Mahsen en Siohwa Kin Ieias

Ire Kesempwal akan Sang Nan Pwuhk Keieu en Melkahka kan

MEHNIA oaralap me pahn inenen konehng pwuhken Paipel ehu me audaudki pali laud kapingpen Sounkapikpatail, Siohwa Koht? Sohte ahd me kak konehng sang Melkahka kan, de Kaping kan. Pwuhk me keieu reirei wet nan Paipel audaudki wiawihdahn koul lingan akan me kin katamandohng kitail sapwellimen Koht irair kaselel akan oh sapwellime wiewia kowahlap akan oh pil kin ketikihda mahsen en kokohp tohto. Me tohto nanpwungen koul pwukat me kin kasalehda tihwohlahn madamadau me soun nting kan kin ahneki nin doken arail kin lelohng kahpwal. Arail koasoi kan kin pidada irair en ahnsou reirei ieu me reireiki mpen pahr kid—sang rahn akan en Moses lel mehn Israel akan arail sapahldo sang arail selidi. Soun nting kan iei Moses, Nanmwarki Depit, oh meteikan. Samworo Esra me aramas akan kin nda me wiahda irekidi en nan pwuhk wet duwen me kitail kilang pwuhk wet nan rahnwet.

Sangete mahs, pwuhken Melkahka kin pwalpeseng koul akan ni pali limau: (1) Melkahka 1-41; (2) Melkahka 42-72; (3) Melkahka 73-89; (4) Melkahka 90-106; oh (5) Melkahka 107-150. Artikel wet pahn koasoiahte pali keieu. Nan pali keieu wet, Nanmwarki Depit en Israel me ntingihda koul kan koaros, ihte meh siluh meteikan ntingihda. Aramas akan me wiahda Melkahka 1, 10, oh 33 sohte me ese.

“AI KOHT IEI AI PAIPALAP”

(Melkahka 1:1–24:10)

Mwurinte melkahka ehu ah mahsanih meid pai ohlo me kin perenki kosonned en Siohwa, keriauo eri tepidahte koasoia duwen Wehio.a Pekipek kan ong Koht me kadire iren Melkahka pwukat. Karasepe, Melkahka 3–5, 7, 12, 13, oh 17, kin pekipekih Koht en kapitirailsang imwintihti kan. Melkahka 8 oaralapihada sapwellimen Siohwa irair kowahlap ni atail pahn karasadohng irair tikitik en aramas.

Depit kin kasalehda nan ah koul duwen Siohwa me wia doarepen sapwellime aramas akan: “Ai Koht iei ai paipalap. E kin wia ai wasahn ruk.” (Melkahka 18:2) Nan Melkahka 19, e kapinga Siohwa me iei Ih me Sounkapikpatail oh Soun Wiahda Kosonned, Ih me Sounkomour nan Melkahka 20, oh Sounkomourpen sapwellime Nanmwarki keidio nan Melkahka 21. Melkahka 23 kasalehda Ih nin duwen Silepe Lapalap, oh nan Melkahka 24 e kasalehda Ih nin duwen Nanmwarki lingan.

Pasapengpen Peidek kan me Pid Duwen Iren Paipel kan:

2:1, 2—Lokaia “soh audepe” dah me wehi kan kin koasoakoasoia? Mehkot me “soh audepe” iei pwunod mwuledek en koperment en aramas akan ong wie kolokolete arail manaman. Met sohte audepe pwehki arail koasoandi pahn uhdahn ohla. Koasoandi en pwihn en sampah kak ahneki koapworopwor me re pahn pweida ni arail wie “pelipelian Siohwa oh pil pelian sapwellime keidio”?

2:7—Dahkot “pahngok en Siohwa”? Pahngok wet iei inou ong Wehi ehu, me Siohwa ketin wiahiong sapwellime Ohl, Sises Krais.—Luk 22:28, 29.

2:12—Ni soangen ahl dah me kaun en wehi kan kak “metik sapwellime ohl”? Nan ahnsou en Pwuhk Sarawi, metik wia kilelepen kompoakepahnki de lelepek ong aramas emen. E wia wiepen kasamwo aramas en kohdo kan. Nanmwarki en sampah kan pahngok kohwong irail en metik sapwellime ohl—me wehwehki me ren kasamwo ih nin duwen Nanmwarki Keidio.

3:oralap​—Ia kahrepen oaralap kan kohiong ni ekei melkahka kan? Oaralap ekei pak kin kasalehda eden ihs me ntingihada melkahkaho de e kin kasalehda duwen ire kan me kahrehda melkahkaho ah wiawihda, me duwehte Melkahka 3. Oaralap pil kak kawehwehda kahrepe de kadoadoahkpen koul ehu (Melkahka 4 oh 5) oh pil kihong kaweid nin duwen wiepen koul (Melkahka 6).

