Mour Kapw—En Emenemen Pilipil?
IHS me kak kahrehda mour kapw? Ekei sounpadahk en sarawi kan kin kangoange aramas akan en wiahla Kristian akan nan arail sarawi ni arail kin doadoahngki sapwellimen Sises mahsen kan: “Kumwail koaros uhdahn pahn ipwsapahl.” (Sohn 3:7) Irail kin doadoahngki mahsen pwukat nin duwen kehkehlik ehu me nda, “Ken ipwsapahl!” Re kin padahngki me emenemen pahn pilada en peikiong Sises oh kapwaiada kahk kan en ahneki mour kapw. Met wehwehki me aramas kak pein pilada en ipwsapahl. Ahpw madamadau wet kin pahrekiong dahme Sises mahsanihong Nikodihmus?
Ma kitail pahn wadek kanaiehng sapwellimen Sises mahsen kan, e sansal me Sises sohte ketin padahngki me emenemen kak pein pilada ma e pahn ipwsapahl de soh. Pwekida? Lepin lokaia kan en Krihk me kawehwehdi “ipwsapahl” pil kak kawehwehdi “en ipwidi sang powe.”a Met wehwehki me mour kapw kohsang “powe” me wehwehki “sang nanleng” de “sang rehn Koht.” (Sohn 19:11; Seims 1:17) Ei, Koht me ketin kahrehda mour kapw.—1 Sohn 3:9.
Ma kitail pahn tamatamante lepin lokaia pwukat “sang powe,” e sohte pahn apwal en wehwehki dahme kahrehda emen sohte kak pein ipwsapahl. Nna medewehla duwen pein omw ipwidi. Kowe me pein pilada en ipwidi? Uhdahn soh! Ke ipwidi pwehki omw pahpao me kahrehda. Duwehte met, kitail kak ahneki mour kapw ma Koht, Samatail nanleng, pahn ketin kahrehda met. (Sohn 1:13) Ihme kahrehda wahnpoaron Piter koasoia: “Kitail kapingkalangan ong Koht, Semen atail Kaun Sises Krais, pwehki sapwellime kalahngan lapalap en mour kapw me e ketikihong kitail.”—1 Piter 1:3.
E Wia Kehkehlik Ehu?
Ahpw ekei kin pwonopwonki, ‘Ma emen sohte kak pein pilada en ipwsapahl, dahme kahrehda Sises ketikihda kehkehlik wet: “Kumwail koaros uhdahn pahn ipwsapahl”?’ Peidek mwahu ehu met. Ma sapwellimen Sises mahsen kan kin wia kehkehlik ehu, met wehwehki me e ketin padahkihong kitail en wia mehkot me kitail sohte kak wia. Met sohte pahn mwahu. Eri, ia duwen kitail pahn wehwehki mahsen pwukat “kumwail koaros uhdahn pahn ipwsapahl”?
Ma kitail pahn tehk kanaiehng mahsen pwukat ni lokaiahn Krihk, e sansal me met sohte wia kehkehlik ehu. Ni ahnsou me Sises mahsanih, “kumwail koaros uhdahn pahn ipwsapahl,” e ketin kasalehda ire mehlel ehu ahpw kaidehn kehkehlik ehu.
Pwehn karasahda met, ke kak medewehla kahnimw ehu me mie sukuhl tohto. Ehu rehrail wia sukuhl ong seri kan me pwilidak en wasa ehu me dohsang kahnimwo. Ehu rahn, emen pwutak me kaidehn pwilidak en pwihn wet ndaiong principal en sukuhlo, “I men iang sukuhl wet.” Principalo ahpw padahkihong ih, “Ma ke men iang, ke anahne wia emen pwilidak.” Met kaidehn kehkehlik ehu. Principalo sohte nda, “Ken wiahla pwilidak!” E ihte kasalehda ihs me kak iang sukuhlo. Duwehte met, ahnsou me Sises mahsanih: “Kumwail koaros uhdahn pahn ipwsapahl,” e ketin ihte kasalehda ihs me kak “pedolong nan Wehin Koht.”
Wehin Koht iei ire ehu me pid mour kapw. Met kin pid peidek wet, Ia kahrepen mour kapw? Atail pahn ese pasapengpen peidek wet pahn sewese kitail en wehwehki ia wehwehn ipwsapahl.
[Nting tikitik me mi pah]
a Ekei kawehwehn Paipel kan kin kawehwehdi Sohn 3:3 nin duwen met. Karasepe, ehu kawehwehn Paipel mahsanih: “Ma emen sohte ipwidi sang powe, e sohte kak kilang wehin Koht.”—A Literal Translation of the Bible.
[Kawehwehpen kilel kan nan ehu ehu pali 5]
Ia duwen mour kapw duwehte ipwidi en emen?