Kitail Dehr Pwangahki Wiewia Dahme Mwahu

“Eri, kitail dehr pwangahki atail wiewia mwahu kan; pwe ma kitail sohte pahn pwangahkihda, ahnsou pahn leledo kitail ahpw pahn dolung.”​—KALESIA 6:9.

1, 2. (a) Dahme kahrehda irairen dadaur me anahn ma kitail men papah Koht? (b) Iaduwen Eipram kin kasalehda me e kin dadaurete, oh dahme sewese ih en wia met?

NIN DUWEN Sounkadehdehn Siohwa kan, kitail kin perenki kapwaiada kupwuren Koht. Kitail pil kin diar kommoalpen loalatail kan ni ahnsou me kitail kin ale “mehn wisik” en wiahla tohnpadahk kan. (Madiu 11:29) Ihme kahrehda, en iang Krais papah Siohwa kaidehn ahnsou koaros kin mengei. Wahnpoaron Pohl kin kasansalehda met ni ahnsou me e kangoange ienge Kristian akan: “Kumwail uhdahn pahn kin kanengamah, pwe kumwail en kapwaiada kupwuren Koht oh ale mehkan me e ketin inoukihong kumwail.” (Ipru 10:36) Irair en dadaur me anahn, pwehki papah Koht ekei ahnsou pahn kak apwal.

² Mouren Eipraam kin kadehde mwahu duwen ire wet. Pak tohto, e anahne wiahda pilipil apwal akan oh lelohng irair kapwunod akan. Ni ahnsou me Koht mahsanihong ih en kohkohsang eh mour nsenamwahu nan Ur, met kin wia tepin kahpwal me e pahn lelohng. Pwe mwurin met, e lelohng kahpwal en duhpek, kahpwal me kohsang mehn mpei kan, kereniong sohlahr eh pwoud, kailok me kohsang ekei ohl me kise kan, oh mahwen ehu. Kasongosong laud sang mehpwukat pahn lelohng ih. Ahpw Eipraam sohte kin pwangahki wia dahme pwung oh men kesehla eh pwoson. Eri, medemedewe, met inenen kapwuriamwei, pwe Mahsen en Koht saikinte unsekla duwehte nan rahnwet. Ni sansal, e ese duwen tepin kokohpo, wasa me Koht mahsanih: “Kowe oh liho pahn kin imwintihtipene; nein liho oh pil noumw kan pahn pil kin imwintihtipene kohkohlahte.” (Senesis 3:15) Pwehki Kadaudoko pahn kohsang peneinei en Eipraam, e sansal me Eipraam pahn lelohng kahpwal laud me kohsang rehn Sehdan. Eipraam kin doudouloale duwen met, oh met kin sewese ih en dadaur ni peren mendahki kalokolok.

3. (a) Dahme kahrehda sapwellimen Siohwa aramas akan nan rahnwet kasikasik me irail pahn lelohng kalokolok kan? (b) Kangoang dahieu me pwuhken Kalesia 6:9 kihong kitail?

³ Sapwellimen Siohwa aramas akan nan rahnwet pil anahne kasik me re pahn lelohng kalokolok kan. (1 Piter 1:6, 7) Pwe pwuhken Kaudiahl 12:17 kin padahkiong kitail me Sehdan kin ‘mahweniong’ luhwen me keidi kan. Oh pwehki “sihpw teikan” kin miniminiong irail me keidi kan, Sehdan pil kin mahweniong irail. (Sohn 10:16) Likin uhwong kan me kohwong Kristian akan ni ahr kin wia arail doadoahk en kalohk, ele re pil kin lelohng kasongosong kan nan pein arail mour kan. Pohl kangoange kitail en: “Eri, kitail dehr pwangahki atail wiewia mwahu kan; pwe ma kitail sohte pahn pwangahkihda, ahnsou pahn leledo kitail ahpw pahn dolung.” (Kalesia 6:9) Ei, edetehn Sehdan kin pilahn en kawehla atail pwoson, kitail anahne en pelianda ih, tengeteng nan pwoson. (1 Piter 5:8, 9) Kamwahu dah kan me pahn kohsang ni atail lelepek? Pwuhken Seims 1:2, 3 kawehwehda: “Riei ko! Kumwail perenkihda ma soangen apwal koaros kin lelohng kumwail, pwe kumwail ese me ni amwail pwoson eh kin powehdi apwal pwukat, e kin kalaudehla amwail kanengamah ni ahnsou apwal.”

