Perenki Wia Pein Ahmw Onop Mahsen En Koht

“I pahn medemedewe duwen mehkoaros me komw ketin wiadahr; I pahn medemedewe duwen sapwellimomwi wiewia manaman akan.”​—MELKAHKA 77:12.

1, 2. (a) Dahme kahrehda kitail anahne koasoanehdi atail ahnsou ong doudouloale? (b) Ia wehwehn “medemedewe” oh “doudouloale”?

NIN duwen tohnpadahk kan en Sises Krais, kitail anahne en nsenohki atail nanpwungmwahu rehn Koht oh kahrepe kan me kitail kin papah Ih. Rahnwet, pali moron en aramas akan kin inenen kedirepw oh re sohte kin wiahda arail ahnsoun doudouloale. Irail kin kedirepwki arail noahrok mwohni, pwainda dipwisou kan, oh rapahkihda peren en sampah soh-katepe kan. Iaduwen kitail kak en dehr lohdi pahn wiewia soh-katepe pwukat? Ni atail kin koasonehdi ahnsoun wiewia kesempwal kan, duwehte mwengmwenge oh memeir, kitail pil anahne koasonehdi ahnsou kan ni ehuehu rahn en medemedewe duwen sapwellimen Siohwa wiewia kan oh kupwur kan.​—Deuderonomi 8:3; Madiu 4:4.

² Mie pak ke kin nennenla oh pwurehng doudouloale mehkan? Ia wehwehn ahmw pahn doudouloale? Ehu dictionary kawehwehda lepin lokaia wet nin duwen met “katakataman de tetehk kanahiehng.” Oh lepin lokaia wet “tetehk kanahieng” kin wehwehki “katamanda de medemedewe ni ahmw nennenla oh keneinei.” Ia wehwehn met ong kitail?

3. Kekeirada ni pali ngehn kin pid duwen dah?

³ Ehu, e pahn anahne katamankin kitail duwen dahme wahnpoaron Pohl ntingwohng ienge ladu Timoty: “Lel ei pahn pwarowei, nantihong wadewadek Pwuhk Sarawi ong aramas akan, oh padapadahkih oh panapanawih irail. . . . [Doudouloale mehpwukat; poadidiong wiewia soahng pwukat,] pwe aramas koaros en kak kilang omw kekeirda.” Ei, irail anahne en kekeirada, oh mahsen en Pohl kin kasansalehda me doudouloale duwen mehkan ni pali ngehn oh kekeirada kin doadoahkpene. Met pil pahn mehlel nan atail ahnsou. Ma kitail men nsenamwahukihla atail paien kekeirada ni pali ngehn, kitail anahne “doudouloale mwhpwukat” oh “poadidiong” mehkan me kin pid Mahsen en Koht.​—1 Timoty 4:13-​15.

4. Sawas dah kei ke kak doadoahngki pwen sewese iuk en kaukaule doudouloale sapwellimen Siohwa Mahsen?

⁴ Ahnsou me pahn keieu mwahu ong kowe en doudouloale pahn poahsoanda pohn pein kowe oh ahmw peneinei koasondi kan ni ehu ehu rahn. Irail me tohto kin doudouloale iren Paipel ieu ni menseng kan ni ahnsou me irail kin wadek pwuhk me oaralap koasoia Examining the Scriptures Daily (Iren Rahn). Ni mehlel, aramas meh 20,000 me kin pein toukihda arail ahnsou en mih nan imwen Bethel kan me mih wasa koaros nan sampah kin tepikihda ehuehu rahn koasoiapene iren Paipel ieu erein minit 15. Ni menseng koaros, edetehn ekeite sang rehn peneinei en Bethel pahn iang pasapeng, tohnpeneinei en Bethel teikan pahn doudouloale duwen arail pasapeng kan oh wadawad kan. Sounkadehde teikan kin doudouloale Mahsen en Siohwa ni ahnsou irail kin kohla nan arail wasahn doadoahk kan. Irail kin rong audiocassette kan en Paipel oh Watchtower oh Awake! makisihn me kin wiawihda ni ekei lokaia kan. Lih pwopwoud tohto kin wia met ni ahnsou me irail kin wia arail doadoahk nan ihmw. Ni mehlel, irail kin kahlemengih sounmelkahka Asap, me ntingihdi: “Maing Kaun, I pahn patohwan tamanda wiepen nin limomwi lapalap akan; I pahn tamataman soahng kapwuriamwei kan me komw wiadahr kawao. I pahn medemedewe duwen mehkoaros me komw ketin wiadahr; I pahn medemedewe duwen sapwellimomwi wiewia manaman akan.”​—Melkahka 77:11, 12.

