Pahpa oh Nohno kan—Wia Mehn Kahlemeng Mwahu ong Noumwail Seri kan
1 Sapwellimen Koht Mahsen padahkiong kitail me “semen me pwung men pahn pereperen.” (Lepin Padahk 23:24, 25) E wia kapai laud ehu ong pahpa oh nohno kan me kin wia mehn kahlemeng mwahu ong neirail seri kan! Emen brother me iang ehu Branch Committee koasoia duwen eh pahpa oh nohno: “Mour en ahi pahpa oh nohno kin poahsoanehda pohn padahk mehlelo, oh I pil men alasang met.” Soahngen mehn kahlemeng dahieu seri kan anahne kilang arail pahpa oh nohno kan en wia?
2 Tiahk Mwahu oh Kasalehda Wahu: Pwukoah en pahpa oh nohno kan iei en kaiahne neirail seri kan en doadoahngki tiahk mwahu. Aramas kin sukuhlikihda tiahk mwahu, kaidehn ihte sang dahme re kin rong, ahpw sang dahme re kin kilang oh alasang. Ihme kahrehda, soahngen tiahk dah kei ke kin kasalehong noumw seri kan? Noumw seri kan kin pein rong uhk ni ahmw kin nda “kupwur mahk,” oh “menlau,” oh “kalahngan”? Nanpwungen tohnpeneinei kan, ke kin kasalehda wahu ong pein emenemen irail? Ke kin rong kanahieng ni ahnsou me meteikan kin koasoi? Ke kin rong ni ahnsou me noumw seri kan kin koasoiong uhk? Kitail kin doadoahngki tiahk mwahu pwukat nan Kingdom Hall oh pil nan imwamwail?
3 Kehlail ni Pali Ngehn oh Ngoangki Wia Doadoahk en Kalohk: Emen brother me iang doadoahk en kalohk kaukaule daulih sounpar 50 tamanda: “Ahi nohno oh pahpa kin wia mehn kahlemeng mwahu ni ara kasalehda ara kalahnganki mihding kan oh ara ngoangki doadoahk en kalohk.” Iaduwen ke kin kasalehong noumw seri kan me ke kin nsenohki irail koaros en kehlail ni pali ngehn? Ke kin koasoiaiong ahmw peneinei “iren rahn”? Ke kin onop Paipel kaukaule rehn omw peneinei? Noumw seri kan kin kilang uhk wadek Paipel oh pwuhk en Society kan? Dahme re kin rong ni ahnsou me ke kin wia kapakapki ahmw peneinei? Ke kin koasoiaiong noumw seri kan mehkot me kin pid ni pali ngehn, koasoiapene duwen mehkot me pahn kakehle noumw seri kan ong padahk mehlel oh mwomwohdiso? Ke kin kasikasik en towehda mihding kan oh iang doadoahk en kalohk nin duwen peneinei ehu?
4 Pahpa oh nohno kan, medemedewe duwen mehn kahlemeng me kumwail kin wia ong noumwail seri kan. Wia mehn kahlemeng mwahu ehu ong noumwail seri kan, oh re pahn kesempwaliki met erein arail mour. Emen me pwoudki emen soundoulik, me mahki sounpar 70 samwa koasoia: “I kin paiekihda mehn kahlemeng mwahu en ahi pahpa oh nohno Kristian lao lel ni ahnsou wet. Oh I kapakapki me I kak kolokolte ahi kalahnganki kisakis wet ni ahnsou kohkohlahte.”