Karanih Koht

“I Dehdehkiher Uwen Ar Lokolok Laud”

Eksodus 3:1-10

“SARAWI, sarawi, sarawi! Kauno, Wasa Lapalahpie.” (Aiseia 6:3) Mahsen pwukat kasalehda me Siohwa Koht me inenen mwakelekel oh min. Ele ke pahn kin idek: ‘Soangen Koht Sarawi menet kin ketin nsenohki aramas? E kin ketin uhdahn nsenohkin ie, aramas dipan oh soh unsek men?’ Kitail pahn tehkpene mahsen kansenamwahu kan me Koht ketin mahsanihong Moses me kileldi nan Eksodus 3:1-10.

Rahn ehu Moses apwahpwalih sihpw kan, ih eri kilangada mehkot me inenen kapwuriamwei. E kilangada mpwulen kisiniei me mpwumwpwulsang nan kisin tuhke kis ahpw “sohte roangala.” (Iretikitik 2) E keila oh eri tehk dahme wiwiawi. Siohwa ketin doadoahngki tohnleng men oh mahsanihong Moses sang nan tuhkeo me mpwumwmpwul. “Ke dehr keido met. Kihsang omw suht kan, pwe wasa me ke mihmi ie wasa sarawi ehu.” (Iretikitik 5) Pwehki tuhke me mpwumwmpwulo kin wiliandi Koht sarawi menet, pwehlo pil sarawihla!

Mie kahrepe me Koht sarawi menet en mahsanihong Moses. E mahsanih: “I mahsaniher uwen lokolok laud en nei aramas akan nan Isip; I rongehr ar pekipeki sawas pwehki ar kaun kan me lemei. Ei, I dehdehkiher uwen ar lokolok laud.” (Iretikitik 7) Koht ketin mwahngih kahpwal en sapwellime aramas akan oh e ketin karonge arail pekipek en sawas kan. Arail kahpwal kan wialahr sapwellime. Tehk me Koht mahsanih: “I dehdehkiher uwen ar lokolok laud.” Me pid duwen mahsen pwukat “I dehdehkiher,” ehu pwuhk koasoia: “Mahsen pwukat kin kasalehda en emen pepehm, eh nsenoh oh eh poakehla.” Sapwellimen Siohwa mahsen ong Moses kasalehda ia uwen laud e kin ketin nsenohki aramas.

Dahme Koht pahn ketin wia? E sohte ketin karongehte oh poakehla. E ketin mwekidki dahme e mwahngih. Ih eri ketin koasoanehdi en kapitirailla sang Isip oh kahreiraillahng nan “sahpw ehu me reken mwenge oh kepwe.” (Iretikitik 8) Pwehn wia met, Siohwa ketikihong Moses pwukoa ehu ni eh mahsanih: “Kahluwahsang nei aramas akan . . . nan Isip.” (Iretikitik 10) Moses kapwaiada eh pwukoa ni lelepek oh kahluwahsang mehn Israel kan nan Isip nan pahr 1513 mwohn Krais.

Siohwa sohte ketin wekila. Rahnwet, sapwellime tohnkaudok kan kak kamehlele me e mwahngih arail kahpwal kan oh karonge arail pekipek en sawas kan. E ketin wehwehki arail lokolok kan. Ahpw Siohwa sohte ketin poakehlahte sapwellime aramas lelepek kan. E kin ketin sewese irail “pwehki eh kin ketin apwahpwalih” irail.​—1 Piter 5:7.

Sapwellimen Koht nsenoh kin kihong kitail koapworopwor. Ki sapwellime sawas, kitail aramas soh unsek kan kak song en kapwaiada sapwellime koasoandi pwung oh mwakelekel kan oh kak kenikenla reh. (1 Piter 1:15, 16) Emen Kristian lih me kin pwunod laud oh mworusala kin nsenamwahukihla koasoipen Moses oh kisin tuhke me mpwumwpwul. E koasoia: “Ma Siohwa kak ketin wiahki pwehlo sarawi, eri mie ei koapworopwor. Madamadau wet uhdahn sewese ie.”

Ke men esehla Koht sarawi menet Siohwa? Ke kak ahneki nanpwungmwahu reh pwehki Siohwa “mwahngih dahme kitail wiawihkihda; e pil ketin tamataman me kitail uhdahn pwehl.”​—Melkahka 103:14.