Sihpw Teikan Oh Inou Kapw

“Mehn liki kan. . . , me kin wauneki rahnen Sapad oh kolokol sapwellime inou kan ni loalopwoat. I pahn weiiraillahng Saion, ei dohl sarawio.”​—AISEIA 56:​6, 7.

1. (a) Nin duwen me kasansal en Sohn kasalehda, dahme wiawihda nin doken tohnleng ko koledi kisinieng en kadeik en Siohwa? (b) Pokon kapwuriamwei dahieu Sohn kilangada?

NAN KASANSAL kapahieuo nan pwuhk en Kaudiahl, wahnpoaron Sohn kilangada tohnleng pahmen ahr kolokol kisinieng en sapwellimen Siohwa kadeik lau tohn “Israel en Koht” koaros kileledi. Irail pwukat me tepin paiekihda Sises, keieun kisehn kadaudok en Eipraam. (Kalesia 6:16; Senesis 22:18; Kaudiahl 7:​1-4) Nan kasansalohte, Sohn kilangada “pokon kalaimwuhnie-me sohte aramas kak wadekedi uwen tohto! Re kohsang nan wehi koaros, ni kadaudok koaros, nan sahpw koaros, oh lokaia koaros; . . . Re ngihl laudida, ndinda, “Komourpat pwilisang rehn at Koht, me ketiket nan mwoale, oh sang rehn Sihmpwulo!” (Kaudial 7:​9, 10) Ni arail koasoia, “komourpat pwilisang . . . rehn Sihmpwulo,” pokon kalaimwun kin kasalehda me irail pil paiekihda Kadaudok en Eipraam.

2. Iahd pokon kalaimwun pwarada, oh iaduwen e sansalda?

² Pokon kalaimwun wet sansaldaiehr mahso nan 1935, oh rahnwet re lelehr meh lime rar samwa. Kileledi pwehn pitsang kahn kamakam kohwalap, towe kan pahn katohrohrlahng mour soutuk ni ahnsou me Sises katohrepeseng “sihpw” kan sang rehn “kuht” kan. Kristian kan en pokon kalaimwun kin iang kisehn “sihpw teikan,” nan ahn Sises karasaras en pelin sihpw kan. Re koapworopworki en mour kohkohlahte nan paradais nin sampah.​—⁠Madiu 25:​31-46; Sohn 10:16; Kaudial 21:​3, 4.

3. Iaduwen Kristian keidi kan oh sihpw teikan ahr wekpeseng me pid inou kapw?

³ Ong 144,000 kan, kapai kan en inoun Eipraam kin doadoahk sang ni inou kapw. Nin duwen towe kan nan inou wet, re mihla “pahn kalahngan en Koht” oh “pahn kosonned en Krais.” (Rom 6:15; 1 Korint 9:21) Ihme karehda, 144,000 tohn Israel en Koht kelehpw me ni pwung tungoale pilawao oh nim waino ni Katamanpen Kamatalahn Sises, oh ong irail kelehpw me Sises wiahda ah inou ong wehi ehu. (Luk 22:​19, 20, 29) Tohn pokon kalaimwun sohte iang towe inou kapw. Ahpw, re kin werekiong Israel en Koht oh kin kousoan rehrail nan “sapwarail.” (Aiseia 66:⁠8) Ihme e pwung en nda me irail pil mihla pahn sapwellimen Siohwa kalahngan oh pahn kosonned en Krais. Nin doken re sohte wia towe kan en inou kapw, re paiekihda inou kapw.

“Mehn Liki kan” oh “Israel en Koht”

4, 5. (a) Nin duwen me Aiseia kasalehda, pwihn dahieu pahn papah Siohwa? (b) Iaduwen Aiseia 56:​6, 7 pweida rehn pokon kalaimwun?

⁴ Soukohp Aiseia ntingihdi: “Mehn liki kan me wiahla kisehn sapwellime aramas akan, me kin poakohng oh papah, me kin wauneki rahnen Sapad oh kolokol sapwellime inou kan ni loalopwoat: I pahn weikumwaillahng Saion, ei dohl sarawio, oh kihong kumwail peren nan ei tehnpas en kapakap, oh kapwurehla meirong kan me kumwail pahn wia pohn ei pei sarawio.” (Aiseia 56:​6, 7) Nan Israel, met kin wehwehki me “mehn liki kan,” irail kan me kaidehn mehn Israel, pahn kaudek ong Siohwa​—⁠oh re pahn poakohng mware, oh peikiong kosonned kan en inoun Kosonned, oh kapwaiada Sapat, oh kihda meirong kan ni tehnpas sarawio, sapwellimen Koht “tehnpas en kapakap.”​—⁠Madiu 21:13.

