Mour Soutuk nin Sampah—Koapworopwor Ehu me Pwurehng Dierekda

“Oh met, Daniel, pahkpene pwuhken . . . lao lel imwin ahnsou. Me tohto pahn kohkohseli oh loalokong mehlel pahn lalaudla.”—DAN. 12:4, NW.

1, 2. Soangen peidek dah kan me kitail pahn tehk nan iren onop wet?

ARAMAS rar kei rahnwet kin wehwehki ni sansal duwen koapworopwor en mour kohkohlahte nan paradais nin sampah me poahsoankihda Paipel. (Kaud. 7:9, 17) Ni tepin poadopoad en aramas, Koht ketin kasalehda me aramas wiawihda pwehn mour kohkohlahte ahpw kaidehn en mour sounpar kei te oh mehla.—Sen. 1:26-28.

² En aramas pahn pwurehng unsekla duwehte me Adam ahneki nin tepio kin wia kisehn koapworopwor en mehn Israel kan. Palien Pwuhk Sarawi ni Lokaiahn Krihk kin kawehwehda ia duwen Koht pahn ketin kahrehiong aramas akan en mour kohkohlahte nan Paradais nin sampah. Eri, dahme kahrehda koapworopwor wet anahne en pil pwurehng dierekda? Ia duwen aramas rar kan arail esehda met?

Mie me Kin Ekihla Koapworopwor Wet

3. Dahme kahrehda e sohte kapwuriamwei me koapworopwor en mour soutuk nin sampah solahr kin sansal?

³ Sises ketin kohpada me soukohp likamw akan pahn kauwehla sapwellime padahk kan oh pahn pitihdi aramas tohto. (Mad. 24:11) Wahnpoaron Piter kaweidih irail Kristian akan: “Met pahn pil duwehte rehmwail: sounpadahk likamw ekei pahn pwarada.” (2 Pit. 2:1) Wahnpoaron Pohl kin koasoia me “ahnsou ehu pahn leledo me aramas akan sohla pahn men rong padahk mehlel, ahpw re pahn idawehnla pein nsenarail; oh re pahn piladahng pein irail sounpadahk tohto me pahn kin koasoiaiong irail soahng kan me re kin men rong.” (2 Tim. 4:3, 4) Sehdan kin iang pitih aramas akan oh doadoahngki irail kan me dene irail Kristian kei pwehn ekihla padahk mehlel duwen kupwuren Koht ong aramas akan oh sampah.—Wadek 2 Korint 4:3, 4.

4. Koapworopwor en aramas dahieu me kaunen pelien lamalam likamw akan kin soikala?

⁴ Iren Paipel kan kin kawehwehda me Wehin Koht iei koperment ehu nanleng me pahn kauwehla kaundahn aramas koaros. (Dan. 2:44) Erein kaundahn Krais pahr kid, Sehdan pahn selidi nan pwoahr loalo me soh kapi, me melahr akan pahn iasada, oh aramas akan pahn unsekla nin sampah. (Kaud. 20:1-3, 6, 12; 21:1-4) Ahpw kaunen pelien lamalam kan me dene irail Kristian kei kin alehda oh kapataiong lamalam teikan nan arail padahk kan. Karasepe, nan pahr riepwiki samwa, Padre Origen sang Alexandria kin kauwe irail kan me kamehlele duwen kapai kan ong sampah me pahn pweida erein Pahr Kido. Ehu dikseneri ndahki soun samanih pelien Kadolik, me adaneki Augustine sang Hippo (pahr 354-430), me e kin “utungada madamadau me pahr kido sohte pahn mie.” (The Catholic Encyclopedia)a

5, 6. Dahme kahrehda Origen oh Augustine kin uhwong padahk en pahr kid?

