Perenki Kapwaiada Mahsen en Koht
1 Sises kasalehda me ahnsou me e ketiket nan mwoale nanleng, pali laud en aramas ‘sasairki’ dahme pahn wiawi, duwehte ahnsou me nohlik wiawi ni mwehin Noha. (Madiu 24:37-39) E pil sohte kapwuriamwei en kilang me pali laud en aramas sohte kin perenki rong duwen Rongamwahu en Wehin Koht. Dahme kak sewese kitail en ahneki peren nin doken kitail kin wia doadoahk en kalohk?—Melkahka 100:2.
2 Keieu, kitail anahne tamataman me dahme kitail kin koasoia nan kalohk oh pil kehkehlik me kohwong kitail en kalohk kin kohsang Koht. Ma aramas sohte men rong, mendahki ma kitail kin wia uwen me kitail kak en kahrehong irail en men rong, met kin kasalehda me re kahng rong Siohwa. Ma kitail tamataman me atail lelepek nan doadoahk en kalohk kin kaperenda Siohwa oh Siohwa pahn kupwurki kitail kin sewese kitail en ahneki peren mehlel oh nsenamwahu ni atail kin kapwaiada Mahsen en Koht.—Seims 1:25.
3 Keriau, miehte aramas akan me pahn mwekidki Rongamwahu sang Siohwa oh ale kamourparail. Mendahki ma pali laud en aramas sohte kin nsenohki iaduwen atail kalohk ong irail kin pid arail mour, miehte “sihpw kan” me saikinte mwekid oh papidaisla lel met, mendahki ma kitail mihmi ni ahnsou me imwin rahn akan kereniongehr pahn nekier. Kitail en nantihong kalohk, “sohte lipilipil kahnimw dahieu de kousapw dahieu” me kitail kohla, kitail en “rapahki mahs aramas akan me kin men rong kumwail.”—Madiu 10:11-13, New World Translation.
4 En Ahneki Lamalam me Ke Pahn Pweida Mwahu: Ahnsou me aramas akan kin medemedewe duwen dahme pelien lamalam likamw kan wia ni arail kin wia dahme suwed oh mwalaun, met kin kaluwetala aramas akan. Pil ekei kin duwehte “sihpw kei me sohte silepahr” pwehki soahng suwed kan me kin wiawi nan koasoandi suwed wet. (Madiu 9:36) Pil ekei kin nsensuwedkihla arail sohte doadoahk en mwohni, sohte epwel mwahu en roson en paliwar oh sohte soahng kan me kin kihong irail nsenamwahu. Ma kitail wehwehki soahng pwukat, met pahn pil sewese kitail en dadaurete nan doadoahk en kalohk. E pahn mwahu ma ke pahn pilada soangen oaralap kan me pahn pid irair kan me aramas akan kin nsenohki de pwunodki pwehn doadoahngki ahnsoun kalohk. Sewese aramas akan en wehwehki me Wehin Koht kelepw me kak kamwahuwihala soangen kahpwal kan koaros. Doadoahngki iren Paipel kan oh ire kesempwal kan nan neitail pwuhk kan, makisihn kan, brochure kan oh tract kan pwehn lel mohngiongarail pwe ren kak wehwehki oh mwekidki Rongamwahu en Wehin Koht.—Ipru 4:12.
5 Irail akan me kin perenki kapwaiada Mahsen en Koht kin tamataman met ahnsou koaros: “Peren me Siohwa kin ketikihong kitail kin kakehlakeikitailla.” (Neh. 8:10, NW) Sohte kahrepe mwahu en sohte ahneki peren. “Ma tohnihmwo pahn kasamwo kumwail, amwail popohl pahn mihmihte rehrail; a ma re sohte men kasamwo kumwail, a kumwail pwurehng amwail popohl.” (Madiu 10:13) Siohwa kin kakehle atail peren oh kehl ni atail kin dadaurete nan doadoahk en papah Ih oh e kin kapaiada atail lelepek ong Ih.