Wia Pein Atail Onop Kin Sewese Kitail En Wiahla Sounpadahk Koahiek Kan

“Medemedewe soahng pwukat; poadidiong wiewia soahng pwukat, pwe aramas koaros en kak kilang omw kekeirada. Kanakanahieng pein kowe oh pil kanahieng omw padahk kan.”​—1 TIMOTY 4:15, 16.

1. Dahme kin mehlel pid duwen ahnsou oh pein atail onop?

“PAIPEL mahsanih nan pwuhken Eklesiasdes 3:1, “Mehkoaros mie ahnsawi.” Met kin inenen mehlel ni ahnsou me kitail kin wia pein atail onop Paipel. Aramas tohto kin apwaliki medemedewe duwen mehkan me pid pali ngehn ma kitail kin pilada ahnsou oh wasa me sohte mwahu. Karasepe ieu, mwurin ehu rahn me ke doadoahk laud, mwenge laud ni soutik, oh ke mwohndi nan sehr kansenamwahu mwohn TV, ke lemeleme ke pahn perenki wia ahmw onop ni soangen ahnsowo? Mwein soh. Eri, dahme kitail kak wia? E sansal me kitail anahne pilada ahnsou oh wasa me keieu mwahu ong kitail pwehn kak sewese pein kitail en pweida mwahu ahnsoun onop.

2. Pali laud en ahnsou, ahnsou dah pahn mwahu en wia pein atail onop?

² Aramas tohto kin diarada me ni menseng kin wia ahnsou me keieu mwahu ong irail en wia pein arail onop, pwehki irail kin kak medemedewe mwahu ni menseng. Ekei kin wia arail onop mwotomwot ni ahnsoun kommoal en souwas. Nan karasaras me se pahn kasalehda met, menlau tehk duwen mehnia ahnsou me mwahu en wia wiewia ngehnin kesempwal kan. Nanmwarki Depit en wehin Israel en mahs ntingihdi: “Komw ketin katamankin ie ni menseng koaros duwen sapwellimomwi limpoak poatopoat, pwe I kin koapworopworkin komwi. Ei tungoal kapakap akan kin kohdawohng rehmwi; komw ketin kasalehiong ie ahl me I pahn keid ie.” (Melkahka 143:8) Soukohp Aiseia pil kin kasalehda soangen kalahnganohte ni e mahsanih: “Kauno, Wasa Lapalahpie, ketin padahkihong ie dahme I pahn patohwan, pwe I en kak kakehlahda me pwangadahr akan. Nimenseng koaros e kin ketin kangoangehkin ie I en rong sapwellime padahk.” Mouren padahk wet: kitail anahne wia atail onop oh kapakap ong Siohwa ni ahnsou me kitail kak medemedewe mwahu, sohte lipilipil ahnsou dah.​—Aiseia 50:4, 5; Melkahka 5:3; 88:13.

3. Soangen irair dah kei me mwahu en wia pein atail onop?

³ Pil ehu irair me pahn kak kahrehong atail onop en pweida, iei ma kitail sohte pahn mwohndiong pohn sehr kansenamwahu ieu. Pwe met sohte pahn sewese kitail en pepehd oh onop mwahu. Ni ahnsou me kitail kin onop, met pahn anahne kahrehong atail madamadau kan en doadoahk, ahpw ma kitail kin nohn nsenamwahu, e pahn kahrehong kitail en sohte medemedewe mwahu. Wasa mwahu ong onop oh doudouloale, iei wasa me sohte katairong oh sohte mehn kerempwa teikan. Ahmw onop sohte pahn kak pweida mwahu ma ke pahn wia ahmw onop oh ni ahnsowohte rong radio, kilang TV, de seri kan mwahuki ke en kilang de rong irail. Ni ahnsou me Sises men doudouloale duwen mehkot, e kin kohla wasa ieu me meleilei. E pil mahsanih duwen kesempwalpen diarada wasa ieu me sohte aramas mie ong kapakap.​—Madiu 6:6; 14:13; Mark 6:30-​32.

Wia Pein Atail Onop Kin Sewese Kitail en Iang Pasepeng

4, 5. Ni ahl dah kei Kupwurki brochure kin kihda sawas konehng kan?

