En Dadaurete ni Ahnsou me Seri Men Pahn Uhwongada Uhk

EMEN lih Kristian me kitail pahn kahdaneki Joy kin song kekeirada nah pwutako en poakohng Siohwa Koht. Ahpw ni ahnsou me pwutako lella sounpar eisek samwa, e uhwongada oh kohkohlahsang ih. Joy koasoia: “Ehdin pepehm kamedek me I ahnekihda met, I pehm me e pitiehdi, oh ahi mohngiong inenen ohkihla oh I pehm me soahng koaros me I wia sohte pweida. Pepehm oh madamadau kansensuwed kan kin kipeiehdi.”

Ele komw kin pil songosong en kekeirada noumw seri kan en poakohng oh papah Koht​—ah ke ahpw kin kilang emen de tohtohsang emen rehrail kin sohpeiweisang Koht. Ia duwen ke pahn kak dadaur pahn soangen kansensuwed laud wet? Dahme pahn kak sewese uhk en tengedihongete ahmw dadaur oh papah Siohwa?

Ni en Sapwellimen Koht Seri kan Kin Uhwongada

Kahk keieu iei en wehwehki me Siohwa mwahngih soangen pepehm me ke ahneki. Nan Aiseia 49:15, kitail wadek: “Kakete lih emen en manokehla uhdahn nah seri pwelel, oh sohte poakpoake wahnedio? Mehnda ma nohno men kak manokehla nah seri, ahpw ngehi, I sohte kak manokeiukala.” Ei, Siohwa kin ahneki soangen pepehm kan me duwehte ahn pahpa oh nohno kan. Nna song medewehla soangen pepehm kansenamwahu me e sapwellimaniki ni en sapwellime tohnleng ko koaruhsie kin kapikapinga oh papah ih. Nan eh mahmahsen ong Sohp “sang nan melimel ehu,” Siohwa katamando ahnsou kaperen ehu nin tepio rehn eh peneinei en tohnleng kan me kin miniminpene, ni eh mahsanih: “Ke mihmihki ia, ahnsou me I kapikada sampah? . . . Nin sohrahn en tepin ahnsowo usu kan wiakihteieu kokoul, oh sapwellime tohnleng kan ngisingiski ar peren.”​—Sohp 38:1, 4, 7.

Ahpw ahnsoukis mwuri, Koht mehlelo mahsanihada me emen rehn sapwellime tohnleng unseko uhwongadar ih oh wialahr Sehdan, me kin wehwehkiong “Sounpelian.” Siohwa pil mahsanih tepin sapwellime aramas Adam oh eh werek unseko, Ihp, iangalahr nan uhwong wet. (Senesis 3:1-6; Kaudiahl 12:9) Mwuri, sapwellime tohnleng teikan “kesehla uhdahn ar wasa” oh uhwongada Koht.​—Sud 6.

Paipel sohte padahkiong kitail sapwellimen Siohwa pepehm kan ni ahnsou me sapwellime seri unsek pwukat iangalahr nan uhwongada wet. Ahpw ni sansal Paipel mahsanih: “Ni KAUN-O eh ketin mahsanihada duwen aramas akan ar suwedlahr nin sampah, oh ar lamalam akan eh kin suwed ahnsou koaros, e ahpw koluhkihla eh ketin wiahda aramas oh ketikihdiong nin sampah. Kupwure eri toutoukihla.” (Senesis 6:5, 6) En mehn Israel kan, me iei sapwellime aramas pilipilda kei, ar uhwongada ih kin “kansensuwedihada” oh “katoutouwihala.”​—Melkahka 78:40, 41.

Eri sohte peikidpe me Siohwa wehwehki pepehm en pahpa oh nohno kan me kin weikekilahr tiahk ketihwohn neirail seri kan. Nan sapwellime Mahsen, Paipel, e ketikihdahr mehn kaweid kaselel oh mehn kangoang pwehn sewese pahpa oh nohno pwukat en kak dadaurete pahn soangen irair pwukat. Koht ketin kangoange irail en mweidong ih arail pwunod koaros, en kaaktikitikla pein irail oh en pelianda Sehdan me Tepil. Kitail kilang iaduwen idawehn kaweid pwukat pahn kak sewese uhk en tengediong dadaurete mendahki noumw serio uhwongada uhk.

