Sewese Noumw Seri kan en Pweida Nan Arail Kalohk
1 Pahpa oh nohno Kristian akan ahneki pwukoa toutou en kaiahnehda neirail seri kan en kalohk sangete ni arail pwulopwul. Met kak wiawi ni soangsoangen ahl tohto. Ekei seri kan kak wadlikihla ehu iren Paipel mwein mwohn irail ese wadawad. Met kak kamwekid laud irail me kin rong. Ni arail kin lalaudla, irail kak kalaudehla dahme irail kak wia nan kalohk. Iaduwen pahpa/nohno kan ahr kak sewese neirail seri kan en kalohk? Mwein iren sawas kan me kileledi wasaht kak sewese kumwail.
2 Mwurin rahnmwahu, ke kak nda:
◼ “Nei pwutako _____ men ehukihong komwi iren Paipel ehu me mie inenen katep laud me ke pahn perenki rong.” Mwurin mwo, noumw serio pahn nda: “Iren Paipel wet nan Melkahka padahkiong ie duwen mwaren Koht. [Serio pahn wadek (de nda ni wadlik) Melkahka 83:18.] Makisihn pwukat kin kasalehda dahme Siohwa Koht pahn wiaiong kitail. I kak kihdi noumw makisihn pwukat?” Ke kak kanekihla omw koasoi ni ahmw pahn kawehwe duwen koasoandi en sawas.
3 De ke kak song tepin koasoi wet:
◼ “Kaselehlie. I kin kaskasukuhlih nei serepein _____ en kasalehda me e nsenohki meteikan nan kousapw wet. E men ehukihong komwi kisin padahk kis me kin pid iren Paipel ehu.” E kak nda: “Ehu ahl me I kin sewese aramas iei met: I kin ehukihong irail duwen dahme Paipel kin mahsanih me pid duwen ahnsou kohkohdo. [Serio pahn wadek [de nda ni wadlik] Kaudiahl 21:4.] Makisihn pwukat kin kawehwehda duwen dahme Wehin Koht pahn wiaiong kitail. I lemeleme ke pahn perenki wadek makisihn pwukat.”
4 Ma ahnsou koaros noumw serio pahn doadoahngki padahk ehu me mengei, e pahn sewese ih en koahiekla ni e pahn kalohk ong aramas duwen Wehin Koht. Ahnsou me e pahn praktis, ke kak sewese ih en koasoi sansal oh ngile en itar ong tohnihmwo en kak rong mwahu, oh met pahn sewese ih en kak koasoi nan soangsoangen irair koaros. Kaunopada mwahu oh kaping me kohsang ahmw mohngiong pahn sewese noumw seri kan en kasalehda arail pwoson.
5 Ma irail me pwulopwul kan pahn ale soangen kangoang duwehte met, irail pahn kak wiahla sounkalohk me saikinte papidais. Ia uwen kaperen en kilang neitail seri kan kekeirada nan doadoahk en kalohk!—Melkahka 148:12, 13.