3:2—Dahkot “Selah”? Lepin lokaia wet aramas tohto kamehlele me e kin wia kilelepen wasahn uhdi ong ahnsou en nennenla oh medemedewe, e sohte lipilipil ma ahnsou en kokoulte de ni ahnsou en koul iangahki keseng. Wasahn uhdi kin doadoahk pwe madamadau oh pepehm en audepen koulo en sansalada mwahu. Sohte anahnepen lepin lokaia kan en wadawad ni ngihl laud ni ahnsou en wadawadepen Melkahka kan.

11:3—Mehnia poahsoan akan me weweikdihsang? Met akan iei poahsoan akan me kousoan en pwihn en aramas kin pwilkihda—kosonned, kaweid oh kopwung. Ma mepwukat pahn pingada, ehupenehn pwihn en aramas ieu pahn sounsuwedla oh sohla pahn mie kopwungpwung. Nan soangen irair pwukat, “mehmen me pwung” pahn likih Koht ni unsek.—Melkahka 11:4-7.

21:3—Dahme kesempwal me pid duwen “nihn kohl ehu”? E sohte lipilipil ma nihno uhdahn nihn ehu de e wia karasaras en lingan kapatapat pwehki ahn Depit kana nan mahwin tohto, me sohte kawehwehda mwahu. Ahpw, iretikitik wet kin kasalehda nihn en nanmwarki me Sises alehsang rehn Siohwa nan pahr 1914. Pwehki nihn wet wiawihkihda kohl, met kin kadehde me sapwellime kaunda me inenen ileile oh kesempwal.

22:1, 2—Dahme kak kahrehiong Depit en ahneki pepehm me Siohwa ketin likidmeliehla ih? Depit mih nan kahpwal sang rehn sapwellime imwintihti kan me kahrehiong sapwellime ‘mohngiong duwehla wax me peipesengehr nan loale.’ (Melkahka 22:14) Ong ih, likamwete Siohwa ketin likidmeliehla ih. Ni ah kamatala, Sises pil sapwellimaniki pepehm wet. (Madiu 27:46) Sapwellimen Depit mahsan akan kin kasalehda sapwellime luwet en uduk nan ah kin lelohng irair apwalo. Sang nan sapwellime loulou en nan Melkahka 22:16-21, e sansal me Depit sohte kesehla sapwellime pwoson Koht.

Mehn Kasukuhl kan ong Kitail:

1:1. Werekiong irail oko me sohte poakong Siohwa en dehr wiawi.—1 Korint 15:33.

1:2. Kitail dehr mweidong rahn ehu en nekla ahpw sohte wia mehkan me ngehnin.—Madiu 4:4.

4:4. Ni atail pahn lingeringerda, kitail en loalokong oh kolokol lowetail pwe kitail dehr nda mehkot me kitail pahn koluhkihla mwuhr.—Episos 4:26.

4:5. Atail meirong en pali ngehn wia “meirong pwung” ma irair kin pwilisang lamalam pwung oh wiewia mwahu kan me Siohwa kin ketin kupwurki.

6:5. Atail kapinga Siohwa kin wia kahrepe keieu kesempwal me pahn kahrehiong kitail en men wie momour.—Melkahka 115:17.

9:12. Siohwa kin ketin tetehk ihs me kakerehdi nta pwe en ketin kaloke me dipkihda ntahn meteikan, ahpw e kin ketin tamataman “likwer en irail me kin mih nan lokolok.”

15:2, 3.; 24:3-5. Tohnkaudok mehlel akan uhdahn pahn koasoi mehlel oh dehr wia kaula likamw oh lokaia widing.

15:4. Ma atail inou sohte uhwong iren Pwuhk Sarawi kan, kitail en nantihong kapwaiada, mehnda ma e inenen apwal.

15:5. Nin duwen atail wia sapwellimen Siohwa tohnkaudok kan, kitail anahne pere kitail sang doadoahngki mwohni ni ahl sapwung.

17:14, 15. “Aramas en koasondi wet en sampah” kin kihong arail mour unsek en rapahki mour kepwehpwe, kakairada ahr peneinei, oh kin kihdi sohso kan mwurin ahr mehla. Dahme Depit keieu nsenohki nan mour wet iei en wiahda adamwahu rehn Koht pwe en kak ‘kilang silangih,’ de ale sapwellimen Siohwa kupwur mwahu. Ni ah pahn “pirida” ong sapwellimen Siohwa inou kan oh kupwur mehlel akan, Depit pahn ‘itariki kilang mwomwe,’ de perenki me Siohwa kin ketiket reh. Duwehte Depit, e soh mwahu kitail en kihong atail mohngiong ong pai en ngehn akan?

