • w06 5/1 pp. 13-17
  • Alialuhwei Nan Ahl Me Marain Wie Lalaudla

Sohte kasdo ong met

Kupwurmahk, mehkot sapwung en kihda kasdo

  • Alialuhwei Nan Ahl Me Marain Wie Lalaudla
  • Kahn Iroir Pakpakairki Wehin Siohwa—2006
  • Sawaspen Oaralap kan
  • Ire kan me Duwehte Met
  • Kamarain kin Kahrehdo Kamwahulahn Sapwellimen Siohwa Pwihn
  • Laudlahn Marain kin Wehwehki Kalaudlahn Kamwahula kan
  • Siohwa kin Kasalehda Duwen Padahk kan
  • Alialuhweite nan Ahl me Marain Wie Lalaudla
  • Peipeian Sapwellimen Siohwa Pwihn
    Kahn Iroir Pakpakairki Wehin Siohwa—2001
  • Sapwellimen Siohwa Lingan Kin Kamarainihada Sapwellime Aramas Akan
    Kahn Iroir Pakpakairki Wehin Siohwa—2002
  • Marain Me Kohsang Rehn Koht Kin Powehdi Rotorot!
    Kahn Iroir Pakpakairki Wehin Siohwa—2002
  • ‘Maing Koht, Komw Ketin Kadarodo Sapwellimomwi Marain’
    Kahn Iroir Pakpakairki Wehin Siohwa—2000
Kahn Iroir Pakpakairki Wehin Siohwa—2006
w06 5/1 pp. 13-17

Alialuhwei Nan Ahl Me Marain Wie Lalaudla

“Ahl me aramas pwung kan kin weid loale rasehng dakadahn ketipin me kin maramarainla lao rahn pwarada.”—LEPIN PADAHK 4:18.

1, 2. Dahme wiawiong sapwellimen Koht aramas akan nin duwen Siohwa ah kin ketin kalaudehla marain en pali ngehn rehrail?

IHS likin Ih me utupen marain, Siohwa Koht, me kak kawehwehda ni unsek duwen pwaradahdohng ketipin ah kin dakerada nan rotorot en pwong? (Melkahka 36:9) Koht mahsanih, ‘Marain en rahn kin kasalehda dohl oh wahu kan, duwehte likou limilim ehu, sansal duwehte nting ehu pohn pwehl.’ (Sohp 38:12-14, NW) Ni lingan en ketipin a kin wie maramarainla, mwomwen sampah kin sansalda oh marainla, duwehte pwehl paip mwuterek me kin wekidekla oh wiahla mehn stampih kisin likou kesempwal.

2 Siohwa iei Ih me pil wia Utupen marain en pali ngehn. (Melkahka 43:3) Pwe sampah mihmihte nan rotorot mosul, Koht mehlel kin ketikihong sapwellime aramas akan marain. Ia imwilahn met? Paipel sapeng: “Ahl me aramas pwung kan kin weid loale rasehng dakadahn ketipin me kin maramarainla lao rahn pwarada.” (Lepin Padahk 4:18) Marain me wia lalaudla me kohsang rehn Siohwa kin wie sensere elen sapwellime aramas akan oh kin kamwahuwihirailla ong pwihn, padahk oh tiahk.

Kamarain kin Kahrehdo Kamwahulahn Sapwellimen Siohwa Pwihn

3. Ia inou me mih nan Aiseia 60:17?

3 Siohwa doadoahngki soukohp Aiseia mahsanih: “I pahn ketikihong uhk kohl a kaidehn prons, silper oh prons a kaidehn mete oh tuhke, oh mete, kaidehn takai. Omw kaun akan solahr pahn kahpwalihiuk; pwe I pahn koasoanehdi pwe re en kakaun ni pwung oh popohl.” (Aiseia 60:17) Duwehte aramas a kin weliankihdi kepwe luwet ong ni kepwe kehlail a kin wia kilelepen kekeirda, pil Sounkadehdehn Siohwa kan kin pehm kekeirda nan arail koasoandi en pwihn mendahte atail mihier “ni imwin koasoandi wet,” de “imwin rahn akan.”—Madiu 24:3; 2 Timoty 3:1.

