Kahrepe Eisek Riau ong Kalohk

Dahme kahrehda kitail kin kalohki rongamwahwo oh wia katohnpadahk? Kitail kin wia met pwehki kahrepe keieu iei en sewese me mohngiong mehlel kan ong kohlahng elen mour? (Mad. 7:14) Ih kahrepe keieu me kileldi ahpw kaidehn met me keieu kesempwal. Eri, mehnia rehn kahrepe 12 kan me kileldi me ke medewe me keieu kesempwal nan doadoahk en kalohk?

1. Atail kalohk kin sewese komourala aramas.—Sohn 17:3.

2. Atail kalohk kin panawih me suwed kan.—Esek. 3:18, 19.

3. E kin sewese pweidahn kokohp en Paipel.—Mad. 24:14.

4. E kin kasalehda sapwellimen Koht pwuhng. Sohte me kak nda me Siohwa sohte ketin mweidohng me suwed kan ahnsou ren koluhla mwohn Eh pahn ketin kasohrirailla.—Wiewia 17:30, 31; 1 Tim. 2:3, 4.

5. E kin mweidohng kitail en kapwaiada atail pwukoa en sewesehki aramas akan ren ahneki nanpwungmwahu rehn Koht me ntahn Sises pwainda.—Rom 1:14, 15.

6. E kahrehiong kitail en dehr pwukoahki mouren meteikan.—Wiewia 20:26, 27.

7. E kin kesempwal ong atail komourala.—Esek. 3:19; Rom 10:9, 10.

8. E kin kasalehda atail poakohng mehn mpatail.—Mad. 22:39.

9. E kin kasalehda atail peikiong Siohwa oh Sapwellime Ohl.—Mad. 28:19, 20.

10. E wia kisehn atail kaudok.—Ipru 13:15.

11. E kasalehda atail poakohng Koht.—1 Sohn 5:3.

12. E kin sewese kasarawihla mwaren Siohwa.—Ais. 43:10-12; Mad. 6:9.

Ahpw kaidehn ihte kahrepe pwukat me kitail kin kalohngki. Karasepe, kalohk kin kakehlaka atail pwoson oh e kihda pwais kaselel kitail en kak wia tohndoadoahk kei me kin iang Koht ketin wiewia sapwellime doadoahk. (1 Kor. 3:9) Ahpw kahrepe me keieu kesempwal me kitail kin wia doadoahk en kalohk iei nempe 12. Sohte lipilipil ma aramas akan rong de sohte rong kitail, kalohk kin sewese kasarawihla mwaren Koht. E pil kin kihda pasapeng pwe Siohwa en ketin sapeng me kin kaukauwe ih. (Lep. Pad. 27:11) Ei, mie kahrepe me inenen mwahu kitail en “kin wonoweite ni padahk oh kawehwe Rongamwahu.”—Wiewia 5:42.