Doadoahngki Mwahu Ahmw Ahnsou nan Wasahn Kalohk
1 Mie soahng tohto me kitail kak wiahda nan atail wasahn kalohk, oh ahnsou me luhluhwe mwotomwotalahr. (Sohn 4:35; 1 Kor. 7:29) Ni atail pahn koasoanehdi mwahu atail ahnsou, kitail pahn kak doadoahngki mwahu atail ahnsou me kitail koasoanehdier en wia doadoahk en kalohk.
2 Kaunopada: Mwohn ahmw pahn pwarala pwehn iang tuhpenehn kalohk, kaunopada noumw pwuhk kan me ke pahn kihla oh padahk me ke pahn wia. Mwurin tuhpenehn kalohk nekier oh kapakap wiawiher, mwadang inenlahng wasahn kalohk. Met pahn kihong kowe oh irail kan me iang uhk en kak doadoahngki uwen ahnsou me mie ong doadoahk en kalohk.
3 Ma pwukoa kohwong uhk ke en apwalih tuhpenehn kalohk, mwadang tepida ni kuloak me koasoandi en tepida. Koasoandi en tuhpenehn kalohk en wiawi ni mwotomwot—sohte daulih minit 10 lel 15. Mwohn tuhpenehn kalohk e pahn nek, tehkada mwahu pwe koaros en ese iawasa irail pahn kalohk ie oh ihs me re pahn iang.
4 Ni Ahnsoun Kalohk: Ni ahnsou me tuhpenehn kalohk nekier, dehr mihmihseli oh kauwehla ahnsou, ahpw onopada oh samwalahr wasahn kalohk. Ma ke koasoanehdi me ke pahn mwadang nek kalohk, ele ke kak koasoanehdi pein weromw mehn peidaid pwe meteikan en dehr anahne pil mwadang nek. Ma ke iang pwihn ehu, menlau medewe duwen irail kan me pahn awiawih iuk ni ahnsou me ke wie padapadahk. Ele met pidada ken kauhdi ahmw padahk ni elen kadek ong tohnihmw me kin men akamai de ken koasoanehdi en pwurala mwuhr rehn emen me perenki rong.—Mad. 10:11.
5 Ni ahnsou me ke kin pwurala rehn tohnihmw akan, ke kak koasoanehdi ken kohla tuhwong irail kan koaros me ke men pwurala rehrail wasao mwohn ahmw pahn kohla ehu wasa tohrohr pwe ken dehr kauwehla ahnsou oh pil pwurala wasaote rehn emen tohrohr. Ele ke kak doadoahngki telephone oh lokaiahng irail kan me ke men kohla tuhwong mwohn ahmw pahn kohla rehrail pwe irail de sohte mih ni imwarail ko. (Lep. Pad. 21:5) Ma ke medemedewe me ke pahn mihmi ekis werei ni imwen me ke pwurala rehrail ko, ele koasoandi kak wiawihda pwe irail ako me iang kisehn ahmw pwihn en kak kalohk limwahn wasao de pil kohla tuhwong irail kan me re men pwurala rehrail.
6 Kitail mihmi ni ahnsoun rahk laud nan doadoahk en kalohk. (Mad. 9:37, 38) Ni ahnsou keren doadoahk wet pahn imwisekla. Kahrehda, kitail en inengieng doadoahngki mwahu atail ahnsou ni atail kin kalohk.