Ahneki Madamadau Pwung Kin Imwikihla Kapai kan

5. Dahme kahrehda pein wia atail onop Paipel anahne wia mehkot kesempwal ong kitail?

⁵ Nan atail ahnsou, aramas tohto solahr kin perenki wadek pwuhk kan pwehki aramas tohto kin kilang TV, kilang video cassette, kilang kasdo oh pil kilang computer. Ahpw, Sounkadehdehn Siohwa kan sohte anahne en alasang aramas pwukat. Pwe ni mehlel, wadawad en Paipel kin duwehte sahl en mour ieu me kin kadoke kitail ong Siohwa. Sounpar kid kei samwalahro, Sosua me wiliandi Moses nin duwen kaun en mehn Israel akan. Pwen paiekihda sapwellimen Siohwa kapai kan, Sosua anahne pein wadek sapwellimen Koht Mahsen. (Soshua 1:8; Melkahka 1:1, 2) Kaweid wet kin pil kohwong kitail nan atail ahnsou. Ahpw, pwehki ekei aramas sohte kin ale kasukuhl mwahu, irail kin apwaliki wadawad de mwomwen doadoahk laud ieu. Eri, dahme pahn kak sewese kitail en perenki wadek oh onop Mahsen en Koht? Pasapengpe diarekda nan mahsen kan en Nanmwarki Solomon me ntingihdier nan pwuhken Lepin Padahk 2:1-6. Menlau ale noumw Paipel, pahkpeseng oh wadek iretikitik pwukat. Eri, kitail kak koasoiapene iren Paipel pwukat.

6. Soangen madamadau dahieu kitail anahne ahneki me pid sapwellimen Koht mahsen kan?

⁶ Kitail tepikihda diarada kaweid wet: “Samwa, ma ke pahn padahngki ai mahsen kan, oh kesempwaliki, oh rong kanahieng ngilen me kupwurokong kan pwe ke kak kahre omw mongiong en nantihong dehdehkihla mehlel; . . .” (Lepin Padahk 2:1, 2, NW) Dahme kitail sukuhliki sang mahsen pwukat? Pein emenemen kitail koaros kin pwukoahki onop Mahsen en Koht. Ahpw, tehk mwahu mahsen pwukat, “ma ke pahn padahngki ai mahsen kan.” Lepin lokaia wet “ma” me kesempwal, pwehki pali moron en aramas akan sohte kin rong kanahieng Mahsen en Koht. Ma kitail men diarada atail kin perenki onop Mahsen en Koht, kitail anahne nseneki padahngki sapwellimen Siohwa mahsen kan oh kilangwong mahsen pwukat nin duwen pai kesempwal kan me kitail sohte men salongala. Kitail en dehr mweidong atail kedirepw kan en ehu ehu rahn en kahreong kitail en nohn kedirepw oh mwuhr kitail pahn solahr perenki oh likih Mahsen en Koht.​—Rom 3:3, 4.

7. Ni uwen me kitail kak, dahme kahrehda kitail anahne iang towehda mihding en Kristian akan oh rong kanahieng?

⁷ Kitail kin uhdahn “rong kanahieng” ni ahnsou me aramas kin kawehwehda Mahsen en Koht nan atail mihding en Kristian akan? (Episos 4:20, 21) Kitail kin ‘kahre omw mongiong’ en nantiong dehdehkihla mehlel? Ele mwein, emen me wia kahpahrek kaidehn emen me inenen koahiek, ahpw, ni ahnsou e kin doadoahngki Mahsen en Koht, e warohng atail kin rong kanahieng. Ni mehlel, ma kitail kak rong kanahieng sapwellimen Siohwa erpit, kitail anahne ni uwen me kitail kak, en iang towehda mihding en Kristian kan koaros. (Lepin Padahk 18:1) Medewehla ia uwen nsensuwed aramas emen ma e sohte iang towehda mihding me wiawi nan ihmw posoke nan Serusalem ni Pendekos 33 C.E.! Edetehn atail mihding kan sohte kin kapwuriamwei duwehte me wiawi ni ahnsowo, kitail kin doadoahngki Paipel me wia neitail pwuhk me kitail kin onop. Eri, ehu ehu mihding kak wia kapai ehu ong kitail ma kitail pahn rong kanahieng oh doadoahngki neitail Paipel kan.​—Wiewia 2:1-4; Ipru 10:24, 25.

