Kakairada Rehn Aramas Ineng en Men Sukuhliki Paipel Sang Ni Ahmw Kin Kaukaule Kihla Makasihn Kapw kan Rehrail
1. Iaduwen atail kin wiahda “makisihn route” rehn aramas akan ah kak sewese irail en kakairada arail ineng en men sukuhliki Paipel?
1 Aramas tohto me kitail kin tuhwong nan kalohk kin perenki kasamwo kitail oh ale neitail pwuhk, brochure oh makisihn kan ahpw irail kin pweiek en tepida onop Paipel rehtail. Ehu ahl me kitail kak kakairada arail ineng en men sukuhliki Paipel iei atail pahn kaukaule kihong irail makisihn kapw kan. Ni ahnsou me ke pahn kihong aramas akan makisihn kan, ken ntingihdi eden aramaso oh iawasa e kin mih ie, rahn me ke koasoiong ih, mehnia makisihn kan ke kihong ih, oh iren Paipel kan me kumwa koasoiapene, oh pil ntingihdi dahme ke kilang me aramaso kin perenki. Ni ahnsou me makisihn kapw kan kin kohda nan mwomwohdiso, rapahki ire kan me ke lemeleme aramaso pahn perenki, oh koasoia duwen ire pwukat ni ahnsou me ke pahn kohla reh. (1 Kor. 9:19-23) Kedekedeo, mehkot me aramaso pahn wadek nan neitail makisihn kan pahn kakete kamwekid ah madamadau oh kahrehong ih en men kalaudehla ah sukuhliki Paipel.
2. Dahme kahrehda e kesempwal oh karuwaru aramas en rapahki Siohwa ahnsou wet, oh dahme kitail kak wia pwehn sewese irail?
2 Mehlel, kitail wehwehki me pali moron en aramas sohte pahn wiahla sapwellimen Siohwa ladu kan sang ihte arail pein wadewadek neitail makisihn kan. Pwehki e karuwaru aramas en rapahki Siohwa ahnsou wet, dahme kitail kak wia pwehn sewese irail? (Sepanaia 2:2, 3; Kaudiahl 14:6, 7) Kitail kak kakairada arail ineng en men sukuhliki Paipel ni atail pahn ehukihong irail iren Paipel ehu me kitail pilada me mwahu oh wadek oh koasoia duwen iren Paipel wet ni ahnsou me kitail kihong irail neitail makisihn kan.
3. (a) Iaduwen kitail kak kaunopada ekei iren Paipel kan pwehn ehukihong aramas akan iren Paipel kan? (b) Soangen oaralap dah kei aramas nan ahmw wasahn kalohk kin perenki rong?
3 Kawehwehda Iren Paipel Ehu: Medemedewe aramas akan me ke kin kaukaule wahla makisihn kapw kan rehrail (makasihn route), oh kaunopada ekei iren Paipel kan oh doadoahngki iren Paipel ehute me konehng anahn en emen emen irail oh kawehwehiong irail duwen met. (Pilipai 2:4) Karasepe, ma emen irail mie arail peneinei me ahpwtehn mehla, ke kak pwurehng pwurala rehrail oh ehu ehu ahnsou me ke pwurala, ke kak koasoia dahme Paipel mahsanih duwen irair en me mehlahr akan oh atail koapworopwor en iasada. Ke kak doadoahngki dahme pwuhken Reasoning kin kasalehda pahnangin sawaspen oaralap kan en “Death” (“Mehla”) oh “Resurrection” (“Iasada”) pwehn kaunopada mehnia iren Paipel ke pahn doadoahngki. Mwurin mwo, ke kak pil koasoia oaralap kan duwehte met: iaduwen soumwahu, mahla oh mehla solahr pahn wiawi. Atail mehn akadei iei en rapahki oaralap ehu me aramaso perenki rong de men ese oh ekis ekis kasalehiong ih dahme Paipel kasalehda duwen oaralapo.
4. Dahme kahrehda e kesempwal en sewese aramas en wehwehkihla iren Paipel kan, oh iaduwen kitail kak wia met?
4 Sewese en Wehwehki: Mendahki e mwahu en pil koasoanehdi ahmw koasoi en mengei en wehwehki oh mwotomwot, kitail anahne wia laud sang ihte en wadek iren Paipel kan. Sehdan kin karotongehla ahn aramas madamadau pwe ren sohte kak kilang marain en Rongamwahuwo. (2 Kor. 4:3, 4) Pil irail akan me kin wadek Pwuhk Sarawi kin anahne sawas ohng en kak wehwehki dahme re wadek. (Wiewia 8:30, 31) Kahrehda, ke anahne koasoanehdi ahmw ahnsou
[Kilel nan Pali 8]
(Doulahng ni pali 7)