Ke Pahn Tapihada Onop en Paipel nan October?
1. Dahme kitail pahn kihla nan October?
1 Kitail pahn kihla Kahn Iroir nan sounpwong en October. Pwehn pwurehng pwurala rehn irail me perenki rong, kangoang kowohng kitail en doadoahngki doaropwehn Ke Sou Men Esehla Duwen Padahk Mehlel? oh nantihong en tapihada ehu onop en Paipel. Ia duwen atail kak wia met?
2. Ia duwen atail kak doadoahngki doaropwehn Esehla Padahk Mehlel pwehn tapiada onop en Paipel ni atail pwurehng pwurala rehn emen me ale makasihn kan?
2 Ia Duwen Atail Pahn Doadoahngki Doaropwe wet: Kitail kak nda: “Makasihn me I pwilikihdi rehmwo kin kangoange soangen aramas koaros oh sarawi koaros en kasawih Paipel. [Kihong tohnihmwo doaropwehn Esehla Padahk Mehlel, oh kasalehiong peidek kan me mi mwowe.] Iet ekei peidek kan me Paipel kin sapengla mehlel. Mie pak me ke kin medewe duwen ehu rehn peidek pwukat?” Mwurin omw rong en tohnihmwo eh pasapeng, kumwa wadekpene nan doaropweo pasapeng ong eh peideko oh wadek ehu iren Paipel me kileldi. Padahkihong me ih ehu karasepen dahme Paipel kin padahngki oh kihong ih pwuhken Paipel Padahngki. Kowe eri kasalehda tepin parakrap kan nan irelaud me e pahn pilada sang audepe kan. De ke kak pahkalahng ehu irelaud me kalaudehla dahme kumwa koasoia nan doaropweo. Iet ekei oaralap kan me kak kadoadoahk:
● Ia duwe, Koht kin ketin uhdahn nsenohkin kitail? (irelaud 1, par. 6-10)
● Mahwen oh kahpwal akan pahn kak imwisekla? (irelaud 1, par. 12-13)
● Dahme kin wiawihong kitail ni ahnsou me kitail kin mehla? (irelaud 6, par. 7-8)
● E kin mie koapworopwor ong me melahr akan? (irelaud 7, par. 13-15)
● Ia duwen ei pahn kapakap pwe Koht en kak karonge ie? (irelaud 17, par. 5-8)
● Ia duwen ei pahn kak diarada nsenamwahu nan ei mour? (irelaud 1, par. 4-5)
3. Ia duwen atail kak doadoahngki soangen wiepe kan me konehng irair en tohnihmwo?
3 Ma kitail sohte kak tapihada onop en Paipel sang pwuhken Paipel Padahngki ni tepin atail pwurala, kitail kak wiahda koasoandi en pwurehng pwurala oh pousehla atail koasoi. Nin duwen irair en aramaso, kitail kak pilada en pwurehng pwurala pahn pak kei oh koasoia pil ekei peidek kan nan doaropweo mwohn atail pahn kihong ih pwuhko. Kitail en nantihong doadoahngki mwahu doaropwe wet erein sounpwong en October pwehn tapihada onop en Paipel oh sewese me mohngiong mehlel pwehn esehla “dahme mehlel.”—Sohn 8:31, 32.