Kisinlikou Ehu Sang Pwihn me Kin Apwalih Mwomwohdiso nan Sampah Pwon
Ong Riat Sounkadehdehn Siohwa kan:
Ia uwen eh wia kapai ehu ong kitail en kin wa mwaren Kaunen Lahng oh Sampah iei Siohwa! Mwar wet me poatopoat, sohte pahn sohrala oh sohte me pahrekiong. Iei Siohwa me ketikihong kitail en kin wa mwareo, keieu sang nan pahr 1931, kitail adanekihla Sounkadehdehn Siohwa kan. (Ais. 43:10) Kitail kin pohlki atail kin adaneki ahd wet.
Tepilo kin nantihong en kihsang mwaren Koht. Pahn eh kaunda, wehi kan kin soikala mwaren Siohwa. Papilon Lapalap me iei pwihn en pelien sarawi likamw akan koaros nin sampah, kin kailongki mwaren Koht oh kihsang mwar wet nan kawehwehn Paipel tohto. Weksang met, Sises kin ketin kesempwalki mehlel mwaren Semeo oh ih me e tepin mahsanih nan sapwellime loulou me e ketin padahkihong sapwellime tohnpadahk ko. E mahsanih: “Eri, iet duwen amwail pahn kin kapakap: ‘Samat me ketiket nanleng: Mwaromwi en sarawihla rehn aramas koaros.’” (Mad. 6:9) Mwuhr, nan sapwellime loulou ong Semeo, e patohwan: “I kasansaledahr mwaromwi ong aramas ako me komwi ketikihongieier sang nin sampah.” (Sohn 17:6, NW) Ni atail kin kahlemengih Sises, e kin kalaudehla atail kin koasoanehdi teng en nantihong pakairki mwaren Siohwa nan sampah pwon.
Iren pahr en 2009, “Kalohkiseli Rongamwahu,” kin kangoange kitail en wia uwen atail kak koaros nan doadoahk en kalohk. (Wiewia 20:24) E sansal me Siohwa kin ketin kapaiahda atail doadoahk nan pahr en kalohk me neko. Kadehde laud wiawi nin sampah pwon ong kaping oh wahulahn mwaren Siohwa. Sounkalohk 7,313,173 iang wia doadoahk en kalohk ong koaros, oh met me keieu tohto sangete mahs. Irail pil iang padahki irail kan me mohngiong mehlel oh kin rapahki sawas ong kahpwal kan me re kin lelohng. Irail meh 18,168,323 iang towehda Katamanpen Kamatalahn Krais kin kasalehda me me rar kei kak iang likweriong mwaren Siohwa mwohn koasoandi suwed wet eh imwisekla.
Erein en Siohwa eh pahn ketin mweidada, kitail pahn pousehla ngoangki atail kalohki rongamwahu en Wehio oh doadoahngki wiepe kan koaros pwehn kak lel aramas koaros nan atail wasahn kalohk. (Mad. 24:14; Mark 13:10) Sohte lipilipil ma kitail kin kalohk sang ihmw lel ihmw, nanial akan, nan kisinlikou kan oh nan telepwohn, de ahnsou sohte lipilipil, kitail en nantihong kasalehda mwaren Siohwa oh kupwure kan ong koaros.
Mie kahrepe laud ong kitail en kamehlele me Siohwa pahn ketin kalinganahla mwareo ni ahnsou keren. (Esek. 36:23) Ahnsowo pahn mwadang leledo me koaros irail me kin mwamwahliki mwaren Koht pahn tokedi. E pahn wia rahn en kaping ehu ong koaros sapwellimen Siohwa ladu lelepek kan me kin kasalehda mwaren Siohwa oh uhki sapwellime kaunda nin lahng oh sampah!
Sapwellimen Siohwa limpoak ni eh kin ketin apwalih sapwellime aramas akan kin sansalda mwahu nan Kapokon en “Kumwail Mwasamwasahn!” me wiawi nan sampah pwon nan pahr 2009. Kapokon pwukat iei wiewia kesempwal ehu nan poadopoad en sapwellimen Siohwa pwihn oh e kamwakid kitail en kilang anahnepen atail pahn mwasamwasahn duwen rahn en Siohwa.—Mark 13:37; 1 Des. 5:1, 2, 4.
Siohwa uhdahn kin ketin mwahuwong kitail. E kin ketikihong kitail peren. Ni karasaras e ketin kommoaleikitaildi nan mohsen dihpw kaselel kei, oh kin ketin kahluwaikitaillahng ni pihl mwakelekel.—Mel. 23:1, 2; 100:2, 5.
Kumwail kak kamehlel me Siohwa pahn ketin kapaiada kumwail ni amwail pahn pousehlahte papah Siohwa ni ahnsou kan me kohkohdo!
At limpoak en Kristian ong riat akan koaros nin sampah pwon,
Riamwail kan,
Pwihn me kin apwalih mwomwohdiso nan sampah pwon en Sounkadehdehn Siohwa kan