⁵ Nan atail ahnsou, “mehn liki kan me wiahla kisehn sapwellimen Siohwa aramas” iei pokon kalaimwun. Irail pwukat kin papah Siohwa ni arail kin werekiong Israel en Koht. (Sekeraia 8:23) Re kin kihda soahngen meirong pwungohte duwehte Israel en Koht. (Ipru 13:​15, 16) Re kin kaudok nan sapwellimen Koht tehnpas sarawio ngehnino, sapwellime “tehnpas en kapakap.” (Pil tehk Kaudiahl 7:15.) Re kin kawauwihte rahn en Sapat wihk koaros? Me keidi kan oh sihpw teikan sohte mih pahn kosonned en kapwaiada met. (Kolose 2:​16, 17) Ahpw, Pohl mahsanihong Kristian en Ipru keidi kan: “Ahpw nin duwen met, rahnen kommoal ehu pahn pahn pil mie rehn sapwellimen Koht aramas akan, duwehte Koht eh ketin kommoaldihsang sapwellime doadoahk ni keisuhn rahn. Pwe mehmen me pahn pedolong oh kommoaldi rehn Koht, pahn kommoalasang pein eh doadoahk, duwehte Koht eh kommoalasang sapwellime doadoahk.” (Ipru 4:​9, 10) Mehn Ipru ko pedolong nan “kommoal en Sapat” wet ni arail mihla pahn “pwung en Koht” oh kommoalasang songosong en kopwung irailkihla doadoahk en Kosonnedo. (Rom 10:​3, 4) Kristian Mehn Liki keidi kan kin paiekihda kommoalohte ni arail kin pein mihla pahn pwungen Siohwa. Pokon kalaimwun kin iang irail nan kommoalo.

6. Iaduwen sihpw teikan rahnwet alehda inou kapw?

⁶ Pil ehu, sihpw teikan kin mihla pahn inou kapw duwehte mehn liki kan en mahs me kin mihla pahn inoun Kosonned. Ni ahl dahieu? Kaidehn ni arail kin iang towehda inou kapw ahpw ni arail kin peikiong kosonned kan me pidada inou wet oh paiekihda ah koasoandi kan. (Pil tehk Seremaia 31:​33, 34.) Duwehte iengerail me keidi kan, kosonned en Siohwa kin ntingdi ‘nan mohngiong’ en sihpw teikan. Re uhdahn poakohng sapwellimen Siohwa kosonned kan oh mouren kosonned kan oh kin peikiong. (Melkahka 37:31; 119:97) Duwehte Kristian keidi kan, re ese Siohwa. (Sohn 17:⁠3) Iaduwen sirkumsais? Mpen sounpar 1,500 mwohn wiawihdahn inou kapwo, Moses kangoangehki mehn Israel kan: “Kumwail sirkumsaisla mohngiongamwail kan.” (Deuderonomi 10:16; Seremaia 4:⁠4) Nin duwen anahnepen sirkumsais en paliwar sohla iangahki Kosonnedo, me keidi kan oh sihpw teikan anahne “sirkumsaisla” mohngiongarail. (Kolose 2:11) Ikmwuri, Siohwa ketin mahkohng en sihpw teikan arail sapwung sang ni poahsoan en sapwellimen Sises “ntahn inouwo” me kapwilpwildi. (Madiu 26:28; 1 Sohn 1:9; 2:⁠2) Koht sohte ketin pwekirailda nin duwen seri ngehnin kan, duwehte me e wiahiong 144,000 kan. Ahpw e kasalehda pwunglahn sihpw teikan, ni irairo me Eipraam pwungla nin duwen kompoakepahn Koht.​—⁠Madiu 25:46; Rom 4:​2, 3; Seims 2:23.

7. Koapworopwor dahieu ritida ong sihpw teikan rahnwet, me kasansalda ahr pwung duwehte Eipraam?

⁷ Ong 144,000 kan, arail pwungla kin ritingada elen arail ahnekihla koapworopwor en iang Sises kaunda nan Wehin nanleng. (Rom 8:​16, 17; Kalesia 2:16) Ong sihpw teikan, arail pwungla nin duwen kompoakepahn Koht kin karehong irail en ahnekihla koapworopwor en mour soutuk nan paradais nin sampah​—⁠sang ni arail pahn pitsang Armakedon nin duwen kisehn pokon kalaimwun de sang ni ahr iang ‘kaiasadahn me pwung kan.’ (Wiewia 24:15) Ia uwen e wia kapai ehu en ahneki soahngen koapworopwor wet oh en wia kompoakepahn Kaun Lapalahpie en lahng oh sampah, oh en wia “emen me luhkdohng nan [sapwellime] impwal sarawi”! (Melkahka 15:​1, 2) Ehi, me keidi kan oh sihpw teikan kin paiekihda Sises, Kadaudok en Eipraam ni ahl kaselel ehu.

