En Usehlahte Wiewia Dahme Mwahu
“Kumwail . . . wia mwahu ong irail.”—LUK 6:35.
1, 2. Dahme kahrehda e kin apwal en wia mwahu ong meteikan?
EN WIA mwahu ong meteikan kin kalapw wia mehkot apwal. Irail akan me kitail kin kasalehiong limpoak ele sohte kin men kasapahlkalahnganki met. Mendahki kitail kin wia uwen atail kak en sewese meteikan oh nantihong ehukihong irail duwen “Rongamwahu lingan me pekederdo sang rehn Koht kalahngan” oh sapwellime Ohl, irail ele sohte pahn kasalehda pepehm en men kalahnganki met. (1 Tim. 1:11) Ekei mwein kin wia aramas suwed kei oh kin kahmahmki de sohte men kamehlele me Sises ketin pwoula pwehn kamaiau kitailsang nan dihp oh mehla. (Pil. 3:18) Nin duwen Kristian kei, iaduwen kitail en wia mwahu ong irail?
2 Sises Krais ketin mahsanihong sapwellime tohnpadahk kan: “Kumwail poakohng amwail imwintihti kan oh wia mwahu ong irail.” (Luk 6:35) Kitail pahn tehk kanaiehng peneu wet. Kitail pahn pil paiekihda sang ire teikan me Sises ketin kasalehda duwen atail en wia mwahu ong meteikan.
“Poakohng Amwail Imwintihti kan”
3. (a) Ni pein omw koasoi, kawehwehda sapwellimen Sises mahsen kan me kileledi nan Madiu 5:43-45. (b) Soangen madamadau dahieu me kaunen pelien lamalam en mehn Suhs akan nan mwein Sises kin kakairada rehrail me pid mehn Suhs oh irail me kaidehn mehn Suhs?
3 Nan sapwellime Kapahrek en Pohn Dohl, Sises ketin mahsanihong irail akan me wie rongorong ih en poakohng arail imwintihti kan oh pil kapakapki irail akan me kin kalokei irail. (Wadek Madiu 5:43-45.) Me mihmihseli wasao ahnsowo iei irail mehn Suhs akan, me uhdahn dehdehki duwen sapwellimen Koht kehkehlik: “Dehr dupungki me suwed ong emen eh wia suwed ong uhk, de kadakadahr omw kailongki, ahpw ke en poakohng mehn mpomw duwehte omw kin poakohng pein uhk.” (Lip. 19:18) Kaunen pelian lamalam en mehn Suhs akan ni mwein Sises kin kamehlele me wehwehn “mehn mpomw” kin dokedokehte mehn Suhs akan. Kosonned en Moses kin pil anahne mehn Israel akan en katohre irail sang tohn wehi teikan, ahpw madamadau me pein irail kakairada rehrail iei en kin kilangwohng irail akan me kaidehn mehn Suhs nin duwen imwintihti kei, me irail en kailongki.
4. Ia pahn duwen wiewiahn sapwellimen Sises tohnpadahk kan ong arail imwintihti kan?
4 Weksang met, Sises ketin mahsanih: “Kumwail poakohng amwail imwintihti kan oh kapakapki me kin kalokei kumwail.” (Mad. 5:44) Sapwellimen Sises tohnpadahk kan anahne en kasalehda limpoak ong koaros me kin kailongkin irail. Nan Rongamwahu en Luk, Sises ketin mahsanih: “Eri, I pahn ndaiong kumwail koaros me rongorong ie: kumwail poakohng amwail imwintihti kan; kumwail wia mwahu ong me kin kailongkin kumwail; kumwail kupwuramwahwih me kin kerieikumwailla; kumwail kapakapki me kin wia suwed ong kumwail.” (Luk 6:27, 28) Pwehn duwehte irail ni mwehin Sises me kin rong oh kapwaiada sapwellime padahk kan, kitail kin “wia mwahu ong me kin kailongkin” kitail ni atail kin kasalehda irair en kadek ong irail. Kitail kin “kupwuramwahwih me kin keriei” kitail ni atail pahn kin lokaia ni elen kadek ong irail. Oh kitail kin “kapakapki me kin kalokei” kitail ki kamakam de soangen elen “wia suwed” me pahn kanamenekih kitail. Soangen kapakap pwukat kin kasalehda me kitail kin poakohng atail imwintihti kan pwehki kitail kin peki rehn Siohwa me tohn kalokolok pwukat ele kak en kawekihla arail irair en mohngiong oh mwekid ni ahl me pahn kak kahrehiong irail en pwungla rehn Siohwa.
5, 6. Ia kahrepen kitail en poakohng atail imwintihti kan?