⁵ Dahme kahrehda Origen oh Augustine kin uhwong padahk en pahr kid? Origen alehdi padahk kan sang tiahk en mehn Krihk me dene mie mehkot me momour mwurin mehla. Plato pil kin padahngki duwen met oh Origen kin uhdahn kamehlele. Ihme ohl emen me samanih pelien lamalam akan me adaneki Werner Jaeger koasoia me Origen “kin kapatapene padahk en Kristian akan oh padahk en Plato.” Eri, Origen kin padahngki me kapai koaros me pahn wiawi erein Pahr Kido sohte kak wiawi nin sampah ahpw e pahn wiawi nanleng.

⁶ Mwohn e wekidala eh lamalam ong padahk en Kristian likamw akan ni eh sounpar 33, Augustine wiahlahr emen me kin utung ehu padahk me kohsang padahk en Plato me Plotinus kalaudehla nan pahr riepwiki samwa. E kin kolokolte padahk wet mwurin e wekidala eh pelien lamalam. Ehu dikseneri koasoia: “E kin pwukoahki laud kapatpatpenehn padahk kan en Kadehde Kapw oh padahk en Plato me kohsang lamalam en Krihk.” (The New Encyclopædia Britannica) Nan ehu dikseneri kasalehda me Augustine kawehwehda me Kaundahn Pahr Kido me kileldi nan Kaudiahl irelaud 20 wia “soai pwoat.” E pil kapatahiong: “Me samanih pelien lamalam akan . . . mwuhr alehda kawehwe wet . . . oh solahr utung tepin padahk me pid pahr kid nin sampah.” (The Catholic Encyclopedia)

7. Padahk likamw dahieu me kaluwetehla koapworopwor en mour soutuk nin sampah? Ia duwen met eh wiawi?

⁷ Padahk me mie mehkot nan aramas me kin momour mwurin mehla kipehdi Papilon en mahs oh parpesengehr nan sampah pwon. Padahk wet kin kaluwetehla koapworopwor en mour soutuk me aramas ahneki. Ni ahnsou me irail akan me dene irail Kristian kei alehdi padahk wet, irail me samanih pelien lamalam akan wekidala wehwehn iren Paipel kan me pid koapworopwor en mi nanleng en uhd padahngki me aramas mwahu koaros pahn kohdahla nanleng. Nin duwen padahk wet, mour en aramas pohn sampah pahn wiawi ahnsou kiste pwehn kasawih ma e warohng mour nanleng. Soahngohte pil wiawihong tepin koapworopwor en mour soutuk nin sampah me mehn Suhs akan ahneki. Ni mehn Suhs ar ekis ekis alehdi padahk en mehn Krihk me mie mehkot me kin momour mwurin mehla, irail solahr kamehlele arail tepin koapworopwor en mour nin sampah. Ia uwen met weksang dahme Paipel kin kasalehda duwen aramas! Aramas wiawihda ni uduk, kaidehn ngehn emen. Siohwa mahsanihong tepin ohl: “Ke wiawihda sang pwehl.” (Sen. 3:19) Sampah iei wasa me aramas pahn kousoan kohkohlahte, kaidehn nanleng.—Wadek Melkahka 104:5; 115:16.

