Doadoahngki Wiepen Koasoi me Kamwakid Tohnihmwo
1. Dahme kitail kak sukuhlki sang mwomwen tepin Kristian kan ar kin tuhwong aramas?
1 Tepin Kristian kan kin kalohki rongamwahwo ong aramas akan me kohsang soangsoangen tiahk oh pelien lamalam kan. (Kol. 1:23) Mehnda ma padahk kan koaros oaralapo iei Wehin Koht, mwomwen tepin koasoi kan kin wekpeseng pwehn konehng me kin rongorong kan. Karasepe, ni Piter eh koasoiong mehn Suhs kan me wauneki mehlel Paipel, e tepikihda koasoi en soukohp Soel. (Wiewia 2:14-17) Ahpw, tehk ia duwen Pohl eh kawehwe padahk mehlel rehn mehn Krihk kan me sansal nan Wiewia 17:22-31. Rahnwet, aramas akan nan ekei wasahn kalohk kin wauneki Paipel, oh kitail kak doadoahngki ni saledek ni atail kin kalohk ihmw lel ihmw. Ahpw kitail anahne kanahieng ni atail koasoiong irail me sohte kamehlele Paipel de pelien lamalam kan, de iang pelien lamalam me kaidehn Kristian.
2. Ia duwen atail kak doadoahngki pwuhk kan pwehn sewese irail me wauneki oh pil me sohte wauneki Paipel?
2 Doadoahngki Pwuhk kan ni Ahl me Keieu Mwahu: Pwuhk kan me kitail pahn kihla nan sounpar en kalohk wet pahn kin wekila sounpwong riau koaros oh pahn kasalehda Kahn Iroir kan, kisin doaropwe kan oh kisin pwuhk kan me pali 32. Mehnda ma aramas akan nan atail wasahn kalohk sohte kin kamehlele Paipel, kitail pahn pil kak koasoiaiong irail ire kan sang nan neitail pwuhk kan me re pahn perenki rong. Mwein kitail sohte pahn wadekohng de kasalehiong tohnihmw men me kitail ahpwtehn tuhwong ehu iren Paipel, ahpw ma e perenki rong kitail kak pwurala pwehn sewese ih en kakairada pwoson Sounkapikadao oh sapwellime Mahsen. Ahpw ma kitail kalohk nan wasa me aramas akan kin wauneki Paipel, kitail kak doadoahngki pwuhk kan oh wiepen tepin koasoi me kasalehda soangen wahu wet. Ni mehlel, kitail kak kihla Paipel Padahngki de Rong Koht pwe Ken Mour Kohkohlahte, mendahki pwuhk pwukat kaidehn pwuhk kan me kitail pahn kihla nan sounpwongo. Dahme kesempwal iei en doadoahngki wiepe ehu me pahn kahrehiong tohnihmwo en men esehla Siohwa.
3. Ni ahl dah me mohngiong en aramas akan nan atail wasahn kalohk kin rasehng pwehl?
3 Kaunopada Pwehlo: Mohngiong en emen kin rasehng pwehl. (Luk 8:15) Ekei pwehl kin anahne kaunopada laud mwohn weren padahk mehlel kak tengedi ie oh kakairada. Tepin sounkalohk kan kin pweida ni arail kin poad nan soangsoangen pwehl kan, oh met kin kihong irail peren oh nsenamwahu. (Wiewia 13:48, 52) Kitail pil kak pweida duwehte irail ma kitail kin tehk mwahu wiepen atail tepin koasoi kan.