Kalohki Wehin Koht Kak Doarehla Aramas akan!
1 Doadoahk wet kin wia doadoahk me keieu kesempwal me wiawi nan sampah ahnsou wet. Siohwa Koht, Sises Krais, oh tohnleng tohto kin nsenohki doadoahk wet. Soangen doadoahk dahieu met, oh dahme kahrehda e kesempwal? Doadoahk wet iei doadoahk en kalohki Wehin Koht, oh e kak doarehla aramas akan!—Rom 1:16; 10:13, 14.
2 Ekei aramas pepehm me re kak sewese aramas akan ma re pahn wia doadoahk me pahn kamwahuwihala sampah me kitail mihmi loale. Aramas tohto kin doadoahk laud pwehn wahdo popohl ohng sampah, de kamwahuwihala soumwahu laud kan, de kamwahuwihala kahpwal en mwohni kan. Ahpw, dahme pahn keieu sewese aramas akan?
3 Doadoahk me Keieu Kesempwal: Rohng me pid Wehin Koht kelepw kin kawehwe duwen kahrepen mour, kahrepen aramas akan kin lokolok, oh pil atail koapworopwor kaselel ong ahnsou kohkohdo. Rongamwahu en Wehin Koht kin sewese aramas en kompoakepahnki Siohwa oh eri ahneki “sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pilipai 4:7) Ihte Rongamwahu duwen Wehin Koht kin kehsehkin aramas akan duwen kaweid mwahu me kak sewese irail en powehdi kahpwal akan en mour ahnsouwet oh kawehwe iaduwen re kak ale komourparail ahnsou me sampah suwed wet pahn sohrala ehu rahn. (1 Sohn 2:17) E soh kin wia doadoahk me inenen katapan, kahrehda kitail en wia uwen me kitail kak en kalohki Wehin Koht?
4 Nna, medewehla duwen karasaras wet: Ia pahn ahl me pahn keieu mwahu ong tohnkousoan ehu me wia memeir ma arail mour miher nan keper pwehki pihl ieu me wie nanahkpene wasakis oh perepe pahn kereniong pwalpeseng oh pwilidihdong pohn aramas pwukat? Limakasang pihlo mwohn perepe kan a pahn ohla? De kapwatakihda tuhke lingan mwohn kahnimwo a pahn ohla? Soh! Tohnkahnimwo anahne mpengada oh pakair kohwong irail me pid kahpwal me pahn leledo oh sewese irail pwe ren kak pitila! Rahnwet, irail akan me wie memeir ni pali ngehn pil mih nan irair keper. (Luk 21:34-36) Pwehki koasoandi suwed wet pahn kereniong sohrala, kitail anahne wia uwen me kitail kak en sewese aramas akan ni pali ngehn!—2 Tim. 4:2; 2 Pit. 3:11, 12.
5 Nannanti Wia Doadoahk Wet: Kitail en wia uwen me kitail kak en rapahki ahl akan en tuhwong aramas akan me, ni mehlel, kin perenki rong duwen Rongamwahu—nan imwarail, nanial, doadoahngki telephone, oh pil wasa teikan. Doadoahk wet me Siohwa ketikihong kitail en wia iei doadoahk me keieu kesempwal nan atail mour. Ma kitail ngoangki wia doadoahk wet, kitail ‘pahn doarehla pein [kitail] oh pil irail kan me kin rong [kitail].’—1 Tim. 4:16.