4. Koasoandi dahieu me wiawi nan pahr 1919, oh iaduwen e wia kamwahu?

4 Ni tepidahn imwin rahn akan, mwomwohdiso en Tohnsukuhl en Paipel akan (Bible Students), me mwuri adanekihla Sounkadehdehn Siohwa kan, kin usada arail elder kan oh deacon kan. Ekei elder kan sohte kin ahneki ngehn mehlel en wia doadoahk en kalohk oh katohnpadahk. Ekei irail sohte kin ihte dangahngahn kalohk, ahpw re pil kin kaluwetala meteikan oh ndaiong irail en dehr kalohk. Kahrehda, nan pahr 1919, pwukoa kapw ehu eri kokouda nan ehuehu mwomwohdiso, iei “Service Director.” “Service Director sohte kin usuhsda sang nan mwomwohdiso, ah e kin idihdda nin duwen sapwellimen Siohwa koasoandi, sang Branch Ohpis en sapwellimen Koht aramas akan. Ah pwukoa kin pidada koasoanehdi doadoahk en kalohk, padahkihong tohnmwomwohdiso iawasa irail pahn kalohk, oh kangoange tohn mwomwohdiso kan en iang doadoahk wet. Mwurin mwo, doadoahk en kalohki Wehio inenen kehlailda.

5. Soangen kamwahula dah me pweida nan pahr 1920 samwa kan?

5 Koaros tohnmwomwohdiso pil ale kalaudpen kakehl sang ni padahk me kangoange koaros en “Kalohkihwei, kalohkihwei, kalohki duwen Nanmwarki oh sapwellime wehi,” oh met wiawi nan pahr 1922 ni Kapokon en Tohnsukuhl en Paipel kan nan Cedar Point, Ohio. Lel nan pahr 1927, koasoandi en kalohk kin koasoandi ong Rahn Sarawi en wia rahn en kalohk ihmw-lel-ihmw. Dahme kahrehda? Pwehki Rahn Sarawi wia rahn ehu me pali laud en aramas akan kin kommoaldi sang doadoahk. Sounkadehdehn Siohwa kan nan rahnwet pil kin kasalehdahte soangen ngoangohte en song lellahng rehn aramas akan ni ahnsou kan me re kin kak mihmi nan imwarail akan, me duwehte imwin wihk kan oh nin soutik kan.

6. Nan pahr 1931, mehnia inou me alahldahr, oh iaduwen met kalaudehla doadoahk en kalohk?

6 Ngoang laud ehu en kalohk en Wehio wiawi ni mwurin souwas en Rahn Sarawi, July 26, 1931, ni inou ieu a alehda keieu nan Kapokon en Columbus, Ohio, ah mwuri wasa koaros nan sampah. Inou wet ketihtihki: “Kiht, ladu kan en Siohwa Koht, pwukoahki wia doadoahk ni mware, oh sang ni peik oh sapwellime pahngok, en lohkihwei mehn kadehde en Sises Krais, oh en kadehde ong aramas akan me Siohwa Koht mehlel oh Keieu Lapalahpie; kahrehda sang ni kapehd peren se kesempwaliki oh alehda mwar wet me pwilisang nin pein doauesen Kauno Koht, oh se inengieng aramas en esehkin kiht oh likwerikin kiht, Sounkadehdehn Siohwa kan.” (Aiseia 43:10) Ia uwen ah nohn sansal me ahd kapw wet kasalehda poahsoan en doadoahk me irail kan koaros me kin wah mwar wet pahn wia! Ei, Siohwa ketikihda doadoahk ong sapwellime ladu kan koaros. Koaros inenen peikiong pahngok wet!

