Ahnsou me Kangoang Laud Pahn Wiawi Nanpwungatail
1 Rahn koaros sapwellimen Siohwa aramas kin lelohng kasongosong kan me kak kauwehla arail pwoson. Pwe Tepil kin wehwehki me eh ahnsou mwotomwotlahr, e kin wia uwen me e kak en kauwehla atail lelepek ong Siohwa. (Kaudiahl 12:12) E kesempwal me kitail pahn “kehlailkihda atail miniminiong Kauno oh manaman en sapwellime roson” pwe kitail “en kak kehlail ong atail imwintihtio ni rahn suwedo me kohkohdo, oh ni imwilah, kitail en kak dadaurete, sohte lohdi.”—Episos 6:10, 13.
2 Tuhwong riatail brother oh sister kan kin wia koasoandi ehu me Siohwa koasoanehdi ong kitail pwe kitail en kak ale kehl me anahn. Wahnpoaron Pohl wehwehki duwen kesempwalpen met. E men miniminiong rie Kristian kan pwe irail koaros en kak kangoange meteikan oh emenemen pahn ale “kehl” en pali ngehn. (Rom 1:11, 12) Pwehn kakehlailih kitail en wia kupwuren Koht, Governing Body koasoanehdi ni limpoak ahnsou mwahu en ale kamwahu kan sang atail miniminpene nanpwungatail oh kangoange meteikan nan Kapokon en District me oaralap koasoia: “Sounkalohk Ngoang kan en Wehio” me pahn wiawi ni ahnsou keren.
3 Ken Iang Towehda Pwehn Paiekihda: Ken wiahda ahmw mehn adadei en iang towehda prokram en rahno pwon. Kitail kin ‘ale kamwahu kan ong pein kitail’ ni atail kin mwadang lel Kingdom Hall mwohn tepin koul pahn wiawi oh mihmi lao lel kaimwiseklahn kapakap me kin imwikihla “Amen.” (Aiseia 48:17, 18) Meh tohto anahne koasoanehdi mwowe arail rahn en doadoahk pwe ren kak kommoal rahn en kapokono. Mehlel, e sohte mengei en pekihda rehn ahmw kaunen doadoahk en kihong uhk ahmw ansoun kommoal, ahpw Siohwa kin kamehlele ong kitail me E pahn sewese kitail en wia kupwure. (1 Sohn 5:14, 15) Kitail kak kamehlele me Siohwa pahn kapaiada atail nannanti pwehn kak iang towehda rahno.—Lepin Padahk 10:22.
4 Kasikasik Kangoang me Pahn Kohda: Mie pak me ke kohsang towehda Kapokon en District oh ke nda: “Kapokono me keieu kaselel!” Dahme kahrehda ke ahneki soangen pepehm? Met pwehki nin duwen aramas soh-unsek kan, kitail kin kak ekis ekis luwetla ni pali ngehn, kahrehda kitail anahne kangoang ni pali ngehn. (Aiseia 40:30) Emen sister kawehwehda: “Koasoandi wet kin kaluwetala ie, oh kapokon kan kin sewese ie en mwohnki Siohwa nan ahi mour oh pil kihong ie kehl en pali ngehn me I anahne. Likamwete kangoang kin kohdo ahnsou me I keieu anahne.” Mwein ekei pak ke kin pil ahneki soangen pepehm kohte.
5 Kitail kin ale kangoang laud kaidehn ihte sang padahk kan oh interview kan ahpw pil sang soahng teikan me kin wiawi ni kapokon ko. Emen brother koasoia: “I kin perenki kawehwehpen mour en kaweid me kin mihmi nan Pwuhk Sarawi. Ahpw, mehlel, I pil kin perenki ahnsou me pwuhk kapw kan kin kohda—met I pil kin kasikasik, oh I pil kin perenki mehpwukat mwurin ahi pwurodo sang kapokono.”
6 Kapokon kan kin wia koasoandi kesempwal kan sang Siohwa me kin sewese kitail nan “ahnsou apwal pwukat.” (2 Tim. 3:1) Kapokon pwukat pil kin sewese kitail en peikiong kaweid wet: “Kumwail mwasamwasahn oh dadaurete amwail pwoson, kumwail kommwad, oh nan kapehd kehlail.” (1 Kor. 16:13) Kahrehda, kitail en nantihong pwe kitail en kak paiekihda kangoang laud me pahn wiawi nan Kapokon en District me oaralap koasoia: “Sounkalohk Ngoang kan en Wehio”!