Wiewiahn Mwersuwed Pahn Imwisekla!

“Koapworopworki KAUN-O oh kapwaiada sapwellime kosonned akan . . . Ke pahn kilang me suwed akan ar pahn koakoahksang.”​—MELKAHKA 37:34.

KE DUWEHTE aramas tohto me kin masak me wiewiahn mwersuwed sohte pahn uhdi oh me e sohte pahn kohsang douluhl? Ma ei, me tohto kin ahneki soangen pepehm wet. Sangete mahs, aramas akan kin song wiahda soangen wiepen koperment koaros me re kin medewe pahn pweida. Ahpw re sohte kin pweida ni arail kin kihsang douluhl wiewiahn mwersuwed. Ia duwe, mie koapworopwor me ahnsou ehu pahn kohdo me aramas koaros pahn mehlelpene nanpwungarail?

Paipel kasalehda me ei! E padahkihong kitail me ahnsou keren Koht pahn ketikihsang wiewiahn mwersuwed nin sampah. Ia duwen eh pahn ketin wia met? E pahn ketin doadoahngki sapwellime Wehi, me iei koperment ehu nanleng me pahn kawiliakapwala douluhl sampah. Ih Wehi wet me Sises ketin padahkihong sapwellime tohnpadahk ko ren kapakapki. Kapakap wet kin ekei pak adaneki Kapakap en Kauno de Samat. Sises mahsanih: “Mweimwi en pweida wasa koaros, kupwuromwi en kin wiawi nin sampah.”​—Madiu 6:10.

Paipel kohpada me Kaunen Wehio, Sises Krais, pahn “ketin kapitala me semwehmwe kan me kin likweriong, oh pil irail kan me paisuwedlahr oh me lekdekla kan. E kin ketin kupwurkalahngan ong me luwet oh semwehmwe kan; e kin doarehla mouren me paisuwed kan. E kin ketin kapitirailla sang nan arail kehnaudek oh angkehlail kan.” (Melkahka 72:12-14) Tehk me Sises ketin poakehla irail kan me kin lokolok pwehki wiewiahn mwersuwed oh e pahn ketin wia mehkot duwen kaunda lemei. Met uhdahn kansenamwahu en ese.

Pahnangin Kaun limpoak oh kehlail menet, Wehin Koht pahn kihsang wiewiahn mwersuwed nin sampah.Ia duwen? Sang ni eh pahn ketikihsang soahng siluh me kin kahrehda wiewiahn mwersuwed.

Irair en Dihp

Ni ahnsou wet, kitail koaros anahne peiong ineng en men wiahda dihp me kin kamwakid kitail en mwekid ni elen roporop. (Rom 7:21-23) Ahpw miehte aramas mwahu kan me kin men wia dahme pwung. Re kin pwoson kesempwalpen meirong en ntahn Sises oh re kak ale mahkpen diparail kan.a (1 Sohn 1:7, 9) Soangen aramas pwukat kin ahneki ahnsou mwahu ren paiekihda sapwellimen Koht wiewiahn limpoak me keieu laud me kitail wadek nan Sohn 3:16: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”

Ong me pwoson kan, Koht pahn ketin wia mehkot me inenen kapwuriamwei. Nan sampah kapwo, e pahn ketikihsang soahng koaros me kin kahrehda dihp, ekis ekis e pahn ketin kahrehda me pwoson kan ren unsekla oh oh pwungla mwohn silangi. (Aiseia 26:9; 2 Piter 3:13) Irair en dihp solahr pahn pwurehng kahrehda emen en mwekid ni elen mwersuwed. Pahn kaundahn Wehin Koht, aramas lelepek kan pahn saledeksang wiewiahn mwersuwed.

Irair en Sampah Suwed Wet

E kansensuwed pwehki rahnpwukat me tohto kin kaloke meteikan. Re kin mwamwahliki me paisuwed oh semwehmwe oh re kin kamwakid meteikan ren iang wia tiahk en mwersuwed. Paipel kaweidki soangen aramas pwukat: “Aramas suwed kan en sohpeisang ar mour suwed, oh wekidala ar lamalam.” Ma soangen aramas mwersuwed pwukat pahn koluhla, Paipel inoukihda me Koht pahn ketin ‘mahkikihong irail diparail kan.’​—Aiseia 55:7.

Ahpw, ma aramas akan sohte pahn men wekila, Koht pahn anahne ketin kasohrehirailla. Pwehki Wehin Koht, inou en Paipel wet pahn pweida: “Koapworopworki KAUN-O oh kapwaiada sapwellime kosonned akan. . . . Ke pahn kilang me suwed akan ar pahn koakoahksang.” (Melkahka 37:34) Ahnsou me soahng suwed akan pahn sohrala, sapwellimen Koht tohnkaudok lelepek kan solahr pahn lokolongki wiewiahn mwersuwed.

Sehdan me Tepil

Me keieu suwed nanpwungen irail me dipan akan me sohte men koluhla iei Sehdan me Tepil. Ia uwen atail kalahnganki me kereniong Siohwa pahn ketin irehdi Sehdan pwehn dehr kasonge aramas akan. Ahnsou keren Koht pahn kasohrehla douluhl Sehdan. Sehdan solahr pahn pwurehng kamwakid aramas akan ren mwekid ni elen mwersuwed.

Madamadau me Koht pahn ketikihsang soahng koaros me kin kahrehda wiewiahn mwersuwed ele kin wia mwomwen ouraman ehu. Ele ke pahn medewe, ‘Koht ketin sapwellimanki ahl akan pwehn ketin wiahda wekidekla pwukat?’ Ma ei, dahme kahrehda e saikinte ketin wia met? Peidek mwahu kei met oh Paipel kihda pasapeng me keieu mwahu.b Se luke iuk ken pein tehk dahme Paipel padahngki duwen ahnsou kohkohdo me wiewiahn mwersuwed koaros pahn sohla mie douluhl.

[Nting tikitik kan me kileldi pah]