7. Wekidekla dah me tepida nan pahr 1932, oh pwekida?

7 Elder kan tohto me kin toukihda arail ahnsou laud ong doadoahk en kalohk. Ahpw, nan ekei wasa, elder usuhsda kan uhwong madamadau me tohnmwomwohdiso koaros pahn iang wia doadoahk en kalohk. Eri, ekei wekidekla kan anahne wiawi. Nan pahr 1932, mwomwohdiso kan alehdi kaweid sang Watchtower me irail en kauhdi koasoandi en usuhsda elder kan oh deacon akan. Dahme pahn wiawi, irail en usuhski pwihn en “Service Committee” me pahn wiawihkihda ohl akan me kehlail ni pali ngehn oh iangehr doadoahk en kalohk oh kin utungada doadoahk wet. Kahrehda, irail ohl akan me pahn apwalih mwomwohdiso pahn kangoangehda doadoahk en kalohk, oh doadoahk wet kakete wonoweite mwowe.

Laudlahn Marain kin Wehwehki Kalaudlahn Kamwahula kan

8. Kamwahula dah me wiawi nan pahr 1938?

8 Maraino wie “maramarainla.” Nan pahr 1938, doadoahkepen usuhs uhdi douluhl. Elder kan oh ministerial servant kan nan mwomwohdiso pahn idihdi nin duwen sapwellimen Siohwa koasoandi pahn epwelpen pwihn en “ladu lelepek oh loalokong.” (Madiu 24:45-47) Mwomwohdiso koaros en Sounkadehdehn Siohwa kan pwungki wekidekla wet, oh doadoahk en kalohk eri doulahte oh kihda wah tohto.

9. Nan pahr 1972, soangen koasoandi dah me wiawihda, oh dahme kahrehda met wia elen kamwahula ieu?

9 Tepisang nan October 1, 1972, pil ehu wekidekla ong epwelpen mwomwohdiso wiawi. Koasoandi en pwihn en elder pwehn apwalih mwomwohdiso en Sounkadehdehn Siohwa kan nan sampah pwon tepidahr, oh met wiliandi koasoandi me emente elder en kin wia soun epwelpen mwomwohdiso. Koasoandi kapw wet kihda kangoang laud ong brother kan me mah ni pali ngehn en koahiekla tiengkihwei doadoahk nan mwomwohdiso. (1 Timoty 3:1-7) Sang ni met, brother tohto alehdi koahiek laud ong pwukoa kan nan mwomwohdiso. Ia uwen met a nohn kesempwal ong epwelpen sihpw tohto akan me kapw me kamehlele padahk mehlel en Paipel me pedolong ong nan mwomwohdiso nan pahr akan en mwurin met.

10. Koasoandi dah me tepidahr doadoahk sang nan pahr 1976?

10 Towe kan en Governing Body wiahda pwihn weneu, oh tepida sang January 1, 1976, doadoahk kan koaros en pwihn pwukat oh pil mwomwohdiso koaros nan sampah mihla pahn epwelpen pwihn weneu pwukat. Met inenen wahdo kapai laud ni mehkan koaros me pid doadoahk en Wehio mihlahr pahn kaweid en “sounkaweid tohto”!—Lepin Padahk 15:22; 24:6.

11. Soangen kamwahula dah me tepida nan pahr 1992, oh dahme kahrehda?

11 Nan pahr 1992, pil mie ehu kamwahula me wiawi, mehkot me rasehng dahme wiawi ong mehn Israel akan oh meteikan ahr pwurodohng Serusalem mwurin arail sella nan Papilon. Ahnsowo, sohte itar mehn Lipai kan mehn apwalih doadoahk nan imwen kaudoko. Kahrehda, doadoahk kohwong irail aramas me kaidehn mehn Israel me adaneki Nethinim oh irail kin wia soahng tohto pwehn sewese mehn Lipai kan. Duwehte met, nan pahr 1992, ekei brother kan me kisehn “sihpw teikan” pil alehda kapatapatpen arail pwukoahn apwalih sapwellimen Siohwa aramas akan pwehn sewese pwihn en “ladu lelepek oh loalokong” ong apwalih anahn me wie lalaudla nin sampah. Irail idihdda oh wia sawaspen pwihn weneu en Governing Body.—Sohn 10:16.