Uhwong kan me kin Sansal

4. Iaduwen Sehdan kin wia uhwong kan me kin sansal pwehn song en kaluwetala lelepek me sapwellimen Koht aramas akan kin kasalehda?

⁴ Mouren Eipram kin kasansalehda me “soangen apwal koaros” pil kak lelohng emen Kristian nan rahnwet. Karasepe ieu, e anahne mahweniong irail imwintihti kan me kohsang Shinar. (Senesis 14:11-​16) Eri, rahnwet, e sohte wia mehkot kapwuriamwei en kilang me Sehdan kin pil uhwong kitail ni elen kalokolok. Sang ni imwin Mahwen Keriaun Sampah, koperment kan en sahpw tohto kin keinipwidi doadoahk en kasukuhl en Kristian me Sounkadehdehn Siohwa kan kin wia. Pwuhk en 2001 Yearbook of Jehovah’s Witnesses kin koasoia duwen kahpwal akan me imwintihti kan kin kihong riatail Kristian akan nan Angola, ahpw re kin dadaurete. Riatail brother oh sister kan kin likih Siohwa oh re kasalehda ni sansal me re sohte men kesehla ahr pwoson! Arail mwekid sohte kin kasalehda wiewia lemei de pelian, ahpw, ni karakarahk, irail sohte pweiek, eri, re wiewiahte arail doadoahk en kalohk.​—Madiu 24:14.

5. Iaduwen Kristian pwulopwul kan pahn kak lelohng kalokolok kan nan sukuhl?

⁵ Ahpw, kaidehn ahnsou koaros kalokolok kin wiawi ni mwomwen tiahk lemei. Eipram me ale kapai en naineki pwutak riemen​—⁠Ismael oh Aisek. Senesis 21:8-​12 padahkiong kitail me ahnsou ehu Ismael me “kapailoke” Aisek. Nan sapwellime kisinlikou ong mehn Kalesia kan, Pohl kin kasalehda me wiewia wet kaidehn ihte mwadong me kin wiawi nanpwungen seri kan, pwe Pohl mahsanih me Ismael kin kaloke Aisek! (Kalesia 4:29) Kapailok kan oh kauwe me kin kohsang rehn iengatail tohnsukuhl akan oh aramas akan me kin uhwong kitail, kitail kak nda me wiewia pwukat iei kalokolok kan. Kristian pwulopwul men me adaneki Ryan kin tamanda duwen ahnsou me ienge tohnsukuhl akan kin kaloke ih ni e koasoia: “Erein minit 15 me I kin mih nan bus kohlahng oh pwurodo sang ni ahi wasahn sukuhl, e kin likamwete awa kei pwehki ahi kin mwomwohd oh rongorong lokaia suwed oh kamedek me kin wiawi ong ie. Irail kin kakarakarihada paper clip kan ki lighter oh kin isingkin ie.” Ia kahrepen kalokolok suwed wet kin wiawi? Ryan pil koasoia: “Kaiahn me I kin ale sang sapwellimen Koht pwihn sansal kin kahrehong ie en weksang irail pwulopwul teikan nan sukuhl.” Ahn Ryan papah oh nohno pil kin kangoange ih, eri e kak dadaurete ni lelepek. Kumwail me pwulopwul kan, kapailok kan me kin kohsang rehn iengomw tohnsukuhl akan kin kahrehong uhk en nsensuwedla? Eri, ken dehr kesehla ahmw pwoson! Ma ke pahn dadaurete ni lelepek, ke pahn pil kilang pweidahn mahsen en Sises: “Meid pai kumwail ma aramas akan pahn lahlahwei kumwail oh kalokei kumwail oh karaunkin kumwail soangen suwed oh likamw koaros pwehki ngehi.”​—Madiu 5:11.