⁴ Wia pein atail onop kin inenen kansenamwahu oh katepe laud ni ahnsou me kitail kin doadoahngki sawaspen Paipel kan pwen kak kalaudehla atail kin wehwehki duwen oaralap ieu, keieu ni ahnsou me kitail kin wia met pwen diarada pasepeng ong peidek mwahu kan me aramas ni mehlel kin kihda. (1 Timoty 1:4; 2 Timoty 2:23) Aramas kapw tohto kin tepikihda arail onop Paipel ni arail kin doadoahngki brochure me oaralap koasoia Dahme Koht Kupwurki Kitail en Wia?,a me wiawihda ni lokaia 261. Brochure wet inenen mengei en wehwehki oh audepe kan unsek kin poasoanda pohn Paipel. Brochure wet kin sewese aramas akan me kin wadek audepe kan en mwadang wehwehki duwen dahme Koht kin kupwurki irail en wia me pid kaudok mehlel. Ahpw, pwehki brochure wet tikitik, koasoipen ehuehu oaralap sohte kin oaretik. Ma emen me ke onop Paipel reh kin kihda peidek mwahu kan duwen oaralap en Paipel kei me kumwa kin koasoiapene, dahme ke pahn kak wia pwen diarada pil ekei ire kesempwal kan me kin pid oaralap en Paipel kei me pahn sewese ih en sapeng peidek pwukat?

⁵ Ong irail akan me kin naineki Watchtower Library en CD-ROM ni pein arail lokaia, met kin kamengeila arail rapahki soangsoangen ire kesempwal kan nan computer. Ahpw, iaduwen irail akan me sohte kin naineki dipwisou pwukat? Kitail en kasawihada mwahu oaralap riau me mih nan Kupwurki brochure pwen sewese kitail en kilang iaduwen kitail pahn kak kalaudehla atail kin wehwehki oaralap pwukat oh sapeng peidek kan ni oaretik​—keieu ma emen pahn kihda peidek duwehte: “Ihs Koht” oh “Soangen aramas dah Sises?”​—Eksodus 5:2; Luk 9:18-​20; 1 Piter 3:15.

Ihs Koht?

6, 7. (a) Peidek dahieu kin kohda me pid Koht? (b) Emen kaun en pelien lamalam kihsang mehkot kesempwal ieu ni ahnsou e wia kapahrek ieu, dahme e kihsang?

⁶ Iren Mehn Kasukuhl 2 nan Kupwurki brochure kin sapeng peidek kesempwal wet, “Ihs Koht?” Met iei padahk kesempwal ieu, pwe aramas emen sohte pahn kak kaudokiong Koht mehlel ma e sohte pahn wehwehki Ih de ma e pahn peikasalki ma mie Koht de soh. (Rom 1:19, 20; Ipru 11:6) Ahpw, nin sampah pwon, aramas akan kin ahneki soangsoangen madamadau tohto me pid ihs Koht. (1 Korint 8:4-6) Padahk kan en pelien lamalam kan kin ahneki pein arail kawehwe duwen peidek wet: “Ihs Koht?” Pali laud en pelien lamalam en Kristendom kin kamehlele Koht kin wia Koht en Trinity. Emen kaun en pelien lamalam ndand en U.S. wia kapahrek ieu me oaralap koasoia “Komw kin Ese Koht?” ahpw sohte pak ehu nan eh kapahrek me e doadoahngki mwaren Koht, edetehn e doadoahngki palien Pwuhk Sarawi ni lokaiahn Ipru ekei pak. Pwe ni mehlel e doadoahngki ehu kawehwehn Paipel me kin doadoahngki lepin lokaia wet: “Kaun” me sohte sansal ihs ih oh wehwe mwahu, oh kawehwehn Paipel wet sohte kin doadoahngki Siohwa de Yahweh.

