Siohwa Kin Wia “Sounkating Ong Irail Akan Me Kin Rapahki Ih”
“Pwe mehmen me men kohwong rehn Koht uhdahn pahn kamehlele me Koht ketin mie, oh me Koht kin ketin katingih irail kan me kin raparapahki.”—IPRU 11:6.
1, 2. Dahme kahrehda ekei sapwellimen Siohwa aramas akan kin ahneki pepehm en soh itarki pein irail?
“I KIN wia Sounkadehdehn men en Siohwa kereniongehr sounpahr 30 ahpw I kin pehm me I sohte warohng ahd wet,” emen lih adaneki Barbara kasalehda.a “Mendahki I wia pioneer men oh ahnekiher soangen pwukoa kaselel tohto, mepwukat sohte itar pwehn kamehlelehong ie nan ahi mohngionget me I warohng kahdaneki Sounkadehde.” Emen ohl me ede Keith kasalehda me e ahneki soangen madamadauohte. “Ekei pak I kin pehm me I sohte warohng pwehki sapwellimen Siohwa aramas akan ahneki kahrepe tohto ren peren ahpw ngehi I sohte kin peren.” Met imwikihla ahi kin ahneki pwunod oh e kin kasuwedihla soahng kan.”
2 Tohtohn sapwellimen Siohwa sounpapah lelepek kan mahs oh pil ni ahnsouwet kin ahneki soangen pepehm pwukat. Mie pak ke kin ahneki soangen pepehm wet? Mwein ekei pak e kin mwomwen me ke mihlahr nan kahpwal kei me sohte kak uhdi, ahpw iengomw ni pwoson teikan kin mwomwen perenki mour, sohte arail kahpwal oh kin pereperen. Met mwein kin imwikihla ahmw kin pehm me Siohwa solahr pwungkin uhk oh solahr kin nsenohkin uhk. Ahpw, Pwuhk Sarawi kamehlelehong kitail: “E sohte ketin likidmeliehla me semwehmwe kan de mwamwahliki arail lokolok kan; e sohte kin ketin sohpeisang irail, ahpw kin ketin kupwure irail ni ar kin likweriong.” (Melkahka 22:24) Mahsen en kokohp pwukat duwen Mesaia kasalehda me Siohwa sohte kin ihte rong duwen pekipek en irail me lelepek kan ahpw e pil kin katingih irail.
3. Dahme kahrehda kitail sohte perepersang kapwunod en koasoandi suwed wet?
3 Aramas koaros pahn lelohng kahpwal en nan koasoandi suwed wet pil lella sapwellimen Siohwa aramas akan. Kitail kin mih nan sampah ieu me Sehdan imwintihti en Siohwa kin kakaun. (2 Korint 4:4; 1 Sohn 5:19) Sapwellimen Siohwa aramas akan sohte kin ale pereparail ki manaman kapwuriamwei kan, ahpw, ni pali teio, irail me kin wia aramas akan me Sehdan kin keieu kainene pwehn kaloke. (Sohp 1:7-12; Kaudiahl 2:10) Lao sapwellimen Koht ahnsou pahn leledo, kitail en “kanengamahiong atail apwal akan” oh “poadidiong kapakap,” oh koapworopworki ni soh peikasal me Siohwa kin nsenohkin kitail. (Rom 12:12) Kitail en dehr lohdiong pahn soangen madamadau me Siohwa sohte poakohng kitail.
Mehn Kahlemeng en Mahs Duwen Dadaurete
4. Kihda ekei karasepe en sapwellimen Siohwa aramas lelepek kan me dadaurete mendahki irair kapwunod kan?
4 Tohto en irail sapwellimen Siohwa ladu kan mahsie kin dadaur pahn irair kapwunod kan. Ana me nsensuwed laud pwehki e sohte kak naineki seri oh ong ih e leme me e mih nan soangen irair wet pwehki Koht manokehla ih. (1 Samuel 1:9-11) Ni ahnsou Elaisa kin ruksang Sesepel me men kemehla ih, e masepwehkada oh kapakap ong Siohwa: “Maing Kaun, I solahr patohwan warohng soahng pwukat. Komw ketin ale ei mour, pwe e konehngete I en mehla.” (1 Nanmwarki 19:4) Oh pil, wahnpoaron Pohl mwein pil pwunodki mehlel duwen ah soh unsek kan me kahrehda e wehkada: “Ni ahnsou me I kin inengieng wia dahme mwahu, mehkot me suwedte me mie me I kak pilada.” E pil nda met: “Uhdahn aramas paisuwed men ngehi!”—Rom 7:21-24.