5 Ia kahrepen kitail en kasalehda limpoak ong atail imwintihti kan? Sises ketin mahsanih: “Pwe kumwail en wiahla sapwellimen Sahm me ketiket nanleng.” (Mad. 5:45) Ma kitail pahn kapwaiada kaweid wet, kitail pahn wiahla “sapwellimen” Koht akan sang ni atail kin kahlemengih Siohwa, me kin “ketin dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek kan oh me dipan akan.” Nin duwen me pwuhken Luk kilelehdi, Koht “kin ketin kalahngan ong me kin dup suwed kan oh me suwed akan.”—Luk 6:35.
6 Pwehn kasalehda ia uwen kesempwal en sapwellime tohnpadahk kan anahne ‘poakohng arail imwintihti kan,’ Sises ketin mahsanih: “Eri, keting dah me kumwail pahn kasikasik sang rehn Koht, ma kumwail pahn poakohngete irail kan me poakohng kumwail? Pwe sounrik daksis kan pil kin wia soahng wet! Oh ma ihte kompoakepahmwail kan me kumwail pahn kin rahnmwahwih, eri, kumwail sohte siksang meteikan, pwe mehn liki kan pil kin wia soahng wet.” (Mad. 5:46, 47) Ma kitail kin ire atail limpoak ongete irail kan me pahn kasapahlkalahngan ong kitail, met sohte pahn warohng ale “keting” de kapai sang rehn Koht. Irail sounrik daksis kan, me aramas akan kin kailongki, pil kin kasalehda limpoak ong aramas akan me kin poakohng irail.—Luk 5:30; 7:34.
7. Dahme kahrehda e sohte pahn wia mehkot siksang ma kitail kin rahnmwahwihte irail akan me kitail kin wiahki ‘kompoakepatail kan’?
7 Mehn Suhs akan kin doadoahngki lepin mahsen wet “popohl” ni arail pahn rahnmwahwih emenemen. (Luk 10:5; Sohn 20:19) Met kin kihong madamadau ong me irail rahnmwahwiho me re koapworopworki me irail ahneki roson mwahu, paiamwahu, oh pahn pweida mwahu nan ar mour. E pahn wia mehkot me ‘sohte sikla’ ma kitail kin rahnmwahwihte irail akan me kitail kin wiahki ‘kompoakepatail kan.’ Nin duwen me Sises ketin kasalehda, met kin pil wiawi rehn “mehn liki kan.”
8. Dahme Sises kin ketin kangoange irail kan me wia rongorong ih ni ahnsou me eh mahsanih: “Mourimwail en unsekla”?
8 Dihp me re sohsohki kin kahrehiong sapwellimen Sises tohnpadahk kan en sohte kak wia aramas unsek kei. (Rom 5:12) Ahpw mendahki met, Sises ketin kaimwisekihla sapwellime kapahrek ki mahsan pwukat: “Eri, mourimwail en unsekla—duwehte ieias unsek en Samamwail me ketiket nanleng.” (Mad. 5:48) Sises eri ketin kangoange irail kan me wia rongorong ih en kahlemengih “Samamwail me ketiket nanleng,” Siohwa, sang ni arail pahn kaunsekihala arail limpoak—met iei sang ni arail pahn poakohng arail imwintihti kan. Ihme e pil konehng kitail en wia met.
Ia Kahrepen Kitail en Kin Kasalehda Mahk?
9. Nin duwen me Sises ketin kasalehda nan sapwellime kapakap, dahme kin pidada atail en uhselahte wia me mwahu?
9 Kitail kin uhselahte wia me mwahu ni ahnsou me kitail kin ni kalahngan mahkohng irail kan me wia sapwung ong kitail. Ni mehlel, mahsen pwukat kin pwarada nan sapwellimen Sises kapakap: “Komw ketin mahkikihong kiht dipat akan, duwen at kin mahkohng koaros me kin wia dihp ong kiht.”—Mad. 6:12.
10. Me pid duwen en mahkohng emen, iaduwen kitail kak en kahlemengih Koht?
10 Kitail anahne en kahlemengih Koht, me kin ketin mahkohng me dipan akan me kin koluhla mehlel. Wahnpoaron Pohl ntingihdi: “Kumwail en kin kadekpene oh loallamwahupene, oh mahkpene duwen Koht eh ketin mahkohng kumwail rehn Krais.” (Ep. 4:32) Sounmelkahka Depit kin koulki: “KAUN-O me kalahngan oh limpoak, me kupwur kanengamah oh diren limpoak poatopoat. . . . E sohte kin ketin kalokei kitail nin duwen me konehng kitail; e sohte kin dupukohng kitail duwen dipatail kan oh atail sapwung kan. . . . Duwen mesenleng oh kepinleng ara dohpeseng, ih duwen eh kin ketin kadohwaneweisang kitail dipatail kan. Duwen sahm emen eh kin kadekohng nah seri kan, ih duwen KAUN-O eh kin ketin kupwurkalahngan ong irail kan me kin wauneki. Pwe e mwahngih dahme kitail wiawihkihda; e pil ketin tamataman me kitail uhdahn pwehl.”—Mel. 103:8-14.
