Prokram Kapw en Kapokon en Circuit

Sampah wet kin mwahuki kitail en kamehlele me koasoandi wet pahn mihmi kohkohlahte. Ahpw, Mahsen en Koht kin weksang met. (1 Sohn 2:15-17) E kin sewese kitail en wehwehkihda me ‘nekidala pai en sampah’ iei mehkot me sohte katepe. Pwehn kakehle sapwellimen Koht aramas akan, Kapokon en Circuit ohng pahr en kalohk en 2007 kin kihda oaralap me koasoia “Nekidala . . . Pai En Nanleng.”—Madiu 6:19, 20.

Madamadau en noahrok kepwe kin iang pidada soahng kan me sansalda nan Episos 2:2 nin duwen “kaun manaman en nan wehwe, iei ngehn me kin kamwakamwakid oh kakaun irail kan me kin uhwong Koht.” Duwehte kisinieng me kin mih wasa koaros, oh aramas kin esingengki, iei duwen “ngehn en sampah wet” kin kipehdi koasoandi wet. (1 Korint 2:12) Pwehki ah manaman me inenen kehlail, e kin mwomwen mie ah “manaman.” Kapokon en Circuit pahn sewese kitail en liksang soangen madamadau en noahrok en kepwe oh en kin medemedewe dahme keieu kesempwal. (Madiu 6:33) Me patehng met, prokram en kapokon wet pahn sewese kitail en kin ale utuht sang Siohwa ni atail kin kihseli Rongamwahuo mendahki soangen kasongosong oh kahpwal kan me kitail kin lelohng.

Tehk pwe ke en kak iang towehda rahno pwon oh ken “rong kanahieng.” (Ipru 2:1) Ntingihdi ire mwotomwot kan me ke kak doadoahngki nan pein ahmw mour oh nan ahmw kalohk. Ni ahmw pahn towehda sangete nin tapio iei ni imwin prokram en pali ngehn wet, ke pahn ale kangoang oh kehl en doulahte ‘nekidala pai en nanleng’!