5. (a) Iaduwen Ana, Elaisa oh Pohl ale katingparail? (b) Mehn kamweit dah kan kitail kak ale sang Mahsen en Koht me pahn sewese kitail en powehdi atail pepehm sapwung kan?
5 Ei, kitail ese me Ana, Elaisa, oh Pohl irail koaros dadaurete erein arail papah Siohwa, oh kating me e kihong irail me laud mehlel. (1 Samuel 1:20; 2:21; 1 Nanmwarki 19:5-18; 2 Timoty 4:8. Ahpw, re pil kin pepeiong pepehm koaros me aramas kin ahneki me duwehte nsensuwed, pwunod oh masepwehk. Kahrehda, e sohte pahn wia mehkot kapwuriamwei ong kitail ma ekei pak kitail kin ahneki pepehm pwukat. Ahpw, dahme kitail kak wia ma kapwunod kan en mour kin kahrehong kitail en tepida medemedewe ma Koht poakohng kitail de soh? Ke kak ale kamweit sang nan Mahsen en Koht. Karasepe, nan artikel en mwohn met, kitail koasoia duwen sapwellimen Sises mahsen me kasalehda me Siohwa wadekedier “pitenmoangatail koaros.” (Madiu 10:30) Mahsen pwukat kin kasalehda me Siohwa kin nsenohkin emen emen sapwellime kan. Pil tamanda duwen sapwellimen Sises karasaras duwen menpihr “sparrow.” Ma Siohwa kin mwahngih ni ahnsou me emen menpihr kin pwupwudi, iaduwen e kak pohnsehsehla apwal kan me ke kin lelohng?
6. Iaduwen iren Paipel kan kak wia mehn kamweit ong irail kan me kin pepeiong arail pepehm en soh itar kan?
6 Kitail aramas soh unsek kak wia mehkot kesempwal mwohn silangin Siohwa Koht, Sounkapikpatail me Lapalap? Ehi! Ni mehlel, iren Paipel tohto kin kak kamehlelehong kitail met. Ma kitail pahn medemedewe duwen mahsen kan nan iren Paipel pwukat, kitail kak iang nda lokaia kan en sounmelkahka ni e mahsanih: (Melkahka 94:19) Kitail en tehkpene ekei iren Paipel kan me kihda iren kamweit kan me pahn sewese kitail en kalahnganki atail wehwehkihla me Koht kin kesempwaliki kitail oh e pahn katingih kitail ni atail pahn doula wia kupwure.
“Sapwellimen Siohwa Aramas akan”
7. Ia kokohp me Siohwa kasalehong Malakai ong wehi suwedo?
7 Irair suwed wiawi nanpwungen mehn Suhs ko nan kelimau en senturi B.C.E. Irail samworo kan kin alehda mahn akan me sohte konehng wia mehn meirong pohn sapwellimen Siohwa pei sarawio. Irail sounkopwung kan kin poupali. Soangen tiahk suwed duwehte wunahni, likamw, mwersuwed oh tiahk en nenek oh kamwahl kohpeseng. (Malakai 1:8; 2:9; 3:5) Malakai kohpada kokohp kapwuriamwei ong wehi suwed wet. Kedekedeo, Siohwa pahn kapwurehdo sapwellime aramas oh kapwungala irair en wehio. Kitail wadek: “Siohwa mahsanih: ‘Re pahn wiahla nei aramas. Ni rahn me I pahn mwekid, re pahn wiahla uhdahn nei aramas. I pahn kupwur mahk oh kalahngan ong irail, duwehte sahm men me kin mahk oh kalahngan ong nah men me kin papah ih.’ ”—Malakai 3:17.
8. Dahme kahrehda Malakai 3:17 kin pil kadoadoahk ong pokon kalaimwun?
8 En Malakai kokohp pweida rehn irail Kristian me keidi kan, irail pwihn en 144,000. Wehi wet kin wiawihkihda “aramas ekei me kesempwal” rehn Siohwa. (1 Piter 2:9) En Malakai kokohp pil kin wia mehn kangoang ong “pokon kalaimwun,” me “uh mwohn mwoahlo oh mwohn Sihmpwulo, likawih likou pwetepwet reirei.” (Kaudiahl 7:4, 9) Irail kin wiahla pwihn ehute me kin mih pahn Sounsilepe tehmen, Sises Krais.—Sohn 10:16.
