Kapokonpene Aramas akan me Kin Doadoahngki Soangsoangen Lokaia Koaros
1 Mahsen en Koht wie pweipweida rahnwet! Aramas akan “me kin doadoahngki lokaia kan sang wehi kan koaros” kin iangala kaudok mehlel. (Sekaraia 8:23) Iaduwen Sounkadehdehn Siohwa kan kin sewese aramas me ‘kohsang wehi koaros, ni kadaudok koaros, nan sahpw koaros, oh lokaia koaros’ pwehn ahneki nanpwung mwahu rehn Siohwa, oh ahneki koapworopwor en pitsang “kahn kamakam kowahlap”?—Kaudiahl 7:9, 14.
2 Sapwellimen Koht Pwihn kin Mwekidki Anahn wet: Governing Body koasoanehdier me sawaspen Paipel kan en wiawihda ni lokaia 380 samwa pwe aramas akan wasa koaros nan sampah kak wehwehki kesempwalpen Rongamwahu. Kaukaunopada oh wiahda sawaspen Paipel pwukat (pwuhk, brochure, makisihn oh tract kan) ni lokaia tohto kin wia doadoahk laud ehu. E kin wehwehki me Society kin koasoanehdi pwihn akan en sounkawehwe koahiek kan oh pil sewese irail duwen arail anahn akan pwehn kawehwe sawaspen Paipel pwukat ni soangsoangen lokaia kan, iangahki wiahda (print) pwuhk, brochure, makisihn oh tract pwukat oh kadarala pwuhk pwukat ong mwomwohdiso kan. Ahpw, doadoahk me irail sounkalohk kan en Wehio kin wia—padahkiong aramas akan duwen mahsen en komour me kohsang Paipel—iei ih doadoahk me keieu kesempwal mehlel.
3 En Wia Doadoahk Kesempwal wet: Rahnwet, aramas tohto kin kousoan wasa tohto likin pein sapwarail kan. Sapwellimen Koht ladu tohto kin sukuhliki lokaiahn China, Russia, Spain de lokaia teikan pwehn kak kalohk ong aramas akan me kin doadoahngki lokaia pwukat nan pein arail wasa. Pil ekei sounkalohk kan kin sukuhliki American Sign Language. Nan United States kelepw, mie mwomwohdiso 2,900 samwa oh pwihn 240 me kin kalohk oh doadoahngki lokaia 38 likin lokaiahn wai. Ekei aramas me saikinte rong duwen Siohwa oh sehse Pwuhk Sarawi kin mwekidki arail onop Mahsen en Koht oh iangala padahk mehlel.—Rom 15:21.
4 Kitail kin wia uwen me kitail kak en kalohk ong aramas kan me kohsang pil ehu wehi me kin mihmi nan atail wasahn kalohk ahnsou wet? (Kolose 1:25) Mwomwohdiso tohto kin koasoanehdi arail doadoahk en kalohk pwehn kalohk ong aramas akan me kin doadoahngki lokaia kan en pein sapwarail. Sounkalohk kan kin tepida sukuhliki ekei lepin lokaia kan pwe irail kak wia padahk mengei, duwehte: “Kaselehlie Maing. I wahdo rohng me mwahu ong komwi. [Mwurin mwo, irail kin kihong tohnihmw tract de brochure ni pein eh lokaia.] Kaselehlie.” Siohwa kin kapaiada irail me kin eimah kalohk oh tepikihda padahk mwotomwot kan duwehte met!
5 Aramas tohto sang wehi tohto oh kin doadoahngki soangsoangen lokaia kan kin perenki rong duwen Rongamwahu en Wehin Koht. Kitail en wia uwen me kitail kak en kalohk ong aramas pwukat oh ehukihong irail Rongamwahu en Wehin Koht.