Peidek kan Sang Sounwadawad kan

Daniel mihmihki ia ni ahnsou me kasongosong kohieng irail mwahnakapw en Ipru silimen ko mwohn sansal me Nepukadnesar kauwada nan patapat en Dura?

Paipel sohte koasoia, kahrehda sohte aramas nan rahnwet me kasalehda wasa me Daniel mihmi ie ahnsou me kasongosongo wiawi.

Ekei lemeleme me pwehki ahn Daniel mwar oh pil pwehki Daniel keniken rehn Nepukadnesar laud sang Sadrak, Mihsak oh Apedneko kahrehda Daniel sohte idihdiong iang kohla nan patapat en Dura. Daniel 2:49 kasalehda me ahnsoukis Daniel alehdi pwukoa ieu me kahrehda en lapalap sang meh silimen ko. Ahpw, kitail sehse ma e uhdahn anahne iang kohla mwohn sansalo de soh.

Sang ni ekei ahr kin song en kawehwehda dahme Daniel sohte iangki mih wasao, re koasoia me ele e seiloakla wasakis pwehn wia kisehn ah pwukoa doadoahk de mwein e soumwahu kahrehda e sohte iang mih wasao. Ahpw, Paipel sohte kin kasalehda met. E sohte lipilipil dahme mehlel, dahme Daniel wia sohte me koasoia, pwe ma mie me kapwarehda ire wet, me lapalap en Papilon kan pahn uhwongada oh kedipehki ih. (Daniel 3:8) Mwowe oh pil mwurin met, Daniel kadehdehda me e kin wia emen me lelepek ong Koht​—⁠sohte lipilipil kahpwal dah me e kin lelohng. (Daniel 1:8; 5:17; 6:4, 10, 11) Kahrehda, edetehn Paipel sohte kasalehda dahme kahrehda Daniel sohte iang mihki nan patapat en Dura, kitail kak likih me e sohte kak kahmahmikihla ah lelepek ong Siohwa Koht.​—Esekiel 14:14; Ipru 11:33.