Padahk Mehlel Sansalda nan Rotorot en Sampah

8. Dahme ekei me sukuhl laud nan pahr 1600 samwa koasoia duwen koapworopwor en aramas?

⁸ Mendahki pali laud en pelian lamalam me dene irail Kristian kei sohte kin padahngki duwen koapworopwor en mour soutuk nin sampah, Sehdan sohte kin ahnsou koaros pweida ni eh kin song en karotongehla padahk mehlel. Mwurin sounpar kei, ekei irail sounwadawad en Paipel me kin tehk kanaiehng ire kan diarada padahk mehlel ni arail wehwehkihla ekei soahng kan me pid ia duwen Koht pahn ketin kapwurehdo mour unsek ong aramas akan. (Mel. 97:11; Mad. 7:13, 14; 13:37-39) Ni eh lella pahr 1600 samwa, kawehwe oh wiawihdahn Paipel kahrehiong e lella wasa koaros. Nan pahr 1651, emen ohl me sukuhl laud ntingihdi me pwehki Adam, aramas “kesehlahr Paradais oh Mour Soutuk nin Sampah,” ahpw pwehki Krais, “aramas koaros pahn pwurehng mour nin sampah.” (Wadek 1 Korint 15:21, 22.) John Milton (pahr 1608-1674), me wia emen sounnting ndand, ntingihdi Paradais me Salongala (Paradise Lost) oh Paradais me Pwurehng Dierekda (Paradise Regained). Nan eh nting, Milton kasalehda me irail kan me lelepek pahn alehdi mour nan paradais nin sampah. Mendahki Milton doadoahngki pali laud en eh mour en onopki Paipel, e kin pohnese me padahk mehlel en Paipel sohte pahn sansalda mwahu lao lel ahnsou me Krais pahn ketier nan mwoale.

9, 10. (a) Dahme Isaac Newton ntingihdi duwen koapworopwor en aramas? (b) Dahme kahrehda Newton medewe me ahnsou me Krais pahn ket nan mwoale saikinte keren?

⁹ Isaac Newton (pahr 1642-1727), emen saintis ndand pil kin uhdahn nsenohki Paipel. E wehwehki me irail me sarawi kan pahn iasadahng mour nanleng oh pahn iang Krais kaunda ni soh sansal. (Kaud. 5:9, 10) Ong irail towe kan en wehio, e ntingihdi: “Aramas pahn pousehlahte kousoan nin sampah kohkohlahte mwurin rahnen kadeik ah kaidehn erein pahr kid te.”

¹⁰ Newton wehwehki me en Krais pahn ket nan mwoale pahn wiawi sounpar epwiki kei mwuhr. Soupoad me adaneki Stephen Snobelen koasoia me Newton medewe me Wehin Koht saikinte keren en wiawi pwehki aramas tohto ahnsowo kin kamehlele padahk likamw me dene Koht wiawihkihda meh silimen. Pwehki Newton sohte kilang me mie pwihnen Kristian me kak kalohki duwen Wehio, e mwomwen rongamwahwo sohte sansalda. E ntingihdi: “Kokohp kan en Daniel oh Sohn [me kileldi nan pwuhken Kaudiahl] sohte pahn sansalda lao lel ni imwin ahnsou.” Newton kawehwe: “‘Eri,’ Daniel nda, ‘tohto pahn kohseli oh loalokong mehlel pahn lalaudla.’ Rongamwahwo anahne kalohkseli wasa koaros nin sampah mwohn kahn kamakam kowahlap oh imwin sampah. Pokon kalaimwuno me kolokol tehn paini, me pitsang kahn kamakam kowahlap wet, sohte kak tohtohla nan wehi koaros, ma Rongamwahwo sohte pahn kalohkseli mwohn imwio pahn leledo.”—Dan. 12:4; Mad. 24:14; Kaud. 7:9, 10.

11. Dahme kahrehda koapworopwor en aramas saikinte sansal ong pali laud en aramas nan ahnsoun Milton oh Newton?

¹¹ Nan ahnsoun Milton oh Newton, e keper en kasalehda madamadau me weksang padahk en Kadolik. Ihme kahrehda pali laud en ara nting kan duwen dahme ira onopki sang Paipel sohte sansalda lao mwurin ara mehla. Nan pahr 1500 samwa, ekei kohkohsang sarawi en Kadolik oh soikala ekei eh padahk kan. Re adaneki Prohs. Ahpw met sohte wekidala [de “kapwungala”] padahk me pid mie mehkot me kin momour mwurin mehla, oh sarawi en Prohs kin pousehlahte padahngki padahk en Augustine me Pahr Kid wiawiher, ahpw e sohte pahn wiawi ni ahnsou kohkohdo. Eri, ia duwe, loalokong lalaudla nan imwin ahnsou?