Rahn En Tomw Lapalap Ehu

8. Dahme kin mwete meirong kan ni Rahn en Tomw pahn Kosonnedo?

⁸ Ni ah koasoia duwen inou kapw, Pohl katamanki irail kan me kin wadek nah kisinlikou duwen Rahn en Tomw me kin wiawi pahr koaros pahn inoun Kosonned. Ni rahno, meirong kan kin katohrohrpeseng oh wiawihda​—⁠ehu ong keinek en samworoun Lipai oh mehteio ong keinek 12 ko me sohte iang keinek en samworo. Ire wet kawehwehdahr ahnsou wereilahr me e kin mwete sapwellimen Sises meirong lapalap me pahn kapaiada 144,000 me ahneki koapworopwor en nanleng oh iangahki aramas rar kan me ahneki koapworopwor en mour nan sampah.a Pohl kasalehda me nan pweidahn kokohpo kapai kan en meirong en Sises kin doadoahk sang ni Rahn en Tomw lapalap ehu pahn inou kapw. Nin duwen Samworo Lapalap en rahn lapalap wet, Sises ketikihda moure unsek nin duwen meirong tomw ehu pwehn alehda “doarepe poatopoat” en tohnsampah.​—⁠Ipru 9:​11-24.

9. Dahme Kristian mehn Ipru keidi kan kak alehda ni ahr mihla nan inou kapw?

⁹ Kristian mehn Ipru tohto nan tepin pahr kan en Kristian kin “ngoangkihte Kosonned en [Moses].” (Wiewia 21:20) Eri, ni pwung, Pohl katamankin irail: “Ihme karehda Krais sapwellimanki doadoahk en kadokepene inou lap kapw, pwe irail kan me Koht ketin malipeier, re en ale kapai soutuk kan me e ketin inoukihong irail. Eri, met kakehr wiawi pwehki pwoulahn Krais me lapwadahr aramas akan sang nan diparail kan me re wiadahr nindoken inou lap mering eh wie doadoahk.” (Ipru 9:15) Inou kapw kasaledek Kristian mehn Ipru kan sang inou mering, me kasalehda arail dipan. Kalahngan en inou kapw, re kak ahnekihla “inoun sohsohki mour soutuk [nanleng].”

10. Dahme me keidi kan oh sihpw teikan kin kalahngankiohng Koht?

¹⁰ “Mehmen” me “kasalehda pwoson Nah” pahn paiekihda meirong tomwo. (Sohn 3:​16, 36) Pohl mahsanih: “Pil duwehte, Krais meirongalahr pahn mehpak pwe en ketikihsang dipen aramas tohto. E pahn ketin sapahldo keriapak, kaidehkin pwe en tomwki dihp, ahpw en komourala irail kan me kin kasikasik ih.” (Ipru 9:28) Rahnwet, irail ko me kin ngoangki kasikasik Sises kin pil iangahki Kristian keidi kan en Israel en Koht me pitla, oh aramas rar kan me wiawikihda pokon kalaimwun, me pil ahneki sohsohn mour soutuk. Pwihn riau pwukat koaros kin kalahngankihong Koht inou kapw oh kapai kan en mour me pidada inou wet, iangahki Rahn en Tomw lapalapo oh en Samworo Lapalapo, Sises, doadoahk en papah nan Wasa Sarawihe nanleng.

Soupisengki Papah Sarawi

11. Pwehki kadeikpen loalerail mwakelekelkihda meirong en Sises, dahme me keidi kan oh sihpw teikan kin perenki wia?

¹¹ Nan nah kisinlikou ong mehn Ipru kan, Pohl kasalehda kesempwalpen meirong en Sises nan koasoandi en inou kapw ah siksang meirong en dihp pahn inou mering. (Ipru 9:​13-15) Meirong en Sises me sikla kak “kamwakelehda kapehditail kan sang tiahk en kaudok soh katepe kan, pwe kitail en kak papah Koht ieias.” Ong Kristian mehn Ipru kan, “tiahk en kaudok soh katepe kan” kin oarepene “diparail kan me re wiadahr nindoken inou lap mering eh wie doadoahk.” Ong Kristian kan rahnwet, re kin oarepene dihp kan me re wiawihda mahso oh koluhkilahr mehlel oh Koht ketin mahkikiohngehr irail. (1 Korint 6:​9-11) Pwehki kadeikpen loalerail mwakelekeldahr, Kristian keidi kan kin kihda “papah sarawi ong Koht ieiaiso.” Oh met pil duwehte pokon kalaimwun. Ni arail kamwakelehkihda “ntahn Simpwuhlo” kadeikpen loalerail, re milahr nan sapwellimen Koht tehnpas ngehnin lapalapo, “papahkiong ih papah sarawi ni rahn oh ni pwong.”​—⁠Kaudiahl 7:​14, 15.

