Dahme Kahrehda Wiewiahn Mwersuwed Wiewiawihte?

“Ekei aramas ahneki manaman, a ekei kin wie lokolok pahn ar manaman.”​—EKLESIASDES 8:9.

IREN Paipel wet kin kawehwehda mwahu poadopoad en kaundahn aramas. Kaundahn aramas kin pwukoahki lokolok oh nsensuwed laud. Erein ahnsou reirei, irail akan me kin song en wiahda koasoandi pahrek ong aramas akan kin kalapw ohkihla noahrok oh mwersuwed. Dahme kahrehda? Dahme kahrehda wiewiahn mwersuwed wiewiawihte? Pwehki kahrepe siluh pwukat.

1. Irair en dihp.

Paipel kasalehda ni sansal me kitail “koaros mihmi pahn manaman en dihp.” (Rom 3:9) Duwehte soumwahu ehu me sohte kin mwahula, dihp kin “momour” loalatail. Erein sounpar kid kei, dihp kin “kakaun” aramas duwehte nanmwarki men. Eh “kosonned” kin wie doadoahk rehtail. Ineng en wiahda dihp kin kahrehiong me tohto en mwohnkihte pein nsenarail de nsenohkihte ren ahneki dipwisou tohto de manaman mendahki e kin kahrehda kahpwal ong meteikan.—Rom 5:21; 7:17, 20, 23, 25.

2. Irair en sampah suwed wet.

Sampah wet kin kasalehda irair en noahrok oh roporop. Pwehki met, e kin apwal ong ekei en weksang meteikan. Pwehki roporop, aramas akan kin uhdahn men alehdi manaman. Re pil kin kakairada ineng en naineki mwohni laud oh ahneki dipwisou tohto, laudsang dahme re uhdahn anahne. E kansensuwed me re kin men mwekid ni ahl mwersuwed pwehn alehdi soahng pwukat. Re sohte kin pelianda ineng suwed pwukat ahpw re kin “idawehn pali moron en aramas ni ar wia me sapwung.”​—Eksodus 23:2.

3. Sehdan me Tepil.

Sehdan, emen tohnleng me ahneki madamadau en uhwong, kin “pitipitih sampah pwon.” (Kaudiahl 12:9) E kin perenki kahrehiong aramas akan en wia dahme e mwahuki. Ele e kak doadoahngki ni elen widing ahn emen eh ineng en kepwehpwehla lao aramaso mwekid ni mwersuwed.

Ia duwe, met wehwehki me kitail en peikiong Sehdan oh wia dahme e men kitail en wia? Kitail pahn sukuhlki pasapengpen met nan ire kan mwuhr.