What Can the Bible Teach Us?​—Ia Mwomwen Doadoahngki Met

Pwuhken Teach Us (saikinte wiawihda ni lokaiahn Pohnpei) oh Paipel Padahngki kereniong duwepenehte. Pwuhk riau pwukat wia neitail mehn doadoahk oh ira koaros kin kasalehda padahk mehlel tehieu oh ni keirekidi tehieu. Ahpw, pwuhken Teach Us kin doadoahngki lokaia mengei kan oh mwomwen eh kin kasalehda padahk pil kin mengei. E wiawihda ong irail kan me ele kin apwalki wehwehki pwuhken Paipel Padahngki. Sohte mie oaritik kan, ahpw mie ire kan nan pwuhken Teach Us me kin kasalehda kawehwe mengei kan ong ekei lepin lokaia kan oh padahk kan me mi nan irelaud kan. Sohte mie peidek kan ni tepin irelaud kan de koakon en kousapahl. Ahpw, ni kaimwiseklahn irelaud kan, mie kousapahl en kawehwe mengei en padahk mehlel en Paipel me kohda nan irelaud kan. Duwehte pwuhken Paipel Padahngki, kitail kak kihla pwuhken Teach Us ahnsou sohte lipilipil, mehnda ma kaidehn ih pwuhk me kitail pahn doadoahngki erein sounpwongo. Ia duwen atail pahn kak doadoahngki soahng pwukat nan pwuhken Teach Us ni ahnsou me kitail wia onop en Paipel?

KOUSAPAHL: Ong pali laud en aramas, wiepe me kitail kin wia ni ahnsoun onop Paipel, wadek parakrap nan pwuhken Paipel Padahngki oh mwuri idek peidek, pahn pweida mwahu. Ahpw, ele tohnsukuhlo sohte nohn ese lokaiao de sohte kak wadawad mwahu. Ma ih duwen met, ele ke pahn pilada en doadoahngki pwuhken Teach Us. Oh kousapahl kan nan irelaudo kak kadoadoahk ni ahnsou me kumwa onop oh kangoange tohnsukuhlo en pein wadek irelaudo. Ke kak padahngki ehuehu padahk mehlel en Paipel nan ehuehu onop me reireiki minit 15. Pwehki kousapahl kan sohte kin pidada oaritik kan me mi nan irelaudo, sounkalohko anahne kaunopada mwahu, medemedewe anahn en tohnsukuhlo. Ma sounkalohko doadoahngki audepen irelaudo ong onop, kousapahl ko kak kadoadoahk ong kousapahl ni kaimwiseklahn amwa onop.

IRE KAN: Lepin lokaia kan oh padahk kan me pwarada nan ire kan keirekidi sang ni tepin irelaud lel kaimwiseklahn irelaud. Sounkalohko kak pilada ma ira pahn koasoiapene ire kan nan pwuhken Teach Us erein ara onop.