En “Mweidohng Amwail Ahnsou Koaros” ong Amwail Doadoahk en Kalohk
1 Ni ahnsou me kitail kin wadek duwen en Pohl kin iang doadoahk en wiahda ihmw likou erein eh koukousoan nan Korint, kitail ele pahn medewe me met pahn kahrehiong en tikitikla eh ahnsoun kalohk. Ahpw nan Wiewia 18:5 kawehwehda: “Pohl ahpw mweidohng eh ahnsou koaros ong kalohkiseli mahseno, kadekadehdehiong mehn Suhs akan me Sises iei Mesaia.” Dahme kahrehda Pohl nohn mweidohng eh ahnsou koaros ong doadoahk en kalohk? Mendahki tohto aramas nan Korint pwosonlahr, Kauno kasansalehda me uhdahn pahn miehte me tohto me pahn pil wiahla nah tohnpadahk nan kahnimwo. (Wiewia 18:8-11) Mie kahrepe duwe met me pahn kahrehda kitail en pil anahne mweidong atail ahnsou koaros ong atail doadoahk en kalohk? Ei. Miehte me tohto me pahn kak dierekda oh ale kasukuhl ong padahk mehlel.
2 Kalaudehla Ahnsou ong Doadoahk en Kalohk: Ele omw mehn akadei iei en kin kedirepwkihla ahmw kin kalohki rongamwahu sounpwong koaros. Ahpw mie sounpwong kan me kin elehda kahrepen kitail en “mweidohng [atail] ahnsou koaros” ong kalohk laudsang sounpwong teikan. Ehu sounpwong duwe met iei sounpwong en April, me iei ahnsoun wia kataman. Ia duwe, ahmw irair kan pahn mweidohng uhk en iang auxiliary pioneer de en kalaudehla ahmw nanti nan kalohk erein sounpwong pwukat? Sounkalohk tohto me kin wiewia met kin aleier kapai tohto. (2 Korint 9:6) Ma ke kin wiewia uwen me ke kak, eri tamataman me Siohwa kin ketin kupwurperenki ahmw papah ih ki mohngiong unsek. (Luk 21:2-4) Sohte lipilipil soangen irair dah me kitail mih loale, wiahki ahmw mehn akadei en “mweidong [ahmw] ahnsou koaros” ong ahmw doadoahk en kalohk. Oh dehr manokehla kapidelong noumw ripoht en kalohk ni imwin sounpwongo pwe ahmw nanti nan kalohk en patehngete nanti laud en sapwellimen Siohwa aramas teikan.
3 Pwurala Rehn Irail kan me Iang Towehda Katamano: Sounpar samwalahro, uwen tohtohn irail me iang towehda Katamano nan sampah pwon lella meh 16,675,113. Kitail nek kilang ma meh depe pahn iang towehda Kataman en pahr wet. Ahpw ripoht kasalehda me mwomwen pahn mie “rahk” ehu me pahn tohtohsang mahs. (Madiu 9:37, 38) Kahrehda, koasoanehdi en mwadangete pwurala rehn irail kan me perenki rong me iang Katamano pwehn sewese irail ni pali ngehn. Atail kapwakapwandehiong pwurala rehrail kak kahrehiong ‘ngehn suwed ahpw kin kohdo oh adihasang dahme kin kamweremwerdiong nan kapehdirail.’ (Madiu 13:19) En mwadang pwurala rehrail kin kasalehda me ke uhdahn kin “mweidohng [ahmw] ahnsou koaros” ong kalohk.
4 Nantihongete Sewese Irail kan me Wereila Sohte Iang Kalohk (Inactive): Ma mie irail kan me wereila sohte iang kalohk nan mwomwohdiso, kitail en sewese irail. Elder kan kak koasoanehdi ahnsoun mwemweitla rehrail. Elder kan pahn song en diarada kahrepen eh luwetala oh ia ahl keieu mwahu en sewese ih pwe en kak pwurehng kehlailla eh kin papah Siohwa. Koasoandi en sawas limpoak wet kin kasalehda me elder kan kin uhdahn nsenohki arail pwukoa nin duwen silepen “sihpw me Koht ketikihong” irail. (1 Piter 5:2; Wiewia 20:28) Watchtower en lokaiahn wai en September 15, 1993, pali 22-3, kin kihda mehn kaweid kaselel kan me elder kan kak doadoahngki ni arail kin tehk iren kahpwal limau me kin kalapw lelohng irail akan me wereila sohte iang kalohk. Me keieu mwahu, ekei pahn kakete pwurehng tepida iang kalohk.
5 Sewese katohtohla me Pahn Wiahla Sounkalohk kan me Saikinte Papidaisla: Noumw seri kan kakehr oh konehngehr ren iang wiahla soun kalohki rongamwahuo? Ia duwen irail kan me ke onohnop rehrail? Ma elder kan pwungki me re kakehr, met sou pahn wia ahnsou mwahu ong irail en tepida iang kalohk? Mie me ke kin onohnop Paipel reh me kin kekeirada mwahu? Ahmw mehn akadei iei en sewese tohnsukuhl en Paipelo kalaudehla eh wehwehki padahk mehlel oh en warohng wiahla sounkalohk men oh mwuri wiahla emen Sounkadehdehn Siohwa men me inoudahr oh papidaislahr.—Episos 3:17-19; 1 Timoty 1:12; 1 Piter 3:21.
6 Ahmw kin kaukaule oh uhdahn mehlelki ahmw nsenohki tohnsukuhl en Paipel me ke onop reh pahn kak sewese ihr en ekis ekis alehda padahk mehlel. Emen Sounkadehde tuhwong pwopwoud mah ehu me inenen pwungki oh men onop Paipel. Ahpw kairek pak siluh re kin kaila rahn en onop ong wihk mwuri. Mwuri re tepiada onop. Ahpw kereniong wihk riau koaros re sohte kin kak onop. Kedekedeo liho kekeirada lao e kakehr papidais. Brothero me kin onop rehra katamando rahn en papidaiso, koasoia: “Ni ahnsou me liho papidaisla, pihlen mese dirkihda eh peren oh met kahrehiong pein pilen meseie oh ei pwoud en pil dirkihda aht peren.” Ei, atail “mweidohng [atail] ahnsou koaros” ong rongamwahuo kin wahdo peren laud!
7 Kokohp en Paipel oh wiewia kan nan sampah kin kadehdehda me kitail miher ni imwi. Ih ahnsouwet me sapwellimen Koht aramas akan anahne “mweidohng [arail] ahnsou koaros” ong kalohkiseli rongamwahuo ong meteikan. Wahnpoaron Pohl kin kamehlelehiong kitail me soangen doadoahk en “papah Kauno kaidehk doadoahk mwahl ehu.”—1 Korint 15:58.