Theocratic Ministry Sukuhl en 2004
1 Siohwa kin sewese sapwellime aramas akan en wia doadoahk me kin kesempwal ong aramas koaros me kin mihmi nan sampah. Ehu ahl me e kin wia met iei en kaiahne irail wihk koaros nan Theocratic Ministry Sukuhl. Ke kin wia uwen omw kak koaros en wia padahk kan me kin kohwong uhk? Tepida nan January, ekei wekidekla kan pahn wiawi me pid kasukuhl me pahn sewese tohnsukuhl akan en paiekihda koasoandi en sukuhlo.
2 Sounsawaspen Sounapwalih en Sukuhl Pahn Weliwelian: Brother kan me kin wia padahk keieu oh padahk me kin koasoia duwen ire kesempwal sang wadawad en Paipel kin kalahnganki kaweid oh sawas kan me Sounsawaspen Sounapwalih en Sukuhlo kin kihda. Ma itar elder koahiek kan, irail me kin wia pwukoa en wia Sounsawaspen Sounapwalih en Sukuhl kak weliali pak ehu nan pahr ehu. Sang koasoandi wet, elder koahiek koaros kak sawaspene wia doadoahk/pwukoa wet; ahpw keieu kesempwal: elder kan oh ministerial servant koahiek kan pahn paiekihda kaweid oh sawas en elder pwukat me kin koahiek en padahk.
3 Koasoandi en Wia Kousapahl: Ma ahmw mwomwohdiso wia arail Kapokon en Circuit ni wihk en kousapahl, eri kousapahl pahn uhd wiawi nan wihk mwurin Kapokono oh koasoandi en wihk en mwurio pahn uhd keseudo ong wihk en Kapokono. Ahpw, ma Sounapwalih en Circuit mwemweitdo nan ahmw mwomwohdiso ni wihk en kousapahl, koasoandi me se ahpwtehn koasoia sohte pahn wiawi. Ihte koul, padahk en wiepen koasoi, oh padahk me kin kasalehda ire kesempwal kan sang wadawad en Paipel pahn wiawi duwehte me koasoanehdier. Padahk keieu me pahn wiawi ni wihk mwurio pahn uhd wiawi nan wihk en mwemweit en Sounapwalih en Circuit. Mwurin padahk me kin kasalehda ire kesempwal sang wadawad en Paipel, Service Mihding pahn wiawi erein elep en awa, oh elder kan kak pilada mehnia koasoandi me irail mwahuki ong Service Mihding: padahk siluh me pahn reireiki minit 10 de padahk riau me pahn reireiki minit 15. (Tepin pakair kan sohte pahn wiawi.) Mwurin Service Mihding, koul pahn wiawi oh mwurin mwo, Sounapwalih en Circuit pahn wia padahk me pahn reireiki elep en awa. Wihk mwurin mwo, padahk en wiepen koasoi oh padahk en ire kesempwal kan sang wadawad en Paipel pahn wiawi nan Theocratic Ministry Sukuhl, oh mwurin padahk riauwo, Kousapahl pahn wiawi.
4 Kitail anahne doadoahngki atail ahnsou mwahu kan koaros en kekeirada ni pali ngehn. Ni ahmw pahn paiekihda kasukuhl oh sawas me ke pahn ale sang Theocratic Ministry Sukuhl, ke kak kangoange tohn ahmw mwomwohdiso, wia kisehn pweidahn kokohp en Paipel, oh kapinga Ih me ketikihong kitail rohng kaperen me kitail kin kalohki.—Aiseia 32:3, 4; Kaudiahl 9:19.