12. Iaduwen Siohwa ah ketikihda ‘kohl a kaidehn prons’?

12 Dahme kohsang ni mepwukat koaros? Siohwa mahsanih, “Omw kaun akan solahr pahn kahpwalihiuk; pwe I pahn koasoanehdi pwe re en kakaun ni pwung oh popohl.” (Aiseia 60:17) Nanpwungen sapwellimen Siohwa ladu kan rahnwet, mie “popohl” oh poakohng me “pwung” wiahlahr ‘soun nehk doadoahk’ ong irail—met kin kamwekid irail en papah Koht. Irail kin soandi mwahu ong arail wia doadoahk en kalohki Wehio oh katohnpadahk.—Madiu 24:14; 28:19, 20.

Siohwa kin Kasalehda Duwen Padahk kan

13. Iaduwen Siohwa ah kin ketin kalaudehla elen marain ong sapwellime aramas akan me pid padahk en Paipel nan pahr 1920 kan?

13 Ekis ekis, Siohwa kin kamarainihala sapwellime aramas akan duwen padahk mehlel. Kaudiahl 12:1-9 kihda ehu karasepe. Koasoi wet pid duwen karasaras silimen: “lih emen” me liseian, “drakon” emen, oh “seri ohl emen.” Ke ese dahme emenemen mour pwukat kin wehwehiong? Kawehwehpen met pwarada nan artikel ieu me oaralap koasoia “Ipwidi en Wehio” me pwarada nan Watch Tower en March 1, 1925. Artikel wet kihong kalaudpen wehwe ong sapwellimen Koht aramas akan ong kokohp me pid ipwidi en Wehio, oh kihda marain laud ong wehwehkihda duwen pwihn sansal riau—sapwellimen Siohwa pwihn oh ahn Sehdan pwihn. Eri, nan pahr 1927/1928, sapwellimen Koht aramas akan pohnesehdahr me Kristmas oh wia ipwidi sohte poahsoankihda iren Paipel kan oh irail sohla kin iang wia.

14. Padahk mehlel dahkei me kawehwehpe mwahu kohda nan 1930 kan?

14 Nan pahr 1930 kan, pil kalaudepen kamarain pil kohwong mour en padahk mehlel silipwoat. Erein pahr tohto, Tohnsukuhl en Paipel kan esehier me irail aramas mwahu tohto, me wia pwihn en “pokon kalaimwun,” me koasoiepe mih nan Kaudiahl 7:9-17, irail weksang irail meh 144,000 me pahn iang Krais nanleng wia nanmwarki oh samworo kan. (Kaudiahl 7:9-17; 5:9, 10; 14:1-5) Ahpw, kawehwehpen pwihn en “pokon kalaimwun” saikinte sansal ahnsowo. Me rasehng marain en menseng ah kin maramarainla oh kahrehiong aramas ah kak kilangada mwahu mwohmw oh pohn mehkan, nan pahr 1935, e sansal me “pokon kalaimwun” iei irail aramas akan me sohte mehla nan “Kahn Kamakam Kowahlap,” oh pwihn wet ahneki koapworopwor en mour pohn sampah kohkohlahte. Ekis mwuri, nan pahrohte, wehwe mwahu ieu pwarada me pidada laud irail tohnsukuhl kan me nein Sounkadehdehn Siohwa kan nan wehi tohto. Ni ahnsou me aramas wasa koaros nan sampah inenen idipek en uhki arail wehi kan, Sounkadehde kan diarada me tiahk en salute pilaik (kaudokiong pilaik) kin wehwe laudsang ihte en kasalehda wahu. Nan pahr en mwurio, kawehwe kohda me Krais mehla pohn tuhke apwoat, a kaidehn pohn lohpwu.—Wiewia 10:39.