Pwunod kan me Kitail Kin Lelohng Ehu Ehu Rahn

6. Rahnwet, dahme pahn kak kahrehong nanpwungsuwed en wiawi nanpwungen Kristian akan?

⁶ Pali laud en kasongosong kan me kitail kin lelohng rahn pwukat kin wia pwunod akan me kitail kin lelohng ehu ehu rahn. Eipraam pil anahne dadaur pahn soangen irair pwukat ni ahnsou me akamai wiawi nanpwungen nein Eipram oh Lohd neira silepen mahn akan. (Senesis 13:5-7) Duwehte nan rahn pwukat, irairen aramas wekpeseng kan oh peirinki mehkot tikitik pahn kak kahrehda nanpwung suwed en wiawi nanpwungen tohnmwomwohdiso oh pil kin kak kahrehda solahr popohl nan mwomwohdiso. “Pwe wasa me peirin, luwak oh akamai kin mie, iei wasao me pingiping oh soangen suwed koaros pil kin mi ie.” (Seims 3:16, New World Translation) Ia uwen kesempwal kitail en dehr kesehla atail pwoson ahpw nantihong en dehr mweidong aklapalap en kauwehla popohl nanpwungatail, duwehte Eipraam wia, oh kitail en pil nsenohki pepehm en aramas teikan!​—1 Korint 13:5; Seims 3:17.

7. (a) Dahme emen pahn anahne wia ma emen ienge Kristian pahn kansensuwedih ih? (b) Iaduwen Eipraam wia mehn kahlemeng mwahu ni eh kin kolokolete eh nanpwungmwahu rehn aramas teikan?

⁷ Kolokol meleilei kak wia kahpwal ehu ni ahnsou me kitail kin pehm me iengatail me pwoson men sohte kin wia mwahu ong kitail. Lepin Padahk 12:18 mahsanih: “Lokaia mwahl kin kauwehla wasa rasehng kedlahs, ahpw lokaiahn loalokong kin kamwahuwihala wasa.” Lokaia kan me aramas kin koasoia ni sohte medemedewe, mehnda ma e sohte lingeringer, e kak kahrehda medek laud. Medek wet pil kak wia mehkot me inenen laud ma kitail pehm me e kin kohsang wia likamw de ni lipahned. (Melkahka 6:6, 7) Ahpw, e sohte konehng emen Kristian en mweidong ohlahn eh pepehm akan en kahrehong ih en nsensuwedla oh kesehla eh pwoson! Ma ke mihmi nan soangen irair wet, ken nantihong kapwungala irairo ni ahmw pahn koasoi ong aramaso me kansensuwedih uhk​—⁠ni kadek. (Madiu 5:23, 24; Episos 4:26) Ken wia uwen me ke kak en mahk ong aramaso. (Kolose 3:13) Ma kitail sohte pahn kouimwintihti, met pahn kahrehong pein atail pepehm akan oh irairen nanpwungen kitail oh mehteikan en mwahula. Eipram sohte kin kouimwintihti ong Lohd. Met kin sansal, pwehki Eipram kin mwadangete perehla Lohd oh eh peneinei ni ahnsou me re lelohng kahpwal!​—Senesis 14:12-​16.

Kasongosong kan Me Pein Kitail Wiahda

8. (a) Iaduwen Kristian akan pahn kak ‘kauwehkihla mohngiongirail soangen kapahtou tohtohie’? (b) Dahme kahrehda Eipraam kin ahneki madamadau en toupahrek ong mehkan me kin pid kepwehn sampah kan?

⁸ Ni mehlel, ekei kasongosong kan, kitail kin pein wiahda. Karasepe ieu, Sises panawihekin sapwellime tohnpadahk kan: “Kumwail dehr kin ngoangki kepwehpwehkihla kepweh sampah, me mer oh loangenmwet kin kauwehla, oh wasa me aramas lipirap akan kin dapengpeseng ihmw kan oh pirap ie.” (Madiu 6:19) Ahpw, ekei brother oh sister kan kin ‘kauwehkihla mohngiongirail soangen kapahtou tohtohie’ ni ahr kin inenen kasikasik en naineki mwohni kan laud sang mehkan me kin pid duwen Wehio. (1 Timoty 6:9, 10) Eipram kin nseneki en tohnmeteikihla kepwehn sampah me kansenamwahu kan pwehn kak kaperenda Koht. “Pwoson me e koukousoanki nan sahpw me Koht ketin inoukihong, nin duwen aramas en liki men. E kin mihmi nan impwal likou kei, duwehte Aisek oh Seikop, me pil iang ale soangen inowohte sang rehn Koht. Pwe Eipraam awiawih kahnimw ehu me Koht ketin kupwurehla oh kauwada, kahnimw me poahsoan poatopoat.” (Ipru 11:9, 10) Eipraam kin pwoson “kahnimwo” me wehwehki Wehin Koht me pahn kaunda sampah ni ahnsou kohkohdo oh met kin sewese ih en dehr koapworopworki kepwehn sampah kan. E soh pahn wiahla elen loloakong ong kitail en kahlemengih ih?

