“Kasalehda Kanengamah”

¹ Nin doken atail kilang me koasoandi mering en Sehdan kohkohieng imwisekla, e kesempwal kitail en “kasalehda kanengamah” nin doken atail awiawih sapwellimen Siohwa rahnen komour. Keieu, ni ahnsou mwotomwotlahr wet, imwintihti suwed kan kin songosong en kasalongehla atail medemedewe ireo me keieu kesempwal me pid sapwellimen Siohwa kaunda unsek en lahng oh sampah oh kin kasonge kitail en soupisengkihla soahng tohto kan me pein kitail kin perenki. Ni ahl wet, Sehdan kak pitih kitail en uhdihsang de wawaila nan doadoahk en kalohki Wehio. (Seims 5:⁠7, 8; Madiu 24:​13, 14) Ni ahl dah kei kitail kak kasalehda soahngen kanengamah me anahn?

² Kanengamah: Ni ahnsou kan me aramas kan me kitail kin tuhwong nan kalohk kin kasalehda arail soukauti ong atail kalohk de uhwong kitail, kanengamah pahn sewese kitail en dadaurete nan kalohk. Kitail sohte pahn mwadang masepwehkada de nsensuwedla ma aramas kan me kitail kin tuhwong kin lemei. (1 Pit. 2:​23) Lamalam kehlail wet kak irehdi kitail endehr kauwe aramas kan me kitail kin kalohkohng me kin kasalehda ahr soukauti de kailok ong atail doadoahk, ni atail pahn pohnese me soahngen lokaiahn kauwe pwukat kak kamworusehla pein kitail oh irail ko me kin iang kitail kalohk.

³ Ngidingidkihte Kanengamah: Atail kanengamah kin kak sohla ma mwurin atail padahkohng aramas men me perenki rong nan kalohk, kitail sohte kak diarada aramaso nan imwe. Met pil mehlel ni ahnsou me irail ko me kitail kin onopohng kin pwand en kekeirada de re sohte kin papidaisla. Ahpw, ngidingidkihte kasalehda kanengamah kin kalapw imwikihla mehkot mwahu. (Kal. 6:9) Emen sister kin kalapw pwurala rehn emen lih mwohn liho uhdahn tepiada onop Paipel. Erein keieun pak limau ko me sistero kin pwurala reh, liho kin kedirepwkihla wiewia soahng teikan. Ni pak kaweneu me sistero pwurala, e wisekisekla pahn keteu laud, ahpw sohte diar liho nan imweo. Mendahki met, sistero ahneki lamalam kehlail oh pwurehng pwurala, oh ih eri diarada me liho onopadahr en onop. Mwurin ahnsouwo kohla, liho wie kekeirada mwahu nan ah onop oh ni ahnsou mwotomwotte inoukihong Siohwa ah mour.

⁴ Kitail ese me Rahnen Siohwa sohte pahn pwand. Ihme kitail kin awih ah pahn ketin kapwaiada sapwellime kupwur kan, ni atail ese me kanengamah sang powe pahn kapwarehda wah mwahu kan. (Apakuk 2:3; 2 Pit. 3:​9-​15) Kitail en kasalehda kanengamah duwehte me Siohwa ketin wia oh dehr uhdisang kalohk. “Ki pwoson oh kanengamah,” kilangwohng Siohwa en katingih uhk pwehki omw doadoahk laud.​—Ipru 6:​10-​12.