11. Ihs irail kan me Koht kin ketin mahkohng?
11 Aramas akan kak ale mahk sang Koht ihte ma irail pahn kin mahkikihong meteikan sapwung me re wiahiong irail. (Mark 11:25) Pwehn kalaudehla met, Sises pil ketin mahsanih: “Pwe ma kumwail pahn mahkikihong meteikan sapwung kan me re wiahiong kumwail, nahn Samamwail me ketiket nanleng pahn pil ketin mahkikihong kumwail dipamwail kan. A ma kumwail sohte pahn mahkikihong meteikan ar sapwung kan ong kumwail, eri, Samamwail me ketiket nanleng pil sohte pahn ketin mahkikihong kumwail sapwung kan me kumwail kin wiahda.” (Mad. 6:14, 15) Ei, Koht kin ketin kasalehda mahk ongete irail kan me kin ni sapan mahkohng meteikan. Oh ehu ahl me kitail en doulahte wia me mwahu iei en kapwaiada en Pohl kaweid: “Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr.”—Kol. 3:13.
“Tokedihsang Kadeik Aramas”
12. Mehnia kaweid me Sises ketikihda duwen kadeiki aramas?
12 Pil ehu ahl en wia mwahu kin sansalda nan Kapahrek en Pohn Dohl ni ahnsou me Sises ketin mahsanihong irail akan me kin wia rongorong ih: “Kumwail tokedihsang kadeik aramas teikan, pwe kumwail en dehr pakadeikda. Pwe duwen kadeik me kumwail kin kadeiki aramas, ih duwen kumwail pahn pakadeikda, oh duwen mehn sohng me kumwail kin sohngki meteikan, ih duwen me pahn pil sohng ong kumwail.” (Mad. 7:1, 2, NW) Sises eri ketin doadoahngki karasaras ehu pwehn kawehwehda ire wet. (Wadek Madiu 7:3-5.) Kitail en tehkpene ia wehwehn sapwellimen Sises mahsen wasaht ni eh mahsanih: “Tokedihsang kadeik aramas.”
13. Dahme irail akan me kin rongorong Sises anahne wia?
13 Rongamwahu en Madiu kin kasalehda dahme Sises ketin mahsanih: “Kumwail tokedihsang kadeik aramas teikan, pwe kumwail en dehr pakadeikda.” (Mad. 7:1, NW) Nan Rongamwahu en Luk, Sises ketin mahsanih: “Kumwail dehr kadeik [“tokedihsang kadeik,” NW] meteikan pwe kumwail dehr pakadeida rehn Koht; kumwail dehr keriahla meteikan pwe kumwail dehr ale keriapamwail rehn Koht; kumwail mahkohng meteikan pwe Koht en ketin mahkohng kumwail.” (Luk 6:37) Irail Parisi kan nan mwein Sises kin kadeiki meteikan ni elen lemei me poasoanpe sohte pwilisang nan Paipel. Koaros me rongorong Sises oh kin wiewia met anahne en “tokedihsang kadeik aramas.” Ahpw irail en “mahkohng meteikan” arail sapwung kan. Wahnpoaron Pohl pil kihda mehn kaweid me pahrekiong met me pid duwen mahk, me kileldi powe.
14. Ni arail kin kasalehda mahk, dahme sapwellimen Sises tohnpadahk kan kin kamwakid meteikan en wia?
14 Ni arail pahn mahkohng meteikan, sapwellimen Sises tohnpadahk kan pahn kamwakid aramas en pil kin kasalehda irair en mahk. Sises ketin mahsanih: “Pwe duwen kadeik me kumwail kin kadeiki aramas, ih duwen kumwail pahn pakadeikda, oh duwen mehn sohng me kumwail kin sohngki meteikan, ih duwen me pahn pil sohng ong kumwail.” (Mad. 7:2, NW) Me pid duwen atail wiewia ong meteikan, dahme kitail padokedi ihme kitail pahn dolung.—Kal. 6:7.