15. Iahd oh iaduwen kesempwalpen nta koasoiepe a kohda?

15 Nan eilepen Mahwen Keriau en Sampah, ahnsou me e wiahda tiahk ieu en kin kihong sounpei kan me ohla doken nta, marain wie lalaudla ong kesempwalpen nda. Nan Watchtower en July 1, 1945, e kangoangehki “koaros tohnkaudok en Siohwa me kin raparapahki en iang mour soutuk nan sapwellime koasoandi pwung nan sampah kapw en wauneki sarawi en nta oh kamenehla irail ong sapwellimen Koht kaweid akan me pid irair kesempwal wet.”

16. Iahd me New World Translation of the Holy Scriptures kohpeseng oh ia soahng riau me kaselel me pid kawehwehn Paipel wet?

16 Nan pahr 1946, anahn ehu sansal ong kawehwe sapahl en Paipel pwe en kak alehdi roporop kerendo kan sang rehn semen Paipel akan oh pwe wehwehn Paipel en dehr saminkihda padahk kan me kohsang palien Kristendom. Doadoahk wet tepida nan December en pahr 1947. Nan 1950, New World Translation of the Christian Greek Scriptures kohda ni lokaiahn wai (English). Sang Senesis lel Malakai kawehwehdi ni lokaiahn wai wiahda pwuhk limau oh tepida kohkohpeseng nan pahr 1953. Kaimwiseklahn pwuhko kohpesengehr nan pahr 1960, ekiste pohnangin pahr 12 mwurin doadoahk en kawehwe ah tepida wiawi. Pwuhk unsek sang Senesis lel Kaudiahl me ede New World Translation of the Holy Scriptures kohpeseng nan pahr 1961. Pwuhk wet me mihier ni lokaia tohto, kin audaudki soahng tohto kei me kaselel. E kapwurehiong loale mwar sarawio, Siohwa. Oh pil likin met, e poahsoanki roporop keneinei kan kihda wehwe me duwehte tepin ntingdahn Paipel pwe en kakairada atail wehwehkihla mehlel duwen padahk sarawi kan.

17. Marain dahieu me laudla nan pahr 1962?

17 Kamarainpen wehwehn “irail kaun lapalap kan” nan pwuhken Rom 13:1 oh ia mwomwen Kristian akan ahr kin peikiong irail kohda nan pahr 1962. Onop keneinei ong Rom irelaud 13 oh pil iren Pwuhk Sarawi me duwehte Taitus 3:1, 2; oh 1 Piter 2:13, 17 kasalehda mwahu me “irail kaun lapalap akan” kin wehwehki, kaidehn Siohwa Koht oh Sises Krais, ahpw irail aramas lapalap de kaunen palien koperment kan.

18. Ia ekei padahk mehlel akan me kawehwehpe kohda nan 1980 samwa kan?

18 Nan pahr akan en mwurin met, elen irail me pwung kan doulahte wie maramarainla. Nan pahr 1985, kamarain kohda ong ia wehwehn kitail en wiahla aramas me pwung “ong mour” oh pwung nin duwen kompoakepahn Koht. (Rom 5:18; Seims 2:23) Wehwehn Jubilee en Kristian inenen kawehwehda mwahu nan pahr 1987.

19. Ia mwomwen Siohwa ah ketikihda kalaudpen marain en ngehn ong sapwellime kan nan pahr kerendo kan?

19 Nan pahr 1995, kawehwe me pid nehnehpeseng en sihpw oh kuht inenen wehwe mwahula. Nan pahr 1998, oaritikpen kaudiahl en Esekiel nan Tehnpas Sarawio kohda, me ahnsou wet wie pweipweida nan atail ahnsou. Nan pahr 1999, kawehwe sansal mwahu kohda ong iahd oh iaduwen me ‘Sansal Kansensuwedo ah pahn uhda nan wasa sarawio.’ (Madiu 24:15, 16) Oh pil, nan pahr 2002, wehwe mwahu alahldi me pid ia wehwehn kaudokiong Koht “ki ngehn oh mehlel.”—Sohn 4:24.

