Kuma ku bu pudi kontinua sedu filis ora ku bejisa na bin

1-2. Kuma ku Jeova ta oja jintis di idadi? (Salmu 92:​12-14; Jubi tambi foto.)

JINTIS na mundu ntidu ta reaẑi di manera diferenti ora ku idadi sta na bai. Pur isemplu tenta imaẑina es: Bu na lembra di purmeru bias ku bu nota di kuma bu tene kabelu branku? Talves bu mistiba tiral pa ka ningin ojal. Ma i ka mporta sforsu ku bu fasi, bu ka pudi tuji pa bejisa bin.

² Kuma ku no Pape ku sta na seu ta oja si servus ku tene idadi? (Dit 16:31) I fala di kuma e parsi ku arvuris bonitu. (Lei Salmu 92:​12-14.) Ke ku kila misti fala? Arvuris ku beju manga di bias e ta bonitu, pabia e ta tene manga di fojas ku floris. Un di ki arvuris ku tene floris bonitu ta kirsi na Japon i na utrus parti di mundu. Alguns des arvuris mas bonitu tene mas di mil anu. Di mesmu manera, servus di Jeova ku tene idadi, ta tene balur si dianti. Jeova ta da balur pa es ermons ku irmas di idadi. E sirbil pa manga di anu i e kontinua sedu fiel pa rel na bon, i na mau mumentus.

3. Da isemplu di kuma ku Jeova ta usa jintis di idadi pa kumpri si vontadi.

³ Jeova kontinua da balur pa jintis di idadi.a Na bardadi, Jeova ta usa sempri jintis di idadi pa kumpri si vontadi. Pur isemplu, Sara teneba ja idadi oca ku Jeova falal di kuma i na sedu mame di un nason garandi, nunde ku Mesias na bin. (Kum 17:​15-19) Moisés tambi teneba idadi oca Jeova mandal pa liberta israelitas di Ejitu. (Sai 7:​6, 7) Tambi apostolu Jon teneba ja idadi oca Jeova usal pa skirbi sinku livrus di Biblia.

4. Di akordu ku Ditus 15:​15, kuma ku no pudi juda jintis di idadi nguenta manga di purblemas? (Jubi tambi foto.)

⁴ Kilis ku sta na beju ta tene manga di purblemas. Un irma ku tene idadi fala sin: “Bejisa i ka brinkadera de.” Ma Jeova pudi judau tene alegria,b asin bu pudi tene kontentamentu na vida mesmu ku purblemas. (Lei Ditus 15:15.) Nes studu, no na aprindi kuma ku kilis di idadi pudi kontinua sedu filis. Tambi no na oja kuma ku utrus pudi juda ermons ku irmas di idadi na se kongregason. Purmeru, no na fala di ke ku manda i difisil kontinua sedu filis ora ku idadi sta na bai.

KUMA KU TENE IDADI AVANSADU TA AFETA BU ALEGRIA

5. Kal kusas ku pudi pui pa un algin di idadi fika disanimadu?

⁵ Ke ku pudi pui pa bu sta disanimadu? Talves bu sta disanimadu pabia bu ka pudi fasi kusas ku bu kustumaba fasi. Talves bu na disja tempu ku bu seduba mas joven i ku bon saudi. (Ekl 7:10) Pur isemplu, un irma comadu Ruby fala sin: “Manga di bias i ta sedu difisil bisti ropa, pabia N ka pudi muvimenta diritu suma ku N kustumaba fasi, pabia di duris. Utrora fasi kusa simplis suma pui meia ta sedu difisil. Ña mon ta sta sempri ku dur pabia N ka pudi usa ña dedus diritu, mesmu fasi kusas simplis ta sedu difisil.” Tambi Harold ku sirbiba na Betel fala sin: “Utrora N ta pañaba raiba dimas, pabia N ka pudi fasi tudu kusas ku N gostaba di fasi. N seduba forti dimas ocanba joven. N gostaba di fasi disportu. Utrus ta falaba sin: ‘Bo manda Harold bola, pabia nunka i ka na ciga di falia.’ Ma gosi, N pensa di kuma N ka pudi te mesmu lansa bola.”

