Theocratic Ministry Sukuhl ong 2000
1 Theocratic Ministry Sukuhl wia kapai kaselel ong sapwellimen Siohwa aramas akan. Sangete sounpahr 50 samwalahro lel met, sukuhl wet sewesedahr aramas rar kei en koahiekla ni ahr wia padahk ong wehi pokon oh sounpadahk en padahk mehlel en Pwuhk Sarawi. (Melkahka 145:10-12; Madiu 28:19, 20) Ke kin kilang iaduwen sukuhlo sewese iuk? E pahn pil sewese kitail nan pahr 2000 ma kitail pahn iang wie atail padahk kan oh kapwaiada kaweid kan me kin kohwong kitail.
2 Kaweid me pid duwen padahk kan oh pwuhk kan me kitail pahn doadoahngki ntingihdi ni pali 1 en “Koasoandi en Theocratic Ministry Sukuhl en 2000.” Dahme ntingihdi wasao kin pid minit depe padahk kan, oh padahk kan pahn poahsoanda pohn dah, oh iaduwen padahk pahn wiawihda, oh ire teikan. Menlau wadek kaweid kan oh nantihong kapwaiada.
3 Wadawad en Paipel Erein Wihk: Mie koasoandi riau ong wadawad en Paipel me ntingihdi nan “Koasoandi en Theocratic Ministry Sukuhl en 2000.” Ehu koasoandi me koasoanehdiong kitail en wadek teh limau samwa en Paipel. Kousapahl en wadawad en Paipel kin poahsoanda pohn wadawad wet. Koasoandi teio kin kalaudehla atail wadawad en wihk koaros oh kitail kak wadek teh eisek samwa. Ma ke pahn daur keriau en koasoandi kan, ke kak kanokehla wadek Pwuhk Sarawi pwon erein sounpahr siluh. Ong ekei, re kak wadek tohto sang teh kan me kileledi, ahpw ong ekei, re pahn apwalki wadek teh pwukat. Ahpw, kitail en dehr kapahrekih kitail ong meteikan, ahpw emen emen kitail en wia uwen me kitail kak en wadek neitail Pwuhk Sarawi. (Kalesia 6:4) Dahme keieu kesempwal iei en wadek Mahsen en Koht rahn koaros.—Melkahka 1:1-3.
4 Ma ke men iang Theocratic Ministry Sukuhl, ke kak idek rehn Sounapwalih en Theocratic Ministry Sukuhl. Menlau wia uwen me ke kak ni ahmw wia ahmw padahk kan koaros, oh dehr kauwehla ahmw wia ahmw padahk kan ong kahrepe sohte lipilipil. Kasalehda ahmw kalahnganki me sukuhlo wia kapai ehu sang rehn Siohwa. Kaunopada mwahu, nantihong wehwehkihla wasao me ahmw padahk poahsoanda powe, oh koasoia sang mohngiongomw, ih duwen ke kak paiekihda sukuhl wet.