Sawas kan Ong Peneinei Pwehn Kak Ahneki Nsenamwahu

Panawih Seri kan

John nda:a Mwohn ei pahpa oh nohno kin panawih ie pwehki sapwung ehu me I wiahda, ira kin nantihong en wehwehki kahrepeo oh dahme wiawi. I kin nantihong en alasang ira ni ei kin panawih nei serepein ko. Ei pwoud Alison, tikida nan peneinei ehu me weksang ahi. Eh pahpa oh nohno kin mwadang wia mehkot mwohn ira kin medewe mwahu soahng kan. Ira kin mwomwen kaloke neira seri ko oh sohte kin nsenohki dahme uhdahn kin wiawi. Ekei pak I kin pehm me ei pwoudo kin panawih nait seri ko duwehte eh pahpa oh nohno.

Carol nda: Ei pahpao keseikitla ni ahnsou me I sounpar limau. E sohte kin nsenohki ngehi oh riei serepein silimeno. At nohno kin doadoahk laud pwehn apwalih kiht, oh I pil iang pwukoahki apwalih riei serepein ko. E apwal ong ie en peren duwehte seri teikan pwehki I anahne wia pwukoahn papah oh nohno men. Lel rahnwet, I kin apwalki mwadong ong nei seri kan. Ni ahnsou me I anahne kapwungala nei seri kan I kin pwunodki arail sapwung ahnsou reirei. I kin men ese ia kahrepen e wiawi oh dahme re medemedewe ni ahnsowo. Ahpw ei pwoudo, Mark, sohte kin wia met. E tikida rehn pahpa limpoak men me kin tengedihong eh kaweid kan oh kin apwalih mwahu eh nohno. E kin mwadang en kamwahwihala kahpwal kan rehn nait serepeinko. E kin medewe mwahu duwen dahme wiawi, nantihong kamwahwihala, oh mwuri sohla kin medewe dahme wiawi.

DAHME John oh Carol nda kin kasalehda me mwomwen omw tikida nan omw peneinei kin kak kamwakid laud mwomwen omw panawih noumw seri kan. Ni en ohl pwopwoud men oh lih pwopwoud men kin tikida nan peneinei wekpeseng, ara madamadau pahn pil wekpeseng ni ara pahn kaiahne neira seri kan. Ekei pak wekpeseng en madamadau kak kahrehiong kahpwal nan pwopwoud ehu.

Kahpwal kak laudla ma ira pwangada. Pwopwoud ehu me ahpwtehn naineki seri pahn esehda me en kaiahne seri kak kahrehiong rehn pwangada oh kin anahne arail ahnsou laud. Joan me ih oh eh pwoud Darren apwalihada serepein riemen, koasoia: “I poakepoake nei serepein ko ahpw kaidehn ahnsou koaros re kin meirla ahnsou me I men rehn meirla. Re kin pwourda ni ahnsou me konehng ira en memeir. Re kin kedirepwei ie ni ahnsou me I kin men koasoi. Ira kin kihdi wasa koaros arail suht, likou, oh mehn mwadong kan oh sohte kin kapwurehla pwete nan aiso.

Jack, me eh pwoud soumwahukihda pwunod laud mwurin neira seri keriemeno, koasoia: “I kin kalapw pwurasang doadoahk uhdahn pwang oh kin apwalih nait seri pwelelo lel lukepen pwong. Met kahpwalihala ei ahnsoun panawih nei serepein laudo. E kin peirinki at anahne pil kihong ahnsou rehn rie me tikitiko.”

Ni ahnsou me pahpa oh nohno kin pwangada oh tepida akamaiki ia duwen ira pahn kaiahne neira seri men, kisin sawehwe ehu kak wiahla akamai laud. Ni ahnsou me sawehwe kan sohte kapwungpwungla, met kak kahrehda nanpwung suwed nan pwopwoud ehu oh kahrehiong neira seri en doadoahngki emen ira pwehn alehdi dahme e mwahuki. Mehnia mouren kaweid en Paipel pahn kak sewese pwopwoud ehu en kolokol ara nanpwung mwahu oh ni ahnsowohte pweida ni ara kaiahnehda neira seri kan?

