E Konehng Kitail en Kapinga Siohwa
Kitail Pahn Kasarawi Saken Soutik en Kauno ni April 16
1 Ni atail kin kerkerenlahng April 16, 2003, aramas tohto kin inenen kasikasik rahno. Pwongo, kitail pahn kasarawi kamatalahn Sises, iangahki aramas rar rar kei me pahn pil tuhpene wasa koaros nan sampah oh kapinga mwaren Siohwa. Siohwa sapwellimaniki pwung en ale atail kaping koaros pwehki Ih me koasoanehdi meirong en tomw me Sises ketikihda. Pwehki meirong en tomwo, Siohwa pahn kapaiakihda aramas peik kan kapai kaselel tohto. Kitail kin iang sounmelkahkao oh koulki met sang mohngiongatail unsek: “Siohwa me roson kowahlahpie, me pwung en ketin ale kaping koaros.”—Melkahka 145:3.
2 Sounpwong kan en March, April oh May (ahnsoun Kataman) kin wia ahnsou mwahu en doudouloale duwen sapwellimen Koht kamwahu oh pil uwen laud kitail anahne kalahngankihong Siohwa pwehki E kadarodo “Sapwellime Iehros nan sampah pwehn wiahla tomwpen dipatail kan.” (1 Sohn 4:9, 10) Ma kitail pahn kasarawi Saken Soutik en Kauno ni ahl me pwung oh peik, met kin kasalehda me “Siohwa me sapwellimaniki kadek oh mahk . . . E kin sapwellimaniki limpoak-kadek.” (Melkahka 145:8) Mehlel, mehn kadehde me keieu laud me kin kasalehda me Siohwa kin kasalehda limpoak ong aramas koaros iei meirong tomw en Sises. (Sohn 3:16) Ni ahnsou me kitail kin medemedewe loal duwen sapwellimen Koht limpoak oh pil duwen lelepek me Sises kasalehda erein ah mour, e kin kamwekid kitail en kapinga Siohwa. Sang met lel ahnsou kohkohlahte, kitail kak kapinga Ih pwehki sapwellime limpoak mwuledek me E kasalehda ni E koasoanehdi me kitail kak ale mour soutuk ma kitail pahn wia dahme E kupwurki.—Melkahka 145:1, 2.
3 Sewese Meteikan en Kapinga Siohwa: Atail kalahnganki sapwellimen Koht kisakis en tomw kin kamwekid kitail en luhke meteikan en iang kitail kapinga Siohwa. Ngehn sarawi kamwekid sounmelkahkao en ntingihdi: “Re pahn kin koasoia duwen wiewia mwahu en nin limomwi kan koaros, oh koulki duwen sapwellimomwi kadek.” (Melkahka 145:7) Nan pahr me ahpwtehn neko, Sounkadehdehn Siohwa kan wasa koaros nan sampah kalohk awa lik samwa. Arail nanti imwikihla dah? Ehuehu wihk, average en aramas 5,100 samwa papidaisla pwehn kasalehda me irail inoukihong Siohwa arail mour. Aramas 15,597,746 iang towehda Katamanpen Kamatalahn Krais, oh sang aramas pwukat: irail meh rar pak 9 saikinte kapinga Siohwa nin duwen sounkalohk kan me kin kalohki Rongamwahu en Wehin Koht . . . eri, e sansal me aramas tohto kakete sukuhliki oh iangala padahk mehlel ni ahnsou kohkohdo! Nin duwen sounkalohki Wehio, kitail kesempwaliki atail pwukoa en kalohk oh sewese meteikan en sukuhliki duwen Siohwa, sapwellime Ohl oh sapwellime Wehi.
4 Ehu ahl kaselel me kitail kak kangoange meteikan en kapinga Siohwa iei luhke irail en iang kitail kasarawi Saken Soutik en Kauno. Ke ntingihdier eden irail akan me ke men luhke iangahki eden irail akan me ke anahne katamankin irail duwen mehnia rahn oh kuloak depe Kataman pahn wiawi? Ke luhkeier irail koaros me ke ntingihdi? Ma saikinte, menlau nantihong tuhwong irail koaros oh luhke irail mwohn April 16. Sewese irail en wehwehki duwen kahrepe Kataman kin wiawi. Mwohn Kataman wiawi oh pil mwuri, kasamwo oh koasoiong irail me kapw kan. Sewese irail pwe ren perenki Kataman, oh pil sewese irail en tuhwong meteikan, oh pil kapinga irail pwe re iang towehda Katamano.
5 Iang towehda Kataman kin kak kamwekid aramas kapw kan en kekeirada ni pali ngehn. Emen ohl me onop Paipel rehn Sounkadehde kan iang towehda Kataman, mendahki ohl menet kin soumwahuki “post-traumatic stress disorder”—soumwahu ehu me aramaso kin apwaliki mihmi wasa kan me aramas tohto mie. Ni ahnsou me emen idek rehn ohlo duwen ah madamadau duwen Katamano, e koasoia: “Katamano wia ahnsoun sarawi me kaping oh wahu laud kohwong Koht, oh ngehi iang towehda kasarawi wet.” Mwurin mwo, e tepida iang towehda mihding kan koaros.
6 Mwurin Kataman: Dahme kitail kak wia pwehn sewese irail me kapw kan me iang towehda Katamano en wiahla aramas me pahn kapinga Siohwa? Elder kan pahn tehk duwen irail me kapw kan me iang towehda Katamano oh koasoanehdi sounkalohk koahiek kan en tuhwong irail oh kousapahlih dahme irail sukuhliki oh dahme irail kilang wiawi ni Katamano. Ekei irail mwein men onop Paipel. Kitail en pil luhke irail en iang towehda mihding kan koaros, pwe ma irail pahn kaukaule iang towehda mihding kan koaros: met pahn sewese irail en kekeirada ni pali ngehn oh sukuhliki soahng tohto sang nan Paipel.
7 Koasoandi kapw kan wiwiawi ahnsou wet pwehn kangoange irail me sohte kin kalapw iang kalohk oh pil irail me solahr iang kalohk en kaukaule iang towehda mihding kan koaros. Ma elder kan idek rehmw ma ke kak sewese emen me solahr iang kalohk, menlau mwekidki met oh sewese aramaso. Ma kitail pahn kasalehda limpoak oh nsenohki riatail kan, met pahn kasalehda me kitail idawehn kaweid en wahnpoaron Pohl: “Eri, nin doken eh mie atail ahnsou, kitail en wia mwahu ong aramas koaros, ahpw mehlel ong irail kan me kisehn atail pwoson.”—Kalesia 6:10.
8 E kesempwal me kitail koaros en wia uwen atail kak en iang towehda Katamanpen Kamatalahn Krais April 16. Kitail sohte men katiasang ahnsou keieu kesempwal wet en kapinga Siohwa. Ei, ahnsou wet oh pil ahnsou kohkohlahte, kitail en kapinga Siohwa pwehki sapwellime doadoahk kaselel kan koaros!—Melkahka 145:21.