Kakairada Seri nan Sampah Ehu me Saledek en Wia Nsene
MIE pak ke kilang seri men eh ngihtehtehki en ale mehn mwadong ehu me eh pahpa oh nohno sohte men pwainda? De seri men me kin men tangseli oh mwadong ahnsou me eh pahpa de nohno ndahng en nennenla? Soangen ahnsou me duwehte met, pahpa oh nohno kan kin men wia dahme pahn keieu mwahu ong neira serio. Pali laud en ahnsou, pahpa oh nohno kin kalapw dukiong serio. Pahpa oh nohno kin wekid ar soh ong ei ahnsou me serio kin sengiseng oh ngihtehte ong ira.
Pahpa oh nohno tohto kin kamehlele me pahpa oh nohno mwahu iei me kin kihong nsenen serio koaros. Karasepe, mie roporop ehu me wiawiong seri 750 me mahki sounpar 12 lel 17 nan Amerika. Ni arail idekda rehrail dahme re kin wia ni ahnsou me arail pahpa oh nohno kan kin ndahng irail soh, kereniong persent 60 en seri pwukat kin nda me re sohte kin uhdi sang arail kin pekipeki ren kihong irail dahme re mwahukio. Persent 55 kin koasoia me ni arail kin wia met, re kin pweida. Arail pahpa oh nohno kan kin medewe me ni arail kin mweidohng nsenen serio, met kin kasalehda me irail poakohng ih. Ahpw, ia duwen, met me mehlel?
Nna medewehla lepin padahk wet: “Ma emen kin mweidala nsenen eh ladu men sang ni eh pwulopwul, e pahn wiahla aramas emen me sehse kalahngan.” (Lepin Padahk 29:21, NW) Mehlel me serio kaidehn ladu men. Ahpw, ke sou pwungki me mouren kaweid wet mwahu ong atail kakairada seri men? En mweidala nsenen serio oh kihong ih soahng koaros me e mwahuki pahn kak kahrehda e pahn wia aramas emen me “sehse kalahngan,” me wehwehki ketihwo, kahngohdi oh sohte kin kalahnganki mehkot.
Weksang met, Paipel kin kaweidki pahpa oh nohno kan: “Padahkihong kisin seri men duwen eh pahn momour, eri, e pahn tamatamante erein eh mour.” (Lepin Padahk 22:6) Pahpa oh nohno loalokong kan kin kapwaiada ineng en kaweid wet oh kin koasoanehdi koasoandi kan me katapan oh wehwe mwahu ong seri kan en kapwaiada ahnsou koaros. Re sohte kin medewe me en mweidohng nsenen serio iei limpoak, ni ara kin kihong serio dahme e mwahuki ma e kin wie sengiseng oh ngihtehtehki. Ahpw re kin pwungki sapwellimen Sises kaweid oh kin mehlel ong ara pahn kin nda: “‘Ei’ de ‘Soh.’” (Madiu 5:37) Dahme kin pid kaiahne seri kan? Nna medewehla karasaras mwahu wet.
“Rasehng Arep Kei nan Pehn Sounpei”
Paipel kin karasa nanpwungen pahpa nohno oh seri ni ahl ehu me kin kasalehda en seri men eh kin anahne kaweid en pahpa oh nohno kan. Melkahka 127:4, 5 mahsanih: “Pwutak kan me ohl emen nainekidahr ni eh pwulopwul, rasehng arep kei nan pehn sounpei men [“ohl kehlail men,” NW]. Meid pai aramaso me naineki tehtehn mahwen tohto pwukat!” Eri, seri kan duwehte arep kan a pahpa oh nohno kan duwehte ohl kehlail men. Sounkesik men sohte kin kasik me nah arep pahn lel wasa me e kin kaikainenehlahng ie pwehki depweila ieu, ih pil duwen pahpa oh nohno kan sang ni ara poakohng neira serio, ira kin kakairada serio ni uwen ara kak koaros. Ira kin men neira serio en lel “wasa” me ira men en lellahng, pwe en wia aramas koahiek men oh pil ahneki mour nsenamwahu. Ira men neira serio en wia aramas marain me kak ese pilada me mwahu me pahn katapan ong eh mour. Ahpw, pahpa oh nohno kan anahne doadoahk laud ma re men neirail seri kan en wia aramas marain, oh koahiek en pilada dahme mwahu pwe ren kak mour nsenamwahu.