12. Iaduwen atail pahn kasalehda me sen ahneki “kapehd me diren pwoson”?

¹² Patohngete met, Pohl mahsanih: “Eri, kitail keiong pahn kupwur en Koht ni kapehd mehlel me diren pwoson, ni kapehd me mwakelekelsangehr katoutoupen suwed en kadeikpen loalatail oh ni paliwar me wideudkidahr pihl mwakelekel.” (Ipru 10:22) Iaduwen atail kak kasalehda me kitail ahneki “kapehd mehlel me diren pwoson”? Pohl kangoangehki Kristian mehn Ipru kan: “Kitail kolokol tengeteng koapworopwor me kitail kin kadehdehda, pwe Koht, me kitail kin koapworopworki uhdahn pahn ketin kapwaiada sapwellime inou. Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwenki wia. A kitail nantihong kakehlaka nan kapehd en emenemen, pwe duwen amwail ese Rahnen Kauno kerendohr.” (Ipru 10:​23-25) Ma atail pwoson kin momour, kitail pil sohte pahn ‘tokedihsang atail tiahk en pokonpene.’ Kitail pahn perenki kangoange riatail Kristian kan oh ale kangoang sang rehrail en limpoakpene oh en wia doadoahk mwahu kan oh en kakehlpene ong doadoahk kesempwal en kalohkiohng wehi pokon atail koapworopwor en mour sampah de nanleng.​—⁠Sohn 13:35.

“Inou Poatopoat”

13, 14. Ni ahl dahkei inou kapw poatopoat?

¹³ Dahme pahn wiawi ni ahnsou me irail 144,000 ko koaros alehdi arail koapworopwor en nanleng? Inou kapw pahn sohla doadoahk? Ni ahnsouwo, luhwen tohn Israel en Koht kan pohn sampah sohla pahn mie. Irail ko koaros me wia tohn inouwo pahn miehr rehn Sises “nan wehin Semeo.” (Madiu 26:29) Ahpw kitail kin tamanda mahsen en Pohl nan nah kisinlikou ong mehn Ipru kan: “Koht ketin kaiasada sang rehn me melahr akan atail Kaun Sises, me iei Silepe Lapalap en sihpw kan pwehki ntahn sapwellime pwoula me katengedier inou lap soutuko.” (Ipru 13:20; Aiseia 55:⁠3) Ni ahl dahieu inou kapw soutuk?

¹⁴ Keieu, me weksang inoun Kosonned, e sohte pahn welialihda. Keriau, mehkan me e koadoahkehda me poatopoat, duwehte kaundahn Sises. (Pil tehk Luk 1:33 oh 1 Korint 15:​27, 28.) Wehin nanleng ahneki pwukoah poatopoat ehu nan kupwur kan en Siohwa. (Kaudial 22:⁠5) Oh kesiluh, sihpw teikan pahn kaukaule paiekihda koasoandi en inou kapw. Erein Kaundahn Krais Pahr Kido, aramas lelepek kan pahn kaukaulehte “papahkiong [Siohwa] papah sarawi ni rahn oh ni pwong nan sapwellime tehnpas sarawio” duwehte me re kin wia ahnsouwet. Siohwa sohte pahn pwurehng katamando diparail kan en mahs me mahkpe kohwongehr sang ni poahson en “ntahn inou” en Sises. Re pahn pousehlahte paiekihda ahneki nanpwung mwahu nin duwen kompoakepahn Siohwa, oh sapwellime kosonned pahn ntingdihte nan mohngiongarail kan.

15. Kasalehda ia mwomwen nanpwungen Siohwa oh sapwellime tohnkaudek en sampah kan nan sampah kapw.

¹⁵ Siohwa pahn ahnsouwo kak patohwanohng aramas ladu pwukat: ‘Ngehi arail Koht, oh irail nei aramas’? Ehi. “E pahn ketiket rehrail, oh irail pahn wiahla sapwellime aramas. Pein Koht pahn kin ketiket rehrail oh e pahn wiahla ar Koht.” (Kaudiahl 21:⁠3) Re pahn “kapilpenehr kahnimpwal en sapwellimen Koht aramas [sarawi kan],” wiliepen “kahnimw kompoakeo” nan sampah, lih kamwohd en Sises Krais nanleng. (Kaudiahl 14:1; 20:9; 21:⁠2) Mehpwukat koaros kak wiawi pwehki arail pwoson “ntahn inou” en Sises me kapwilpwildi oh arail uhpaiong nanmwarki kan oh samworo kan nanleng, me ni ahnsou me re mihmi sampah kin wia Israel en Koht.​—⁠Kaudiahl 5:10.