8, 9. (a) Soangen madamadau dahieu kitail anahne ahneki ni ahnsou kitail pahn wia pein atail onop? (b) Iaduwen ke pahn kapahrekiong kesempwalpen kohl oh kesempwalpen wehwehki loaloakong me pid duwen Koht?

⁸ Nanmwarki loalokong Solomon doula oh mahsanih: “Ma ke pahn peki loalokong oh peki erpit ni ngidingid, . . .” (Lepin Padahk 2:3) Mahsen pwukat kin kawehwehong kitail duwen soangen madamadau dah? E kin padahkiong kitail duwen ineng kehlail en men wehwehki sapwellimen Siohwa Mahsen! Met akan kin kasalehda ineng en onop en kak alehdi loalokong pwe en kak wehwehkihla duwen dahme Siohwa kupwurki. Ahpw, ni mehlel, met kin wehwehki me emen pahn anahne en nannanti doadoahk laud, oh dahme Solomon mahsanih mwurin mahsen pwukat oh karasaras me e pil kihda pahn kasalehda duwen met.​—Episos 5:15-17.

⁹ E pousehla oh mahsanih: “Ma ke rapahki [en wehwehki] uwen omw kak, me pahn rasehng me kin rapahki silper de takai kesempwal me rir kan, . . .” (Lepin Padahk 2:4) Met kin katamankin kitail duwen doadoahk en ohl akan nan wasahn weirada takai kesempwal kan ni erein sounpar epwiki kei ni ahr kin rapahki takai kesempwal kan duwehte silper oh kohl. Ekei aramas kin kemehla aramas teikan pwehki kohl. Ekei aramas kin rapahki kohl erein arail mour. Ahpw, ni mehlel, ia uwen kesempwal kohl? Ma ke mih nan sapwtehn oh salongala oh ke men nim pihl, dahme ke pahn pilada: lepin kohl ieu de ehu kep en pihl? Edetehn pweinen kohl kin kalapw kohdi oh kohda, ekei aramas kin ngoangki rapahki kohl!a Eri, kitail ki ngoang laud sang irail anahne rapahki irairen erpit, dehdehki, oh loalokongkihla Koht oh sapwellime kan! Ahpw ia ekei kapai kan me kin kohsang soangen roporop wet?​—Melkahka 19:7-​10; Lepin Padahk 3:13-​18.

10. Dahme kitail kak diarada ma kitail pahn onop sapwellimen Koht Mahsen?

¹⁰ Solomon uhd pousehla wia e padahk: “Ma ke pahn kapwaiada met, eri, ke pahn esehla dahkot masak Kauno oh ke pahn pweida ni omw pahn padahngki duwen Koht.” (Lepin Padahk 2:5) Madamadau kapwuriamwei met​—met kitail aramas dipan akan pahn kak diarada “loalokong me pid duwen Koht,” iei Siohwa, Kaunepen Lahng oh Sampah! (Melkahka 73:28; Wiewia 4:24) Erein sounpar epwiki tohto mie aramas loalokong kan nin sampah wet me kin nantihong en wehwehki duwen mehkan me apwal en wehwehki me kin pid duwen atail mour oh audepen lahng oh sampah. Ahpw, irail sohte pweida diarada “loalokong me kin pid duwen Koht.” Pwekihda? Edetehn pasepengpe mie ong aramas koaros nan sapwellimen Koht Mahsen, iei Paipel, irail kin soikala Paipel oh nda me e nohn mengei, oh irail sohte pwungki oh wehwehki Paipel.​—1 Korint 1:18-​21.