Mweidong Siohwa Ahmw Pwunod kan

Siohwa mwahngih me soahng malaulau keite me kin kapwunode pahpa oh nohno kan laudsang arail kin pwunodki me neirail seri kan mih nan keper pwehki pein seri kan me pahn kahrehda de meteikan me pahn kahrehong neirail kan. Wahnpoaron Piter kasalehda ehu ahl en kak kehlail pahn kahpwal wet oh pil kapwunod teikan. E ntingihdi: “Kumwail mweidohng [Siohwa], amwail pwunod koaros, pwehki eh kin ketin apwahpwalih kumwail.” (1 Piter 5:7) Dahme kahrehda luhk wet oh pil koasoi en kansenamwahu wet keieu konehng pahpa oh nohno kan me neirail kan uhwongadar irail?

Ni ahnsou me noumw serio tikitik, ke kin nantihong pere ih sang keper kan, oh mwein e kin peikiong ahmw kaweid limpoak kan. Ahpw ahnsou me e lalaudla ahmw pahn kak kamwekid ih kin wia tikitikla, ahpw ahmw ineng kehlail en perehsang ih keper kan sohte kin tikitikla. Ni mehlel, mwein pepehm wet kin wia lalaudla.

Kahrehda ni ahnsou me serio kin uhwongada uhk oh lelong kahpwal en pali ngehn de pali en pepehm, de paliwar, ke pahn pehm me kowe me kahrehda kahpwal wet. Joy, lih me kitail koasoiahda nin tepin artikel wet, kin ahneki soangen pepehm wet. E koasoia: “Ehu ehu rahn I kin pwurepwurehng katamando dahme wiawiero, pwehki ei kin lokolongki pepehm me I sohte pweida nan ei pwukoa.” Eri, ih soangen ahnsou duwe met me Siohwa keieu kupwurki ken “mweidohng ih amwail pwunod koaros.” Ma ke pahn wia met, e pahn sewese uhk. Sounmelkahkao mahsanih: “Mweidohng KAUN-O omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.” (Melkahka 55:22) Joy kin alehdi soangen sawas kansenamwahu wet. E kawehwehda: “I kin koasoiong Siohwa soangen oaritik koaros me kawehwehda pepehm en loalei. I kin kasalehiong ahi pepehm koaros oh met inenen kin kasaledekihala ahi pwunod kan.”

Nin duwen pahpa de nohno soh unsek men mwein mie wasa kan me ke sapwungala ni ahmw kekeirada noumw seri. Ahpw mehnda ken medemedewehte sapwung pwukat? Sansal me Siohwa sohte kin ketin wia met, pwe sounmelkahkao kin koulki: “Ma komw pahn ketin kilelehdi dipat akan, ihs me kak pitsang sapwellimomwi kadeik?” (Melkahka 130:3) Mehnda ma ke pil pahpa de nohno unsek men, noumw serio pahn pil kakete uhwongada uhk. Eri, ken kin kasalehiong Siohwa ahmw pepehm kan nan kapakap, ih eri ahpw pahn sewese uhk en dadaurete. Ahpw ke anahne wia laudsang met, ma ke men tengedihongete papah Siohwa oh pitsang lohdi pahn Sehdan.

Kumwail Pein Karakarahkala

Piter ntingihdi: “Kumwail pein karakarahkala pahn nin limen Koht manaman, pwe en ketin kasapwilkumwailda ni ahnsou me konehng.” (1 Piter 5:6) Dahme kahrehda madamadau en karakarahk anahn ni ahnsou me noumw seri kin uhwongada uhk? Likin pepehm me kowe me kahrehda kahpwalo oh pil kamedek me ke ahneki pwehki noumw serio ketihwo, ke pahn pil ahneki pepehm en namenekla. Ke mwein pahn pwunodki me en serio wiewia kan pahn kauwehla eden ahmw peneineio, keieu ma e piskensang mwomwohdiso en Kristian. Ahmw pepehm en kapwukoahkin pein uhk kahpwalo oh pepehm en namenekla pahn kak kahrehiong uhk en men soikala mihding en Kristian kan.