9. Dahme kahrehda sapwellimen Siohwa aramas akan kin wia “aramas kesempwal kei” ong Ih?
9 Iaduwen Siohwa kin kilangwohng irail akan me kin pilada en papah Ih? Nin duwen me Malakai 3:17 kasalehda, e kin kilangwohng irail duwehte pahpa limpoak men kin kilangwohng nah seri kan. Oh tehk iaduwen e kin likwerih sapwellime aramas—“aramas kesempwal kei.” Ekei sounkawehwe kan kin kawehwe lepin mahsen wet ong “pein nei aramas,” “ahi dipwisou me keieu kesempwal” oh “nei takai kesempwal kan.” Dahme kahrehda Siohwa kin kilangwohng irail kan me kin papah ih nin duwen soahng kan me inenen kesempwal ong ih? Ehu kahrepe iei pwehki e wia Koht men me kin kalahnganki soahng kan. (Ipru 6:10) E kin karanih oh kesempwaliki irail kan me kin papah ih sang nan mohngiongarail.
10. Iaduwen Siohwa kin pere sapwellime aramas akan?
10 Ke kak medewehda mehkot me ke ahneki de naineki me ke inenen kesempwaliki? Ke soh kin nantiong kanai oh pere pwe e de ohla? Siohwa kin pil wia duwehte met ong sapwellime “aramas kesempwal kan.” Mehlel, e sohte kin pere sang douluhl sapwellime aramas sang kahpwal kan en mour de kapwunod kan. (Eklesiasdes 9:11) Ahpw, Siohwa kak oh pahn pere sapwellime aramas lelepek kan ni pali ngehn. E kin kihong irail kehl me re anahne pwehn dadaur pahn kalokolok kan. (1 Korint 10:13) Ihme kahrehda, Moses padahkiong sapwellimen Koht aramas akan, mehn Israel kan: “Kumwail nan kapehd kehlail oh kommwad, . . . pwe Siohwa, amwail Koht, pahn ketin ieiang kumwail, e sohte pahn ketin keseikumwailla de likidmelieikumwailla.” (Deuderonomi 31:6) Siohwa kin katingih sapwellime aramas akan. Irail kin wia “aramas kesempwal kan” ong Ih.
Siohwa Kin Wia “Sounkating”
11, 12. Iaduwen atail pahn kalahnganki Siohwa nin duwen Sounkating pahn sewese kitail en peiong atail pepehm sapwung kan oh karanih Siohwa?
11 Pil ehu mehn kadehde me Siohwa kin kesempwaliki sapwellime aramas iei ni ah kin katingih irail. E padahkiong mehn Israel ko: “Kumwail song duwen ei manaman, oh kumwail ahpw pahn kilang me I pahn ritingadahng kumwail dipwisou kesempwal en nanleng oh kamwerehdiong kumwail soangen kamwahu kan ni uwe ieu me laud.” (Malakai 3:10) Siohwa pahn katingih sapwellime aramas akan oh ketikihong irail mour soutuk. (Sohn 5:24; Kaudiahl 21:4) Kisakis wet me sohte me kak pwainda iei kasalepe keieu laud en sapwellimen Siohwa limpoak oh kadek. E pil kin kasalehda me e kin inenen kesempwaliki irail kan me kin pilada en papah Ih. Sang ni atail pahn sukuhliki en kilangwohng Siohwa nin duwen sounkating men me sapwellimaniki irair en kadek sapan, met pahn sewese kitail en karanih Koht. Ni mehlel, Siohwa kin kangoange kitail en kilangwohng Ih nin duwen Sounkating! Pohl ntingihdi: “Mehmen me men kowohng rehn Koht uhdahn pahn kamehlele me Koht ketin mie, oh me Koht kin ketin katingih irail kan me kin raparapahki.”—Ipru 11:6.
12 Ni mehlel, kitail kin papah Siohwa pwehki kitail kin poakohng Ih—kaidehn pwehki e pahn katingih kitail. Ma kitail pahn pil medemedewe duwen koapworopwor me e pahn katingih kitail, met sohte wehwehki me kitail roporop. (Kolose 3:23, 24) Siohwa kin katingih irail me kin rapahki ih pwehki e kin nsenohki oh limpoak ong irail.
13. Dahme kahrehda kitail kak ndahki me koasoandi en meirong tomw kin wia mehn kadehde keieu laud en kasalehda sapwellimen Siohwa limpoak laud ong kitail?