11. Ia ekei kapai kan en pein onop Paipel?

¹¹ Solomon kihda pil ehu kahrepe: “Pwe Kauno iei Ih me kin ketikihdo kupwurokong; iei Ih me kin ketikihdo loalokong oh dehdehki.” (Lepin Padahk 2:6) Siohwa kin ni kadek sapan ketikihda kupwurokong, loalokong oh dehdehki ong aramas akan me kin nseneki rapahki irair pwukat. Kitail kin ahneki kahrepe tohto en kesempwaliki wia pein atail onop Mahsen en Koht, edetehn kitail anahne doadoahk laud, kaiahn, oh tohnmetei. Kitail pai, pwe mie neitail kopy kan en Paipel oh kitail sohte anahne pein ntingihdi kopy kan en Paipel, duwehte aramas en kawa ko kin wia!​—Deuderonomi 17:18, 19.

Momour Nin Duwen me Siohwa kin Ketin Kupwurki

12. Ia kahrepe kitail kin rapahki sapwellimen Koht loalokong?

¹² Ia kahrepe kitail kin wia pein atail onop Paipel? Pwen mwomwehda me kitail mwahu sang aramas teikan? Oh kitail men suweiki atail loalokong? Pwen wiahla emen me kin uhdahn esehla audepen Paipel? Soh. Atail mehn akadei, iei en wiahla Kristian akan me kin kapwaiada Paipel oh kahlemengih Krais ni atail wiewia kan koaros, oh ahnsou koaros kaunopada en sewese aramas teikan nin duwen Krais kin sewese aramas akan. (Madiu 11:28-​30) Wahnpoaron Pohl kihda kaweid wet: “Loalokong kin kahrehda aklapalap rehn aramas, ahpw limpoak me kin kakehlahda.” (1 Korint 8:1, NW) Ihme kahrehda kitail anahne ahneki lamalam aktikitik me Moses kasalehda ni e kapakap ong Siohwa: “Eri, ma komw kupwurperenkin ie, I patohwan peki rehmwi, komwi en ketin kasalehiong ie kupwuromwien, pwe I en [wehwehki komwi], oh papah komwi oh kin kaparanda kupwuromwi.” (Eksodus 33:13) Ei, kahrepen atail kin perenki loalokongla iei en kaperenda Koht, kaidehn suweiki atail loalokong mwohn aramas. Kitail men wiahla sapwellimen Koht ladu aktikitik warong kan. Iaduwen kitail kak kapwaiada mehn akadei wet?

13. Dahme emen anahne wia ma e men wiahla emen sapwellimen Koht ladu me warohng?

¹³ Pohl kihda kaweid wet ong Timothy duwen ahl me kitail kak kaperenda Koht: “Wia uwen omw kak mwohn silangin Koht, pwe en ketin pwungkin uhk, nin duwen soundoadoahk men me sohte kin namenengki eh doadoahk, me kin [doadoahngki] mahsen en Koht [ni mehlel].” (2 Timoty 2:15) Lepin lokaia pwukat “doadoahngki . . . ni mehlel” iei lepin lokaia ehu ni lokaiahn Krihk me kin wehwehki “tipwa mehkot ni inen.” (Kingdom Interlinear) Ekei aramas me kin sukuhl laud kin nda me wehwehn lepin lokaia wet kin pid emen soundeidei me kin tipwa likou ieu oh wiahda pattern, de soumwet emen me doadoahngki mehn deipwel oh wiahda warawar kan. Ahpw, ara doadoahk pahn anahne imwikihla mehlel de inen. Mouren padahk wet, ma Timoty men wiahla sapwellimen Koht ladu emen me kin kenikenla rehn Koht, e anahne ‘wia uwen [eh] kak’ pwen tehk ma eh padahk kan oh tiahk kan kin duwehte mahsen en padahk mehlel.​—1 Timoty 4:16.