Dahme anahn pwe arep pwoat en lella wasa me e dokedoke? E anahne en uhdahn kaunopada mwahu, perperla mwahu, oh kainenelahng wasa me e pahn lel. Met pil duwehte seri kan. Irail pil anahne kaunop mwahu, perepe mwahu oh kaiahn mwahu pwe ren kak laudla oh wiahla aramas pweida kei. Kitail pahn tehkpene ehuehu irair siluh kan ong kakairada seri.
Kaunopada Mwahu Arepo
Sounkesik kan ni mwehin Paipel kin kaunopada mwahu arep kan ni keneinei. Aramaso pahn anahne wiahkihda pein peh kan ah kaidehn misihn. E pahn wiahkihda tuhke me marahra oh inen. Imwio pahn anahne en keng. Ah ni kapin arepo wunen menpihr pahn katengtengdiong pwe arepo en kak inen ni eh pahn pipihr kohla.
Pahpa oh nohno kan pil kin men neirail seri kan en duwehte arep me inen kan, irail en mwahu oh ren dehr sohpeisang soahng kan me pwung. Kahrehda ma re pahn wia aramas loalokong kei, re sohte pahn kin pohnsehsehla arail soh itar akan, ahpw ni limpoak pahpa oh nohno kan pahn kin sewese irail en kak kamwahwihala oh powehdi arail luwet akan. Doadoahk laud anahn pwehki “seri kan kin wia mehkot sapwung ni ar sohte wehwehki oh seukautih.” (Lepin Padahk 22:15) Pwuhk Sarawi kin kaweidih pahpa oh nohno kan en kihong kaweid ong neirail seri kan. (Episos 6:4) Kaweid de peneu kin kesempwal ni atail kin kaiahnehda madamadau oh tiahk en seri kan.
Ihme kahrehda Lepin Padahk 13:24 kin mahsanih: “Ma ke sohte pahn kaloke [“doadoahngki tuhkehn peneu,” NW] noumw seri, eri, ke sohte poakepoake. Ma ke poakepoake, ke pahn kapwungala.” Nan iren Paipel wet, tuhkehn peneu kin wehwehki wiepen kaweid ehu me konehng. Ni en pahpa de nohno kin wia kaweid ni limpoak, e kin songosong en kapwungala sapwung me kak tengala rehn serio me pahn kak kahrehda serio en laudla oh lelohng kahpwal kan nan eh mour. Ihme kahrehda, pahpa oh nohno me sohte kin kaweidih neira seri sohte kin poakohng serio.
Pahpa de nohno limpoak men pil kin sewese nah serio en kak wehwehki kahrepen kaweid eh kin kohwong ih. Kaweid sohte kin pidadahte en kihda peneu kan oh pil kamakam, ahpw me keieu kesempwal serio en wehwehki kahrepen kaweido. Paipel kin mahsanih: “Mwahnakapw emen me peikiong kosonned me loalokong.”—Lepin Padahk 28:7.
Wunen mahn me sounkesik men kin kihong nin nah arepo kin sewese arepo en kak pihr inen. Padahk en Paipel kan me kohsang rehn ih me tapiada koasoandi en peneinei koaros kak ieiang seri kan oh wia kamwahuparail lao lel ahnsou me irail kakehr pein uhtohrda. (Episos 3:14, 15) Ahpw ia duwen pahpa oh nohno kan ar kak sewese neirail seri kan en kak “katengehdi” padahk pwukat loalarail?
Eri nna tehk mahs kaweid en Koht ong pahpa oh nohno kan en Israel ni mwehin Moses: “Dehr manokehla kosonned pwukat me I kihong kumwail rahnwet. Padahkihong noumwail seri kan. Kataman kin irail.” (Deuderonomi 6:6, 7) Eri pahpa oh nohno kan anahne wia soahng riau. Keieu, pein irail anahne en sukuhlki oh pil kapwaiada Mahsen en Koht, oh poakohngla sapwellimen Koht kosonned akan. (Melkahka 119:97) Eri met ira kakehr kapwaiada pali keriau me iei ara pahn “padahkihong” oh “kataman kin” neirail seri kan sapwellimen Koht kosonned akan. Ihme kahrehda pahpa oh nohno kan anahne en kasalehda kesempwalpen sapwellimen Koht kosonned akan pwehn kak tengediong nan mohngiong en seri kan. Irail pahn wia met sang ni ara pahn kin kaukaule padahki neirail seri kan.