“Loalokong Mehlel Pahn Lalaudla”

12. Iahd me loalokong pwung lalaudla?

¹² Me pid duwen “imwin ahnsou,” Daniel kohpadahr duwen mehkot mwahu me pahn wiawi. (Wadek Daniel 12:3, 4, 9, 10.) Sises mahsanih me ni ahnsowo “me lelepek kan pahn lingalingla . . . duwehte ketipin.” (Mad. 13:43) Ia duwen loalokong pwung lalaudla ni imwin ahnsou? Tehk duwen ekei wiewia kan sang pahr 1870 lel 1914, iei pahr me imwin ahnsou tepida.

13. Dahme Charles Taze Russell ntingihdi mwurin eh kasawih duwen oaralap me pid duwen kapwurpwurdohn mour unsek me Adam ahneki?

¹³ Nan imwin pahr 1800 samwa, ekei irail kan me nsenohki mehlel kin raparapahki duwen wehwehn “mahsen mehlel kan.” (2 Tim. 1:13) Emen iei Charles Taze Russell. Nan pahr 1870, ih oh ekei me pil raparapahki duwen padahk mehlel wiahda pwihn ehu me kin onopki Paipel. Nan pahr 1872, re kasawih duwen oaralap me pid duwen kapwurpwurdohn mour unsek me Adam ahneki. Mwuhr, Russell ntingihdi: “Lao lel ahnsowo se sohte wehwehki wekpeseng laud nanpwungen keting en mwomwohdiso (mwomwohdisohn Kristian keidi kan) me met mi nan kadeikpe oh ketingpen irail me lelepek kan nan sampah.” Keting me pahn kohwong irail me lelepek kan nin sampah pahn “pwurehng ale mour unsek me tepin arail pahpa . . . Adam ahneki nan mwetuwel en Ihden.” Russell pohnese me meteikan kin sewese ih ni eh onop Paipel. Ihs irail pwukat?

14. (a) Ia duwen Henry Dunn eh wehwehkihda Wiewia 3:21? (b) Ihs me Dunn koasoia pahn mour kohkohlahte nin sampah?

¹⁴ Henry Dunn iei emen irail. E ntingihdi duwen “wiliakapwala [“onehda sapahl,” NW], nin duwen me Koht ketin kasalehiong sapwellime soukohp sarawi ko keilahn aio.” (Wiewia 3:21) Dunn ese me onehda sapahl wet kin pidada aramas akan me pahn pwurehng ale mour unsek erein Kaundahn Krais Pahr Kid. Dunn pil kasawih peidek ehu me tohto kin pwonopwonki, Ihs me pahn mour kohkohlahte nin sampah? E kawehwehda me aramas rar kei pahn iasada, sukuhlki padahk mehlel, oh ahneki ahnsou en pwosonla Krais.

15. Dahme George Storrs wehwehkihla duwen kaiasada?

¹⁵ Nan pahr 1870 samwa, George Storrs pil wehwehkihla me pwung kan pahn iasada oh ahneki ahnsou mwahu en ale mour soutuk. E pil wehwehki sang iren Paipel kan me irail kan me iasada me sohte mwekidki met “pahn imwikihla mehla, mendahki ma ‘me dipan men sounpar epwiki.’” (Ais. 65:20) Storrs kin kousoan nan Brooklyn, New York, oh ntingihdi makasihn me adaneki Bible Examiner.

16. Dahme kahrehda tohnsukuhl en Paipel kan weksang irail kan me dene irail Kristian kei?

¹⁶ Russell diarada sang Paipel me e lelehr ahnsou me rongamwahu pahn lohkseli. Eri, nan pahr 1879, e tapihada wiahda makasihn ehu (Zion’s Watch Tower and Herald of Christ’s Presence) me met adaneki Kahn Iroir Pakpakairki Wehin Siohwa. Ahnsou kan mwowe, aramas malaulaute wehwehki padahk mehlel duwen koapworopwor en aramas, ahpw met pwihn en Tohnsukuhl en Paipel nan wehi tohto kin ale oh onohnop Kahn Iroir. Ar kamehlele me aramas malaulaute pahn kohdahla nanleng oh aramas rar kei pahn ale mour unsek nin sampah kahrehiong Tohnsukuhl en Paipel pwukat en weksang irail kan me dene irail Kristian kei.