14. Iaduwen pein atail onop pahn anahne kamwekid kitail ni atail wiewia kan oh lokaia kan?

¹⁴ Pohl kin kawehwehda iren mehn kasukuhl ohte ni ahnsou e kangoange ienge Kristian akan nan Kolose en “momour nin duwen me Kauno kin ketin kupwurki” ki “wa mwahu ni soangen doadoahk mwahu koaros oh kumwail pil pahn kekeirda ni amwail marainkihla Koht.” (Kolose 1:10) Sang iren Paipel wet, Pohl kin koasoia duwen emen me pahn warong mwohn Siohwa pahn anahne “wa mwahu ni soangen doadoahk mwahu koaros” oh pil “kekeirda ni arail pahn marainkihla [loalokong me pid duwen Koht.]” Met kin wehwehki, me Siohwa kin kupwurperenki kitail en kaidehn ihte kesempwaliki loalokong ahpw en mahsanih uwen laud me kitail kin kapwaiada sapwellime Mahsen, ni atail wiewia kan oh lokaia kan. (Rom 2:21, 22) Met kin wehwehki me pein atail onop pahn anahne kamwekidada atail madamadau kan oh tiahk kan ma kitail men kaperenda Koht.

15. Iaduwen kitail kak perehla oh kaiahne atail madamadau kan?

¹⁵ Rahnwet, Sehdan kin nantiong en kawehla atail kehl ni pali ngehn ni e kin song en kawehla atail madamadau kan. (Rom 7:14-​25) Ihme kahrehda, kitail anahne perehla oh kaiahne atail madamadau kan pwe Siohwa en kupwure kitail. Mehn perepe kitail kin ahneki iei “loalokong me pid duwen Koht,” me pahn kak “salihedi soangen lamalam koaros pwe en peikiong Krais.” Met iei kahrepe laud ehu en kamwekid kitail en nsenohki onop Paipel ni ehu ehu rahn, pwe kitail men kihsang madamadau roporop oh ineng en pali uduk kan sang atail madamadau kan.​—2 Korint 10:5.

Mehn Sawas kan en Wehwehki

16. Iaduwen kitail kak paiekihda sapwellimen Siohwa padahk kan?

¹⁶ Sapwellimen Siohwa padahk kan kin wahdohng kitail pai kan ni pali ngehn oh paliwar. Sapwellime padahk kan sohte kin kapwang oh re kin katapan nan atail mour en ehuehu rahn. Kitail wadek: “Ngehi me Kauno omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.” (Aiseia 48:17) Iaduwen Siohwa kin sewese kitail en kekeid nan sapwellime ahl me pahn kapaiada kitail? Keieu, kitail kin naineki sapwellime Mahsen, Pwuhk Sarawi. Met iei neitail pwuhk me keieu kesempwal, pwe ih pwuhk wet me kitail kin kalapw doadoahngki ong ale sawas de sukuhliki ire kesempwal kan. Ih kahrepe e pahn mwahu kitail en rong kanahieng oh doadoahngki neitail Paipel nan mihding en Kristian akan. Wiewia wet kin pweida mwahu, oh kitail kak kilang duwen soangen pweida wet sang poadopoad en ohlen Idiopia me ntingihdi nan Wiewia irelaud 8.

17. Dahme wiawi ong ohlen Idiopia men, oh dahme met kin padahkiong kitail?

¹⁷ Ohlen Idiopia men iangala pelien lamalam en mehn Suhs. E kin ni mehlel kamehlele Koht, oh e kin onop Pwuhk Sarawi. Ni ehu ahnsou me e dake were kuruma, oh wadewadek pwuhken soukohp Aiseia, Pilip eri tangala limwahn kuruma oh idek reh: “Ia duwe, komw wehwehki dahme komw wadewadeken?” Dahme ohlen Idiopia men sapeng? “ ‘Ia duwen ei pahn kak wehwehki, ma sohte me pahn kawehwehiong ie?’ E ahpw lukeiong Pilip en karada oh iang mwohndi nan kurumao.” Eri, ngehn sarawi doadoahngki Pilip en sewese ohlen Idiopia en wehwehki duwen kokohp en Aiseia. (Wiewia 8:27-​35) Dahme met kin kawehwehiong kitail? Atail kin pein wadek Paipel me sohte itar. Siohwa, ki sapwellime ngehn, kin doadoahngki pwihn en ladu lelepek oh loalokong pwen sewese kitail en wehwehki sapwellime Mahsen ni ahnsou me konehng. Iaduwen met kin wiawi?​—Madiu 24:45-​47; Luk 12:42.