⁷ Ire kesempwal ieu me kaun en pelien lamalam menet sohte doadoahngki ni ahnsou e koasoia duwen pwuhken Seremaia 31:33, 34: “ ‘Sohte emen rehrail pahn anahne padahkihong tohn eh wehi men en ese Kauno [lokaiahn Ipru: esehla Siohwa], pwehki koaros pahn ese ie, sang me tikitik lel me lapalap. I pahn mahkikihong diparail kan oh I solahr pahn tamanda arail sapwung kan. Ngehi, Kauno [lokaiahn Ipru, Siohwa] me mahmahsen.” Kawehwehn Paipel ieu me e doadoahngki me kihsangehr mwar sarawio, Siohwa.​—Melkahka 103:1, 2.

8. Dahme kin kasansalehda duwen kesempwalpen doadoahngki mwaren Koht?

⁸ Melkahka 8:9 kin kawehwehda dahme kahrehda doadoahngki mwaren Siohwa me inenen kesempwal: “Maing Siohwa at Kaun, ia uwen lingan mwaromwi wasa koaros nin sampah!” Kapahrekih kawehweh wet ong met: “O Maing Kaun, aht Kaun, ia uwen lingan mwaromwi wasa koaros nin sampah!” (King James Version; pil kilang The New American Bible, The Holy Bible​—New International Version, Tanakh​—The Holy Scriptures) Ahpw, nin duwen me artikel en mwowe kin koasoia, kitail kak alehdi “loalokong me pid duwen Koht” ma kitail kin mweidong sapwellime Mahsen en kamarainihkitailla ni pali ngehn. Ahpw, mehnia sawaspen Paipel ieu me pahn mwadang sapeng atail peidek kan duwen kesempwalpen mwar sarawio?​—Lepin Padahk 2:1-6.

9. (a) Mehnia pwuhk pahn kak sewese kitail en kawehwehda duwen kesempwalpen doadoahngki mwar sarawio? (b) Ni ahl dahieu me tohto sounkawehwehn Paipel kan sohte kasalehda wahu ong mwaren Koht?

⁹ Kitail kak wadek brochure me oaralap koasoia The Divine Name That Will Endure Forever, me wiawihdahr ni lokaia 69.b Sawaspen oaralap me koasoia “God’s Name​—Its Meaning and Pronunciation” (pali 6-​11) kin kasalehda duwen Tetragrammaton ni lokaiahn Ipru (ni lokaiahn Krihk, kin wehwehki “lepin nting pahieu”) kin pwarada mpen pak 7,000 nan palien Pwuhk Sarawi ni lokaiahn Ipru en mahs. Ahpw, kaunen pelien lamalam akan oh sounkawehwehn Paipel kan en pelien lamalam en mehn Suhs oh Kristendom kin nseneki kihsang Mwaren Koht sang pali laud en neirail kawehwehn Paipel kan.c Iaduwen irail kak nda me re kin ese Koht oh ahneki nanpwungmwahu reh ma irail kin kahng doadoahngki mwaren Koht? Pwen esehla uhdahn mware kin sewese aramas akan en wehwehki duwen sapwellime kupwur kan oh ihs Ih. Oh pil, ia katapan wasa me Sises mahsanih nan kapakap wet “Samat me ketiket nanleng: Mwaromwi en sarawihla rehn aramas koaros” ma kitail sohte kin doadoahngki mwaren Koht?​—Madiu 6:9; Sohn 5:43; 17:6.

Ihs Sises Krais?

10. Iaduwen kitail kak wehwehkihla duwen mouren Sises oh sapwellime doadoahk?

¹⁰ Iren Mehn Kasukuhl 3 nan Kupwurki brochure me oaralap koasoia “Ihs Sises Krais?” Nan audepen parakrap ehu lel weneu, e kin kawehwehda ni oaralap duwen Sises, iawasa e tepisang ia, oh kahrepen e ketidihdo sampah. Ahpw, ma ke men wehwehki duwen mouren Sises ni oaretik, me keieu mwahu​—likin Rongamwahu kan​—iei pwuhk wet me oaralap koasoia The Greatest Man Who Ever Lived, me wiawihda ni lokaia 111.* Pwuhk wet kin koasonehdi ni unsek keirekidi en pahr duwen mouren Krais oh sapwellime padahk kan me poahsonda pohn Rongamwahu pahieu. Audepen irelaud 133 kin koasoiada duwen mouren Sises oh sapwellime doadoahk. Ma ke men sukuhliki duwen ehu ire kesempwal me pid duwen Sises, ke kak kilang nan pwuhken Insight, Volume 2, pahnangin sawaspen oaralap “Sises Krais.”

