Prokram Kapw en Kapokon en Rahn Tohrohr
Oaralap en prokram en Kapokon en Rahn Tohrohr ong pahr wet kin koasoia: “Kitail en Rapahki Ire Loal kan me Pid Duwen Koht.” (1 Kor. 2:10) Ire kesempwal dah kan kitail pahn sukuhliki?
Aramas tohto, ni arail kin rapahki loalokong, re sohte kin nsenamwahuki dahme re kin diar. Pwuhk Sarawi kin kamwekid kitail en wia dahme pwung, oh met pahn sansal sang padahk me Sounapwalih en Circuit pahn wia me oaralap koasoia “Rapahki Ire Kesempwal Kan Nan Mahsen en Koht Kin Kansenamwahu.” Oh pil, brother me mwemweitdo pahn kasalehda iaduwen rapahki ire loal kan me pid duwen Koht pahn pidada atail kalohki rongamwahu ni ah pahn sapengla peidek wet “Iaduwen Kitail Kin Kilangwong Atail Doadoahk en Kalohki Wehio?”
Iaduwen pahpa oh nohno kan kak sewese neirail seri kan en rapahki ire kesempwal kan nan Mahsen en Koht? Brother me pahn wia padahk me oaralap koasoia “Padahkiong Noumw Seri Kan Mahsen en Koht” pahn koasoia ire kan me ke kak doadoahngki nan ahmw mour. Kristian pwulopwul kan kak werekiong me mah ni pali ngehn nan mwomwohdiso oh paiekihda met. Brother me pahn wia padahk me oaralap koasoia “Me Pwulopwul kan Me Sukuhlikihsang Me Mah Kan” pahn koasoia iaduwen me pwulopwul kan kin paiekihda arail sukuhlikihsang me mah kan.
Siohwa kin kasalehda soahng kan me rir. Dahme kahrehda kitail en nantihong rapahki soahng kan me rir ahpw kesempwal ni pali ngehn ni ahnsouwet? Brother me mwemweitdo pahn wia padahk me oaralap koasoia “Siohwa Kin Ekis Ekis Kasalehda Mehkan me Loal” oh e pahn kawehwehda dahme Siohwa kin kasalehda mahs oh ahnsou wet. Padahk wet pahn kangoange kitail en nantihong “rapahki ire loal kan me pid duwen Koht.”
Koasoanehdi ahmw koasoandi kan ahnsou wet pwehn kak iang towehda kapokon wet. Irail me men kasalehda me re inoukihdahr arail mour ong Siohwa anahne mwadang ndaiong Presiding Overseer me re men papidaisla. Atail ineng en men sukuhlikihsang Mahsen en Koht pahn kehlailda ni atail pahn rongorong prokramo. Kitail en dehr katiasang rahn tohrohr wet me pahn dirkihla kaweid en ngehn!