“Iawasa I Kak Diar Ahi Ahnsou en Wia Soahng Pwukat?”
1 Aramas tohto kin wia peidek wet pwehki atail mour kin kedirepwkihla wiewia tohto. Aramas kin koasoia me ahnsou kin wia mehkot me keieu kesempwal ahpw apwal en diar. Eri, iawasa kitail kak diar ahnsou ong soahng kan me kin keieu kesempwal, duwehte wadek oh onop Mahsen en Koht?—Pilipai 1:10.
2 Dahme kitail anahne wia iei met: pilada iaduwen kitail pahn doadoahngki atail ahnsou, kaidehn rapahki iawasa kitail kak diar ahnsou laud sang dahme mie. Emen emen kitail ahneki awa 168 nan ehu ehu wihk, oh awa 100 sang awa pwukat kitail kin meir oh doadoahk. Ahpw, iaduwen kitail pahn doadoahngki awa kan me luhwe ni ahl me keieu mwahu? Episos 5:15-17 kin kangoange kitail en dehr kekeid “duwehte aramas me loalopwon kan, ahpw [kitail] duwehte me loalokong kan. [Kitail] isaneki ahnsou mwahu koaros . . . , rapahki dahme Kauno [“Siohwa,” New World Translation] ketin kupwukupwure [kitail] en wia.” Met kin kasalehda me kitail anahne doadoahngki ahnsou mwahu koaros pwehn wia dahme Siohwa kin kasalehda me kesempwal kitail en wia.
3 Sises kapahrekiong atail ahnsou ong ni mwehin Noha. (Luk 17:26, 27) Aramas en nan mwehin Noha kin soupisengki kedirepw kan en ehu ehu rahn. Ahpw, Noha koasoanehdi eh ahnsou pwehn kak wiahda lapalahn warihmw oh wia doadoahk en kalohk. (Ipru 11:7; 2 Pit. 2:5) Iawasa e diar eh ahnsou en wia mehpwukat? Pwehki e mwohnki kupwuren Koht nan eh mour oh e pil e kin peikiong Ih oh “kapwaiada mehkoaros me Koht ketin mahsanih.”—Sen. 6:22.
4 Dahme Kin Keieu Kesempwal Nan Atail Mour? Sises mahsanih: “Kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.” (Madiu 4:4) Ehu ehu wihk, kitail kin ale “kisin tungoal [mwengehn ngehn] ni ahnsou me konehng.” (Luk 12:42) Met kin wehwehki me kitail anahne kolokol pein atail koasoandi en onop ahnsou koaros pwehn kak kang mwengehn ngehn koaros me kin kohwong kitail oh paiekihda ni ahl me keieu mwahu. Pwehki kitail kin kalahnganki mwehngen ngehn pwukat, kitail en dehr kilangwong mwenge pwukat duwehte “fast food” me kitail kak mwadang kang. Ma kitail kalahnganki mwengehn ngehn, kalahngan wet pahn kamwekid kitail en onop oh kesempwaliki soahng ngehnin kan.
5 Atail kin kang mwengehn ngehn kin kak kahrehong kitail en ale mour soutuk. (Sohn 17:3) Kitail anahne kesempwaliki mwengehn ngehn oh kihong en keieu nan atail koasoandi en ehu ehu rahn. Kitail kak diar atail ahnsou en wadek neitail Pwuhk Sarawi oh kaunopada ong mihding kan koaros? Ei, kitail kak. Ma kitail wia met, kitail pahn ale “keting laud” me kin kohsang atail wehwehkihla oh wia kupwuren Koht.—Mel. 19:7-11, NW.