11. (a) Dahme kahrehda Sounkadehdehn Siohwa kan kin weksang mehteikan duwen arail kin kamehlele Sises? (b) Ia ekei iren Paipel kan me kin ni sansal kasalehda me padahk en Trinity sapwung, oh mehnia pwuhk kan kin kak sewese kitail duwen met?

¹¹ Nan Kristendom, akamai laud kin wiawi me pid Sises, ma ih “Sapwellimen Koht Ohl” de “Koht Nah”​—eri, met kin wehwehki me akamaipene kin wiawi me pid dahme Catechism of the Catholic Church kin nda “ekiek kesempwal ieu me pid pwoson en Kristian,” iei Trinity. Sounkadehdehn Siohwa kan kin weksang pelian lamalam en Kristendom akan, pwe, irail kin kamehlele me Koht kapikada Sises oh Sises kaidehn Koht. Kawehwe mwahu duwen oaralap wet dierekda nan brochure wet Should You Believe in the Trinity?, me kawehwehda ni lokaia 95.d Ekei Iren Paipel kan me mih nan brochure wet pwen kawehwehda me padahk en Trinity me sapwung iei pwuhken Mark 13:32 oh 1 Korint 15:24, 28.

12. Ia pil ekei peidek kesempwal me pahn mwahu ong kitail en medemedewe?

¹² Nan parakrap en mwowe kan me koasoiada duwen Koht oh Sises Krais oh met kin kihda sawas ong iaduwen kitail kak wia pein atail onop pwen sewese aramas akan me sohte kin wehwehki padahk mehlel kan en Paipel pwen ale loalokong pwung. (Sohn 17:3) Ahpw, iaduwen aramas akan me kin iang mwomwohdiso en Kristian ni erein sounpar tohto? Sangete mahs lel ni ahnsouwet, irail kin sukuhlkier soahng tohto duwen Paipel, ahpw met kin wehwehki me irail pil anahne kanakanahieng pein ahr onop sapwellimen Siohwa Mahsen?

Dahme Kahrehda Ke Anahne “Kanakanahieng Pein Kowe”?

13. Madamadau sapwung dahieu mwein ekei kin ahneki me pid duwen wia pein atail onop?

¹³ Ekei aramas me mihmi nan padahk mehlel erein sounpar tohto, ele pahn kakete ahnla doadoahngkihte dahme irail sukuhlikiehr duwen Paipel ni tepin sounpar kan me irail iangala Sounkadehdehn Siohwa kan. E mengei en ahneki madamadau wet: “I sohte anahne onop ahnsou koaros duwehte irail me kapw kan anahne wia. I wadekehr Paipel pwon pak tohto iangahki sawaspen Paipel kan oh I kin wiewia met erein sounpar tohto.” Met pahn duwehte emen me nda: “I sohte anahne kanakanahieng dahme I kin kang ahnsou wet pwe I mwenge mwahu mahs.” Pwehn kak ahneki roson mwahu oh kehl, kitail ese me paliwaratail kan kin anahne kaukaule ale ketihnain en paliwar me kohsang mwenge mwahu kan me aramas kin kaunopada oh wiahda ni ahl me mwahu. Met pil kin mehlel ma kitail men kolokolete atail roson mwahu oh kehl en pali ngehn!​—Ipru 5:12-​14.