Kihong Ahnsou Ong Omw Mouren Pwopwoud

Koht ketin koasoanehdi riemen en pwopwoudla mwohn ira naineki seri oh kolokol ara inoun pwopwoud mwurin seri ko tohrohrwei sang ira. Me pid inou en pwopwoud, Paipel mahsanih: “Eri, kaleke aramas de kamweidpeseng me Koht ketin kapatapenehr.” (Madiu 19:6) Ahpw, nan ire kohte kasalehda me Koht kupwurki me ehu rahn, ahnsou me seri kan pahn laudla oh ahneki pein arail peneinei, re pahn kak ‘mweisang seme oh ine.’ (Madiu 19:5) Ni mehlel, epwel seri kin wia kisehn mouren pwopwoud ahpw kaidehn utupen pwopwoud. Ei, pahpa oh nohno kan anahne kihong ahnsou laud pwehn kaiahnehda neirail seri kan, ahpw e pahn mwahu ren tamataman me ara ahneki nanpwungmwahu kehlail nan mouren pwopwoud iei poahsoan keieu mwahu en kaiahne neirail seri kan.

Ia ehu ahl me pwopwoud ehu kak kolokol ara nanpwungmwahu erein sounpar kan me ira kin apwahpwalih neira seri kan? Ma kak, kaukaule koasoanehdi ahnsou ira en kelehpwla. Met pahn kihong ira ahnsou en koasoiapene duwen soahng kesempwal kan nan ara kisin peneinei oh pil ahnsou ong pein ira. Ni mehlel, e sohte mengei en wia met. Alison, nohno me kitail koasoiaier, nda, “Ni ahnsou me se leme me se kakehr kelehpwla, ih ahnsou me nait serepein keieu tikitiko kin men sen tehk ih de nait me sounpar weneuwo pahn men sen sewese ih rapahkihda nah mehn mahlen kan.”

Joan oh Darren, me kitail koasoiapenehr, kin wiahda ahnsou ong pein ira ni ara kin koasoanehdi ahnsoun neira seri kan en meirla. Joan koasoia: “Nait seri ko anahne en meirla ni kuloak me se koasoanehdier. Met kihong ahnsou ong ngehi oh Darren en kak kommoal oh koasoakoasoipene.”

En koasoanehdi ahnsoun meir ong neira seri kan, kak kihong pwopwoud ehu ahnsou ong pein ira oh pil sewese seri men en ‘dehr medemedewe me e lapalap’ de kesempwal sang meteikan. (Rom 12:3) Kedekedeo, seri kan me ahnlahr en wauneki koasoandi en meir pahn wehwehkihla me kaidehn ihte kelehpw me kesempwal nan peneineio. Re anahne en peikiong koasoandi en peneinei oh dehr kasik me koasoandi en peneineio pahn pahsan dahme e mwahuki.

SONG WIA MET: Koasoanehdi kuloak en meir oh kolokolte koasoandio. Ma noumwa serio pahn kihda kahrepe ehu me e anahne en awih ekis, duwehte ma e men nimpil, ke kak mweidada met. Ahpw dehr mweidohng serio en kareireila kuloak en eh meir ni eh pahn pwurepwurehng peki soahng teikan. Ma noumw serio peki minit limau en wie pepehd oh ke men kapwaiada eh pekipeko, koasoanehdi en dehr daulih minit limau. Ke anahne koasoanehdi teng ni omw pahn nda “‘Ei’ de ‘Soh.’”​—Madiu 5:37.

Kasalehda Ehupene

“Samwa, rong mahsen en omw pahpa, oh rong kanahieng padahk en omw nohno.” (Lepin Padahk 1:8) Iren Paipel wet kasalehda me pahpa oh nohno ahneki manaman pohn seri kan. Ahpw, mehnda ma pwopwoudo kin tikida nan mouren peneinei ehu me duwepenehte, ele ira kak sohte pwungkipene ia duwen ira pahn kaiahne neira serio, oh soangen koasoandi en peneinei dah me pahn konehng ehuehu irair. Ia duwen pahpa oh nohno kak powehdi kahpwal wet?