6. (a) Kal ki utru motivu ku pudi pui kilis di idadi sinti disanimadu? (b) Ke ku pudi juda kilis di idadi disidi si e dibi di kontinua kurinti karu o para? (Jubi nes Sintinela artigu ku tene tema: “Sera ki N dibi di para kurinti karu?”)

⁶ Bu pudi sinti disanimadu, pabia bu na pirsisa pa utrus fasi kusas ku bu kustumaba fasi abo son. Talves bu na pirsisa di ajuda pa fasi sertus kusas, asin, un algin dibi di bin pa bu kau o bu dibi di bai mora ku un di bu fiju. Talves bu ka na pudi kurinti karu o bai abo son na sertus kaus pabia bu ka tene forsa mas o bu ka pudi oja diritu. Es pudi disanimau ciu. Talves bu ka na pudi fasi manga di kusas ku bu kustumaba fasi, ma lembra di kuma bu tene balur garandi pa Jeova i pa utrus. Bu pudi tene sertesa di kuma Jeova ta ntindi bu sentimentus. Jeova sibi di kuma bu amal, tambi bu ama bu ermons ku irmas. Es ta pui pa bu tene balur garandi pa rel. — 1 Sam 16:7.

7. Ke ku pudi juda kilis ku sta tristi pabia fin des mundu ka ciga na se tempu?

⁷ Talves bu pudi sta tristi pabia fin des mundu ka ciga na bu tempu. Si sedu asin, ke ku pudi judau? Tenta lembra di kuma, Jeova tene motivu ku pui i sta na pera antis di kaba ku es mundu mau. (Isa 30:18) Ke ku pui Jeova sedu pasenseru? Jeova tene speransa di kuma manga di jintis na tene oportunidadi di kunsil i sirbil. (2 Ped 3:9) Ora ku bu sinti disanimadu, lembra di kuma manga di jintis pudi kunsi Jeova i sedu salvu antis di fin ciga. Alguns des jintis pudi sedu membrus di bu familia.

8. Ke talves ku kilis di idadi pudi fasi ora ke sta duenti o ku dur?

⁸ Ora ku no sta duenti o ku dur, anos tudu no pudi papia o fasi kusa ku no ka dibi di papia o fasi. (Ekl 7:7; Tiagu 3:2) Pur isemplu, oca Jo staba ku dur, i papia mau kusas. (Jo 6:​1-3) Tambi ora ku jintis di idadi sta duenti o e sta na toma mesiñu, e pudi papia o fasi kusas ke ka na cigaba di fasi o papia. Ma mesmu si no tene idadi o no sta duenti, i ka motivu pa ka mostra bondadi o sempri spera pa utrus fasi kusas pa nos. Si no nota di kuma no fala un kusa ki ka bon pa un algin, no dibi di fasi rapidu pa pidi diskulpa. — Mat 5:​23, 24.

KUMA KU NO PUDI KONTINUA TENE ALEGRIA

9. Pabia ku no dibi di seta ajuda di utrus? (Jubi tambi fotos.)

⁹ Seta ajuda di utrus. (Gal 6:2) Na kumsada, i pudi sedu difisil fasil. Un irma comadu Gretl fala sin: “Utrora i ta sedu difisil pa N pidi ajuda di utrus, pabia N ta preokupa di kuma N na ŝatia elis. I toma tempu pa N muda ña manera di pensa, i rikuñisi ku umildadi di kuma N pirsisa di ajuda.” Lembra di kuma utrus na sedu filis ora ku bu disa elis pa e judau. (At 20:35) Tambi bu na sedu filis di oja di kuma utrus amau i e misti kuida di bo.

10. Pabia ku no dibi di lembra gardisi? (Jubi tambi fotos.)

¹⁰ Gardisi jintis ku ta judau. (Kol 3:15; 1 Tes 5:18) Ora ku utrus fasi bon kusas pa nos no ta gardisi pa se ajuda. Utrora no pudi diskisi fala elis obrigadu. Ma si bu ri o fala elis obrigadu, e na sibi di kuma bu da balur pa ke ke fasi pa bo. Leah ku ta kuida di kilis di idadi na Betel fala sin: “Un di irmas ku N ta kuida del sempri ta skirbi mensaẑen di gardisimentu pa mi. I ta skirbi so puku palabras, ma ku ta toka ña korson. N gosta di lei ke ki ta skirbin, i ta fasin sinti filis di sibi di kuma i da balur pa ajuda ku N ta dal.”

