“I Sohte Men Rong”
1 Met wia mwekid ieu me aramas tohto kin kasalehda ong atail padahk kan nan ekei wasa kan. Dahme pahn sewese kitail en dehr mworusala ni ahnsou me kitail lelohng soangen irair en sohte men rong nan wasahn kalohk? Iaduwen kitail pahn kak kamwekid aramas akan en men rong rongamwahu?
2 Kolokol Peren: En tamanda dahme kahrehda me tohto sohte men rong pahn sewese kitail en kolokol peren. Aramas akan me kin ale kasukuhl en evolution de me kin tikida nanpwungen aramas akan me sohte kin nsenohki meteikan mwein sohte kin tehk katepen Paipel. Meteikan mwein nsensuwedkihla mwalaun me re diarada nan pelien lamalam kan. Ong ekei, arail sohte men rong kin kak kasalehda arail nsensuwed oh pepehm en sohte koapworopwor. (Episos 2:12) Ekei kin ‘sasairki’ pwehki re toutoukihla kapwunod kan en mour.—Madiu 24:37-39.
3 Mendahki ekei kin kasalehda me re sohte men rong, kitail kak ahneki peren nan kalohk, pwehki kitail ese me atail nanti kin kalinganahda Siohwa. (1 Piter 4:11) Kapataiong met, en koasoia duwen padahk mehlel kak kakehle pein atail pwoson mendahki kitail kin koasoiong irail akan me saikinte men kalahnganki padahk mehlel. Kitail en nantiong kilangwohng aramas akan nan wasahn kalohk nin duwen Siohwa kin ketin wia. E ketin poakehla aramas akan nan Ninipe me sohte “ese wekpeseng palimaun oh palimeing.” (Sona 4:11, NW) Aramas akan me kin kousoan nan atail wasahn kalohk anahne rongamwahu wet! Kahrehda, kitail en dehr uhdi ahpw anahne rapahki ahl akan en kamwekid irail en perenki rong padahk en Paipel.
4 Koasoi Duwen Dahme Aramas akan nan Atail Wasahn Kalohk Kin Nsenohki: Mwein ke kak koasoia ire ehu me aramas akan nan ahmw wasahn kalohk kin nsenohki nan ahmw tepin padahk oh idek rehn tohnihmw ah madamadau. Rong ni ahnsou me e pahn koasoi, mwurin mwo kasalehong ih padahk kansenamwahu en Paipel me pid duwen dahme e nsenohki. Mwurin wiewia kansensuwed ehu wiawi nan ah wasahn kalohk, emen Sounkadehde kasalehda ah nsensuwedkihla mehlel duwen ireo ohng emen emen tohnihmw. E nda: “Aramas akan tepida koasoi, oh I kak koasoiong aramas tohto ni rahno pwehki I kasalehda ahi nsenohki arail mour.”
5 Wehin Koht pahn kapwungala ehu ehu kahpwal me kin lelohng tohnsampah. Song en wehwehki ehu kahpwal me tohnihmw kin keieu nsenohki. Mwein ele e pahn mweidong iuk en kawehwehda koapworopwor kan me Paipel kin padahngki. Ma soh, mwein ele e pahn perenki rong “pil ehu ahnsou tohrohr.”—Wiewia 17:32, NW.