Ahnsou wet, e pil pahn wia sawas laud ong seri kan ma pahpa nohno kan pahn kin padahkihong irail kaweid en Paipel ni elen limpoak. Mepwukat wia ire kesempwal kei ong en kaunopada “arep” kesempwal pwukat pwe irail en kak kekeidwei ni pwung lel ni arail pahn laudla.
Pere Mwahu Arepo
Kitail kak pwuralahng karasaras me kileldi nan Melkahka 127:4, 5. Taman me sounkesiko kin kolokol ‘arep ko nan peh.’ Arep kan anahne perperla mwahu mwurin ar kaunopadahr. Kin mie doupen arep kan me sounkesik men kin weuwa. Ihme kahrehda, sounkesiko kin weuwa nah arep kan nan doupe pwehn pere pwe e de ohla. Me kapwuriamwei pwehki Paipel pil kohpada me Mesaia kin rasehng arep kaselel pwoat me Seme kin ‘kasilehkin ih pein nin lime kan.’ (Aiseia 49:2) Siohwa Koht me wia Sahm limpoak men me kin ketin pere sapwellime Ohl kompoake, Sises, sang soangen kahpwal kan koaros lao lel ahnsou me kilelediong Mesaia en pwoula nin duwen kokohpo. E pil ketin pere sapwellime Ohlo en dehr lelohng mehla soutuk. Ihme kahrehda e ketin kaiasada ih en pwuralahng nanleng pwehn ketin mour kohkohlahte.
Me pil duwehte met, pahpa oh nohno mwahu kan pil kin nsenohki pere neirail seri kan sang soahng keper kan nan sampah suwed wet. Ele mwein pahpa oh nohno kan kin keinapwih neirail seri kan sang ekei wiewia kan me pahn kakete kahrehiong seri ko nan kahpwal. Karasepe, pahpa oh nohno me erpit kin kesempwalki kaweid en Paipel wet: “Werekiong aramas suwed kan e kin kauwehla tiahk mwahu.” (1 Korint 15:33) En pere neitail seri kan sang werekiong irail kan me sohte kin wauneki kosonned en Paipel pahn kak pere irail sang en wiahda sapwung laud kan me kakete pil kahrehiong irail en mehla.
Seri kan ele sohte kin perenki en pahpa oh nohno ara kin songosong en pere irail. Ni mehlel, ekei pak re kin uhwong pahpa oh nohno kan. Pwehki pahpa oh nohno kan kin men pere neirail seri kan iei me kahrehda pali laud en ahnsou re pahn kin ndahng seri kan soh. Lih wahun emen me kin ntingihda pwuhk kan ong kakairada seri kan koasoia: “Mwein ele re sohte pahn kasalehda arail kalahngan ong kumwail ni ahnsou me kumwail kin kaweidih irail, ahpw ni mehlel seri kan kin kalahnganki pahpa oh nohno me kin kihda kaweid kan me re pahn kak doadoahngki nan arail mour. Kitail kak wia met sang ni atail pahn kin kesempwalki atail pwukoahn kaweid ni atail pahn kin pere oh keinapwih ekei wiawi kan me sohte konehng.”
Ei, en kin pere noumw seri kan sang mehkot me pahn kihsang arail nsenamwahu de arail nanpwungmwahu rehn Koht iei mehkot me kesempwal pwehki e kin kasalehda me ke kin poakohng irail. Eri mwuhr, ni arail pahn wehwehkihda de esehda ia kahrepen omw kin keinapwih de pere irail sang ekei soangen wiewia kan, irail pahn kin kalahnganki mehlel omw limpoak ong irail.
