Kadehdehki Nei Pwuhk en Poadoapoad Kan en Paipel
1 “Kumwail pahn kanahieng, pwe kumwail dehr manokehla ire kesempwal akan me kumwail pein kadehdehkier masamwail kan. Kumwail dehpa mweidohng re en sohrasang nan kapehdamwail erein amwail mour. A kumwail pahn kin koasoiaiong noumwail seri kan oh nein noumwail seri kan.” (Deuderonomi 4:9) Ki mahsen ko, Siohwa kin kaunopada sapwellime aramas kan en pidelong nan Sapwen Inouwo. Ehi, e kesempwal ong me laud kan oh seri kan en ale kasukuhl ‘en dehr manokehla ire kesempwal akan’ me Siohwa ketin wiahda. E weksang rahnwet ni atail kesikesihnen mwohn Sapwen Inouwo, sampah kapw en Koht?
2 Pwuhken Nei Pwuhk en Poadoapoad Kan en Paipel kin wia mehn sawas kaselel ehu pwehn sewese kitail koaros en ‘kanaieng.’ Poadoapoad en dahme Siohwa ketin wiahdahr mahso me mengei ahpw kaidehn koasoi en seri. Me mah oh pwulopwul kan kin kalahnganki nting laud kan oh kilel kan me e audaudki. Ni ahnsou me kitail pahn kihla pwuhken Nei Pwuhk en Poadoapoad Kan en Paipel erein sounpwong en July, ele komw pahn men song mehn sawas pwukat me kilekilel pah.
3 Ni ahnsou me ke pahn kihong emen pahpa de nohno “Nei Pwuhk en Poadoapoad Kan en Paipel,” ele komw kak kalelepek reh:
◼ “Ke lemeleme me e apwal en kawehwe Paipel ong seri kan? [Mweidong en sapeng.] Pahpa oh nohno tohto kin diarada me pwuhk wet kin keieu katapan en doadoahngki pwehn padahkihong seri kan duwen Paipel. Karasepe ehu, mweidohng ie en kasalehong uhk iaduwen e kak sewese uhk en kawehwe kapakap en Kauno.” Pakpeseng pwuhken Nei Pwuhk en Poadoapoad Kan en Paipel ong poadoapoad 91 me oaralap koasoia “Sises Padahk Pohn Dohl,” oh kasalehda iaduwen e kasalehda duwen Wehin Koht ni ahl ehu me mengei. Ma pahpa oh nohno perenki, idek rehra ma re men ale neira pwuhk. Mwohn ahmw pahn kohkohsang, wadek Sohn 17:3 oh idek, “Iaduwen kitail kak ale loalokong wet me kahluwalahng mour soutuk?” Wiahda koasoandi sansal pwehn pwurehng pwurkihdo pasapengo.
4 Ni ahnsou me ke pwurehng pwurala pwehn kawehwehda idauwen emen en alehda loalokong wet, ke kak nda:
◼ “I inoukihong uhk me I pahn pwurehng pwurodo pwehn kasalehong uhk iaduwen kitail kak alehda loalokong me kahluwalahng mour soutuk. Pahkalahng poadoapoad 116 nan pwuhken Nei Pwuhk en Poadoapoad Kan en Paipel oh kasalehong duwen kesempwalpen onop Paipel ahnsou koaros. Kasalehong tohnihmwo brochure Kupwurki oh doadoahngki Iren Mehn Kasukuhl 1 pwehn kamwomwehda ehu onop.
5 Sohte lipilipil ma ke kalohk sang ihmw-lel-ihmw de kalohk ni ahnsou soh lipilipil, ke kak kihla pwuhken “Nei Pwuhk en Poadoapoad Kan en Paipel” ni ahmw pahn kalelepek:
◼ “Ke lemeleme me sampah pahn kak wiahla wasa kaperen oh meleilei en kousoan ie?” [Mweidong en sapeng.] Kasalehda kilelo nan poadoapoad 71 oh nda, “Ke soh pahn men kousoan nan wasa ehu me mwakelekel oh meleilei duwehte met?” Koasoia ekei ire kesempwal kan sang Aiseia 11:6-9. Ma aramaso men kalaudehla ah sukuhliki duwen paradaiso, idek reh ma e men naineki pwuhko oh kawehwehda koasoandi en sawas. Ni ahnsou me ke pahn kohkohsang, ke kak kalelepek, “Ke ese iahd me Koht pahn kaparadaisla sampah?” Koasoanehdi me ke pahn pwurehng pwurodo pwehn sapengla peideko.