13 Siohwa kasalehda uwen laud en ah kesempwaliki aramas sang ni sapwellime koasoandi en meirong tomw me Sises wia. Wahnpoaron Sohn ntingihdi: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) En Sises meirongkihla moure ong kitail kin kasalehda uwen sapwung en ahneki madamadau me Siohwa sohte poakohng kitail. E sansal me Siohwa kin sapwellimaniki limpoak laud ong kitail pwehki e mweidala sapwellime Iehros en matkinkitailla.
14. Dahme kin kasalehda iaduwen Pohl kin kilangwohng meirong tomw en Krais?
14 Ihme kahrehda, ma mie soangen pepehm sapwung kan de pepehm en peikasal pahn kohda rehmw, ke kak doudouloale duwen meirong tomwo. Ke kak kilangwohng koasoandi wet nin duwen kisakis sang Siohwa ong uhk. Ih met me wahnpoaron Pohl wia. Tamataman dahme e mahsanih: “Uhdahn aramas paisuwed men ngehi!” Ahpw, e pousehla oh mahsanih: “Kalahngan ong Koht, me kin ketin kapwaiada met rehn atail Kaun Sises Krais . . . me ketin loalloale ie oh meirongkihong Koht pein ih pwehki ngehi.” (Rom 7:24, 25; Kalesia 2:20) Ni ahnsou me Pohl mahsanih met, e sohte kin wehwehki me e kin roporop ong pein ih. E kin kasalehdahte me Siohwa kin nsenohki emen emen aramas. Duwehte Pohl, kitail anahne en sukuhliki en kilangwohng meirong tomw nin duwen kisakis sang Koht ong uhk. Siohwa kaidehnte Sounkamour Lapalap ahpw e pil kin wia Sounkating limpoak men.
Kanahieng en Sehdan ‘Widing kan’
15-17. (a) Iaduwen Sehdan kin kaluwetala kitail? (b) Mehn kangoang dah kitail kak ale sang dahme wiawiong Sohp?
15 Mwein ke pil kin medemedewe me mahsen ko dierek nan Pwuhk Sarawi sohte kin dokedoke iuk. Mwein ke pehm me kisakis en mour soutuk nan sapwellimen Koht koasoandi kapw pahn wia mehkot me meteikan pahn kak ale, ahpw kowe, ke sohte warohng. Ma iei duwen ahmw pepehm kan met, dahme ke kak wia?
16 Ke mwein esehier sapwellimen Pohl kaweid ong mehn Episos kan: “Kumwail pwuhriong nan tehtehn mahwen koaros me Koht ketikihong kumwail, pwe kumwail en kak pelianda kehlail en Tepil eh widing suwed kan.” (Episos 6:11) Ni ahnsou me kitail kin medewe duwen ahn Sehdan widing kan oh iaduwen e kin kaluwetala aramas, kitail kin tepin medewehda noahrok kepwe oh tiahk samin. Kasongosong pwukat me kauwehla pali ngehn en sapwellimen Koht aramas tohto mahso oh pil rahnwet. Ahpw, kitail en dehr pohnsehsehla ehu ahn Sehdan ahl en pitihkitaildi iei ah kin kihong kitail madamadau me Siohwa sohte poakohng kitail.
17 Sehdan me Tepil kin inenen mai en kihong aramas kan en ahneki soangen pepehm pwukat pwehn kahrehong irail en sohpeisang Koht. Tamataman en Pildad lokaia ong Sohp: “Mie emen me kak pwung oh mwakelekel mwohn silangin Koht? Maram pil sohte kin marain mwohn silangi, de usu kan sohte mwakelekel. Ahpw ia duwen aramas, me duwehte mwahs, kisin mensiek? Ia kesempwal en aramas mwohn silangin Koht?” (Sohp 25:4-6) Ke kak medewehla uwen kansensuwed en lokaia pwukat? Eri, ke dehr mweidohng Sehdan en kaluweteiukala. Ni pali teio, nantihong esehla ahl akan me Sehdan kin doadoahngki pwehn kaluweteiuk pwe ken kak ahneki kehl en pelianda oh wia dahme pwung. (2 Korint 2:11) Ong Sohp, mendahki Siohwa anahne kapwungala ih, E kapaiada Sohp pahn pak riau kapahrekiong dahme e ahneki mahso.—Sohp 42:10.
Siohwa “Lapalapasang Mohngiongatail”
18, 19. Ia wehwehn mahsen wet Koht “lapalapasang mohngiongatail,” oh kin ese soahng kan koaros?