18. Iaduwen pwihn en ladu oh lelepek kin sewese kitail?

¹⁸ Edetehn pwihn en laduo kin adaneki “lelepek oh loalokong,” Sises sohte nda me irail sohte kak pwupwudi. Pwihn en riatail me keidi lelepek kan kin wiawikihda Kristian soh unsek kan. Edetehn irail men wia dahme konehng, irail kak sapwungala, duwehte irail nan keieun senturi. (Wiewia 10:9-​15; Kalesia 2:8, 11-​14) Ahpw, mohngiongirail kin mwakelekel, oh Siohwa kin doadoahngki irail en kihong kitail sawaspen Paipel kan me kin kakehlahda atail pwosonki sapwellimen Koht Mahsen oh inou kan. Mehn doadoahk kesempwal ieu ong wia pein atail onop me pwihn en laduo ketikihong kitail iei New World Translation of the Holy Scriptures. Mieher pwuhk wet me wiawihda ni unsek de ekei apalihte, ni lokaia 42, oh kopy rar 114 kin wiawihdar ni ekei lokaia kan. Ni ahnsou me kitail pahn wiahda pein atail onop, iaduwen kitail kak doadoahngki pwuhk wet ni ahl me pahn keieu pweida mwahu?​—2 Timoty 3:14-​17.

19. Ia ekei ire kesempwal kei me mih nan New World Translation​—With References me pahn kak sewese emen ni ahnsou e pahn wia pein eh onop?

¹⁹ Karasepe ieu, New World Translation of the Holy Scriptures​—With References. Mie iren Pwuhk Sarawi teikan me kin kawehwehda ire ieu, oh pil mie koasoipen de kawehwehpen lepin lokaia me kin ntingihdi pah, oh mie lepin lokaia kan mehn sewese rapahkihda iren Pwuhk kan oh mie kawehwe oaretik kan ong oaralap 43, oh iangahki map kan oh mehn kaweid teikan. Pil mie “Tepin Koasoi,” me kin kawehwehda ia wasa sounkawehwehn Paipel wet kin kawehwehda Paipel wet. Ma e wiawihda nan lokaia ehu me ke kak wehwehki, nantihong en esehla ire kesempwal pwukat oh doadoahngki. Ahpw tamanda me Paipel iei pwuhk ieu me kitail pahn doadoahngki pwen tepikihda atail prokram en onop, oh New World Translation, iei kawehwehn Paipel ieu me kin ni pwung kasansalehda mwar sarawio oh kaundahn Wehin Koht.​—Melkahka 149:1-9; Daniel 2:44; Madiu 6:9, 10.

20. Mehnia peidek kan me kin pid pein onop anahne pasepengpe?

²⁰ Ele kitail pahn kak kihda peidek wet: ‘Ia pil ehu sawas kitail anahne pwen sewese kitail en wehwehki Paipel? Iaduwen kitail kak koasonehdi atail ahnsou ong wia pein atail onop? Iaduwen atail onop pahn kak pweida mwahu sang ni ahnsouwet? Iaduwen pein atail onop pahn kak kamwekid aramas teikan?’ Artikel en mwurin met pahn koasoiahda duwen ire kesempwal en kekeiradahn Kristian akan.

[Nting tikitik me mi pahs]

Ke Tamataman?

• Ia wehwehn “doudouloale” oh “medemedewe”?

• Soangen madamadau dahieu kitail anahne ahneki me pid onop Mahsen en Koht?

• Kahrepe dahieu kitail anahne ahneki ong wia pein atail onop?

• Sawaspen Paipel dah kei kitail kin naineki?

[Kilel nan Pali 23]

Tohn Bethel kan kin tepikihda ehuehu rahn arail wadekpene oh koasoiapene duwen iren Paipel ehu oh irail kin diarada me met kin kakehlahda arail pali ngehn

[Kilels nan Pali 23]

Kitail kak doadoahngki mwahu atail ahnsou ma kitail pahn rongorong audio cassette tape en Paipel kan ni ahnsou me kitail kin doadoahngki waratail sidohsa kan

[Kilel nan Pali 24]

Ohl akan kin doadoahk laud oh reirei pwen kak alehdi kohl. Eri, ia uwen laud ahmw kin nantiong en wia onop Mahsen en Koht?

[Credit Line]

Courtesy of California State Parks, 2002

[Kilels nan Pali 25]

Paipel duwehte pai kesempwal ieu me pahn kak kahluwaiukalahng mour soutuk