Nan soangen irair wet, ke anahne doadoahngki erpit. Lepin Padahk 18:1 kalekehkin kitail: “Aramas me sohte kin men patehng meteikan kin nsenohkihte pein irail; re kin sapwungki mehkoaros me aramas koaros ese me pwung.” Ni ahmw kin kaukaule towehda mihding en Kristian kan mendahki ahmw nsensuwed, ke pahn kak alehdi iren kaweid kesempwal kan oh mehn kangoang kan. Joy kin wehkada: “Nin tepio, uhdahn I sohte men tuhwong aramas, ahpw I kin katamankihong ie kesempwalpen kaukaule dadaur koasoandi ngenin kan. Oh pil ehu, ma I mihmi nan ihmwo, I pahn mwomwohdete pwunpwunodiki ahi kahpwal kan. Mihding kan kin sewese ie en kihong ahi madamadau ong soahng ngenin kan me kin kakehleiehda. Uhdahn I kin kalahnganki me I sohte katohrohriehla en kelekelehpw oh katihasang utuht limpoak en riei brother oh sister kan.”​—Ipru 10:24, 25.

Pil tamataman me emenemen nan peneinei pahn “pein wa eh wisik” en pwukoahn Kristian. (Kalesia 6:5) Siohwa kin ketin kasik me pahpa oh nohno kan pahn kin poakohng oh kaweid neirail seri kan. E pil kin ketin kasik seri kan en peikiong oh kahkahki arail pahpa oh nohno kan. Ma pahpa oh nohno kan kin song uwen arail kak en katikada neirail kan “ni kaweid oh elen madamadau en Siohwa” eri pein pahpa oh nohno kan pahn adamwahu rehn Koht. (Episos 6:1-4, NW) Ma seri men uhwongada kaweid limpoak en eh pahpa oh nohno, eri pein eden serio me pahn ohla. Lepin Padahk 20:11 mahsanih: “Seri men pil kin kasalehda mwomwe sang ni eh wiewia kan; ke kak ese ma e lelepek oh mwahu.” En Sehdan uhwongada sohte mwahn kauwehla mwaren Siohwa rehn irail kan me wehwehki ire mehlel kan duwenmet.

Kehlail Pelianda Tepilo

Piter kaweid: “Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla.” (1 Piter 5:8) Duwehte laion men, Tepilo kin kalapw keieu raparapahki me pwulopwul oh soakoahiek kan. Mahso, laion kan kin kohkohseli nan sapwen Israel oh kin keper ong mahn mand kan. Ma kisin sihpw men kin salongasang pelin sihpw ko, e kin mengei en lohdi. Nohno sihpw men ele pahn uhdahte song en doarehla nah kisin sihpwo mendahki pein eh mour pahn lelong keper. Ahpw sihpw laud men pil sohte kakohng laion men. Ihme kahrehda sounsilepen sihpw kommwad men iei me anahn pwehn pere pelin sihpw ko.​—1 Samuel 17:34, 35.

Pwehn pere sapwellime kan me rasehng sihpw sang “laion emen me kin weriwer,” Siohwa ketin koasoanehdi pwihn en silepen sihpw ehu ni pali ngehn en apwalih pelin sihpw ko pahn epwelpen “sounsilepe lapalapo” Sises Krais. (1 Piter 5:4) Piter kaweidki irail ohl pilipildahr pwukat: “Kumwail en kin wia doadoahk en silepen sihpw me Koht ketikihong kumwail, oh apwalih irail, kaidehk ni mehnseiren ahpw ni kupwur mwahu duwen kupwur en Koht. Kumwail wia amwail doadoahk, kaidehk pwehki amwail pahn ale pweipweiki, a pwehki amwail kin uhdahn ngoangki papah.” (1 Piter 5:1, 2) Sang ni amwail minimin sawas nin duwen pahpa oh nohno kei, irail sounsilepe pwukat ele pahn kak sewese me pwulopwul men en kapwungala eleh kan ni pali ngehn.