18 Ni mehlel, e pahn wia mehkot apwal en kihsang pepehm en nsensuwed ma pepehm wet wereilahr rehtail. Ahpw, sapwellimen Siohwa ngehn sarawi kak sewese iuk en kihsang “pepehm loal kan . . . me kin pelianda erpit en Koht.” (2 Korint 10:4, 5) Ni ahnsou me madamadau sapwung kan kin kerempwa iuk, medemedewe duwen sapwellimen Sohn mahsen kan: “Ihme kitail pahn esehki me kitail kisehn me mehlelo. Oh iei duwen atail pahn ahneki likilik mwohn silangin Koht. Pwe ma mohngiongatail kadeingkitailda, kitail en ese me Koht lapalapasang mohngiongatail, oh pein ih kin ketin mwahngih mehkoaros.”—1 Sohn 3:19, 20.
19 Ia wehwehn mahsen wet “Koht lapalapasang mohngiongatail”? Ekei ahnsou, mohngiongatail kin kak kadeingkitailla, mehlel ni ahnsou me kitail kin mworuskihla atail soh unsek oh soh itar kan. De mwein mwomwen atail tikida kin kak kahrehiong kitail en pehm me kitail sohte katepe oh pil dahme kitail kin wia sohte katepe mwohn silangin Siohwa. Sapwellimen Sohn mahsen kan kin kamehlelehong kitail me Siohwa me lapalap sang met. E sohte kin tehk atail sapwung kan ahpw e kin tehk atail koahiek kan oh atail irair mwahu kan. E pil kin ese dahme kin poahsoankihda atail mwekid kan. Depit ntingihdi: “Pwe e mwahngih dahme kitail wiawihkihda; e pil ketin tamataman me kitail uhdahn pwehl.” (Melkahka 103:14) Ehi, Siohwa kin ese kitail laud sang pein kitail.
Rasehng “Sapwellimen Kauno Nihn Lingan”
20. Iaduwen kokohp en Aiseia me pid kapwurpwurdohn wehin Israel kin kasalehda iaduwen Siohwa kin kilangwohng sapwellime kan?
20 Siohwa doadoahngki soukohp Aiseia ni e ketikihong sapwellime aramas en kawa ko arail koapworopwor en kapwurpwurdo. Pwehki irail selidi nan Papilon ahnsowo, mahsen pwukat kin wia mehn kamweit ong irail pwukat. Ni arail kin kilikilangwohng arail pahn pwuralahng nan uhdakarail, Siohwa mahsanih: “Ke pahn rasehng sapwellimen Kauno nihn lingan.” (Aiseia 62:3) Siohwa doadoahngki mahsen pwukat oh ketikihong sapwellime aramas akan koapworopwor oh peren laud. E pil kin wia soahngohte ong wehin Israel en rahnwet. E kin mwomwen me e kihda irail ile pwe koaros en kilang oh linganki.
21. Iaduwen ke kak ahneki koapworopwor me Siohwa pahn katingih ahmw kin lelepek ong Ih?
21 Mehlel, kokohp wet kin keieu pweida rehn me keidi kan, ahpw e pil kin wia mehn kasalepen wahu me Siohwa kin ketikihong koaros me kin papah Ih. Mendahki ke ahneki pepehm sapwung kan oh pepehm en peikasal, taman me ke kin rasehng “nihn lingan” ong Siohwa. Eri, nantihong wia uwen ahmw kak koaros en kaperenda mohngiong en Siohwa ni ahmw pahn ngoangki wia kupwure. (Lepin Padahk 27:11) Ni ahmw kin wia met, ke pahn kak koapworopworki me Siohwa pahn katingih ahmw dadaur ni lelepek.
[Nting tikitik me mi pahs]
a Eden aramas akan nan artikel wet weksang uhdahn ederail.
Ke Tamatamante?
• Iaduwen kitail kin wia “mehkot kesempwal” mwohn silangin Siohwa?
• Dahme kahrehda e kesempwal kitail en kilangwohng Siohwa nin duwen Sounkating men?
• Ia ahl widing kan en Sehdan me kitail en kanahieng?
• Ni ahl dah me Koht “lapalapasang mohngiongatail”?
[Kilel nan Pali 24]
Pohl
[Kilel nan Pali 24]
Elaisa
[Kilel nan Pali 24]
Ana
[Kilel nan Pali 26]
Mahsen en Koht kin
direki soangen
mehn kamweit tohto