9, 10. (a) Iaduwen ineng en ndandla pahn kak wiahla kasongosong ong emen? (b) Rahnwet, iaduwen emen brother pahn kak wiahla “aramas aktikitik” men?

⁹ Medemedewe duwen pil ehu kasongsong. Pwuhk Sarawi kin kihda kaweid kehlail wet: “Ma emen lemeleme me ih mehkot, ni eh sohte mehkot ih, eri, e kin pitipitih pein ih.” (Kalesia 6:3) Kitail kin pil ale kaweid en “dehr wia mehkot sang ni atail ineng en roporop ong pein kitail de suwei mwahl; ahpw kitail mpahipene nanpwungatail, oh dehr wiahki me kitail mwahusang aramas teikan.” (Pilipai 2:3) Ekei kin pein wiahda arail kasongosong kan pwehki re sohte kin kapwaiada kaweid wet. Pwehki re kin inengieng pwais kaselel kan oh sohte inengieng “doadoahk mwahu,” irail kin nsensuwedla oh kaulimkihla arail sohte alehdi pwais kan nan mwomwohdiso.​—1 Timoty 3:1.

¹⁰ Eipraam wia mehn kahlemeng mwahu ni eh sohte ‘medemedewe me ih me lapalap.’ (Rom 12:3) Ni ahnsou me e tuhwong Melkisedek, Eipraam sohte ahneki madamadau me ih me lapalap sang Melkisedek pwehki e kenikenla rehn Koht. Ahpw weksang met, e pohnese duwen ahn Melkisedek pwais laud nin duwen samworo men oh e kihong ih eisek kis ehu. (Ipru 7:4-7) Rahnwet, Kristian akan pil anahne en nseneki ahneki madamadau en ‘aramas aktikitik kan’ oh sohte men mihla nan irair me aramas teikan pahn kilang oh kapinga irail. (Luk 9:48) Ma irail akan me kin apwalih mwomwohdiso kin mwomwen sohte kihong uhk ekei pwais kan, eri ni mehlel, ken kasawihada pein kowe pwen kilang iaduwen ke kak kamwahuwihala pein ahmw irair akan oh wiewia kan. En dehr nsensuwedkihla me ke sohte ale pwais akan, ahpw kapwaiada mwahu pwais ehu me ke kin ahneki​—pwais wet iei en sewese aramas teikan en esehla Siohwa. Ei, kitail en “pein karakarahkala pahn nin limen Koht manaman, pwe en ketin kasapwilkumwailda ni ahnsou me konehng.”​—1 Piter 5:6.

Pwoson Mehkan Me Kitail Sohte Kak Kilangki Masatail

11, 12. (a) Dahme kahrehda ekei nan mwomwohdiso solahr kin ngoang de mwasamwasahn? (b) Ni ahl dahieu me Eipraam wia mehn kahlemeng mwahu en pwoson sapwellimen Koht inou kan?

¹¹ Pil ehu kasongosong ele mwein pahn kak wiawi ma kitail pehm me koasoandi suwed wet kin mwomwen pwand en imwisekla. Nin duwen pwuhken 2 Piter 3:12, Kristian akan anahne “kasikasik sapwellimen Koht Rahno.” Erein sounpahr tohto, aramas tohto kin awiawih oh kasikasik “Rahno” en leledo. Kahrehda, ekei rehrail kin mworusala oh solahr kin ngoang oh mwasamwasahn.