11. Kuma ku bu pudi juda utrus? (Jubi tambi fotos.)

¹¹ Tenta juda utrus. Ora ku bu na pensa na utrus i tenta juda elis, bu ka na pensa ciu aserka di bu propi purblemas. Un ditu afrikanu kompara jintis di idadi ku un biblioteka ku tene manga di livrus ku tene jiresa. Si jintis ka lei es livrus e ka na pudi aprindi delis. Di mesmu manera, jovens ka pudi aprindi lisons importanti si bu ka papia ku elis i bu konta elis alguns kusas ku bu sibi. Buska kunsi jovens ora ku bu na fasi elis purgunta, i sukuta ora ke na papia di se kabesa. Dipus, bu pudi konta elis kuma ku Jeova judau na bu vida, i kuma ku obdisi Jeova na pui elis sedu filis. Ora ku bu konsola i nkoraẑa bu amigus jovens bu na sedu filis. — Sal 71:18.

12. Di akordu ku Isaias 46:​4, ke ku Jeova purmiti fasi pa jintis di idadi? (Jubi tambi fotos.)

¹² Ora Jeova pa i dau forsa. Talves bu pudi sta sin forsa na sintidu fisiku i emosional, ma Jeova “ka ta kansa, nin si forsa ka ta kaba”. (Isa 40:28) Kuma ku Jeova ta usa si forsa ku ka tene limiti? Un di maneras ki ta fasil i ora ki da forsa pa kilis ku tene idadi i ku sedu fiel. (Isa 40:​29-31) Na bardadi, i purmiti juda elis. (Lei Isaias 46:4.) Tambi Jeova sempri ta kumpri si purmesas. (Jos 23:14; Isa 55:​10, 11) Ora ku bu ora Jeova, Jeova na dau ajuda ku bu pirsisa del. Dipus bu na sinti di kuma i amau, i kila na pui pa bu tene alegria.

13. Di akordu ku 2 Koríntius 4:​16-18, ke ku no dibi di lembra del? (Jubi tambi fotos.)

¹³ Lembra di kuma bu na bin sedu mas joven i tene bon saudi. I ta sedu mas fasil nguenta un situason difisil, ora ku bu sibi di kuma i na bin kaba. Tambi Biblia purmitinu di kuma na futuru jintis ka na beju nin duensi. (Jo 33:25; Isa 33:24) Pa kila, bu pudi sedu filis pabia bu sibi di kuma na futuru, bu na bin tene saudi, tene forsa i sedu mas bonitu di ki gosi. (Lei 2 Koríntius 4:​16-18.) Ma ke ku utrus pudi fasi pa juda?

KUMA KU UTRUS PUDI JUDA

14. Pabia ki importanti visita i liga jintis di idadi?

¹⁴ Visita i liga sempri ermons ku irmas di idadi. (Eb 13:16) Kilis di idadi pudi sta tristi pabia e ta pasa manga di tempu elis so. Un ermon di nomi Camille ku ta sta sempri na kasa, fala sin: “N dibi di sta na kasa disna di parmaña te di noti. Pa kila, N ta kansa mal. Utrora N ta sinti suma un lion beju na gaiola. N ta staba ku raiba sin sibi ke ku N na fasi.” Ora ku no visita kilis di idadi, no ta mostra di kuma no ama elis. Talves i ten mumentus ku no misti liga o visita un algin di idadi. Anos tudu no tene manga di kusas di fasi. Ma, ke ku pudi judanu “kuji kusa mas bon”, suma visita kilis di idadi? (Fil 1:10) Bu pudi skirbi nomi di kilis di idadi na bu kongregason, i kuji dia ku bu misti manda elis mensaẑen o liga elis. Bu pudi tambi fasi planu pa visita elis. Kuji dia pa bu ka bin diskisi.