Kainene Arepo
Tehk mah me nan Melkahka 127:4, 5 kin karasa pahpa oh nohno ong “ohl kehlail men.” Eri ia duwen, met wehwehki me pahpa kelehpw me kak kamwakid seri kan? Soh. Pwe iren Paipel wet kin kadoadoahk ong pahpa oh nohno koaros, pil iangahki irail akan me sohte pwopwoud ahpw naineki seri. (Lepin Padahk 1:8) Lepin lokaia “ohl kehlail men” kasalehda me kehl laud anahn pwehn kak kasikihla arepo. Ni mwehin Paipel kan, kesik ketieu kan kin wiawihkihda mete (copper) pwe sounkesiko en kak tiakidi pwehn katengehdi arepo nan dewe. Eri e sansal me kehl oh ahnsou laud anahn pwehn kak kadangpeseng kesik ketieuo oh koasoanehdi oh kainenehla arepo pwehn kak lellahng wasa me e dokedoke!
Kakairada seri kan pil kin anahne doadoahk laud. Duwehte arep pwoat me sohte kin kak pein pihrlahsang ni kesik ketieuo, ih pil duwen seri kan ar sohte kin pein keirda. Ahpw rahn pwukat, pahpa oh nohno tohto sohte kin nsenohki en kihong ahnsou laud me anahn ong kakairada mwahu neirail seri kan. Irail kin mweidohng TV, sukuhl oh iengerail me pwulopwul kan en padahkihong seri kan dahme pwung oh sapwung me pid duwen tiahk oh pil wia nsenen pwopwoud. Re kin mweidohng nsenen seri kan. Oh ma re kin pwangahkihda ahn seri kan ar kin ngihtehtehki dahme re mwahuki, eri re kin nda ehng pwehki dene re sohte men kansensuwedih neirail seri kan. Ahpw ni mehlel, arail kin mweidala nsenen seri kan iei me kin kahrehda seri kan ar kin kalapw lelohng nan kahpwal akan.
Kakairada seri kan kin wia doadoahk apwal ehu. En wia doadoahk wet ni mohngiong unsek oh pil iangahki kaweid sang Mahsen en Koht sohte mengei, ahpw kapai me kitail pahn ale sang met me inenen laud. Mie makasihn ehu me koasoia: “Roporop kan . . . kasalehda me seri kan me arail pahpa oh nohno kan kin kesempwalki arail pwukoahn kakairirailda ni limpoak oh kin utung neirail seri kan ahpw ni ahnsowohte pil kin kolokol koasoandi pwung kan kin pweida nan sukuhl. Irail kin ese ehuong meteikan, kin koapworopworki pein irail oh pil kin ahneki peren laudsang seri kan me arail pahpa oh nohno kin lamaih irail de kin mweidala nsenarail.”—Parents.
Mie kapai me pil mwahusang met. Mwowe ekis kitail koasoiapeneier tepin iren Lepin Padahk 22:6: “Padahkihong kisin seri men duwen eh pahn momour.” Ireo pil pouselahte ni mahsen kaperen pwukat: “Eri, e pahn tamatamante erein eh mour.” Eri ia duwe, lepin padahk wet kin kadehde me met uhdahn pahn pweida? Kaidehn ahnsou koaros. Noumw serio ahneki saledek en pilipil oh ni eh pahn kekeirda, e pahn kin pilada dahme e pahn wia. Iren Paipel wet kin kihda mehn kangoang limpoak ehu. Dahkot met?
Ma ke kin kakairada noumw seri kan nin duwen kaweid en Paipel, ke kin elehda irair kan me pahn wahdo imwila mwahu en kilang noumw seri kan ar pahn keirda oh wiahla aramas koahiek, peren oh pweida mwahu. (Lepin Padahk 23:24) Eri, nantihong uwen omw kak koaros en kaunopada “arep” kesempwal pwukat, ni omw pahn kin pere oh pil kin kihong omw ahnsou oh kehl en kaweidih oh kaiahne irail. Ke sohte pahn koluhkihla met.
[Kawehwehpen kilel kan nan ehu ehu pali 28]
Pahpa oh nohno kan kin poakong neirail seri kan ma re kin mweidohng nsenarail kan koaros?
[Kawehwehpen kilel kan nan ehu ehu pali 29]
Pahpa oh nohno mwahu kan kin pere seri kan sang kahpwal akan en sampah suwed wet
[Kawehwehpen kilel kan nan ehu ehu pali 31]
Kakairada seri wia doadoahk apwal ehu, ahpw kapai kan me inenen laud