20. Pil nan mehnia wasa me sapwellimen Koht aramas akan alehdi kamwahula kan?

20 Pil likin kamwahulahn pwihn oh mour en padahk kan, pil mie kamwahula kan me pid wiewiahn Kristian. Karasepe, nan pahr 1973, e sansal me doadoahngki tipaker duwehte simoak kin “kasaminehla paliwar” oh koasoandi en kopwungpwunglahn ire wet wiawihier. (2 Korint 7:1) Sounpahr eisek mwuri, nan July 15, 1983, Watchtower kasalehda mwahu atail pilipil me pid doadoahngki kesik. Mehpwukat wiahte ekei karasepen laudlahn marain me mie nan atail ahnsou.

Alialuhweite nan Ahl me Marain Wie Lalaudla

21. Ahneki soangen elen madamadau dah me pahn sewese kitail en weweidweite nan ahl me marain wie lalaudla?

21 Emen elder me wereila nan pwoson wehkada me, “Pwungkihla wekidekla ieu ni ah kin pwarada oh alehda wekideklao kak wia mehkot apwal.” Dahme kin sewese ih en peikiong wekidekla kamwahu tohto kan me pein ih kilangehr nan erein pahr 48 me e wiewiahkiher sounkalohk en Wehio? E sapengki: “Ahneki irair en madamadau pwung. Ma ke sohte men alehda iren kamwahula kan, e wehwehki me ke pahn mihmihte, a pwihn en Siohwa pahn mwekimwekid kohweisang uhk. Ma I kin lelohng soangen irair wet me wekidekihda pahn likamwete e apwal en alehda, a I kin tamanda mahsen en Piter ong Sises: ‘Maing, ihs me se pahn patohla reh? Sapwellimomwi mahsen kan, iei mahsen en mour soutuk.’ Mwuri, I kin pein idek rehi, ‘Iawasa I pahn kohla ie—likin wasaht nan rotorot mosul en sampah?’ Met kin sewese ie en kolokolete teng ieiang sapwellimen Koht pwihn.”—Sohn 6:68.

22. Iaduwen atail pahn ale kapaipen atail alialu nan maraino?

22 Sampah me pidahkihkitailpene kin inenen mihla nan rotorot mosul. Nin doken Siohwa ah ketin ketikihdahte kamarain oh sapwellime kan, wekpeseng laud me mie nanpwungen irail oh irail akan nan sampah kin wie lalaudla. Dahme marain wet kin wia ong kitail? Me duwehte atail kin padik ohng dengki marain pwehn serehdahte pahd akan nan ahl ehu ahpw sohte kak kihsang pahd pwukat, pil marain me pwilisang ni Mahsen en Koht sohte kin ketikihsang kasongosong kan. Ahpw, marain sarawio pahn uhdahn sewese kitail en sohte lohdi pahn kasongosong kan pwe kitail en wonoweite oh alialu nan ahl me maraino kin wie lalaudla. Eri, kitail doulahte mwowe oh tetehk sapwellimen Siohwa mahsen en kokohp, “e rasehng marain ehu me kin dakedaker wasa rotorot.”—2 Piter 1:19.

Ke Tamataman?

• Soangen kamwahulahn pwihn dah kei me Siohwa ketikihong sapwellime kan?

• Marain me wie lalaudla kin wahdo soangen kamwahulahn mour en padahk dah kan?

• Soangen wekidekla dah kan me ke kadehdehier, oh dahme kin sewese iuk en mwadang alehda wekidekla pwukat?

• Dahme ken alialuhkihweite nan ahlo me marain kin wie lalaudla?

[Kawehwehpen kilel kan nan ehu ehu pali 15]

Kapokon en Cedar Point, Ohio nan pahr 1922 kakehlahda tohnsukuhl en Paipel akan en wia sapwellimen Koht doadoahk en kalohk

[Kawehwehpen kilel kan nan ehu ehu pali 16]

“New World Translation of the Christian Greek Scriptures” kohpesengehr nan 1950, sang N. H. Knorr

[Kilel Credit Line nan Pali 13]

© 2003 BiblePlaces.com

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share