16. (a) Kapai dah kei kin awiawih irail ko me kaiasada pohn sampah? (b) Kapai dah kei pahn kohdo ni imwin pahr kido?

¹⁶ Iaduwen me melahr akan me pahn kaiasada pohn sampah? (Sohn 5:28, 29) Irail pil pahn ale luk en “kapaiada pein irail” sang ni sawas en Sises, Kadaudok en Eipraam. (Senesis 22:18) Re pil pahn poakohng mwaren Siohwa, oh papah ih, oh kihda meirong pwung kan, oh wiahiong papah sarawi nan sapwellime tehnpas en kapakap. Irail ko me wia met pahn pedolong ong nan sapwellimen Koht kommoal. (Aiseia 55:6, 7) Lau lel ni imwin sounpar kido, me lelepek kan koaros pahn wiahla aramas unsek sang ni epwelpen Sises Krais oh ienge samworo 144,000. Re pahn wiahla aramas pwung, kaidehn ihte kasansalda me re pwung nin duwen kompoakepahn Koht. Re pahn “mourda,” saledek sang douluhl dihp oh mehla me re sohsohkihsang Adam. (Kaudiahl 20:5; 22:2) Ia uwen met pahn wia kapai ehu! Sang ni atail lamalam rahnwet, e mwomwen me en Sises oh 144,000 doadoahk en samworo pahn ahnsouwo kapwaiadahr doadoahk koaros me e pahn wia. Kapai kan en Rahn en Tomw lapalapo eri pahn kadoadoahk unsek. Pil ehu, Sises pahn ‘ketikihong Koht Sahm sapwellime Wehi.’ (1 Korint 15:24) Mie kasongosong me pahn wia kaimwsekpen kasongosong koaros me pahn wiawihong tohnsampah, oh mwuri Sehdan oh nah ngehn saut akan pahn kasohrala soutuk.​—Kaudiahl 20:7, 10.

17. Pwehki peren me mih mwotail, dahme emen emen kitail en nantiong wia?

¹⁷ Pwukoa dahieu, ma mie, me “inou soutuk” pahn kapwaiada nan ahnsou kapereno me pahn tepiada? Kaidehn kitail me pahn kihda pasepeng ong met. Dahme Siohwa kasansalehdahr lau lel ahnsouwet itar ong met. E karehiong kitail en pwuriamweikihla duwen met. Medewehla duwen met​—⁠mour soutuk nin duwen kisehn “lahng kapw oh sampah kapw”! (2 Piter 3:13) Kitail endehr mweidohng okotme en kaluwetehla atail ineng en sohsohkihla inouwo. Kesihnenda teng sohte pahn mengei. Pohl mahsanih: “Kumwail uhdahn pahn kin kanengamah, pwe kumwail en kapwaiada kupwur en Koht oh ale mehkan me e ketin inoukihong kumwail.” (Ipru 10:36) Ahpw, tamataman me, kahpwal kan me kitail kin powehdi, iangahki uhwong kan, sohte kak kaparekiong peren me mihmi mwohtail. (2 Korint 4:17) Ihme karehda, sohte emen kitail en “kin kesehla ar pwoson, re ahpw kin lekdekla.” Ahpw, kitail en kasalehda me pein kitail “pwoson oh kitail aleier komourpatail.” (Ipru 10:39) Kitail koaros en likih unsek Siohwa, Koht en inou kan, ong kapai soutuk en emenemen kitail.

[Nting tikitik me mi pah]

Komw Wehwehki?

◻ Likin Kristian keidi kan, ihs me pil paiekihda Kadaudok en Eipraam?

◻ Ni ahr paiekihda inou kapw, iaduwen sihpw teikan kin duwehte proselyte kan de irail kan me wekiong lamalam en mehn Suhs pahn inou mering?

◻ Iaduwen sihpw teikan paikihda koasoandi en Rahn en Tomw lapalapo?

◻ Dahme karehda Pohl kahdaneki inou kapw “inou soutuk”?

[Kilel nan pali 31]

Pwehki peren me mih mwohtail, kitail en “pwoson pwehn ale komourpatail”