¹² Eri, kitail pahn pwurehng medemedewe duwen mehn kahlemeng mwahu en Eipraam. E kin ni mour unsekiong pwoson sapwellimen Koht inou kan, edetehn e sohte pahn kilang pweidahn inou wet nan eh mour. Ni mehlel, e kilangada nah pwutak Aisek wia lalaudla oh kekeirada. Ahpw sounpar epwiki kei pahn dower powe mwohn kadaudok en Eipraam pahn wie tohtohla oh rasehng “usu kan en pahnlahng” de “ngeder en pihk kan pohn oaroahr kan.” (Senesis 22:17) Ahpw, Eipraam sohte kin nsensuwedla de mworusala. Wahnpoaron Pohl mahsanih duwen Eipraam oh sahm teikan: “Aramas pwukat koaruhsie pwoson, ahpw re melahr. Re sohte ale mehkan me Koht ketin inoukidahr; ahpw, sang wasa doh me re kilang oh perenkihda, re pil kadehdehda ni sansal duwen ar mehn liki oh mehn keiru kei nin sampah.”​—Ipru 11:13.

13. (a) Ni ahl dahieu me irail Kristian akan nan rahnwet kin rasehng “mehn keiru kan”? (b) Dahme kahrehda Siohwa pahn kasorehla koasoandi wet?

¹³ Ma Eipraam kak mwohneki sapwellimen Koht inou kan nan eh mour, mehnda ma pweidahn inou wet me “mih ni ahnsou doh ieu,” iaduwen kitail nan rahnwet, pwe pwepweidahn kokohp wet me inenen kerendohr! Duwehte Eipraam, kitail anahne en kilangwong kitail nin duwen “mehn keiru kan” nan koasoandi en Sehdan wet, oh kitail sohte men ahneki soangen mour me roporop oh rapahki peren en sampah. Mehlel, kitail men “imwin mehkoaros” en lelehr, kaidehn ihte kerendohr. (1 Piter 4:7) Ele mwein kitail kin lokolongki soumwahu laud kan. De kahpwal en mwohni kan kin wia kapwunod laud ong kitail. Ahpw, kitail anahne tamataman me Siohwa pahn kauwehla koasoandi suwed wet pwehn doarehla kitail, ahpw pwehn kasarawihla mware. (Esekiel 36:23; Madiu 6:9, 10) Imwio pahn leledo, ahpw kaidehn ni ahnsou ehu me kitail men en wiawi, ahpw ni ahnsou me Siohwa kin ketin koasoanehdi.

14. Rahnwet, iaduwen Kristian akan kin paiekihda sang sapwellimen Koht kanengamah?

¹⁴ Pil, tamanda me “Kauno sohte kin ketin pwapwand ni wiepen sapwellime inou, duwen ekei ar kin lemeleme. Ahpw, e kin ketin kanengamahiong kumwail, pwehki eh sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” (2 Piter 3:9) Tehk mahsen pwukat, Koht iei “kanengamahiong kumwail”​—towe kan en mwomwohdisohn Kristian akan. E sansal me ekei rehtail anahne ahnsou laud en wiliakapwala pwe kitail en kin mwakelekel oh pwung mwohn silangin Koht.” (2 Piter 3:14) Eri, e soh konehng kitail en kalahnganki me Koht ketin kanengamahiong kitail?

Kitail Kak Ahneki Peren Mendahki Kahpwal kan

15. Iaduwen Sises kak kolokolte eh peren mendahki kasongosong kan oh kahpwal kan, oh iaduwen Kristian akan kin paiekihda arail kin kahlemengih Sises rahnwet?

¹⁵ Rahnwet, mouren Eipraam kin wia mehn kasukuhl tohto ong Kristian akan. Eipraam sohte ihte kasalehda pwoson, ahpw e pil kin kanengamah, doadoahngki eh loalokong, eimah, oh limpoak me sohte kin roporop ong pein ih. E kin mwohneki eh kaudok ong Siohwa nan eh mour. Ahpw, kitail anahne tamataman mehn kahlemeng me keieu mwahu ong kitail en kalemengih iei Sises Krais. Edetehn e pil lelohng kasongosong tohto, e kolokolete eh peren. Dahme kahrehda? Pwehki e kin medemedewehte eh koapworopwor ong ahnsou kohkohdo. (Ipru 12:2, 3) Pohl wia eh kapakap oh mahsanih: “Eri, Koht me tepin kanengamah oh kakehlepen loalatail, eh ketin kaminiminihkinkumwailpene lamalamteieu ni amwail kin kahlemegih Krais Sises.” (Rom 15:5) Ki madamadau pwung ehu, kitail kak diar peren mendahki kasongosong kan oh kahpwal kan Sehdan kin wia ong kitail.