14. Dahme kahrehda kitail anahne kanakanahieng pein kitail?

¹⁴ Eri, kitail koaros, sohte lipilipil ma kitail wia tohnsukuhl en Paipel ni ahnsou werei de mwotomwot, kitail anahne rong sapwellimen Pohl kaweid ong Timoty, me wiahla aramas mah ni pali ngehn, sounapwalih likilik men: “Kanakanahieng pein kowe oh pil kanahieng omw padahk kan. Nantiong wiewia soahng pwukat, pwe ma ke pahn wia, ke pahn doarehla pein kowe oh pil irail kan me kin rong uhk.” (1 Timoty 4:15, 16) Dahme kahrehda kitail anahne rong kanahieng kaweid en Pohl? Tamataman me Pohl pil kawehwehda duwen atail kin mahweniong “manaman [“widing suwed akan,”] en Tepil” oh “manaman en ngehn suwed kan en pahnlahng.” Wahnpoaron Piter pil kihda kaweid wet me Tepil kin “raparapahki ihs me e pahn kadallehla,” oh “ihs” me e pahn kadallehla, pahn kakete wiahkin kitail. Atail soukauti en kalaudehla atail sukuhliki duwen Paipel pahn kak mweidong ahnsou ieu me Tepil kin raparapahki.​—Episos 6:11, 12; 1 Piter 5:8.

15. Ia mehn perepehn pali ngehn me mie rehtail me kitail kin ahneki, oh iaduwen kitail pahn kak wia kolokolete?

¹⁵ Eri, mehn perepe dahieu kitail kin ahneki? Wahnpoaron Pohl kin katamankin kitail ni e mahsanih: “Eri, kumwail ale sapwellimen Koht tehtehn mahwen, pwe ni rahn suwedo eh pahn leledo, kumwail en kak kehlail ong amwail imwintihtio, oh ni imwilah kumwail en dadaurete, sohte lohdi.” (Episos 6:13) Tehtehn mahwen en pali ngehn pahn kak doadoahk ihte ma kitail kin kalapw onehda sapahl. Tehtehn mahwen ni unsek me kin kohsang rehn Koht kin anahne pil pid wehwe kapw kan duwen Mahsen en Koht. Met kin kasansalehda duwen kesempwalpen atail kin wehwehki ire kesempwal kapw kan me Siohwa kin kasalehong kitail sang sapwellime Mahsen ki pwihn en ladu lelepek oh loalokong. Kaukaule pein onop Paipel oh sawaspen Paipel kan kin wia mehkot kesempwal ong onehdasapahl atail tehtehn mahwen kan ni pali ngehn.​—Madiu 24:45-​47; Episos 6:14, 15.

16. Iaduwen kitail kak tehk ma atail “mehn sansar en pwoson” kin kehlailte?

¹⁶ Pohl kin kasansalehda duwen ehu kisehn tehtehn mahwen kesempwal ong atail mehn perepe iei “pwoson pwen wia atail mehn sansar,” pwe kitail en kak kakunkihla ketieu kisiniei kan sang rehn Sehdan ni mwomwen karaun likamw akan oh padahk kan me kin lalahwe padahk mehlel. (Episos 6:16) E kesempwal kitail en tehk ia uwen kehlail atail mehn sansar en pwoson oh dahme kitail kin wia pwen onehdasapahl oh kakehlahda. Karasepe ieu, ele ke pahn kak wia peidek pwukat: ‘Iaduwen I kin kaunopada ong onop en Paipel ni ehu ehu wihk ni ai kin doadoahngki Kahn Iroir? I kin onop mwahu pwen sewese ie en “nsenoh sawaspene ni kasalepen ai limpoak oh ai wiewia mwahu kan” ni ai pahn kak iang wia pasepeng mwahu kan nan mihding? I kin pahkala nei Paipel oh wadek iren Paipel kan me ntingihdiehr eden Pwuhk, irelaud oh iretikitik ahpw audepe sohte ntingihdi? I kin kangoange mehteikan sang ei kin ngoangki wia pasepeng nan mihding kan?’ Kenatail mwengehn ngehn kin rasehng mwenge kekeluwak, oh doadoahk en kamwute mehkot me anahnepe mie pwe kitail en kak ale kapaipe ni unsek.​—Ipru 5:14; 10:24.

17. (a) Soangen pwoisen dahieu Sehdan kin doadoahngki pwen kaluwetala atail kehl en pali ngehn? (b) Dahme pahn kak pelianda pwoisen en ngehn wet me kohsang rehng Sehdan?

