“Kauwada Ahmw Peneinei”
1 E sansal me nan keinek koaros nan sampah pwon, mour en peneinei kin kohkohdi. Ahn Sehdan sampah kin dirkihla mwersuwed oh tiahk suwed. (1 Sohn 5:19) Ihme kahrehda, e inenen kesempwal oh karuwaru me kitail en nantiong ‘kauwada atail peneinei’ ni pali ngehn oh padahkiong mehteikan iaduwen irail kak pil ‘kauwada arail peneinei kan.’—Lepin Padahk 24:3, 27.
2 Kaweid en Paipel Pahn Wia Perepatail: Dahme kak uhdahn sewese peneinei kan en diarada peren mehlel iei en doadoahngki kaweid en Paipel. Kaweid mehlel pwukat kin kamwahuiala mour en tohn peneinei koaros. Peneinei kan me pahn doadoahngki kaweid en Paipel pahn anehki peren oh popohl sang powe.—Pil tehk Aiseia 32:17, 18.
3 Kaweid en Paipel me pahn sewese kitail en kauwada atail peneinei ni pali ngehn kin mihmi nan pwuhken Wiaiong Mour En Ahmw Peneinei Nsenamwahu. Irelaud kan koaros kin kihda kaweid me tohn peneinei anahne tamataman. Peidek kan me mihmi ni pali kan (pah) kin kasalehda kesempwalpen kaweid sang Paipel. E pil kin kaineneong atail madamadau madamadau en Koht pwe kitail en sukuhliki madamadau en Koht ong oaralap pwukat.—Aiseia 48:17.
4 E kesempwal en wehwehkihla pwuhko. Sukuhlkihdi iawasa ke kak diarada kaweid kan me kin kak sewese mehteikan nan soangsoangen kahpwal kan. Pwuhko kin koasoia ire kan duwehte mehpwukat: dahme emen anahne rapahki rehn meno me e men pwoudki (irelaud 2), mehn kapir kan ong diarada peren mehlel nan pwopwoud (irelaud 3), dahme emen pahn wia ma eh pwopwoud kerenieng pahn mweipeseng (irelaud 6), iaduwen pahpa oh nohno kan kak sewese neirail seri kan pwe ren kekeirada mwahu oh wiahla aramas likilik kei me kin lammwiki Koht (irelaud 9), iaduwen emen kak pere eh peneinei sang soahng kan me pahn kawehla mour en peneinei (irelaud 10), dahme emen kak wia pwehn kasalehda wahu ong eh pahpa oh nohno ahnsou me ira mahlahr (irelaud 12), oh iaduwen emen pahn sewese eh peneinei en anehki koapwoaroapwoar ong ni ahnsou kohkohdo (irelaud 14).
5 Doadoahngki Mwahu Pwuhko: Ma ke saikinte wia, dahme ke soh onop pwuhken Peneinei rehn ahmw peneinei? Oh pil, ahnsou me kahpwal kan kin pwarada, kousapahlih irelaud kan me pid duwen kahpwal kan, oh kapakap pwehn peki sawas en doadoahngki mwahu kaweid. Oh pil ehu, tepida sang wihk en April 28, kitail pahn onopki pwuhken Peneinei nan mihding en Pwuhk Study en mwomwohdiso.
6 Peneinei kan me kin nannanti en lelepek ong Siohwa ahnsou koaros pahn kehlail ni pali ngehn oh miniminpene oh pahn kaunopada mwahu en powehdi kasongosong kan en Sehdan. (1 Tim. 4:7, 8; 1 Pit. 5:8, 9) Kitail koaros kak kalanganki kaweid sarawi kan sang Ih me koasoanehdi koasoandi en peneinei!