16. Dahme kitail kak wia ni ahnsou me kitail lemeleme me kitail sohte kak powehdi atail kahpwal akan?

¹⁶ Tamanda met, ni ahnsou ke pahn lelohng kahpwal akan me ke leme ke sohte kak dadaur, tamanda me Siohwa kin poakohng uhk duwehte E kin poakohng Eipraam. E kin kupwurki ken pweida. (Pilipai 1:6) Likih Siohwa ni unsek, oh liki me “e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” (1 Korint 10:13) Nantihong kaiahne pein kowe en ahnla wia omw wadawad en Mahsen en Koht ni ehu ehu rahn. (Melkahka 1:2) Ken poadidiong kapakap, oh ken peki rehn Siohwa en sewese iuk en dadaur. (Pilipai 4:6) E pahn “ketikihong ngehn sarawi irail kan me kin peki reh.” (Luk 11:13) Ken doadoahngki mwahu sawas kan me Siohwa ketikihong uhk en kakehlail ahmw pali ngehn duwehte neitail pwuhk kan me kin poahsoankihda iren Paipel kan. Kitail kak pil rapahki sawas sang rehn riatail brother oh sister kan ni pali ngehn. (1 Piter 2:17) Ken kaukaule iang towehda mihding kan koaros, pwe iei wasao me ke pahn ale kangoang pwehn sewese iuk en dadaur. (Ipru 10:24, 25) Ken perenki ni ahmw kin medemedewe duwen ahmw dadaur pwehki ke wehwehki me ahmw lelepek pahn kahrehong iuk en kenikenla mwohn silangin Koht oh ke pahn kak kaperenda Ih!​—Lepin Padahk 27:11; Rom 5:3-5.

17. Dahme kahrehda Kristian mehlel kan sohte pahn nsensuwedla oh mworusala oh mwuri kesehla arail pwoson?

¹⁷ Koht kin ketin loalloale Eipraam nin duwen “kompoakepah.” (Seims 2:23) Ahpw, Eipraam kin lelohng kasongosong tohto. Eri, Kristian akan kak kasikasik me irail pil pahn lelohng kasongosong kan nan “imwin rahn akan” me kin suwed. Pwe Paipel kaweidih kitail “aramas suwed oh me likamw akan pahn nantihweite sang ni me suwed ong ni me suwedsang.” (2 Timoty 3:1, 13) Dehr mworusala, ahpw ken kamehlele me kasongosong kan me kitail kin lelohng kin wia mehn kadehde ehu me imwin koasoandi en Sehdan kerendohr. Ahpw, Sises kin katamankin kitail me: “me pahn dadaurete lel ni imwi, ih me pahn mourla.” (Madiu 24:13) Eri, ‘kitail dehr pwangahki atail wiewia mwahu kan!’ Kahlemengih Eipraam, oh “kumwail alasang irail kan me kin pwoson oh kanengamah re lao lel dahme Koht ketin inoukihong irail.”​—Ipru 6:12.

Ke Tehkehr Duwen Ire Kesempwal Pwukat?

• Dahme kahrehda sapwellimen Siohwa aramas akan anahne kasik me re pahn lelohng kasongosong kan oh kalokolok kan nan rahn pwukat?

• Ni ahl dah kei me Sehdan pahn kehlail uhwong kitail?

• Iaduwen Kristian akan kak kapwungala ahr nanpwungsuwed akan?

• Iaduwen aklapalap kahrehong kitail en lelohng kasongosong kan?

• Ni ahl dahieu me Eipraam wia mehn kahlemeng mwahu ni e kin awiawih oh kasikasik pwepweidahn sapwellimen Koht inou kan?

[Kilel nan Pali 28]

Kristian pwulopwul tohto kin ale kalokolok sang iengarail tohnsukuhl akan me kin kapailoke irail

[Kilel nan Pali 31]

Mehnda ma pwepweidahn sapwellimen Koht inou kan “mih ni ahnsou doh ieu,” Eipraam kin kihong eh mour unsek ong inou pwukat