¹⁷ Sehdan kin ese duwen luwet akan en aramas soh unsek akan, oh ah pilahn mwersuwed kan kin inenen widing. Ehu ahl me e kin wia pwen kamwarekpeseng kehl en wia me suwed iei sang ni ah kin wiahda kilel suwed akan en kin mengei en pwarada nan TV, Internet, video, oh nan pwuhk kan. Ekei Kristian akan kin mweidong pwoisen wet en kaluwetala arail mehn perepe kan ni pali ngehn, oh met kin imwikihla ahr pwais kaselel kan en nan mwomwohdiso en kohsang rehrail de pil imwikihla suwed sang met. (Episos 4:17-​19) Eri, dahme pahn kak pelianda pwoisen en ngehn wet me kohsang rehn Sehdan? Kitail en dehr kommoal sang atail kin pein onop Paipel, iang towehda mihding en Kristian akan, oh tehtehn mahwen unsek me kohsang rehn Koht. Mehpwukat koaros kin sewese kitail en koahiekla pwen kak dehdehkihla dahme pwung oh dahme sapwung, oh tateki mehkan me Koht kin kalahdeki.​—Melkahka 97:10; Rom 12:9.

18. Iaduwen “kedlahs en ngehn sarawi” kin sewese kitail ong atail mahwen en pali ngehn?

¹⁸ Ma kitail pahn kolokolete ahnepatail en onop Paipel, kitail sohte pahn ahnekihte mehn perepe kehlail ieu me kin kohsang loalokong pwung en sapwellimen Koht Mahsen, ahpw kitail pil pahn ahnekihla wiepe kehlail akan ong pelian sang ni “kedlahs en ngehn sarawi, iei mahsen en Koht.” Mahsen en Koht iei “keng sang kedlahs me au riau. E kin lellong loalen aramas lel wasa keieu rir, wasa me mour oh ngehn kin tuhpene ie, wasa me kakon oh sahl akan kin tuhpene ie. E kin kadeikada ineng oh lamalam en nan kapehd en aramas.” (Episos 6:17; Ipru 4:12) Ma kitail kin koahiekla doadoahngki “kedlahs,” eri, ni ahnsou me kitail kin lelong kasongosong kan, edetehn e kin mwomwen sohte keper, kitail pahn kak dehdehkihla me kasongosong wet iei lidip ieu me kohsang rehn me suwedo. Atail loalokongkihla oh wehwehki duwen Paipel pahn sewese kitail en liksang dahme suwed oh wia dahme pwung. Eri, kitail koaros anahne idek pein kitail: ‘Nei kedlahs kin keng, de konsla? I kin apwaliki tamanda iren Paipel kan me kin kak kakehlahda ai kin pei ong mehkan me kin uhwong ai pwoson?’ Kitail en kolokolte atail kin ahnla wia pein atail onop ahnsou koaros oh met pahn sewese kitail en soikala Tepil.​—Episos 4:22-​24.

19. Kapai dah kei kitail kak ale ma kitail pahn nantihong wia pein atail onop?

¹⁹ Pohl ntingihdi: “Pwe audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.” Ma kitail pahn kapwaiada dahme Pohl mahsanihong Timoty, kitail kak kakehlahda pein atail pali ngehn oh atail doadoahk en kalohk pahn pweida mwahu. Elder oh ministerial servant kan pahn kak kapaiada tohnmwomwohdiso kan, oh kitail koaros pahn kak tengehdi nan pwoson.​—2 Timoty 3:16, 17; Madiu 7:24-​27.

[Nting tikitik me mi pahs]

Ke Tamanda?

• Soangen irair dah kei kin kak sewese iuk en pweida mwahu ni ahmw pahn wia pein ahmw onop?

• Sapwung dahieu me sounkawehwehn Paipel tohto wiahda me kin pid mwaren Koht?

• Mehnia iren Paipel kan ke kak doadoahngki pwen kasalehda me padahk en Trinity me sapwung?

• Dahme kitail kak wia pwen pere pein kitail sang widing kan en Sehdan, edetehn kitail wia Kristian mehlel kan erein sounpar tohto?

[Kilels nan Pali 27]

Wia pein atail onop pahn kak pweida ma kitail pahn pilada mwahu wasahn onop me meleilei

[Kilels nan Pali 30]

Noumw “kedlahs” keng de konsla?