Ihs me wiahda Koht?

Medewehla pahpa men koasoakoasoiong nah pwutak me sounpar isuh. E nda: “Mahs mahsie, Koht ketin wiahda sampah oh mehkoaros me mi loale, oh e ketin wiahda ketipin, maram, oh usu kan.” Pwutako medemedewe ekis duwen met oh eri idek, “Ipa, a ihs me wiahda Koht?”

Eh pahpao sapeng nda: “Sohte me wiahda Koht. E ketin ieias ahnsou koaros.” Soangen kawehwe mengei wet serio itarkiher. Ahpw ni eh wie lalaudla, e kin laudla eh men esehla duwen peidek wet. E apwalki en wehwehki ia duwen emen eh kak sohte tapwi. Pwe pil mie tepin pahnlahng. E kin medewe, ‘Ia wasa Koht ketin kohsang ie?’

Ia duwen Paipel eh sapengala? Ni mehlel, pil duwehte dahme pahpao sapengki nan karasaraso. Moses ntingihdi: “Maing ei Kaun, . . . mwohn nahna kan ar wiawihda, mwohn omwi ketin kapikada sampah, komwi Koht poatopoat emen, oh pahn wia Koht kohkohlahte.” (Melkahka 90:1, 2) Pil duwehte, soukohp Aiseia ngihl laudada nda: “Ke sehse? Ke sohte kin rong? Me KAUN-O, iei Koht soutuk; iei ih me ketin kapikada sampah pwon.” (Aiseia 40:28) Duwehte met, kisin likou en Sud kasalehda me Koht kin ketin ieias “erein dih koaros kohkohlahte.”​—Sud 25.

Nin duwen me wahnpoaron Pohl kawehwehda, iren Paipel pwukat kasalehiong kitail me Koht iei “Nanmwarki poatopoat.” (1 Timoty 1:17) Met wehwehki me Koht ketin ieias poatopoat, mehnda ia uwen atail pahn kilanglahng mwuri mahs mahsie, kitail pil sohte kak wehwehki. Oh pil ni ahnsou kohkohdo e pahn ketin ahnsou koaros ieias. (Kaudiahl 1:8) Eri, eh ketin ieias poatopoat kin kasalehda ehu irair kesempwal en eh Lapalahpie.

Dahme kahrehda e apwal kitail en wehwehki ire wet? Pwehki mie irepen atail mour me kahrehda atail madamadau ong ahnsou kin weksang sapwellimen Siohwa madamadau. Pwehki Koht wia emen me poatopoat, sounpar kid kin duwehte rahn ehu ong ih. (2 Piter 3:8) Pwehn karasahda: Ia duwe, mensiek men me kin momourkihte mpen rahn 50 te, kak wehwehki atail mour me kin lella sounpar 70 de 80? E pahn apwal! Paipel kawehwehda me kitail duwehte mensiek kei kapahrekiong atail Sounkapikada Lapalapo. Pil atail koahiek en wehwehki soahng kan, me inenen tikitik kapahrekiong sapwellime madamadau. (Aiseia 40:22; 55:8, 9) Eri, e sohte kapwuriamwei me mie irair kan me Siohwa sapwellimaniki me kitail aramas akan sohte kak uhdahn wehwehki.

Mendahki ma e apwal en wehwehki Koht emen me poatopoat, ahpw kitail kak kilang me mie kahrepen met. Ma mie me kapikada Koht, eri ih me Sounkapikadao. Ahpw, duwen me Paipel kawehwehda, Siohwa me ketin “wiadahr mehkoaros.” (Kaudiahl 4:11) Patehng met, kitail ese me mie ahnsou ehu me pahnlahng pil sohte mie. (Senesis 1:1, 2) Ia wasa e kohsang ie? Sounkapikadahn pahnlahng anahne en mie mahs. Sounkapikadao pil ketin mieier mwohn ngehn akan wiawihda, duwehte sapwellime Iehroso oh tohnleng kan. (Sohp 38:4, 7; Kolose 1:15) Eri, e sansal me e ketin mieier mwoweo kelehpw. E sohte kak kapikipikda, sohte me mie mwoweo me kapikada ih.

Atail mour oh mour koaros pahnlahng kadehdehda me mie Koht emen me poatopoat. Meno me kin kamwakid mwekimwekid en pahnlahng, oh Meno me koasoanehdi kosonned kan me kin kaunda mepwukat, uhdahn kin ketin ieias ahnsou koaros. Ih kelehpw me ni ahnsowo ketikihda esingek en mour ong soahng koaruhsie.​—Senesis 2:7.