6 Ni ahnsou me ke pwurehng pwurodo pwehn kawehwehiong tohnihmwo iahd sampah pahn paradaisla, ke kak nda:
◼ “Ahnsou me I koasoiong uhk rahn teio, I kasalehong uhk ehu kilel en mwomwen sampah ni ahnsou me e pahn paradaisla. Rahnwet, I men kasalehong uhk pil ehu kilel.” Pakpeseng pwuhken Nei Pwuhk en Poadoapoad Kan en Paipel ong poadoapoad 115, oh nin doken tohnihmwo kilikilang kilelo, wadek Kaudiahl 21:3, 4. Eri ke kak nda, “Ma ke men mour nan paradais, mie mehkot me Koht kupwurki ken wia.” Kasalehong brochure Kupwurki oh tepiada ehu onop ni ahmw doadoahngki Iren Mehn Kasukuhl 1.
7 Tepiada Koasoi Kan: Mie mehn sawas en kasukuhl tohto nan pwuhken Nei Pwuhk en Poadoapoad Kan en Paipel me kak kadoadoahk pwehn tepiada koasoi kan ni ahnsou me ke tepin tuhwong tohnihmwo de ni ahmw pwurehng pwurala rehn emen me perenki rong. Ke kak tepiada ehu koasoi rehn emen ni ahmw pahn kalelepek reh ehu peidek me konehng. Karasepe ehu, tehk peidek pwukat oh poadoapoad kan me re pwarada ie:
“Koht Kupwurki Adam oh Ihp en Kohdala Nanleng?” (3)
“Dahme Kahrehda Kitail Kin Mahla oh Mehla?” (5)
“Mie Kodon kan me Mour Mahs Pohn Sampah?” (8)
“Dahme Kahrehda Koht Wiahda Ahia?” (11)
“Dahme Kin Wiawihong Kompoakepahtail Kan me Melahr?” (92)
“Dahme Kahrehda Sises Kin Wiahda Manaman Kapwuriamwei Kan?” (93, 96)
“Mie Katepen Ahmw Pelien Lamalam?” (108)
8 Ke kak pahkalahng poadoapoad kan me ke pilada nan pwuhken Nei Pwuhk en Poadoapoad Kan en Paipel oh kawehwehda mouren ireo me ke koasoia. Eri koasoanehdi me ke pahn pwurehng pwurodo ni ahmw pahn kalelepek reh peidek ehu me ke pahn pwurehng pwurodo oh sapengla sang nan pwuhk sohte lipilipil ma kaidehn brochure Kupwurki, doadoahngki pwuhken Mour Kohkohlahte. Tehk mwahu pwe ken luhke tohnihmwo ong mihding en Kapahrek ong Wehipokon oh pwilikihdi reh ehu kisin doaropwehn luk (handbill). Kihong aramas kan ahnsou mwahu en kihda arail sawas ong atail doadoahk ele ni ahmw pahn nda, “Ekei kin men kihda arail kisin sawas ong aht doadoahko sampah pwon.”
9 Aramas mongiong mehlel kan anahne en ese duwen soahng mwahu kan me Siohwa ketin wiahdahr, oh duwen sapwellime inou kan ong ahnsou kohkohdo. Kitail kak sewese irail nan atail doadoahk en kalohk. Eri, ihmw kitail en wohnoweite oh “doadoahk laudki pwe kitail kin koapworopworki Koht ieias me iei Sounkomour en aramas koaros, ahpw mehlel en irail kan me kin pwoson.”—1 Tim. 4:10.