15. Iaduwen Sises kin ketin kasalehda duwen uwen sapwung en emen pahn kadeik daulihala?
15 Pwehn kasalehda ia uwen sapwung en emen pahn kadeik aramas daulihala, kitail en tamanda me Sises ketin kalelapek: “Dahme ke kin tehngki diper me mi nan pwoaren mesen riomw men, a ke ahpw sohte kin nsenohki lepin tuhke me mi nan pwoaren mesomwen? Ia duwen omw kak ndahng riomwo, ‘Nahn, sepit mahs pwe I en kihsang diperen nan pwoaren mesomwen,’ nin lepin tuhke lep eh mi nan pwoaren mesomwen?” (Mad. 7:3, 4) Aramas men me kin mwahuki kauwe emen kin men tehk sapwung tikitik kan me mih nan “pwoaren mesen” kompoakepaho. E kin uhdahn ndinda me e leme me kompoakepaho sohte ahneki koahiek en madamadau de e sohte kin ahneki dehde mwahu ong duwen mehkan. Mendahki ma sapwung wet kin tikitik—duwehte kisin diper kis—soun kauwe menet kin peki ma e kak “kihsang diperen” pwoaren mesen kompoakepaho. E kin ni elen mwalaun pein toukihda eh sawas pwehn sewese kompoakepaho en kak dehdehkihla soahng kan.
16. Dahme kahrehda kitail kak nda me mehn Parisi kan kin mie “lepin tuhkehn” nan pwoaren meserail ko?
16 Eri ni mehlel kaunen palien lamalam en mehn Suhs akan me kin keieu men kauwe meteikan. Karasepe: Ni en ohl maskun men me Sises ketin kamwahwihala eh maskun padahngki me Sises ketido sang rehn Koht, mehn Parisi kan eri mwakarada oh sapengki: “Ke ipwidi oh kekeirda nan dihp, ke ahpw songosong en padahkih kiht?” (Sohn 9:30-34) Ong duwen koahiek en teneki soahng kan ni pahrek me poahsoanda pohn sapwellimen Siohwa koasoandi kan, irail Parisi pwukat kin kasalehda me mie “lepin tuhkehn” nan pwoaren meserail ko oh irail uhdahn maskun douluhl. Ihme kahrehda Sises mahsanihki: “Mwalaun ahmwen! Kihsang mahs lepin tuhkehn nan pwoaren mesomwen, ke ahpw pahn kak kilang mwahu duwen omw pahn kihsang diperen nan pwoaren mesen riomwo.” (Mad. 7:5; Luk 6:42) Ma kitail kin nantihong en wia me mwahu ong meteikan, kitail sohte pahn wia sounkauwe men me kin ahnsou koaros kilikilang sapwung kan de diper kis nan pwoaren mesen riatail kan. Ahpw, kitail en pohnese me kitail sohte unsek oh anahne en soikala irair en kadeiki kisehtail kan nan pwoson.
Iaduwen Kitail en Wia Mwahu ong Meteikan
17. Nin duwen me Madiu 7:12 mahsanih, ia pahn mwomwen atail wiewia ong meteikan?
17 Nan Kapahrek en Pohn Dohl, Sises ketin kasalehda me Koht kin ketin kasansalehda pepehm en pahpa men ong Sapwellime ladu kan ni Eh kin sapengla arail kapakap akan. (Wadek Madiu 7:7-12.) E kesempwal en tehk me Sises ketin koasoanehdier kosonned wet ong duwen tiahk: “Eri, kumwail wiahiong meteikan me kumwail kin anahne aramas akan en kin wiahiong kumwail.” (Mad. 7:12) Ihte ma kitail pahn wiahiong meteikan nin duwen ahl wet me kitail pahn kadehdehda me kitail iei sapwellimen Sises Krais ladu kan me kin idawehn ih ni mehlel.
18. Iaduwen “Kosonned en Moses” kin kasalehda me kitail en wiahiong meteikan dahme kitail men irail en wiahiong kitail?
18 Mwurin Sises mahsanih me kitail anahne en kin wiahiong meteikan dahme kitail anahne irail en wiahiong kitail, ih eri kapatahiong: “Ih met wehwehn Kosonned en Moses oh padahk en soukohp ako.” Ni ahnsou me kitail kin wia mwahu ong meteikan nin duwen me Sises ketin kawehwehda, atail mwekid pahn kin pahrekiong mour en dahme “Kosonned en Moses”—nting kan me wiahda pwuhken Paipel kan sang Senesis lel Deuderonomi—kin nantihong en kasalehda. Pwuhk pwukat sohte ihte kapwarehda duwen kupwuren Siohwa me pid eh pahn ketikihda kadaudoko me pahn kasohrehla me suwed akan, ahpw e pil kasalehda duwen Kosonned me Koht ketin doadoahngki Moses en ketikihong mehn Israel kan nan pahr 1513 B.C.E. (Sen. 3:15) Oh iangahki met, Kosonned en Moses pil kasalehda ni sansal me mehn Israel kan anahne en pwung, en dehr kasalehda pepehm en lipilipilki aramas, oh en kin nsenohki me semwehmwe kan oh pil mehn liki kan.—Lip. 19:9, 10, 15, 34.