John, me kitail koasoiahier nin tepio, nda: “I pehm me e inenen kesempwal en dehr kasalehda at sapwungki ire ehu mwohn seri kan.” Ahpw, e kasalehda me en ehupene kin mengei en nda sang en kapwaiada. E nda: “Seri kan kin uhdahn tehk wasa. Mehnda ma se sohte kasalehda ni lokaia me se sohte pwungkipene mehkot, nait serepeino kak kilang sang mwomwat.”

Ia duwen John oh Alison kin powehdi kahpwal wet? Alison nda: “Ma I kin sapwungki en ei pwoudo kin panawih nait serepeino, I kin awih lao nait serepeino pahn kohkohla sang wasao, ih ahnsowo me I pahn kasalehda ei madamadau. I sohte men nait serepeino en leme me se pahn mweidohng nsene pwehki at sohte kin pwungkipene mehkot. Ma e ese me se sohte kin pwungkipene mehkot, I pahn kin padahkihong ih me tohn peneinei pwon anahne en idawehn sapwellimen Siohwa koasoandi kan, oh I pil kin uhpa koasoandi en ei pwoud pwehki ih me tapwin peneinei, oh e pil anahne en uhpa at koasoandi kan.” (1 Korint 11:3; Episos 6:1-3) John pil nda: “Ni at kin patpene nin duwen peneinei ehu, I kin tiengla mwowe oh panawih nait serepein ko. Ahpw ma Alison kin wehwehki laud dahme wiawiher, I kin mweidohng ih en panawih ira oh I kin utungada ih. Ma I sapwungki mehkot, I pahn koasoiong ih mwuhr.”

Ia duwen ke kak irehdi sawehwe kan me pid kaiahne serio me kakete kahrehda kumwa en nanpwung suwed, oh pil kak imwikihla serio en sohla waunekin kumwa?

SONG WIA MET: Koasoanehdi nan ehuehu wihk en koasoiapene ire kan duwen kaiahne seri ko, oh koasoia ni saledek amwa iren sawehwe kan me ele kumwa ahneki. Nantihong en wehwehki en omw pwoudo iren madamadau, oh kin wauneki nanpwungmwahu me e ahneki rehn serio.

Kaiahne Seri en Kahrehda Kerenpene en nan Pwopwoud

En apwalihada seri kan uhdahn wia doadoahk apwal ehu. Ekei pak, pwukoa wet ele kin kangala ahnsou laud. Ahpw kedekedeo, seri kan pahn tohrohrla, eri nin duwen pwopwoud ehu, kumwa pahn kelehpwla duwehte nin tepio mwohn amwa naineki seri kan. Ia duwe, amwa mouren pwopwoudo pahn kehlailte de e pahn luwetala pwehki epwelpen seri kan? Pasapengo pahn poahsoankihda ia uwen amwa kin doadoahngki mour en padahk me kileldi nan Eklesiasdes 4:9, 10: “Aramas riemen mwahusang emente, pwehki ma ira pahn patpene doadoahk, e pahn mie katepe. Ma emen ira pahn pwupwudi, meteio kak sewesehda.”

Ni en pahpa oh nohno kan kin doadoahkpene, e kak uhdahn imwihla mwahu. Carol, me kitail koasoiahier, kin kasalehda eh pepehm kan nin duwen met: “I ese me ei pwoudo ahneki irair mwahu tohto, ahpw ni at kin ehupene oh apwalih nait seri ko, I kin diarada me mie ekei irair mwahu reh me I sohte ese duwe. Ei kin wauneki oh poakohng ih kin laudla ni ei kin kilang ih apwalih ni limpoak nait serepein ko.” John kin ndahki Alison, “En kilang ei pwoudo kekeirda nin duwen nohno men me uhdahn nsenohki nah seri kan kin kalaudehla ei poakohng oh wauneki ih.”

Ma ke kin wiahda ahnsou ong omw pwoud oh ehupene nan doadoahk erein amwa kin apwalih noumwa seri kan, amwa mouren pwopwoud pahn kehlailla ni en seri kan pahn laudla. Mehn kahlemeng mwahu dah kan kumwa kin wia pwe noumwa seri kan en kak alasang?

[Nting tikitik me mi pah]

IDEK REHMW. . .

▪ Ia uwen laud en ahnsou I kin kelehpwla oh koasoiong ei pwoud nan ehuehu wihk?

▪ Ni ahl dahieu I kin utungada ei pwoud ni eh kin panawih nait seri kan?