Sawas Ni Ahnsou Konehng
1 Ni ahnsou me wahnpoaron Piter wehwehki me mie anahn en kakehlailihala ienge me pwoson kan, nsenoh kin kamwekid ih en kihong irail kataman oh kangoang limpoak kan. (2 Pit. 1:12, 13; 3:1) E kangoange ‘irail me aleier pwoson’ en kekeirada arail irair en pali ngehn kan pwe irail en “wah mwahu oh pweida pwehki loalokong pwung me irail sukuhliki duwen atail Kaun, Sises Krais.” (2 Pit. 1:1, 5-8) Kahrepe Piter kihda soangen kaweid wet iei en sewese irail en nantihong pwe sapwellimen Siohwa luhk oh pilipil ong irail en mehlel oh pahn pweida pwe Siohwa kak mwahngih ma irail “mwakelekel oh pwung mwohn silangih ni kapehd popohl.” (2 Pit. 1:10, 11; 3:14) Ong tohtohn irail me pwoson, sapwellime kangoang wia sawas ni ahnsou konehng.
2 Rahnwet, Kristian sounapwalih kan kin pil nsenohki sapwellimen Koht aramas akan. Nan “ahnsou apwal akan,” sapwellimen Siohwa ladu tohto anahne dadaurete mendahki kahpwal akan. (2 Tim. 3:1) Pwehki kahpwal en mwohni, peneinei, de kahpwal me pid pein ahn emen mour, ekei pahn ahneki pepehm duwehte Depit: “Suwed ngeder kapiliepenehr—me nohn ngeder oh soh kak wadawad. Dipei kan salihiepenehr, oh I solahr kak kilang wasa; re tohtohsang pitenmoangei kat, oh loalei tikitikla.” (Melkahka 40:12) Kahpwal pwukat kak laudla kahrehda aramas pwukat kak solahr nsenohki soahng ngenin kan oh pil solahr iang kalohk. Ahpw, mendahki kahpwal pwukat, ‘irail sohte kin sohpeisang sapwellimen Siohwa kosonned akan.’ (Melkahka 119:176) Met iei ahnsou konehng elder kan en sewese aramas pwukat.—Aiseia 32:1, 2.
3 Pwehn kaitarala anahn wet, elder kan pahn wia uwen me irail kak en sewese irail me solahr iang kalohk. Met elder kan koasoanehdier prokram pwehn sewese irail me solahr iang kalohk oh prokram wet pahn wiawi lao lel imwin sounpwong en March. Sounapwalih en Pwuhk Study kan pahn mwemweitla rehn irail me solahr iang kalohk oh irail pahn kasalehda me irail men sewese aramas pwukat ni pali ngehn pwehn sewese irail en pwurehng iang tohnmwomwohdiso kalohk. Ni ahnsou me elder kan pepehm me aramaso anahne pwurehng onop Paipel, irail pahn koasoanehdi met. Elder kan kak pil idek rehn tohnmwomwohdiso teikan en sawas. Ma elder kan pekihda ahmw sawas, e pahn wia sawas laud ma ke pahn sewese aramaso, keieu ma ahmw sawas oh kangoang pahn wiawi ni ahl kadek oh mwahu.
4 Mie kahrepe tohto me koaros kak ahneki peren ni ahnsou me emen kin pwurehng kehlailda ni pali ngehn oh pil pwurehng iang tohnmwomwohdiso kalohk. (Luk 15:6) Atail nannanti pwehn kangoange irail me solahr kalohk kakete pweida pwehki “lokaia me kitail doadoahngki ni ahnsou konehng.”—Lepin Padahk 25:11.