‘Kumwail Pahn Kapakap Duwe Met’

KE WADLIKIHALA audepen Kapakap en Kauno? Met iei mwomwen kapakap ieu me Sises padahkki. Ni ahnsou me e wia Kapahrek en Pohn Dohl me ndand, Sises mahsanih: “Kumwail pahn kapakap duwe met.” (Madiu 6:9, New World Translation) Pwehki Sises me mahsanih met, kahrehda e kin adaneki kapakap en Kauno, oh pil adaneki kapakap en Samat.​—Latin, Paternoster.

Aramas tohto nan sampah kin wadlikihala Kapakap en Kauno oh kin kalap kapakapadal, ele rahn koaros. Ni ahnsou kerendo kan, ekei kin wia kapakap wet nan wasahn sukuhl oh pil nan kapokon en pwihn en aramas akan. Dahme kahrehda Kapakap en Kauno aramas tohto kin kesempwaliki?

Nan nein palien Roman Catholic kadekisim kin wiahki Kapakap en Samat me iei “poahsoan en kapakap en Kristian.” Ahpw, kitail anahne pohnese me aramas tohto me kin iang kapadal Kapakap en Kauno sohte uhdahn wehwehki audepen kapakap. “Nein mehn Canada nuhspepa me ede Ottawa Citizen koasoia, “Ma kowe emen me kin iang kisehn sarawi me kose me irail Kristian, ele ke kak wad rekerekihala Kapakap en Kauno kohkohwei sohte uhdi, ahpw mwein ke pahn apwaliki nda ni wawai oh sohte wehwehki dahme ke ndinda.”

E inenen kesempwal kitail en wehwehki audepen atail kapakap akan ohng Koht? Dahme kahrehda Sises ketikihong kitail Kapakap enKauno? Ia wehwehn met ong uhk? Kitail tehkpene ahnsou wet ong peidek pwukat.