19:1-6. Ma kepikipik kan me sohte kak lokaia oh madamadau kin kihong Siohwa lingan, ia uwen ah nohn konehng kitail me kak madamadau, lokaia oh kaudok en kalinganahda ih?—Kaudiahl 4:11.

19:7-11. Sapwellimen Siohwa koasoandi kan—ia uwen ah nohn kamwahu ong kitail!

19:12, 13. Wiahda sapwungala kan oh wiewia aklapalap akan iei dihp ekei me kitail en perehsang kitail.

19:14. Kitail en kesempwaliki kaidehnte dahme kitail kin wia, ah pil dahme kitail nda oh medemedewe.

“PWEHKI AI KIN WIA DAHME PWUNG KOMW KETIN KOLOKOL IE”

(Melkahka 25:1–41:13)

Ia uwen kaselel en ineng oh koasoandi kehlail me kolokol ohng ahn Depit lelepek me pwarada nan tepin iren Melkahka riau en nan kahng en Melkahka pwukat! E koulki, “A duwen ngehi, I kin wia dahme pwung.” (Melkahka 26:11) E wehkada nan ah kapakap en pek mahk dipe kan oh mahsanih: “Ni ei sohte kin wehkada dipei kan, I kin tihwohla wie sengiseng sang ni menseng lel ni pwong.” (Melkahka 32:3) Depit kihda kangoang ong sapwellimen Siohwa me lelepek kan: “Kauno kin ketin sinsile me pwung kan oh kin ketin karonge ar likwer kan.”—Melkahka 34:15.

Ia uwen kesempwal kaweid me kohda nan Melkahka 37 ong mehn Israel akan oh pil ong kitail ni atail mihmihier nan “imwin rahn akan” en koasoandi wet! (2 Timoty 3:1-5) Melkahka 40:7, 8 kasalehda kokohp me pid duwen Sises Krais: “Iet ngehi, Maing; sapwellimomwi kaweid kan ong ie mihmi nan pwuhken Kosonnedo. Maing ei Koht, ia uwen ei kin ngoangki kapwaiada kupwuromwien! I kin kolokol sapwellimomwi padahk kan nan mohngiongiet.” Melkahka me kaimwisekala pwuhken Melkahka pwukat kin mahsanih duwen sapwellimen Depit pekipek en sawas sang Siohwa nin doken pahr akan en ah pwunodki dihp me e wiahdahr rehn Padsipa. E koulki: “Komw pahn ketin sewese ie, pwehki ei kin wia dahme pwung; komw pahn kolokol ie mwohn silangomwi kohkohlahte.”—Melkahka 41:12.

Pasapengpen Peidek kan me Pid Duwen Iren Paipel kan:

26:6—Ni karasaras, duwehte Depit, iaduwen atail kin alu kapil sapwellimen Siohwa pei sarawi? Pei sarawi kin wia kilelepen sapwellimen Siohwa kupwur me kin limehda meirong en tomw me Sises Krais ketikihda pwehn kasaledekihada tohnsampah. (Ipru 8:5; 10:5-10) Kitail kin alu pidakih sapwellimen Siohwa pei sarawi ni atail kin kasalehda atail pwoson meirong wet.

29:3-9—Ia wehwehn kapitiehn Siohwa ah kin duwehte nansapwe me kin kamwekidada madamadau ni ah kin ngiringirsek? E kin kasalehda sapwellimen Siohwa kehl kapwuriamwei!

31:23—Iaduwen aramas aklapalap ah kin ale pweipwei mwuledek? Pweipwei wasaht iei kalokolok. Aramas pwung men kin ale pweinen a sapwung kan me e sohte uhdahn pilahnehda wia ni ah kin ale kaweid en Siohwa. A pwehki aramas aklapalap emen sohte kin uhdihsang wiewia me sapwung, e pahn ale pweine ni kalokolok mwuledek.—Lepin Padahk 11:31; 1 Piter 4:18.

33:6; footnote —Dahkot “ngehno,” de “angin,” en doauesen Siohwa? Ngehn wet iei sapwellimen Koht manaman, de ngehn sarawi, me e kin ketin doadoahngki pwehn wiahda mehkan nanleng. (Senesis 1:1, 2) E kin adaneki ngehn en doauese pwehki e duwehte angin doauese me manaman, e kak ketin kadarewei pwehn wiahda mehkan nan wasa me doh.

35:19—Ia wehwehn sapwellimen Depit pekipek en dehr mweidong irail me kin kailongki ih en marep? Marep wasaht kin kasalehda me sapwellimen Depit imwintihti kan kin perenki arail pilahn en kauwehla ih ar kin pweida. Depit peki met en dehr wiawi.