19. Iaduwen “padahk en soukohp ako” kin kasalehda me kitail anahne en wia dahme mwahu?
19 Ahnsou me Sises kin mahsanih duwen “padahk en soukohp ako,” e kin mahmahsanih duwen pwuhken kokohp kan nan Palien Pwuhk Sarawi ni Lokaiahn Ipru. Nting pwukat kin audaudki kokohp kan me pid duwen Mesaia me pweida rehn Krais. E pil kin kasalehda me Koht kin ketin kapaiada sapwellime aramas akan ni ahnsou me irail kin wia dahme pwung mwohn silangih oh wia mwahu ong meteikan. Karasepe ehu, kokohp en Aiseia kin kihda kaweid wet: “KAUN-O ketin mahsanihong sapwellime aramas akan, ‘Kumwail wia dahme pwung, pwe I pahn mwadang doareikumwailla. . . . I pahn kapaiahda irail kan me sohte kin wia me suwed.’” (Ais. 56:1, 2) Ei, Koht kin ketin kasik me sapwellime aramas akan sohte pahn uhdihsang wia dahme mwahu.
Wia Mwahu ong Meteikan Ahnsou Koaros
20, 21. Iaduwen pokono kin mwekidkihda sapwellimen Sises Kapahrek en Pohn Dohl, oh dahme kahrehda kitail anahne en kin doudouloale duwen met?
20 Kitail koasoiapenehr ekeite ire kan sang nanpwungen ire kesempwal tohto kan nan sapwellimen Sises Kapahrek en Pohn Dohl me inenen siksang kapahrek koaros. Kitail pil kak en wehwehki duwen pepehm en irail akan me karonge dahme e mahsanih ni ahnsowo. Paipel mahsanih: “Sises lao ketin kaimwisekala sapwellime mahsen pwukat, pokono ahpw pwuriamweikihla kowahlap duwen mwomwen eh kin ketikihwei sapwellime padahk. Pwe e sohte kin duwehte arail sounkawehwehn Kosonnedo kan; pwe e kin ketin kawehwehda ni manaman.”—Mad. 7:28, 29.
21 Ni soh peikidpe, Sises Krais kin ketin kadehdehda me iei ih me kokohp kan kin kamwarenki: “Sounkaweid Kupwurokong.” (Ais. 9:6) Kapahrek en Pohn Dohl wia karasepe mwahu ehu en kasalehda duwen sapwellimen Sises kupwurokong me pid duwen mwomwen Semeo nanleng kin ketin kilangwohng mehkan. Kapatahiong ire kan me kitail koasoiapenehr, kapahrek wet pil kin kasalehda laud duwen peren mehlel, iaduwen kitail en soikala tiahk samin, ahl en kekeid ni pwung, dahme kitail anahne wia pwehn ahneki mour peren oh nsenamwahu ni ahnsou kohkohdo, oh pil soahng tohto teikan. E uhdahn pahn mwahu ma kitail pahn pwurehng wadek irelaud 5 lel 7 en Madiu ni keneinei oh pil ni elen kapakap. Doudouloale duwen sapwellimen Sises kaweid kaselel kan me kileledi nan ire pwukat. Doadoahngki nan omw mour dahme Sises ketin mahsanih nan sapwellime Kapahrek en Pohn Dohl. Met pahn kahrehiong uhk en kak kaperenda Siohwa, wia mwahu ong meteikan, oh pil doudoulahte wia dahme mwahu.
Iaduwen Ke Pahn Sapeng?
• Iaduwen kitail en kin wia mwahu ong atail imwintihti kan?
• Dahme kahrehda kitail en kin kasalehda mahk?
• Dahme Sises ketin mahsanihki duwen kadeik aramas?
• Me kileledi nan Madiu 7:12, iaduwen kitail en wia mwahu ong meteikan?
[Kawehwehpen kilel kan nan ehu ehu pali 12]
Ia kahrepen kitail en kin kapakapki irail akan me kin kalokei kitail?
[Kawehwehpen kilel kan nan ehu ehu pali 14]
Ke kin ahnsou koaros wia mwahu ong meteikan nin duwen me ke kin men irail en wiahiong uhk?