Ni en sounsilepen sihpw Kristian kan kin kihda kaweid ong noumwail seri ketihwo kan, kumwail mwein pahn ahneki pepehm en men perehsang irail soangen kaweid pwukat. Ahpw amwail pahn wia met pahn wia sapwung laud ehu. Piter ketihtihki: “Pelianda kehlail [Tepilo]”​—kaidehn pelianda sounsilepe kan ni pali ngehn.​—1 Piter 5:9, NW.

Ni Ahnsou me Peneu Kin Kehlail

Ma noumw serio sohte koluhla ahpw ih emen Kristian me papidaislahr, e mwein pahn alehdi peneu me keieu kehlail—iei piskensang mwomwohdiso. Eri, uwen ahmw pahn ehuong oh koasoiong ih pahn poasoanda pohn eh sounpar oh pil pohn irair teikan.

Ma serio pwulopwulte oh kin koukousoan rehmw, eri ke uhdahn pahn doulahte apwahpwalih ih ong anahn kan en paliwar kan. E pahn pil anahne kaiahn ong eh tiahk kan oh peneu, oh kowe me pwukoahki kihda mepwukat. (Lepin Padahk 1:8-18; 6:20-22; 29:17) Ele ke pahn men wia onop en Paipel reh, me e anahne iang pidada. Ke kak sewese ih en tehk iren Paipel kan oh pwuhk kan me “ladu lelepek oh loalokong” kin kihda. (Madiu 24:45) Ke pil kak kahrehla ih ong ni mihding en Kristian kan oh kamwohndi ih limwahmw. Soahng pwukat koaros kin wiawi pwehki ke koapworopworki me e pahn kakete alehdiong kaweid en Paipel kan nan ah mohngiong.

Irairo pahn wekila ma seri piskenlao kaidehn emen me pwulopwul oh e sohte kin kousoan rehmw. Wahnpoaron Pohl kaweidki Kristian en mahs ko nan Korint: “Ahpw I koasoia duwen irail kan me kin wia riamwail [Kristian] ahpw kin nenek, kin noahrok, kin pwongih dikedik en eni kan, kin karaunlikamw, kin kamamsakau de kin loallap suwed. Kumwail dehr pil kin patehng irail oh iang mwenge rehrail.” (1 Korint 5:11) Mwein ekei koasoandi en peneinei pahn kak kahrehiong anahn ehu en koasoiong me piskenlao, ahpw pahpa de nohno Kristian men en nantihong dehr miniminiong irail ni ahnsou kan me sohte anahnepe.

Ma seri ketihwo men pahn alehdi peneu sang rehn silepe Kristian kan, e sohte pahn wia elen erpit ma ke song en soikala de katikitikihala arail kaweid kan me poasoanda pohn Paipel. Ahmw pahn poupoarki noumw seri ketihwo sohte pahn kak perehsang Tepilo. Ni mehlel met pahn kahrehiong pein uhk en mihla nan keper ong ni pali ngehn. Ni pali teio, ma ke utung sawas en sounsilepe pwukat, ke pahn “tengeteng ni amwail pwoson” oh ke pahn kihda sawas me keieu mwahu ong noumw serio.​—1 Piter 5:9.

Siohwa Pahn Ketin Sewese Uhk

Ma noumw serio pahn uhwongada uhk, ah ken tamataman me ke sohte kelehpwiki met. Pahpa oh nohno Kristian teikan pil kin lelong soangen kahpwal wet. Sohte lipilipil kahpwal me kitail lelong, Siohwa pahn ketin sewese kitail.​—Melkahka 68:19.

Likih Siohwa ni kapakap. Kaukaule werekiong mwomwohdisohn Kristian. Utung kaweid kan en irail kan me pilipildahr en wia sounsilepe kei. Ma ke wia met, ke pahn pil kak tengeteng dadaurete. Oh ahmw mehn kahlemeng mwahu pahn sewese noumw serio en kakete mwekidki luhk me kohsang rehn Siohwa en pwurodo reh.—Malakai 3:6, 7.

[Kilel nan pali 30]

En ale kehl sang ni kapakap oh sang rehn mwomwohdisohn Kristian