Kokohp kan Pweida Ahnsou Koaros
“KAUN-O . . . ketin kapwaiadahr inou koaros me e ketin wiahda, sohte ehu me sapwungala.”—SOSUA 23:14.
IA DUWEN PAIPEL EH WEKSANG PWUHK TEIKAN? Aramas tohto kin ese me dahme ekei aramas kin kohpada mahs de kosetipwihada dahme pahn wiawi kin kasawehwe oh sohte likilik. Oh pil kokohp en irail kan me kin kasawih usu kan oh ndahng emen dahme pahn pweida reh nan ehuehu sounpwong pil sohte katepe. Keseupen dahme pahn wiawi ahnsou kohkohdo kin poasoankihda dahme kin wiewiawi rahnpwukat oh pak malaulaute e kin song en kohpada oaritik kan duwen dahme pahn wiawi sounpar epwiki kei mwuhr. Weksang met, kokohp kan en Paipel kin oaritik oh ahnsou koaros kin pweida mehnda ma re kohpada “mahsie dahme pahn wiawi.”—Aiseia 46:10.
KARASEPE: Nan pahr 500 samwa mwohn Krais, soukohp Daniel kilangada kaudiahl ehu me kohpada wehin Krihs eh mwadang kalowehdi Media oh Persia. E pil kohpada me ni ahnsowohte me nanmwarki en Krihs pahn “miher nan eh manaman koaros,” eh kaunda pahn “ohla.” Ihs me pahn wiliandi? Daniel ntingihedi: “Wehio pahn pwalpeseng wiahda wehi pahieu me sohte pahn kehlail duwehte wehi keieuo.”—Daniel 8:5-8, 20-22.
DAHME SOUPOAD KAN NDA: Daulih sounpar 200 mwurin Daniel eh wie momour, Alexander wiahla nanmwarki en Krihs. Erein sounpar eisek, Alexander kalowehdi Media oh Persia oh kalaudehla wasa kan me wehin Krihs kaunda lella Pillap en Indus me met adaneki Pakistan. Ahpw e mwadangete mehla ni eh sounpar 32. Eri, mahwen ehu wiawi karanih kahnimw en Ipsus me mihmi nan sahpw me met adaneki Turkey, kauwehla eh kaunda. Mwurin ahnsou kis, meh pahmen me kana nan mahweno pwalangpeseng wehin Krihs nanpwungarail. Ahpw sohte emen rehrail me kehlail duwehte Alexander.
IA OMW MADAMADAU? Mie ehu pwuhk tohrohr me kin kasalehda me eh kokohp kan kin pweida ahnsou koaros? De Paipel kin weksang pwuhk teikan?
[Blurb nan pali 4
Emen ohl koasoia: “Kokohp kan en Paipel . . . inenen tohto me kahrehda emen en dehr wiahki me kokohp kan kin depweila pweida.”—A LAWYER EXAMINES THE BIBLE, BY IRWIN H. LINTON
© Robert Harding Picture Library/SuperStock