Mehn Kasukuhl kan ong Kitail:

26:4. Kitail anahne ahneki erpit en kaleke werekiong irail akan me kin ekihla ihs irail nan Internet chat room akan nan computer, oh nan sukuhl de pil nan atail wasahn doadoahk oh kin mwomwehda me irail kompoakpatail kei pwe irail en pitih kitail, oh pil irail me kin uhwong padahk mehlel ahpw kin mwomwehda aramas mwahu, oh pil irail oko me kin mourki mour riau.

26:7, 12; 35:18; 40:9. Kitail en kihong Siohwa kaping ni ahnsou me kitail Kristian kan kin pokonpene.

26:8; 27:4. Kitail kin perenki iang towehda mihding en Kristian akan?

26:11. Ni ahnsou me Depit kin kasalehda ah koasoandi teng en kolokolete ah lelepek, e pil kin wia pekipek en kamaioupe. Ei, kitail pil kak kolokol atail lelepek mendahte me kitail soh unsek.

29:10; footnote. Siohwa kin ketiket pohn “pihl loal” de “madau en lahng,” kin wehwehki me e sapwellimanki manaman unsek ong sapwellime kehl.

30:5. Sapwellimen Siohwa irair keieu laud iei limpoak—kaidehn engieng.

32:9. Siohwa sohte kupwurki kitail en duwehte mahn ahs me kin peik pwehki sahl ni ewe de mehn poak. Ahpw, e ketin kupwurki kitail en pein pilada en peikiong ih sang ni atail wehwehki kupwure.

33:17-19. Sohte koasoandi me pein aramas wiahda, sohte lipilipil ia uwen kehlail, me kak wahdo komour. Atail likilik en mih rehn Siohwa oh sapwellime koasoandi en Wehio.

34:10. Ia uwen ire wet a wia mehn kakehlepen lamalam en irail oko me kin mwohneki mahs mehkan me pid duwen Wehin Koht nan arail mour!

39:1, 2. Ni ahnsou me aramas suwed akan kin raparapahki kahrepe pwe en wahdohng irair apwal ong iengetail me pwoson akan, e wia elen erpit kitail en ‘sohte pahn nda mehkot’ oh nennenla.

40:1, 2. Koapworopworki Siohwa kak sewese kitail en kak powehdi atail pahtou oh ketin waikiehda sang “nan pwoar keper ehu, nan pwelmatak loal.”

40:5, 12. Sohte kahpwal laud akan, oh pil soh unsek en aramas, mehnda ma re inenen ngeder, pahn kauweikitailla ma kitail sohte manokehla me atail kapai kan ‘me nohn ngeder oh sohte kak wadawad.’

“Kapinga Siohwa”

Ia uwen kansenamwahu oh kangoang me mih nan Melkahka 41 me wia tepin pwihn en kahng en Melkahka kan! Sohte lipilipil ma kitail ahneki medek pwehki lokolok kan, de kahpwal me kin kohsang ohlahn nsen mwakelekel, kitail kak ale kakehl oh kangoang sang nan Melkahka pwukat en sapwellimen Koht mahsen roson. (Ipru 4:12) Melkahka pwukat audaudki mehn kaweid likilik nan atail mour. E kin kapwurehiong katamankin kitail me sohte lipilipil soangen apwal dah me kitail pahn lelohng, Siohwa sohte pahn ketin likidmelieikitailla.

Keieu en mwutumwutin melkahka kan kaimwisekihla mahsen pwukat: “Kaping Siohwa Koht en Israel, kapinga ih met oh pil kohkohlahte. Amen oh Amen.” (Melkahka 41:13) Ni atail kaimwisekihlahr atail keseupen tepin melkahka pwukat, kapehdatail kin kamwekid kitail en danke oh kapinga Siohwa?

[Nting tikitik me mi pah]

[Blurb nan Pali 30]

Ma kepikipik kan me soh kak lokaia ahpw irail kin kapinga Siohwa, ia uwen ah nohn konehng kitail aramas en kapinga Siohwa!

[Kawehwehpen kilel kan nan ehu ehu pali 28]

Depit wiahda pali laud en Melkahka 1-41

[Kawehwehpen kilel kan nan ehu ehu pali 29]

Ke ese mehnia Melkahka me kasalehda me Siohwa kin wia Sounsilepe Lapalap?

[Kawehwehpen kilel kan nan ehu ehu pali 31]

E kesempwal en medemedewe oh wiewia soahng ngenin kan rahn koaros

[Kilel Credit Line nan Pali 28]

Stars: Courtesy United States Naval Observatory

[Kilel Credit Line nan Pali 30]

Stars, pages 29 and 30: Courtesy United States Naval Observatory

[Kilel Credit Line nan Pali 31]

Stars: Courtesy United States Naval Observatory