15. Ke ku jovens pudi fasi juntu ku kilis di idadi?

¹⁵ Si bu sedu joven bu pudi sta preokupadu, pabia bu ka sibi ke ku bu na papia o fasi pa un algin di idadi. Ma bu ka pirsisa di preokupa. Sedu so amigu. (Dit 17:17) Papia ku kilis di idadi antis o dipus di runions di kongregason. Talves bu pudi punta elis aserka di un versikulu di Biblia ke gosta del, o un kusa interesanti ke fasi oca e seduba mas joven. Bu pudi kumbida elis tambi pa bo jubi juntu un programa di JW Broadcasting^®. Bu pudi tambi fasi un kusa pa relis ke ka pudi fasi elis son. Pur isemplu, bu pudi juda elis pa e atualiza se tablet o telefoni o baŝa publikasons ku kumsa sai. Un irma comadu Carol fala sin: “Punta elis si e misti fasi kusas ku bu gosta di fasi. Mesmu manera ku idadi bai ja, N gosta di apruveita di vida. N gosta di fasi kompras, kume ku amigus i visita kaus bonitu.” Un irma comadu Maira fala sin: “Un di ña minjoris amiga tene 90 anu di idadi. No tene 57 anu di diferensa. Ma sempri N ta diskisi di kuma N mas joven di ki el, pabia no ta ri juntu, i jubi filmis juntu. Tambi ora ku no tene purblemas, no ta buska konsiju di n̈utru.”

16. Pabia ki i bon kumpaña kilis di idadi ora ke na bai nunde mediku?

¹⁶ Kumpaña elis ora ke na bai oja ku medikus. Bu pudi leba elis pa e oja ku mediku, ma tambi bu pudi kontinua sta ku elis pa tene sertesa di kuma mediku o nfermeru na trata elis ben, i juda elis na ke ke pirsisa del. (Isa 1:17) Bu pudi konsigi juda un algin di idadi, ora ku bu toma nota di ke ku mediku fala. Un irma di idadi comadu Ruth fala sin: “Manga di bias ora ku N bai ami so pa bai oja ku un mediku, i ka ta fia na ke ku N na fala. Medikus ta fala kusas suma es: ‘Bu ka sta duenti, bu sta so na tenta imaẑina di kuma bu sta duenti.’ Ma ora ku un algin kumpañan, mediku ta tratan mas minjor. N na gardisi ermons ku irmas ku ta ranja tempu pa kumpañan.”

17. Di kal maneras ku bu pudi prega juntu ku kilis di idadi?

¹⁷ Pasa tempu ku elis na pregason. I ten kilis di idadi ku pudi ka tene forsa di yanda di kasa pa kasa. Sera ki bu pudi kumbida un irma di idadi pa bo prega juntu ku mostruariu? Bu pudi leba un asentu, nunde ki pudi sinta nel. Ma sera ki bu pudi kumbida un ermon di idadi pa un studu di Biblia o talves diriẑi ki studu na si kasa? Ansions pudi fasi aranẑu pa runions di pregason fasidu na kasa di ermons ku irmas di idadi, asin pa i pudi sedu mas fasil pa e partisipa. Jeova ta kontenti ora ku no fasi ke ku no pudi pa mostra amor ku rispitu pa kilis di idadi. — Dit 3:27; Rom 12:10.

18. Ke ku no na bin fala na studu ku na bin?

¹⁸ Es artigu lembrantanu di kuma Jeova ama, tambi i da balur pa kilis di idadi. Tambi anos tudu na kongregason no ama i no da balur pa kilis di idadi! Bejisa i difisil, ma ku ajuda di Jeova bu pudi kontinua tene alegria. (Sal 37:25) Tambi bu pudi jubi pa tempu nunde ku bu na sedu mas filis di ki gosi! Ma i ten ermons ku irmas ku tene utru purblema. E ta kuida di un membru di familia ku tene idadi, un mininu o un amigu ku sta duenti. Kuma ke pudi kontinua tene alegria? No na ruspundi es purgunta na studu ku na bin.