17. Ia duwen loalokong pwung lalaudla?

¹⁷ “Imwin ahnsou” me kokohpdahro tepida nan pahr 1914. Ia duwe, loalokong pwung duwen koapworopwor en aramas lalaudla? (Dan. 12:4) Lao lel nan pahr 1913, en Russell kapahrek ntingdi nan doaropwehn rohng 2,000 me aramas dep lime rar (15,000,000) kin wadek. Ni imwin pahr 1914, aramas daulih duwe rar (9,000,000) nan wehi tohto kilangehr kasdo (Photo-Drama of Creation) me kawehwehda duwen Kaundahn Krais Pahr Kid. Sang pahr 1918 lel 1925, sapwellimen Siohwa ladu kan wiahda padahk ehu me oaralap koasoia “Aramas Rar kei me Momour Ahnsou Wet Sohte Pahn Mehla,” me kawehwehda duwen koapworopwor en mour soutuk nin sampah, ni lokaia 30 nan sampah pwon. Nan pahr 1934, Sounkadehdehn Siohwa kan wehwehkihla me irail kan me koapworopworki mour soutuk nin sampah anahne papidaisla. Ni ar wehwehki met, e kin kamwakid irail en ngoangki kalohki rongamwahu en Wehio. Rahnwet, koapworopwor en mour kohkohlahte nin sampah kahrehiong aramas rar kei en uhdahn kalahnganki ong Siohwa.

“Saledek Lingan” Kerendohr!

18, 19. Soangen mour dah me Aiseia 65:21-25 kohpada?

¹⁸ Soukohp Aiseia ntingihdi duwen soangen mour me sapwellimen Koht aramas akan pahn ahneki nin sampah. (Wadek Aiseia 65:21-25.) Ekei tuhke kan me mi ni ahnsou me Aiseia ntingihdi lepin lokaia pwukat sounpar 2,700 samwalahro pil momourte lel rahnwet. Ke kak medewehla pein kowe momourki soangen ahnsou reirei duwehte met ni kehlail oh roson mwahu?

¹⁹ Mour sohte pahn mwotomwot ahpw e pahn kihda ahnsou sohte imwi en kauwada, padokedi, oh sukuhlki soahng kan. Medewehla nanpwungmwahu me ke pahn kak kakairada rehn kompoakpahmw kan. Mepwukat pahn pousehlahte kekeirda kohkohlahte. Ia uwen “saledek lingan” me “sapwellimen Koht seri kan” pahn ahneki nin sampah!—Rom 8:21.

[Nting tikitik me mi pah]

Ke Kak Kawehwehda?

• Dahme kahrehda koapworopwor en aramas en mour nin sampah sohte sansalda?

• Dahme ekei soun wadawad kan en Paipel wehwehkihda nan pahr 1600 samwa?

• Kerenlahng pahr 1914, ia duwen koapworopwor mehlel en aramas sansalda?

• Ia duwen loalokong duwen koapworopwor en mour nin sampah lalaudla?

[Kawehwehpen kilel kan nan ehu ehu pali 19]

Sounnting John Milton (palimeing) oh saintis Isaac Newton (palimaun) ese duwen koapworopwor en mour soutuk nin sampah

[Kawehwehpen kilel kan nan ehu ehu pali 21]

Tepin Tohnsukuhl kan en Paipel wehwehki sang iren Paipel kan me met iei ahnsoun kasalehda koapworopwor mehlel en aramas nan sampah pwon