Koasoandi en Peneinei—Kalohk Nin Duwen Peneinei
1 Siohwa kin ketin perenki mahsanih me pwulopwul kan ahr kin kapinga mware. (Melkahka 148:12, 13) Ni mwehin Sises, pil irail ‘seri kan oh irail me wie dihdi kan kin kapinga’ Koht. (Madiu 21:15, 16) Met pil duwehte rahnwet. Kumwail pahpa oh nohno kan, iaduwen kumwail kak sewese noumwail seri kan en kekeirada mwahu oh wiahla aramas me kin ngoangki kapinga Siohwa nan kalohk? Pil duwehte dahme sansal nan artikel en mwowe me pid duwen mihding kan en mwomwohdiso, ahmw mehn kahlemeng mwahu me kin keieu kesempwal. Emen pahpa kasalehda duwen pepehm en pahpa oh nohno kan nan wasa koaros nan sampah ni e koasoia: “Seri kan sohte kin wia dahme ke nda; irail kin wia dahme ke wia!”
2 Emen sister me tikida rehn pahpa/nohno me lemmwiki Koht koasoia: “Sohte pak ehu se pirida ni menseng en Rahn Kaunop oh idek ma se pahn kalohk. Se esehier me se pahn kalohk.” Pil duwehte met, ke kak sewese noumw seri kan en kesempwaliki doadoahk en kalohk ni ahmw pahn kaukaule iang kalohk wihk koaros nin duwen peneinei. Met sohte pahn ihte sewese noumw seri kan en pil sukuhliki sang arail pahn kin kasawih iuk oh ahmw wiewia kan, ahpw e pil pahn kihong uhk ahnsou mwahu en kasawih noumw seri kan: arail lamalam, arail wiewia kan, oh ia mwomwen irail kekeirada nin duwen arail koahiek.
3 Ekis Ekis Kaiahn Kohwong Irail: Ma seri kan pahn perenki iang kalohk, irail anahne kaunopada ong dahme irail pahn nda nan kalohk. Sister me koasoi mwowe nan artikel wet pil koasoia: “Se ese me se sohte pahn ihte ieiang aht pahpa/nohno nan ara kalohk. Se ese me se pahn kin wia mehkot nan kalohk, mehnda ma se pahn ihte letelet ni wenihmw kan oh kihlahte kisin doaropwe. Pwehki se kin kaunopada mwahu mwohn kalohk en Rahn Kaunop, se kin wehwehki dahme se pahn nda.” Ke kak pil kihda soangen kaiahn wet ong noumw seri kan ni ahmw pahn koasoanehdi minit kei nan wihk koaros en sewese irail en kaunopada ong kalohk, sohte lipilipil ma erein ahnsoun onop en peneinei de pil ehu ahnsou tohrohr.
4 Ehupene kalohk nin duwen peneinei kin kihong uhk ahnsou mwahu en padahkiong noumw seri kan padahk mehlel. Emen Kristian pahpa kin kahre nah serepein ni ah kin alu mwail weneu kohlahng kisin kahnimw pwehn kihla kisin doaropwe kan. Serepeino kin perenki taman ahnsou pwukat oh e koasoia: “Nan aht alu reirei ko, ih ahnsou kan me ahi pahpa kin kakairada padahk mehlel nan ahi mohngiong.” (Deud. 6:7) Ke pil kak wia duwehte met oh ale kapai kan me kin kohsang ahmw kihong kalohk en kisehn ahmw koasoandi en peneinei nan wihk koaros.